Helpful Saints Corpus Reader

Targum Jonathan

Joshua

Reading display

Text size Line spacing Theme

Text size, spacing, and the sepia or night theme stay on this browser when storage is available.

Targum Jonathan on Joshua — 1

[Targum Jonathan on Joshua / 1 / 1] וַהֲוָה בָּתַר דְמִית מֹשֶׁה עַבְדָא דַייָ וַאֲמַר יְיָ לִיהוֹשֻׁעַ בַּר נוּן מְשַׁמְשׁוּנֵיהּ דְמֹשֶׁה לְמֵימָר: [Targum Jonathan on Joshua / 1 / 2] מֹשֶׁה עַבְדִי מִית וּכְעַן קוּם עִיבַּר יַת יַרְדְנָא הָדֵין אַתְּ וְכָל עַמָא הָדֵין לְאַרְעָא דַאֲנָא יְהִיב לְהוֹן לִבְנֵי יִשְׂרָאֵל: [Targum Jonathan on Joshua / 1 / 3] כָּל אַתְרָא דְתִדְרַךְ פַּרְסַת רַגְלְכוֹן בֵּיהּ לְכוֹן יְהַבִתָהּ כְּמָא דְמַלֵילִית עִם מֹשֶׁה: [Targum Jonathan on Joshua / 1 / 4] מִמַדְבְּרָא וּלְבָנוֹנָא הָדֵין וְעַד נַהֲרָא רַבָּא נַהֲרָא דִפְרָת כֹּל אַרַע חִתָּאֵי וְעַד יַמָא רַבָּא מַעֲלָנֵי שִׁמְשָׁא יְהֵא תְחוּמְכוֹן: [Targum Jonathan on Joshua / 1 / 5] לָא יִתְעַתַּד אֱנָשׁ קֳדָמָךְ כָּל יוֹמֵי חַיָיךְ כְּמָא דַהֲוָא מֵימְרִי בְּסַעֲדֵיהּ דְמֹשֶׁה כֵּן אֶהֱוֵי עִמָךְ לָא אַשְׁבְּקִינָךְ וְלָא אַרְחְקִינָךְ: [Targum Jonathan on Joshua / 1 / 6] תְּקֵיף וַעְלַם אֲרֵי אַתְּ תַּחְסֵין יַת עַמָא הָדֵין יַת אַרְעָא דְקַיֵימִית לַאֲבָהַתְהוֹן לְמִתַּן לְהוֹן: [Targum Jonathan on Joshua / 1 / 7] לְחוֹד תְּקֵיף וֶעְלֵם לַחֲדָא לְמִטַר לְמֶעְבַּד כְּכָל אוֹרַיְתָא דְפַקְדָךְ מֹשֶׁה עַבְדִי לָא תִסְטֵי מִינֵיהּ לְיַמִינָא וְלִשְׂמָאלָא בְּדִיל דְתִצְלַח בְּכָל אֲתַר דִתְהָךְ: [Targum Jonathan on Joshua / 1 / 8] לָא יַעְדֵי סִיפְרָא דְאוֹרַיְתָא הָדֵין מִפּוּמָךְ וּתְהֵי הֲגֵי בֵּיהּ יֵימָם וְלֵילְיָא בְּדִיל דְתִטַר לְמֶעְבַּד כְּכָל דִכְתִיב בֵּיהּ אֲרֵי בְּכֵן תַּצְלַח יַת דַרְכָּךְ וּבְכֵן תַּכְשָׁט: [Targum Jonathan on Joshua / 1 / 9] הֲלָא פַקֵידְתָּךְ תְּקֵף וֶעְלֵם לָא תִדְחַל וְלָא תִתְּבַר אֲרֵי בְּסַעֲדָךְ מֵימְרָא דַייָ אֱלָהָךְ בְּכָל אֲתַר דִתְהָךְ: [Targum Jonathan on Joshua / 1 / 10] וּפַקֵיד יְהוֹשֻׁעַ יַת סַרְכֵי עַמָא לְמֵימָר: [Targum Jonathan on Joshua / 1 / 11] עִבָרוּ בְּגוֹ מַשְׁרִיתָא וּפַקִידוּ יַת עַמָא לְמֵימָר אַתְקִינוּ לְכוֹן זְוָדִין אֲרֵי בְּסוֹף תְּלָתָא יוֹמִין אַתּוּן עָבְרִין יַת יַרְדְנָא הָדֵין לְמֵיעַל לְמֵירַת יַת אַרְעָא דַייָ אֱלָהָכוֹן יָהֵיב לְכוֹן לְמִירְתָהּ: [Targum Jonathan on Joshua / 1 / 12] וּלְשֵׁבֶט רְאוּבֵן וּלְשֵׁבֶט גָד וּלְפַלְגוּת שִׁבְטָא דִמְנַשֶׁה אֲמַר יְהוֹשֻׁעַ לְמֵימָר: [Targum Jonathan on Joshua / 1 / 13] הֲווֹ דְכִירִין יַת פִּתְגָמָא דִפַקֵיד יַתְכוֹן מֹשֶׁה עַבְדָא דַייָ לְמֵימָר יְיָ אֱלָהָכוֹן מַנִיחַ לְכוֹן וִיהַב לְכוֹן יַת אַרְעָא הָדָא: [Targum Jonathan on Joshua / 1 / 14] נְשֵׁיכוֹן טַפְלֵיכוֹן וּבְעִירְכוֹן יֵתְבוּן בְּאַרְעָא דִיהַב לְכוֹן מֹשֶׁה בְּעִבְרָא דְיַרְדְנָא וְאַתּוּן תְעָבְרוּן מְזָרְזִין קֳדָם אֲחוּכוֹן כֹּל גִבָּרֵי חֵילָא וּתְסַעֲדוּן יַתְהוֹן: [Targum Jonathan on Joshua / 1 / 15] עַד דִינִיחַ יְיָ לַאֲחוּכוֹן כְּוַתְכוֹן וְיֵירְתוּן אַף אִינוּן יַת אַרְעָא דַייָ אֱלָהָכוֹן יָהֵיב לְכוֹן וּתְתוּבוּן לְאַרַע יְרוּתַתְכוֹן וְתֵירְתוּן יָתָהּ דִיהַב לְכוֹן מֹשֶׁה עַבְדָא דַייָ בְּעִבְרָא דְיַרְדְנָא מַדְנַח שִׁמְשָׁא: [Targum Jonathan on Joshua / 1 / 16] וַאֲתִיבוּ יַת יְהוֹשֻׁעַ לְמֵימָר כֹּל דְפַקֵדְתָּנָא נַעֲבַד וּלְכָל אֲתַר דְתִשְׁלַחְנָנָא נְהַךְ: [Targum Jonathan on Joshua / 1 / 17] כְּכֹל דְקַבֵּלְנָא מִן מֹשֶׁה כֵּן נְקַבֵּל מִנָךְ לְחוֹד יְהֵי מִימְרָא דַייָ אֱלָהָךְ בְּסַעֲדָךְ כְּמָא דַהֲוָה בְּסַעֲדֵיהּ דְמֹשֶׁה: [Targum Jonathan on Joshua / 1 / 18] כָּל גְבַר דִיסַרֵב עַל מֵימְרָךְ וְלָא יְקַבֵל יַת פִּתְגָמָךְ לְכֹל דְתַפְקְדִנֵיהּ יִתְקְטֵיל לְחוֹד תְּקֵף וֶעְלָם:

Study this passage

Prepare a passage questionPassage ID & source details Where did this come from?

Targum Jonathan on Joshua — 2

[Targum Jonathan on Joshua / 2 / 1] וּשְׁלַח יְהוֹשֻׁעַ בַּר נוּן מִן שִׁטִין תְּרֵין גוּבְרִין מְאַלְלִין בְּרָז לְמֵימָר אֲזִילוּ חֲזוּ יַת אַרְעָא וְיַת יְרִיחוֹ וַאֲזַלוּ וְעַלוּ לְבֵית אִתְּתָא פּוּנְדְקִיתָא וּשְׁמָה רָחָב וּשְׁכִיבוּ תַמָן: [Targum Jonathan on Joshua / 2 / 2] וְאִתְאַמַר לְמַלְכָּא דִירִיחוֹ לְמֵימָר הָא גוּבְרַיָא אֲתוֹ הָכָא בְּלֵילְיָא מִבְּנֵי יִשְׂרָאֵל לְאַלָלָא יַת אַרְעָא: [Targum Jonathan on Joshua / 2 / 3] וּשְׁלַח מַלְכָּא דִירִיחוֹ לְוַת רָחָב לְמֵימָר אַפִיקִי גֻבְרַיָא דַאֲתוֹ לְוָתִיךְ דַעֲלוּ לְבֵיתֵיךְ אֲרֵי לְאַלָלָא יַת כָּל אַרְעָא אֲתוֹ: [Targum Jonathan on Joshua / 2 / 4] וּדְבִירַת אִתְּתָא יַת תְּרֵין גֻבְרַיָא וְאַטְמַרַתְנוּן וַאֲמָרַת בְּקוּשְׁטָא אֲתוֹ לְוָתִי גֻבְרַיָא וְלָא יִדְעֵית אֵי מִנָן אִינוּן: [Targum Jonathan on Joshua / 2 / 5] וַהֲוָה עִדָן לְמֵיחַד תַּרְעָא בְּקִבְלָה וְגֻבְרַיָא נְפַקוּ לָא יַדְעֵית לְאָן אֲזַלוּ גֻבְרַיָא רִדְפוּ בִּפְרִיעַ בַּתְרֵיהוֹן אֲרֵי תַדְבְּקוּנוּן: [Targum Jonathan on Joshua / 2 / 6] וְהִיא אַסְקַתְנוּן לְאִגְרָא וְאַטְמַרַתְנוּן בִּטְעוּנֵי כִתָּנָא דִסְדִירִין לָהּ עַל אִגְרָא: [Targum Jonathan on Joshua / 2 / 7] וְגֻבְרַיָא רְדָפוּ בַּתְרֵיהוֹן אוֹרַח יַרְדֵנָא עַד מְגִזָתָא וְתַרְעָא אֲחָדוּ בָּתַר דִנְפַקוּ רַדְפַיָא בַּתְרֵיהוֹן: [Targum Jonathan on Joshua / 2 / 8] וְאִינוּן עַד לָא שְׁכִיבוּ וְהִיא סְלֵיקַת לְוַתְהוֹן לְאִגְרָא: [Targum Jonathan on Joshua / 2 / 9] וַאֲמַרַת לְגֻבְרַיָא יְדַעְנָא אֲרֵי יְהַב יְיָ לְכוֹן יַת אַרְעָא וַאֲרֵי נְפָלַת אֵמַתְכוֹן עֲלָנָא וַאֲרֵי אִתְּבָּרוּ כָּל יַתְבֵי אַרְעָא מִן קֳדָמֵיכוֹן: [Targum Jonathan on Joshua / 2 / 10] אֲרֵי שְׁמַעְנָא יַת דְיַבֵּשׁ יְיָ יַת מֵי יַמָא דְסוּף מִן קֳדָמֵיכוֹן בְּמִפַּקְכוֹן מִמִצְרַיִם וְדִי עֲבַדְתּוּן לִתְרֵין מַלְכֵי אֱמוֹרָאָה דִי בְּעַבְרָא דְיַרְדְנָא לְסִיחוֹן וּלְעוֹג דִי גְמַרְתּוּן יַתְהוֹן: [Targum Jonathan on Joshua / 2 / 11] וּשְׁמַעְנָא וְאִתְמְסֵי לִבָּנָא וְלָא אִשְׁתְּאָרַת עוֹד רוּחָא בֶּאֱנַשׁ מִן קֳדָמֵיכוֹן אֲרֵי יְיָ אֱלָהָכוֹן הוּא אֱלָהָא דִשְׁכִינְתֵּיהּ בִּשְׁמַיָא מִלְעֵילָא וְשַׁלִיט עַל אַרְעָא מִלְרָע: [Targum Jonathan on Joshua / 2 / 12] וּכְעַן קַיְימוּ כְעַן לִי בְּמֵימְרָא דַייָ אֲרֵי עֲבָדִית עִמְכוֹן טִיבוּ וְתַעְבְּדוּן אַף אַתּוּן עִם בֵּית אַבָּא טִיבוּ וְתִתְּנוּן לִי אָת דִקְשׁוֹט: [Targum Jonathan on Joshua / 2 / 13] וְתֵיחוּן יַת אַבָּא וְיַת אִמָא וְיַת אֲחַי וְיַת אֲחָתֵי וְיַת כָּל דִילְהוֹן וּתְשֵׁזְבוּן יַת נַפְשָׁתָנָא מִמוֹתָא: [Targum Jonathan on Joshua / 2 / 14] וַאֲמַרוּ לָהּ גֻבְרַיָא נַפְשָׁנָא מְסִירָן חֲלַף נַפְשָׁתֵיכוֹן לְמֵמָת אִם לָא תְחַווּן יַת פִּתְגָמָנָא דֵין וִיהֵי כַּד יִתֵּן יְיָ לָנָא יַת אַרְעָא וְנַעֲבֵד עִמָךְ טֵיבוּ וּקְשׁוֹט: [Targum Jonathan on Joshua / 2 / 15] וְשַׁלְשְׁלַתְנוּן בְּאַטוּנָא מִן חֲרַכָּא אֲרֵי בֵיתָהּ בְּכוֹתֵל שׁוּרָא וּבְשׁוּרָא הִיא יָתְבָה: [Targum Jonathan on Joshua / 2 / 16] וַאֲמַרַת לְהוֹן לְטוּרָא אֱזִילוּ דִלְמָא יְעַרְעוּן בְּכוֹן רָדְפַיָא וְתִטַמְרוּן תַּמָן תְּלָתָא יוֹמִין עַד דִיתוּבוּן רָדְפַיָא וּבָתַר כֵּן תְּהָכוּן לְאוֹרְחַתְכוֹן: [Targum Jonathan on Joshua / 2 / 17] וַאֲמַרוּ לָהּ גֻבְרַיָא זַכָּאִין אֲנַחְנָא מִמוֹמָתֵךְ הָדָא דְקַיֵמְתָּ עֲלָנָא: [Targum Jonathan on Joshua / 2 / 18] הָא אֲנַחְנָא עָלִין בְּאַרְעָא יַת תּוֹרָא דְחוּט זְהוֹרִיתָא הָדֵין תִקְטְרִי בַּחֲרַכָּא דְשַׁלְשַלְתָּנָא בֵּיהּ וְיַת אֲבוּךְ וְיַת אִמֵךְ וְיַת אֲחָיְכִי וְיַת כָּל בֵּית אָבוּךְ תִּכְנְשִׁין לְוָתֵיךְ לְבֵיתָא: [Targum Jonathan on Joshua / 2 / 19] וִיהֵי כָּל דְיִפּוֹק בַּר מִדָשֵׁי בֵּיתֵךְ לְבָרָא חוֹבַת קְטוֹלֵיהּ בְּרֵישֵׁיהּ וַאֲנַחְנָא זַכָּאִין וְכֹל דִי יְהֵי עִמָךְ בְּבֵיתָא חוֹבַת קְטוֹלֵיהּ בְּרֵישָׁנָא אִם יַד אֱנָשׁ תְהֵי בֵיהּ: [Targum Jonathan on Joshua / 2 / 20] וְאִם תְּחַוִין יַת פִּתְגָמָנָא דֵין וּנְהֵי זַכָּאִין מִמוֹמָתִיךְ דְקַיֵימְתְּ עֲלָנָא: [Targum Jonathan on Joshua / 2 / 21] וַאֲמָרַת כְּפִתְגָמֵיכוֹן כָּן הוּא וּשְׁלַחַתְנוּן וַאֲזָלוּ וְקִטְרַת יַת תּוֹרָא דִזְהוֹרִיתָא בַּחֲרַכָּא: [Targum Jonathan on Joshua / 2 / 22] וַאֲזַלוּ וְעָלוּ לְטוֹרָא וִיתָבוּ תַמָן תְּלָתָא יוֹמִין עַד דְתָבוּ רָדְפַיָא וּבְעוֹ רָדְפַיָא בְּכָל אָרְחָא וְלָא אַשְׁכָּחוּ: [Targum Jonathan on Joshua / 2 / 23] וְתָבוּ תְּרֵין גֻבְרָין וּנְחִיתוּ מִן טוּרָא וַעֲבָרוּ וַאֲתוֹ לְוַת יְהוֹשֻׁעַ בַּר נוּן וְאִשְׁתְּעִיאוּ לֵיהּ יַת כָּל דְעַרָעָא יַתְהוֹן: [Targum Jonathan on Joshua / 2 / 24] וַאֲמַרוּ לִיהוֹשֻׁעַ אֲרֵי מְסַר יְיָ בִּידָנָא יַת כָּל אַרְעָא וְאַף אִתְּבַּרוּ כָּל יָתְבֵי אַרְעָא מִן קֳדָמָנָא:

Study this passage

Prepare a passage questionPassage ID & source details Where did this come from?

Targum Jonathan on Joshua — 3

[Targum Jonathan on Joshua / 3 / 1] וְאַקְדֵים יְהוֹשֻׁעַ בְּצַפְרָא וּנְטַלוּ מִשִׁטִין וַאֲתוֹ עַד יַרְדְנָא הוּא וְכָל בְּנֵי יִשְׂרָאֵל וּבָתוּ תַמָן קֳדָם יַעַבְּרוּן: [Targum Jonathan on Joshua / 3 / 2] וַהֲוָה מִסוֹף תְּלָתָא יוֹמִין וַעֲבָרוּ סַרְכַיָא בְּגוֹ מַשְׁרִיתָא: [Targum Jonathan on Joshua / 3 / 3] וּפַקֵידוּ יַת עַמָא לְמֵימָר בְּמֶחְזֵיכוֹן יַת אֲרוֹן קְיָמָא דַייָ אֱלָהָכוֹן וְכֹהֲנַיָא לְוָאֵי נַטְלִין יָתֵיהּ וְאַתּוּן תִּטְלוּן מֵאַתְרֵיכוֹן וּתְהָכוּן בַּתְרוֹהִי: [Targum Jonathan on Joshua / 3 / 4] בְּרַם רָחִיק יְהֵי בְּינֵיכוֹן וּבֵינוֹהִי כִּתְרֵין אַלְפִין אַמִין בְּמִשְׁחָתָא לָא תְקַרְבוּן לְוָתֵיהּ בְּדִיל דְתִידְעוּן יַת אוֹרְחָא דִי תְהָכוּן בָּהּ אֲרֵי לָא עֲבַרְתּוּן בְּאוֹרְחָא מֵאִתְמָלִי וּמִדְקָמוֹהִי: [Targum Jonathan on Joshua / 3 / 5] וַאֲמַר יְהוֹשֻׁעַ לְעַמָא אִזְדַמְנוּ אֲרֵי מָחָר יְעַבֵּד יְיָ בֵּינֵיכוֹן פְּרִישָׁן: [Targum Jonathan on Joshua / 3 / 6] וַאֲמַר יְהוֹשֻׁעַ לְכַהֲנַיָא לְמֵימָר טוּלוּ יַת אֲרוֹן קְיָמָא וַעֲבַרוּ קֳדָם עַמָא וּנְטָלוּ יַת אֲרוֹנָא דִקְיָמָא וַאֲזַלוּ קֳדָם עַמָא: [Targum Jonathan on Joshua / 3 / 7] וַאֲמַר יְיָ לִיהוֹשֻׁעַ יוֹמָא הָדֵין אַשְׁרֵי לְרַבָּיוּתָךְ בְּעֵינֵי כָּל יִשְׂרָאֵל דְיֵדְעִין אֲרֵי בְּמָא דַהֲוָה מֵימְרִי בְּסַעְדֵיהּ דְמֹשֶׁה כֵּן יְהֵי מֵימְרִי בְּסַעְדָךְ: [Targum Jonathan on Joshua / 3 / 8] וְאַתְּ תְּפַקֵד יַת כַּהֲנַיָא נַטְלֵי אֲרוֹנָא דִקְיָמָא לְמֵימָר כְּמִמְטֵיכוֹן עַד קְצַת מֵי יַרְדְנָא בְּיַרְדְנָא תְּקוּמוּן: [Targum Jonathan on Joshua / 3 / 9] וַאֲמַר יְהוֹשֻׁעַ לִבְנֵי יִשְׂרָאֵל אִתְקְרִיבוּ הַלְכָא וּשְׁמָעוּ יַת פִּתְגָמַיָא דַייָ אֱלָהָכוֹן: [Targum Jonathan on Joshua / 3 / 10] וַאֲמַר יְהוֹשֻׁעַ בְּדָא תֵדְעוּן אֲרֵי אֱלָהּ קַיָם אִתְרְעֵי לְאַשְׁרָאָה שְׁכִנְתֵּיהּ בְּינֵיכוֹן וּתְרָכָא יְתָרֵךְ מִן קָדָמֵיכוֹן יַת כְּנַעֲנָאֵי וְיַת חִתָּאֵי וְיַת חִוָאֵי וְיַת פְּרִיזָאֵי וְיַת גִרְגְשָׁאֵי וֶאֱמוֹרָאֵי וִיבוּסָאֵי: [Targum Jonathan on Joshua / 3 / 11] הָא אֲרוֹן קְיָמָא דְרִבּוֹן כָּל אַרְעָא עֲבַר קֳדָמֵיכוֹן בְּיַרְדְנָא: [Targum Jonathan on Joshua / 3 / 12] וּכְעַן דַבָּרוּ לְכוֹן תְּרֵי עֲסַר גַבְרִין מִשִׁבְטַיָא דְיִשְׂרָאֵל גַבְרָא חָד גַבְרָא חָד לְשִׁבְטָא: [Targum Jonathan on Joshua / 3 / 13] וִיהֵי כִּמְנָח פַּרְסַת רִגְלֵי כַהֲנַיָא נַטְלֵי אֲרוֹנָא דַייָ רִבּוֹן כָּל אַרְעָא בְּמֵי יַרְדְנָא מֵי יַרְדְנָא יִפְסְקוּן מַיָא דְנַחֲתִין מִלְעֵילָא וִיקוּמוּן רוּקְבָא חָד: [Targum Jonathan on Joshua / 3 / 14] וַהֲוָה כַּד נְטַלוּ עַמָא מְקִרְוֵיהוֹן לְמֶעֱבַּר יַת יַרְדְנָא וְכַהֲנַיָא נַטְלֵי אֲרוֹנָא דִקְיָמָא קֳדָם עַמָא: [Targum Jonathan on Joshua / 3 / 15] וּכְמִמְטֵי נַטְלֵי אֲרוֹנָא עַד יַרְדְנָא וְרַגְלֵי כַהֲנַיָא נַטְלֵי אֲרוֹנָא טְבִילָא בִּקְצַת מַיָא וְיַרְדְנָא מְלִי עַל כָּל כַּפּוֹהִי כֹּל יוֹמֵי חֲצָדָא: [Targum Jonathan on Joshua / 3 / 16] וְקָמוּ מַיָא דְנַחְתִין מִלְעֵילָא קָמוּ רוּקְבָא חָד רְחִיקִין לַחֲדָא מֵאָדָם קַרְתָּא דְבִסְטַר צָרְתָן וּדְנַחֲתִין לְיַמָא דְמֵישְׁרָא לְיַמָא דְמִלְחָא שְׁלִימוּ פְּסָקוּ וְעַמָא עֲבָרוּ לָקֳבֵיל יְרֵיחוֹ: [Targum Jonathan on Joshua / 3 / 17] וְקָמוּ כַהֲנַיָא נַטְלֵי אֲרוֹן קַיָמָא דַייָ בְּיַבֶּשְׁתָּא בְּגוֹ יַרְדְנָא מְתַקְנַיָא וְכָל יִשְׂרָאֵל עָבְרִין בְּיַבֶּשְׁתָּא עַד דִשְׁלִימוּ כָּל עַמָא לְמֶעְבַּר יַת יַרְדְנָא:

Study this passage

Prepare a passage questionPassage ID & source details Where did this come from?

Targum Jonathan on Joshua — 4

[Targum Jonathan on Joshua / 4 / 1] וַהֲוָה כַּד שְׁלִימוּ כָל עַמָא לְמֶעְבַּר יַת יַרְדְנָא וַאֲמַר יְיָ לִיהוֹשֻׁעַ לְמֵימָר: [Targum Jonathan on Joshua / 4 / 2] דַבָּרוּ לְכוֹן מִן עַמָא תְּרֵי עֲסַר גַבְרִין גַבְרָא חָד גַבְרָא חָד מִשִׁבְטָא: [Targum Jonathan on Joshua / 4 / 3] וּפַקֵידוּ יַתְהוֹן לְמֵימָר טוּלוּ לְכוֹן מִכָּא מִגוֹ יַרְדְנָא מֵאֲתַר מֵיקַם רִגְלֵי כַהֲנַיָא מְתַקְנַיָא תַּרְתֵּי עַסְרֵי אַבְנַיָא וּתְעַבְרִנוּן יַתְהוֹן עִמְכוֹן וְתַחֲתוּן יַתְהוֹן בְּבֵית מַבְּתָא דִתְבִיתוּן בֵּיהּ בְּלֵילְיָא: [Targum Jonathan on Joshua / 4 / 4] וּקְרָא יְהוֹשֻׁעַ לִתְרֵי עֲסַר גַבְרָא דְאַתְקִין מִבְּנֵי יִשְׂרָאֵל גַבְרָא חָד גַבְרָא חָד מִשִׁבְטָא: [Targum Jonathan on Joshua / 4 / 5] וַאֲמַר לְהוֹן יְהוֹשֻׁעַ עֲבָרוּ קֳדָם אֲרוֹנָא דַייָ אֱלָהָכוֹן לְגוֹ יַרְדְנָא וַאֲרִימוּ לְכוֹן גְבַר אַבְנָא חָדָה עַל כִּתְפֵיהּ לְמִנְיַן שִׁבְטַיָא דִבְנֵי יִשְׂרָאֵל: [Targum Jonathan on Joshua / 4 / 6] בְּדִיל דִתְהֵי דָא אָת בֵּינֵכוֹן אֲרֵי יִשְׁאֲלִין בְּנֵיכוֹן מְחָר לְמֵימָר מָא אַבְנַיָא הָאִלֵין לְכוֹן: [Targum Jonathan on Joshua / 4 / 7] וְתֵימְרוּן לְהוֹן דִי פְּסַקוּ מֵי יַרְדְנָא מִן קֳדָם אֲרוֹן קְיָמָא דַייָ בְּמֶעְבְּרֵיהּ בְּיַרְדְנָא פְּסַקוּ מֵי יַרְדְנָא וִיהֶוְיָן אַבְנַיָא הָאִלֵין לְדָכְרָנָא לִבְנֵי יִשְׂרָאֵל עַד עָלְמָא: [Targum Jonathan on Joshua / 4 / 8] וַעֲבָדוּ כֵן בְּנֵי יִשְׂרָאֵל כְּמָא דִי פַּקֵד יְהוֹשֻׁעַ וּנְטַלוּ תַּרְתָּא עַשְׂרֵי אַבְנַיָא מִגוֹ יַרְדְנָא כְּמָא דְמַלֵיל יְיָ עִם יְהוֹשֻׁעַ לְמִנְיַן שִׁבְטַיָא דִבְנֵי יִשְׂרָאֵל וְאַעַבְּרוּנוּן עִמְהוֹן לְבֵית מַבָּתָא וְאַצְנְעוּנוּן תַּמָן: [Targum Jonathan on Joshua / 4 / 9] וְתַרְתָּא עַשְׂרֵי אַבְנַיָא אֲקֵים יְהוֹשֻׁעַ בְּגוֹ יַרְדְנָא בַּאֲתַר מֵיקַם רִגְלֵי כַהֲנַיָא נַטְלֵי אֲרוֹנָא דִקְיָמָא וַהֲווֹ תַּמָן עַד יוֹמָא הָדֵין: [Targum Jonathan on Joshua / 4 / 10] וְכַהֲנַיָא נַטְלֵי אֲרוֹנָא קַיְמִין בְּגוֹ יַרְדְנָא עַד דִשְׁלִים כָּל פִּתְגָמָא דְפַקֵיד יְיָ יַת יְהוֹשֻׁעַ לְמַלָלָא עִם עַמָא כְּכֹל דְפַקֵיד מֹשֶׁה יַת יְהוֹשֻׁעַ וְאוֹחִיאוּ עַמָא וַעֲבָרוּ: [Targum Jonathan on Joshua / 4 / 11] וַהֲוָה כַּד שְׁלִים כָּל עַמָא לְמֶעְבַּר וַעֲבַר אֲרוֹנָא דַייָ וְכַהֲנַיָא קֳדָם עַמָא: [Targum Jonathan on Joshua / 4 / 12] וַעֲבָרוּ בְּנֵי רְאוּבֵן וּבְנֵי גָד וּפַּלְגוּת שִׁבְטָא דִמְנַשֶׁה מְזָרְזִין קֳדָם בְּנֵי יִשְׂרָאֵל כְּמָא דְמַלֵיל עִמְהוֹן מֹשֶׁה: [Targum Jonathan on Joshua / 4 / 13] כְּאַרְבְּעִין אַלְפִין מְזָרְזֵי חֵילָא עֲבָרוּ קֳדָם עַמָא דַייָ לִקְרָבָא לְמֵשְׁרֵי יְרֵיחוֹ: [Targum Jonathan on Joshua / 4 / 14] בְּיוֹמָא הַהוּא רַבֵּי יְיָ יַת יְהוֹשֻׁעַ בְּעֵינֵי כָּל יִשְׂרָאֵל וּדְחִילוּ מִנֵיהּ כְּמָא דַהֲווֹ דָחֲלִין מִן מֹשֶׁה כָּל יוֹמֵי חַיוֹהִי: [Targum Jonathan on Joshua / 4 / 15] וַאֲמַר יְיָ לִיהוֹשֻׁעַ לְמֵימָר: [Targum Jonathan on Joshua / 4 / 16] פַּקֵיד יַת כַּהֲנַיָא נַטְלֵי אֲרוֹנָא דְסַהֲדוּתָא וְיִסְקוּן מִן יַרְדְנָא: [Targum Jonathan on Joshua / 4 / 17] וּפַקֵיד יְהוֹשֻעַ יַת כַּהֲנַיָה לְמֵימָר סַקוּ מִן יַרְדְנָא: [Targum Jonathan on Joshua / 4 / 18] וַהֲוָה כַּד בְּעוֹ לְמִסַק כַּהֲנַיָא נַטְלֵי אֲרוֹן קְיָמָא דַייָ מִגוֹ יַרְדְנָא אִתְנְגִידָא פַּרְסַת רִגְלֵי כַּהֲנַיָא וּנְחָא עַל יַבֶּשְׁתָּא וְתָבוּ מֵי יַרְדְנָא לְאַתְרֵיהוֹן וַאֲזַלוּ כְמֵאִתְמָלֵי וּמִדְקֳדָמוֹהִי עַל כָּל כַּפּוֹהִי: [Targum Jonathan on Joshua / 4 / 19] וְעַמָא סְלִיקוּ מִן יַרְדְנָא בְּעַשְׂרָא לְיַרְחָא קַדְמָאָה וּשְׁרוֹ בְגִלְגָלָא בִּסְיָפֵי מַדְנַח יְרִיחוֹ: [Targum Jonathan on Joshua / 4 / 20] וְיַת תַּרְתָּא עַשְׂרֵי אַבְנַיָא הָאִלֵין דִנְסִיבוּ מִן יַרְדְנָא אֲקֵים יְהוֹשֻׁעַ בְּגִלְגָלָא: [Targum Jonathan on Joshua / 4 / 21] וַאֲמַר לִבְנֵי יִשְׂרָאֵל לְמֵימָר דְיִשְׁאֲלוּן בְּנֵיכוֹן מְחָר יַת אֲבָהַתְהוֹן לְמֵימָר מָה אַבְנַיָא הָאִלֵין: [Targum Jonathan on Joshua / 4 / 22] וּתְהוֹדְעוּן יַת בְּנֵיכוֹן לְמֵימָר בְּיַבֶּשְׁתָּא עֲבַר יִשְׂרָאֵל יַת יַרְדְנָא הָדֵין: [Targum Jonathan on Joshua / 4 / 23] דְיַבֵּשׁ יְיָ אֱלָהָכוֹן יַת מֵי יַרְדְנָא מִן קֳדָמֵיכוֹן עַד דַעֲבַרְתּוּן כְּמָא דַעֲבַד יְיָ אֱלָהָכוֹן לְיַמָא דְסוּף דִי יַבֵּשׁ מִן קֲדָמָנָא עַד דַעֲבָרְנָא: [Targum Jonathan on Joshua / 4 / 24] בְּדִיל דְיֵדְעוּן כָּל עַמְמֵי אַרְעָא יַת גְבוּרְתָּא דַייָ אֲרֵי תַקִיפָה הִיא בְּדִיל דְתִדְחֲלוּן יַת יְיָ אֱלָהָכוֹן כָּל יוֹמַיָא:

Study this passage

Prepare a passage questionPassage ID & source details Where did this come from?

Targum Jonathan on Joshua — 5

[Targum Jonathan on Joshua / 5 / 1] וַהֲוָה כַד שְׁמָעוּ כָּל מַלְכֵי אֱמוֹרָאֵי דִי בְּעִבְרָא דְיַרְדְנָא מַעֲרָבָא וְכָל מַלְכֵי כְנַעֲנָאָה דִי עַל יַמָא יַת דְיַבֵּשׁ יְיָ יַת מֵי יַרְדְנָא מִן קֳדָם בְּנֵי יִשְׂרָאֵל עַד דַעֲבָרוּ וְאִתְמְסֵי לִבְּהוֹן וְלָא אִשְׁתַּאֲרַת בְּהוֹן עוֹד רוּחַ מִן קֳדָם בְּנֵי יִשְׂרָאֵל: [Targum Jonathan on Joshua / 5 / 2] בְּעִידָנָא הַהִיא אֲמַר יְיָ לִיהוֹשֻׁעַ עֲבַד לָךְ אִזְמְלָוָן חֲרִיפִין וְתוּב גְזַר יַת בְּנֵי יִשְׂרָאֵל תִּנְיָנוּת: [Targum Jonathan on Joshua / 5 / 3] וַעֲבַד לֵיהּ יְהוֹשֻׁעַ אִזְמְלָוָן חֲרִיפִין וּגְזַר יַת בְּנֵי יִשְׂרָאֵל בְּגִבְעַתָא וּקְרָא לֵיהּ גִבְעַת עַרְלָתָא: [Targum Jonathan on Joshua / 5 / 4] וְדֵין פִּתְגָמָא דִי גְזַר יְהוֹשֻׁעַ כָּל עַמָא דִנְפַק מִמִצְרַיִם דָכְרַיָא כָּל גַבְרֵי מְגִיחֵי קְרָבָא מִיתוּ בְמַדְבְּרָא בְּאוֹרְחָא בְּמִפַּקְהוֹן מִמִצְרָיִם: [Targum Jonathan on Joshua / 5 / 5] אֲרֵי גְזִירִין הֲווֹ כָּל עַמָא דִי נְפַקוּ וְכָל עַמָא דְאִתְיְלִידוּ בְּמַדְבְּרָא בְּאָרְחָא בְּמִפַּקְהוֹן מִמִצְרַיִם לָא גְזָרוּ: [Targum Jonathan on Joshua / 5 / 6] אֲרֵי אַרְבְּעִין שְׁנִין הֲלִיכוּ בְנֵי יִשְׂרָאֵל בְּמַדְבְּרָא עַד דְסָף כָּל עַמָא גַבְרֵי מְגִיחֵי קְרָבָא דִנְפַקוּ מִמִצְרַיִם דְלָא קַבִּילוּ לְמֵימְרָא דַייָ דְקַיֵם יְיָ לְהוֹן בְּדִיל דְלָא לְאַחֲזָיוּתְהוֹן יַת אַרְעָא דְקַיֵם יְיָ לַאֲבָהַתְהוֹן לְמִתַן לָנָא אַרְעָא עַבְדָא חֲלַב וּדְבָשׁ: [Targum Jonathan on Joshua / 5 / 7] וְיַת בְּנֵיהוֹן דְקָמוּ בַתְרֵיהוֹן יַתְהוֹן גְזַר יְהוֹשֻעַ אֲרֵי עֲרֵלִין הֲווֹ אֲרֵי לָא גְזָרוּ יַתְהוֹן בְּאָרְחָא: [Targum Jonathan on Joshua / 5 / 8] וַהֲוָה כַּד שְׁלִימוּ כָל עַמָא לְמִגְזַר וִיתֵבוּ בְּאַתְרֵיהוֹן בְּמַשְׁרִיתָא עַד דְאִתַּסִיאוּ: [Targum Jonathan on Joshua / 5 / 9] וַאֲמַר יְיָ לִיהוֹשֻׁעַ יוֹמָא דֵין אַעֲדֵית יַת חִיסוּדֵי מִצְרָאֵי מִן קֳדָמֵיכוֹן וּקְרָא שְׁמָא דְאַתְרָא הַהוּא גִלְגְלָא עַד יוֹמָא הָדֵין: [Targum Jonathan on Joshua / 5 / 10] וּשְׁרוֹ בְנֵי יִשְׂרָאֵל בְּגִלְגָלָא וַעֲבַדוּ יַת פִּסְחָא בְּאַרְבַּעַת עַשְׂרָא יוֹמָא לְיַרְחָא בְּרַמְשָׁא בְּמֵישְׁרֵי יְרִיחוֹ: [Targum Jonathan on Joshua / 5 / 11] וַאֲכַלוּ מֵעִבּוּרָא דְאַרְעָא מִבָּתַר פִּסְחָא פַּטִיר וּקְלִי בִּכְרַן יוֹמָא הָדֵין: [Targum Jonathan on Joshua / 5 / 12] וּפְסַק מַנָא מִיוֹמָא דְבַתְרוֹהִי בְּמֵיכַלְהוֹן מֵעִיבּוּרָא דְאַרְעָא וְלָא הֲוָה עוֹד לִבְנֵי יִשְׂרָאֵל מַנָא וַאֲכַלוּ מֵעֲלְלַת אַרְעָא דִכְנַעַן בְּשַׁתָּא הַהִיא: [Targum Jonathan on Joshua / 5 / 13] וַהֲוָה כַּד הֲוָה יְהוֹשֻׁעַ בִּירִיחוֹ וּזְקַף עֵינוֹהִי וַחֲזָא וְהָא גַבְרָא קָאִים לְקִבְלֵיהּ וְחַרְבֵּיהּ שְׁלִיפָא בִּידֵיהּ וַאֲזַל יְהוֹשֻׁעַ לְוָתֵיהּ וַאֲמַר לֵיהּ הַלְמִסְעַדָנָא אַתֵיתָא אִם לְבַעֲלֵי דְבָבָנָא: [Targum Jonathan on Joshua / 5 / 14] וַאֲמַר לָא אֲרֵי אֲנָא מַלְאַךְ שְׁלִיחַ מִן קֳדָם יְיָ כְּעַן אֲתֵיתִי וּנְפַל יְהוֹשֻׁעַ עַל אַפּוֹהִי עַל אַרְעָא וּסְגִיד וַאֲמַר לֵיהּ מַה רִבּוֹנִי מְמַלֵיל עִם עַבְדֵיהּ: [Targum Jonathan on Joshua / 5 / 15] וַאֲמַר מַלְאָכָה דִשְׁלִיחַ מִן קֳדָם יְיָ לִיהוֹשֻׁעַ שְׁרֵי סִינָךְ מֵעַל רִגְלָךְ אֲרֵי אַתְרָא דִי אַתְּ קָאִים עֲלוֹהִי קַדִישָׁא הוּא וַעֲבַד יְהוֹשֻׁעַ כֵּן:

Study this passage

Prepare a passage questionPassage ID & source details Where did this come from?

Targum Jonathan on Joshua — 6

[Targum Jonathan on Joshua / 6 / 1] וִירִיחוֹ אֲחִידָא הֲוַת בְּדָשִׁין דְפַרְזְלָא וּמְתַקְפָא בְּעַבְּרִין דִנְחָשׁ מִן קֳדָם בְּנֵי יִשְׂרָאֵל לֵית דִנְפַק מִנָהּ לְמֶעְבַּד קְרָבָא וְלֵית דְעָלֵל בְּגַוָהּ לְמִשְׁאַל בִּשְׁלָמָא: [Targum Jonathan on Joshua / 6 / 2] וַאֲמַר יְיָ לִיהוֹשֻׁיעַ חֲזֵי דִמְסָרִית בִּידָךְ יַת יְרִיחוֹ וְיַת מַלְכָּהּ גִבָּרֵי חֵילָא: [Targum Jonathan on Joshua / 6 / 3] וְתִסְחֲרוּן יַת קַרְתָּא כָּל גַבְרֵי עָבְדֵי קְרָבָא אַקֵיף יַת קַרְתָּא זִמְנָא חָדָא כְּדֵין תַּעְבֵּד שִׁיתָּא יוֹמִין: [Targum Jonathan on Joshua / 6 / 4] וְשִׁבְעָא כַהֲנַיָא יִסְבוּן שִׁבְעָא שׁוֹפָרַיָא דְקֶרֶן דִכְרַיָא קֳדָם אֲרוֹנָא וּבְיוֹמָא שְׁבִיעָאָה תִּסְחֲרוּן יַת קַרְתָּא שְׁבַע זִמְנִין וְכַהֲנַיָא יִתְקְעוּן בְּשׁוֹפָרַיָא: [Targum Jonathan on Joshua / 6 / 5] וִיהֵי בְּמֵיגַד בְּקְרַן דִכְרַיָא בְּמִשְׁמַעֲכוֹן יַת קַל שׁוֹפָרָא יְיַבְּבוּן כָּל עַמָא יַבָּבָא רַבָּא וְיִפּוֹל שׁוּרָא דְקַרְתָּא וְיִתְבְּלַע תְּחוֹתָהּ וְיִסְקוּן עַמָא גְבַר לְקִבְלֵיהּ: [Targum Jonathan on Joshua / 6 / 6] וּקְרָא יְהוֹשֻׁעַ בַּר נוּן לְכַהֲנַיָא וַאֲמַר לְהוֹן טוּלוּ יַת אֲרוֹן קְיָמָא דַייָ וְשִׁבְעָא כַהֲנַיָא יִטְלוּן שַׁבְעָא שׁוֹפָרַיָא דְקֶרֶן דִכְרַיָא קֳדָם אֲרוֹנָא דַיָי: [Targum Jonathan on Joshua / 6 / 7] וַאֲמַר לְעַמָא עֲבָרוּ וְאַקִיפוּ יַת קַרְתָּא וּמְזַרְזֵי חֵילָא יַעַבְּרוּן קֳדָם אֲרוֹנָא דַיָי: [Targum Jonathan on Joshua / 6 / 8] וַהֲוָה כַּד אֲמַר יְהוֹשֻׁעַ לְעַמָא וְשַׁבְעָא כַהֲנַיָא נָסְבִין שַׁבְעָא שׁוֹפָרַיָא דְקָרֶן דִכְרַיָא קֳדָם אֲרוֹנָא דַייָ עָבְרִין וְתָקְעִין בְשׁוֹפְרַיָא וַאֲרוֹן קְיָמָא דַייָ אָזֵיל בַּתְרֵיהוֹן: [Targum Jonathan on Joshua / 6 / 9] וּמְזַרְזֵי חֵילָא אָזְלִן קֳדָם כַּהֲנַיָא תָּקְעֵי שׁוֹפָרַיָא וְשִׁבְטָא דְבֵית דָן אָזַל בָּתַר אֲרוֹנָא וְכַהֲנַיָא אָזְלִין וְתָקְעוּן בְּשׁוֹפָרַיָא: [Targum Jonathan on Joshua / 6 / 10] וְיַת עַמָא פַּקֵיד יְהוֹשֻעַ לְמֵימָר לָא תְיַבְבוּן וְלָא תַשְׁמְעוּן יַת קָלְכוֹן וְלָא יִפּוֹק מְפּוּמְכוֹן פִּתְגָמָא עַד יוֹמָא דְאֵימַר לְכוֹן יַבִּיבוּ וּתְיַבְּבוּן: [Targum Jonathan on Joshua / 6 / 11] וְאַסְחַר אֲרוֹנָא דַייָ יַת קַרְתָּא אַקֵיף זִמְנָא חָדָא וְעָלוּ בְּמַשְׁרִיתָא וּבָתוּ בְמַשְׁרִיתָא: [Targum Jonathan on Joshua / 6 / 12] וְאַקְדֵים יְהוֹשֻׁעַ בְּצַפְרָא וּנְטָלוּ כַהֲנַיָא יַת אֲרוֹנָא דַיָי: [Targum Jonathan on Joshua / 6 / 13] וְשִׁבְעָא כַהֲנַיָא נְסִיבוּ שִׁבְעָא שׁוֹפָרַיָא דְקֶרֶן דִכְרַיָא קֳדָם אֲרוֹנָא דַייָ אָזְלִין מֵיזַל וְתָקְעִין בְּשׁוֹפָרַיָא וּמְזָרְזֵי חֵילָא אָזְלִין קֳדָמֵיהוֹן וְשִׁבְטָא דְבֵית דָן אָזֵיל בָּתַר אֲרוֹנָא דַייָ וְכַהֲנַיָא אָזְלִין וְתָקְעִין בְּשׁוֹפָרַיָא: [Targum Jonathan on Joshua / 6 / 14] וְאַסְחָרוּ יַת קַרְתָּא בְּיוֹמָא תִנְיָנָא זִמְנָא חָדָא וְתָבוּ לְמַשְׁרִיתָא כְּדֵין עֲבָדוּ שִׁתָּא יוֹמִין: [Targum Jonathan on Joshua / 6 / 15] וַהֲוָה בְּיוֹמָא שְׁבִיעָאָה וְאַקְדִימוּ כְּמִיסַק צַפְרָא וְאַסְחֲרוּ יַת קַרְתָּא כְּהִלְכָתָא הָדֵין שְׁבַע זִמְנִין לְחוֹד בְּיוֹמָא הַהוּא אַקִיפוּ יַת קַרְתָּא שְׁבַע זִמְנִין: [Targum Jonathan on Joshua / 6 / 16] וַהֲוָה בְּזִמְנָא שְׁבִיעִיתָא תְּקָעוּ כַהֲנַיָא בְּשׁוֹפָרַיָא וַאֲמַר יְהוֹשֻׁעַ לְעַמָא יַבִּיבוּ אֲרֵי יְהַב יְיָ לְכוֹן יַת קַרְתָּא: [Targum Jonathan on Joshua / 6 / 17] וּתְהֵי קַרְתָּא חֶרְמָא הִיא וְכָל דְבָהּ קֳדָם יְיָ לְחוֹד רָחָב פּוּנְדְקִיתָא תְחֵי הִיא וְכָל דְעִמָהּ בְּבֵיתָא אֲרֵי אַטְמַרַת יַת אִזְגַדַיָא דִי שְׁלָחָנָא: [Targum Jonathan on Joshua / 6 / 18] וּלְחוֹד אַתּוּן אִסְתַּמָרוּ מִן חֶרְמָא דִלְמָא תְחַרְמוּן וְתִסְבוּן מִן חֶרְמָא וּתְשַׁווּן יַת מַשְׁרִיתָא דְיִשְׂרָאֵל לְחֶרְמָא וּתְעַכְרוּן יָתֵיהּ: [Targum Jonathan on Joshua / 6 / 19] וְכָל כַּסְפָּא וְדַהֲבָא וּמָנֵי נְחָשָׁא וּבַרְזְלָא קוּדְשָׁא אִינוּן קֳדָם יְיָ לְאוֹצַר בֵּית מַקְדְשָׁא דַייָ יִתְעָלוּן: [Targum Jonathan on Joshua / 6 / 20] וְיַבִּיבוּ עַמָא וּתְקָעוּ בְּשׁוֹפְרַיָא וַהֲוָה כַּד שְׁמַע עַמָא יַת קַל שֹׁפָרָא וְיַבִּיבוּ עַמָא יַבָּבָא רַבָּא וּנְפַל שׁוּרָא דְקַרְתָּא וְאִתְבְּלַע תְּחוֹתוֹהִי וּסְלִיק עַמָא לְקַרְתָּא גְבַר לְקִבְלֵיהּ וּכְבָשׁוּ יַת קַרְתָּא: [Targum Jonathan on Joshua / 6 / 21] וּגְמָרוּ יַת כָּל דִבְקַרְתָּא מִגְבַר וְעַד אִתָּא מֵעוּלֵימָא וְעַד סָבָא וְעַד תּוֹר וְאִמַר וַחֲמָר לְפִתְגַם דְחֶרֶב: [Targum Jonathan on Joshua / 6 / 22] וְלִתְרֵין גַבְרַיָא דְאַלִילוּ יַת אַרְעָא אֲמַר יְהוֹשֻׁעַ עֲלוּ לְבֵית אִתְּתָא פּוּנְדְקִיתָא וְאַפִּיקוּ מִתַּמָן יַת אִתְּתָא וְיַת כָּל דִי לָהּ כְמָא דְקַיֵמְתּוּן לָהּ: [Targum Jonathan on Joshua / 6 / 23] וְעָלוּ עוּלֵמַיָא מְאַלְלַיָא וְאַפִּיקוּ יַת רָחָב וְיַת אֲבוּהָא וְיַת אִמָהּ וְיַת אֲחוּהָא וְיַת כָּל דִי לָהּ וְיַת כָּל זַרְעֲיָתָהָא אַפִּיקוּ וְאַשְׁרוּנוּן מִבָּרָא לְמַשְׁרִיתָא דְיִשְׂרָאֵל: [Targum Jonathan on Joshua / 6 / 24] וְקַרְתָּא אוֹקִידוּ בְנוּרָא וְכָל דִי בָהּ לְחוֹד כַּסְפָּא וְדַהֲבָא וּמָאנֵי נְחָשָׁא וּבַרְזְלָא יְהַבוּ בְּאוֹצַר בֵּית מַקְדְשָׁא דַיָי: [Targum Jonathan on Joshua / 6 / 25] וְיַת רָחָב פּוּנְדְקִיתָא וְיַת בֵּית אֲבוּהָא וְיַת כָּל דִי לָהּ קַיֵם יְהוֹשֻׁעַ וִיתִיבַת בְּגוֹ יִשְׂרָאֵל עַד יוֹמָא הָדֵין אֲרֵי אִטְמַרַת יַת אִזְגַדַיָא דִשְׁלַח יְהוֹשֻׁעַ לַאֲלָלָא יַת אַרְעָא: [Targum Jonathan on Joshua / 6 / 26] וְאוֹמֵי יְהוֹשֻׁעַ בְּעִידָנָא הַהִיא לְמֵימָר לִיט גַבְרָא קֳדָם יְיָ דִיקוּם וְיִבְנֵי יַת קַרְתָּא הָדָא יַת יְרִיחוֹ בִּבְכוֹרֵיהּ יְשַׁכְלְלִינָהּ וּבִזְעֵיר בְּנוֹהִי יְקִים דְשָׁהָא: [Targum Jonathan on Joshua / 6 / 27] וַהֲוָה מֵימְרָא דַייָ בְּסַעֲדֵיהּ דִיהוֹשֻׁעַ וַהֲוָה שִׁמְעֵיהּ סַגִי בְּכָל אַרְעָא:

Study this passage

Prepare a passage questionPassage ID & source details Where did this come from?

Targum Jonathan on Joshua — 7

[Targum Jonathan on Joshua / 7 / 1] וְשַׁקָרוּ בְּנֵי יִשְׂרָאֵל שְׁקַר בְּחֶרְמָא וּנְסִיב עָכָן בַּר כַּרְמִי בַר זַבְדִי בַר זֶרַח לְשִׁבְטָא דִיהוּדָה מִן חֶרְמָא וּתְקֵיף רוּגְזָא דַייָ בִּבְנֵי יִשְׂרָאֵל: [Targum Jonathan on Joshua / 7 / 2] וּשְׁלַח יְהוֹשֻׁעַ גֻבְרִין מִירִיחוֹ לְעַי דְעִם בֵּית אָוֶן מִמַדְנַח לְבֵית אֵל וַאֲמַר לְהוֹן לְמֵימַר סַקוּ וְאַלִילוּ יַת אַרְעָא וּסְלִיקוּ גַבְרַיָא וְאַלִילוּ יַת עָי: [Targum Jonathan on Joshua / 7 / 3] וְתָבוּ לְוַת יְהוֹשֻׁעַ וַאֲמַרוּ לֵיהּ לָא יִסַק כָּל עַמָא כִּתְרֵין אַלְפִין גַבְרָא אוֹ כִּתְלָתָא אַלְפִין גַבְרָא יִסְקוּן וְיִמְחוּן יַת עָי לָא תַרְגִישׁ לְתַמָן יַת כָּל עַמָא אֲרֵי זְעִירִין אִינוּן: [Targum Jonathan on Joshua / 7 / 4] וּסְלִיקוּ מִן עַמָא לְתַמָן כִּתְלָתָא אַלְפִין גַבְרָא וְאַפִּיכוּ קֳדָם אֱנָשֵׁי עָי: [Targum Jonathan on Joshua / 7 / 5] וּקְטַלוּ מִנְהוֹן אֱנָשֵׁי עַי כִּתְלָתִין וְשִׁתָּא גַבְרָא וּרְדָפוּנוּן קֳדָם תַּרְעָא עַד דְתַבְּרוּנוּן וּמְחוּנוּן בְּמַחֲתָנָא וְאִתְמְסֵי לִבָּא דְעַמָא וַהֲוָה לְמַיָא: [Targum Jonathan on Joshua / 7 / 6] וּבְזַע יְהוֹשֻׁעַ לְבוּשׁוֹהִי וּנְפַל עַל אַפּוֹהִי עַל אַרְעָא קֳדָם אֲרוֹנָא דַייָ עַד רַמְשָׁא הוּא וְסָבֵי יִשְׂרָאֵל וְאַסִיקוּ עַפְרָא עַל רֵישֵׁיהוֹן: [Targum Jonathan on Joshua / 7 / 7] וַאֲמַר יְהוֹשֻׁעַ קַבֵּיל בָּעוּתִי יְיָ אֱלֹהִים לְמָא אַעֲבַרְתָּא אַעֲבָרָא יַת עַמָא הָדֵין יַת יַרְדְנָא לְמִמְסַר יָתָנָא בִּידָא דֶאֱמוֹרָאָה לְאוֹבָדוּתָנָא וּלְוַי פוֹן דִשְׁרֵינָא וִיתֵיבְנָא בְּעִבְרָא דְיַרְדֵנָא: [Targum Jonathan on Joshua / 7 / 8] בְּבָעוּ אֲדֹנָי מָה אֵימַר בָּתַר דְאַחֲזָרוּ יִשְׂרָאֵל קְדַלְהוֹן לְמֶהְפַךְ קֳדָם בַּעֲלֵי דְבָבֵיהוֹן: [Targum Jonathan on Joshua / 7 / 9] וְיִשְׁמְעוּן כְּנַעֲנָאֵי וְכָל יַתְבֵי אַרְעָא וְיִסְתַּחֲרוּן עֲלָנָא וִישֵׁצוּן יַת שְׁמָנָא מִן אַרְעָא וּמָה תַּעֲבֵּד בְּדִיל שְׁמָךְ רַבָּא: [Targum Jonathan on Joshua / 7 / 10] וַאֲמַר יְיָ לִיהוֹשֻׁעַ קוּם לָךְ לָמָה דְנָן אַתְּ רָמֵי עַל אַפָּךְ: [Targum Jonathan on Joshua / 7 / 11] חֲטָא יִשְׂרָאֵל וְאַף עֲבָרוּ עַל קְיָמִי דְפַקְדֵית יַתְהוֹן וְאַף נְסִיבוּ מִן חֶרְמָא וְאַף גְנָבוּ וְאַף כַּדִיבוּ וְאַף שַׁוִיאוּ בְּמָנֵיהוֹן: [Targum Jonathan on Joshua / 7 / 12] וְלָא יִכְלוּן בְּנֵי יִשְׂרָאֵל לְמֵקַם קֳדָם בַּעֲלֵי דְבָבֵיהוֹן קְדַלְהוֹן יַחְזְרוּן לְמֵיפַּךְ קֳדָם בַּעֲלֵי דְבָבֵיהוֹן אֲרֵי הֲווֹ לְחֶרְמָא לָא אוֹסִיף לְמֶהֱוַי מֵימְרִי בְּסַעְדְכוֹן אִם לָא תְשֵׁיצוּן חֶרְמָא מִבֵּנֵיכוֹן: [Targum Jonathan on Joshua / 7 / 13] קוּם זַמֵן יַת עַמָא וְתֵימַר אִזְדַמְנוּ לִמְחַר אֲרֵי כִּדְנַן אֲמַר יְיָ אֱלָהָא דְיִשְׂרָאֵל חֶרְמָא בֵינָךְ יִשְׂרָאֵל לָא תִכּוּל לְמֵיקַם קֳדָם בַּעֲלֵי דְבָבָךְ עַד דְתַעֲדוּן חֶרְמָא מִבֵּינֵיכוֹן: [Targum Jonathan on Joshua / 7 / 14] וְתִתְקַרְבוּן בְּצַפְרָא לְשִׁבְטֵיכוֹן וִיהֵי שִׁבְטָא דְיִתְאַחַד מִן קֳדָם יָיָ יִקְרַב לְזַרְעֲיָן וְזַרְעִיתָא דְיִתְאַחַד מִן קֳדָם יְיָ תִּקְרַב לְבָתִּין וּבֵיתָא דְיִתְאַחַד מִן קֳדָם יָיָ יִתְקַרַב לְגַבְרַיָא: [Targum Jonathan on Joshua / 7 / 15] וִיהֵי דְיִתְאַחַד בְּחֶרְמָא יִתּוֹקַד בְּנוּרָא יָתֵיהּ וְכָל דִי לֵיהּ אֲרֵי עֲבַר עַל קְיָמָא דַייָ וַאֲרַי עֲבַד דְלָא כָשַׁר בְּיִשְׂרָאֵל: [Targum Jonathan on Joshua / 7 / 16] וְאַקְדֵם יְהוֹשֻׁעַ בְּצַפְרָא וְקָרֵיב יַת יִשְׂרָאֵל לְשִׁבְטוֹהִי וְאִתְאַחַד שִׁבְטָא דְבֵית יְהוּדָה: [Targum Jonathan on Joshua / 7 / 17] וְקָרֵיב יַת זַרְעֲיַת יְהוּדָה וְאַחַד יַת זַרְעֲיַת זָרַח וְקָרֵיב יַת זַרְעֲיַת זָרַח לְגַבְרַיָא וְאִתְאַחַד זַבְדִי: [Targum Jonathan on Joshua / 7 / 18] וְקָרֵיב יַת בֵּיתֵיהּ לְגַבְרַיָא וְאִתְאַחַד עָכָן בַּר כַּרְמִי בַּר זַבְדִי בַּר זֶרַח לְשִׁבְטָא דִיהוּדָא: [Targum Jonathan on Joshua / 7 / 19] וַאֲמַר יְהוֹשֻׁעַ לְעָכָן בְּרִי שַׁוִי כְעַן יְקָרָא קֳדָם יְיָ אֱלָהָא דְיִשְׂרָאֵל וְהַב קֳדָמוֹהִי הוֹדָאָה וְחַוֵי כְּעַן לִי מַה עֲבַדְתָּא לָא תְכַסֵי מִינִי: [Targum Jonathan on Joshua / 7 / 20] וַאֲתֵיב עָכָן יַת יְהוֹשֻׁעַ וַאֲמַר בְּקוּשְׁטָא אֲנָא חָבִית קֳדָם יְיָ אֱלָהָא דְיִשְׂרָאֵל וּכְדֵין וּכְדֵין עֲבָדִית: [Targum Jonathan on Joshua / 7 / 21] וַחֲזִית בְּבִזְתָא אִצְטְלִי בַּבְלִי חָד שַׁפִּיר וּמָאתָן סַלְעִין דִכְסַף וְלִישְׁנָא דְדַהֲבָא חָד חַמְשִׁין סַלְעִין מַתְקְלֵיהּ וְרִגַגְתִינוּן וּנְסֵבְתִּנוּן וְהָא אִנוּן טְמִירִין בְּאַרְעָא בְּגוֹ מַשְׁכְּנִי וְכַסְפָּא תְּחוֹתָא: [Targum Jonathan on Joshua / 7 / 22] וּשְׁלַח יְהוֹשֻׁעַ אִזְגַדוּן וּרְהַטוּ לְמַשְׁכְּנָא וְהָא טְמִירִין בְּמַשְׁכְּנֵיהּ וְכַסְפָּא תְּחוֹתָא: [Targum Jonathan on Joshua / 7 / 23] וּנְסִיבוּנוּן מִגוֹ מַשְׁכְּנָא וְאַיְתִיאוּנוּן לְוַת יְהוֹשֻׁעַ וּלְוַת כָּל בְּנֵי יִשְׂרָאֵל וְאַתִּיכוּנוּן קֳדָם יְיָ: [Targum Jonathan on Joshua / 7 / 24] וּדְבַר יְהוֹשֻׁעַ יַת עָכָן בַּר זֶרַח וְיַת כַּסְפָּא וְיַת אִצְטְלָא וְיַת לִישָׁנָא דְדַהֲבָא וּדְבַר יַת בְּנוֹהִי וְיַת בְּנָתֵיהּ וְיַת תּוֹרֵיהּ וְיַת חֲמָרֵיהּ וְיַת עָנֵיהּ וְיַת מַשְׁכְּנֵיהּ וְיַת כָּל דִילֵיהּ וְכָל יִשְׂרָאֵל עִמֵיהּ וְאַסִיקוּ יַתְהוֹן לְמֵישַׁר עָכוֹר: [Targum Jonathan on Joshua / 7 / 25] וַאֲמַר יְהוֹשֻׁעַ מָה עַכַרְתָּנָא יַעְכְּרִינָךְ יְיָ בְּיוֹמָא הָדֵין וּרְגָמוּ יָתֵיהּ כָּל יִשְׂרָאֵל בְּאַבְנַיָא וְאוֹקִידוּ יַתְהוֹן בְּנוּרָא בָּתַר דִרְגִימוּ יַתְהוֹן בְּאַבְנַיָא: [Targum Jonathan on Joshua / 7 / 26] וְאַקִימוּ עֲלוֹהִי דְגוֹר אַבְנִין רַב עַד יוֹמָא הָדֵין וְתַב יְיָ מִתְקוֹף רוּגְזֵיהּ עַל כֵּן קְרָא שְׁמָא דְאַתְרָא הַהוּא מֵישַׁר עָכוֹר עַד יוֹמָא הָדֵין:

Study this passage

Prepare a passage questionPassage ID & source details Where did this come from?

Targum Jonathan on Joshua — 8

[Targum Jonathan on Joshua / 8 / 1] וַאֲמַר יְיָ לִיהוֹשֻׁעַ לָא תִדְחַל וְלָא תִתְּבַּר דְבַר עִמָךְ יַת כָּל עַמָא עָבְדֵי קְרָבָא וְקוּם סַק לְעָי חֲזֵי דִמְסָרִית בִּידָךְ יַת מַלְכָּא דְעַי וְיַת עַמֵיהּ יַת קַרְתֵּיהּ וְיַת אַרְעֵיהּ: [Targum Jonathan on Joshua / 8 / 2] וְתַעְבֵּיד לְעַי וּלְמַלְכָּה כְּמָא דַעֲבַדְתָּ לִירִיחוֹ וּלְמַלְכָּהּ לְחוֹד עֲדָאָהּ וּבְעִירָהּ תִּבְזוֹן לְכוֹן אַתְקַן לָךְ כְּמָנָא לְקַרְתָּא מֵאֲחוֹרָאָה: [Targum Jonathan on Joshua / 8 / 3] וְקָם יְהוֹשֻׁעַ וְכָל עַמָא עָבְדֵי קְרָבָא לְמִיסַק לְעָי וּבְחַר יְהוֹשֻׁעַ תְּלָתִין אַלְפִין גַבְרָא גִבָּרֵי חֵילָא וְשַׁלְחִינוּן בְּלֵילְיָא: [Targum Jonathan on Joshua / 8 / 4] וּפַקֵיד יַתְהוֹן לְמֵימָר חֲזוּ דְאַתּוּן כָּמְנִין לְקַרְתָּא מֵאֲחוֹרֵי קַרְתָּא לָא תַרְחִיקוּן מִן קַרְתָּא לַחֲדָא וּתְהוֹן כּוּלְכוֹן מְתַקְנַיָא: [Targum Jonathan on Joshua / 8 / 5] וַאֲנָא וְכָל עַמָא דְעִמִי נִתְקָרֵב לְקַרְתָּא וִיהֵי אֲרֵי יִפְקוּן לִקְדָמֻתָנָא כִּדְבְּקַדְמֵיתָא וְנִפּוֹךְ קֳדָמֵיהוֹן: [Targum Jonathan on Joshua / 8 / 6] וְיִפְקוּן בַּתְרָנָא עַד דְנִגוֹד יַתְהוֹן מִן קַרְתָּא אֲרֵי יֵימְרוּן תְּבִירִין קֳדָמָנָא כִּדְבְּקַדְמֵיתָא וְנִפּוֹךְ קֳדָמֵיהוֹן: [Targum Jonathan on Joshua / 8 / 7] וְאַתּוּן תְּקוּמוּן מִכְּמָנָא וּתְתַרְכוּן יַת קַרְתָּא וְיִמְסְרְנָהּ יְיָ אֱלָהָכוֹן בְּיֶדְכוֹן: [Targum Jonathan on Joshua / 8 / 8] וִיהֵי כְּמֵיחַדְכוֹן יַת קַרְתָּא תַּדְלְקוּן יַת קַרְתָּא בְּנוּרָא כְּפִתְגָמָא דַייָ תַּעַבְדוּן חֲזוֹ דְפַקְדִית יַתְכוֹן: [Targum Jonathan on Joshua / 8 / 9] וּשְׁלָחִינוּן יְהוֹשֻׁעַ וַאֲזַלוּ לִכְמָנָא וִיתַבוּ בֵּין בֵּית אֵל וּבֵין עָי מַעֲרַב לְעָי וּבָת יְהוֹשֻׁעַ בְּלֵילְיָא הַהוּא בְּגוֹ עַמָא: [Targum Jonathan on Joshua / 8 / 10] וְאַקְדִים יְהוֹשֻׁעַ בְּצַפְרָא וּמְנָא יַת עַמָא וּסְלִיק הוּא וְסָבֵי יִשְׂרָאֵל קֳדָם עַמָא לָעָי: [Targum Jonathan on Joshua / 8 / 11] וְכָל עַמָא עָבְדֵי קְרָבָא דְעִמֵיהּ סְלִיקוּ וְאִתְקְרָבוּ וַאֲתוֹ לָקֳבֵל קַרְתָּא וּשְׁרוֹ מִצִפּוּנָא לָעַי וְחֵילְתָא בֵּינוֹהִי וּבֵין עָי: [Targum Jonathan on Joshua / 8 / 12] וּדְבַר כְּחַמְשָׁא אַלְפִין גַבְרָא וְשַׁוִי יַתְהוֹן כְּמָנָא בֵּין בֵּית אֵל וּבֵין עָי מִמַעֲרָב לְעָי: [Targum Jonathan on Joshua / 8 / 13] וְשַׁוִיאוּ עַמָא יַת כָּל מַשְׁרִיתָא דְמִצִפוּנָא לְקַרְתָּא וְיַת כְּמָנֵיהּ מַעֲרַב לְקַרְתָּא וַאֲזַל יְהוֹשֻׁעַ בְּלֵילְיָא הַהוּא בְּגוֹ מֵישְׁרָא: [Targum Jonathan on Joshua / 8 / 14] וַהֲוָה כַּד חֲזָא מַלְכָּא דְעַי וְאוֹחִיאוּ וְאַקְדִימוּ וּנְפַקוּ אֱנָשֵׁי קַרְתָּא לִקְדָמוּת יִשְׂרָאֵל לְאַגָחָא קְרָבָא הוּא וְכָל עַמֵיהּ לְזִמְנָא דִמְתַקֵן לֵיהּ לִקְדָם מֵישְׁרָא וְאִינוּן לָא יָדְעִין אֲרֵי כְּמָנָא לְהוֹן מֵאֲחוֹרֵי קַרְתָּא: [Targum Jonathan on Joshua / 8 / 15] וְאִתְּבָרוּ יְהוֹשֻׁעַ וְכָל יִשְׂרָאֵל קֳדָמֵיהוֹן וְאַפָּכוּ לְאוֹרַח מַדְבְּרָא: [Targum Jonathan on Joshua / 8 / 16] וְאִתְכְּנִישׁוּ כָּל עַמָא דִי בְקַרְתָּא בָּעַי לְמִרְדַף בַּתְרֵיהוֹן וּרְדַפוּ בָּתַר יְהוֹשֻׁעַ וְאִתְנְגִידוּ מִן קַרְתָּא: [Targum Jonathan on Joshua / 8 / 17] וְלָא אִשְׁתְּאַר אֱנַשׁ בְּעַי וּבֵית אֵל דְלָא נְפַקוּ בָּתַר יִשְׂרָאֵל וּשְׁבַקוּ יַת קַרְתָּא כַּד פְּתִיחָא וּרְדַפוּ בָּתַר יִשְׂרָאֵל: [Targum Jonathan on Joshua / 8 / 18] וַאֲמַר יְיָ לִיהוֹשֻׁעַ אֲרֵים בְּרוּמְחָא דִי בִידָךְ עַל עַי אֲרֵי בִּידָךְ אִמְסְרִינָה וַאֲרֵים יְהוֹשֻׁעַ בְּרוּמְחָא דְבִידֵיהּ עַל קַרְתָּא: [Targum Jonathan on Joshua / 8 / 19] וּכְמָנָא קָם בִּפְרִיעַ מֵאַתְרֵיהּ וּרְהָטוּ כִּדְאָרֵים יְדֵיהּ וְעָלוּ לְקַרְתָּא וְכַבְּשׁוּהָ וְאוֹחִיאוּ וְאַדְלִיקוּ יַת קַרְתָּא בְּנוּרָא: [Targum Jonathan on Joshua / 8 / 20] וְאִתְפְּנִיאוּ אֱנָשֵׁי עַי לַאֲחוֹרֵיהֶן וַחֲזוֹ וְהָא סְלִיק תְּנָנָא דְקַרְתָּא לְצֵית שְׁמַיָא וְלָא הֲוָה בְהוֹן חֵילָא לְמַעֲרָק לְכָא וּלְכָא וְעַמָא דְאַפֵיךְ לְמַדְבְּרָא אִתְחֲזַר עַל רָדְפָא: [Targum Jonathan on Joshua / 8 / 21] וִיהוֹשֻׁעַ וְכָל יִשְׂרָאֵל חֲזוֹ אֲרֵי כְבַשׁ כְּמָנָא יַת קַרְתָּא וַאֲרֵי סְלֵיק תְּנָנָא דְקַרְתָּא וְתָבוּ וּמְחוֹ יַת אֱנָשֵׁי עָי: [Targum Jonathan on Joshua / 8 / 22] וְאִלֵין נְפַקוּ מִן קַרְתָּא לִקְדָמוּתְהוּן וַהֲווֹ לְיִשְׂרָאֵל בִּמְצִיעָא אִלֵין מִכָּא וְאִלֵין מִכָּא וּמִחוֹ יַתְהוֹן עַד דְלָא אִשְׁתָּאַר לְהוֹן שְׁאֵר וּמְשֵׁזֵיב: [Targum Jonathan on Joshua / 8 / 23] וְיַת מַלְכָּא דְעַי אֲחָדוּ כַּד חָי וְקָרִיבוּ יָתֵיהּ לְוַת יְהוֹשֻׁעַ: [Targum Jonathan on Joshua / 8 / 24] וַהֲוָה כַּד שֵׁיצֵי יִשְׂרָאֵל לְקַטָלָא יַת כָּל יַתְבֵי עַי בְּחַקְלָא בְּמַדְבְּרָא דִי רְדָפוּנוּן בֵּיהּ וְאִתְקְטָלוּ כּוּלְהוֹן לְפִתְגַם דְחָרֶב עַד דִשְׁלִימוּ וְתָבוּ כָל יִשְׂרָאֵל לְעַי וּמְחוֹ יָתָהּ לְפִתְגַם דְחָרֶב: [Targum Jonathan on Joshua / 8 / 25] וַהֲווֹ כָּל דְאִתְקְטָלוּ בְּיוֹמָא הַהוּא מִגְבַר וְעַד אִתְּתָא תְּרֵי עֲשַׂר אַלְפִין כֹּל אֱנָשֵׁי עָי: [Targum Jonathan on Joshua / 8 / 26] וִיהוֹשֻׁעַ לָא אָתֵיב יְדֵיהּ דַאֲרִים בְּרוּמְחָא עַד דְגַמַר יַת כָּל יַתְבֵי עָי: [Targum Jonathan on Joshua / 8 / 27] לְחוֹד בְּעִירָא וַעֲדִי קַרְתָּא הַהִיא בְּזוֹ לְהוֹן יִשְׂרָאֵל בְּפִתְגָמָא דַייָ דְפַקֵיד יַת יְהוֹשֻׁעַ: [Targum Jonathan on Joshua / 8 / 28] וְאוֹקִיד יְהוֹשֻׁעַ יַת עָי וְשַׁוְיָהּ תֵּל חֲרִיב לְעָלַם לְצָדוּ עַד יוֹמָא הָדֵין: [Targum Jonathan on Joshua / 8 / 29] וְיַת מַלְכָּא דְעַי צְלַב עַל צְלִיבָא עַד עִידַן רַמְשָׁא וּכְמֵיעַל שִׁמְשָׁא פַּקֵד יְהוֹשֻׁעַ וַאֲחִיתוּ יַת נִבְלָתֵיהּ מִן צְלִיבָא וּרְמוֹ יָתֵיהּ בְּמַעֲלָנָא תְּרַע קַרְתָּא וְאַקִימוּ עֲלוֹהִי דְגוֹר אַבְנִין רַב עַד יוֹמָא הָדֵין: [Targum Jonathan on Joshua / 8 / 30] בְכֵן בְּנָא יְהוֹשֻׁעַ מַדְבְּחָא קֳדָם יְיָ אֱלָהָא דְיִשְׂרָאֵל בְּטוּרָא דְעֵיבָל: [Targum Jonathan on Joshua / 8 / 31] כְּמָא דְפַקֵיד מֹשֶׁה עַבְדָא דַייָ יַת בְּנֵי יִשְׂרָאֵל כְּמָא דִכְתִיב בִּסְפַר אוֹרַיְיתָא דְמֹשֶׁה מַדְבַּח אַבְנִין שַׁלְמִין דְלָא אִתְּרַם עֲלֵיהוֹן בַּרְזְלָא וְאַסִיקוּ עֲלוֹהִי עֲלָוָן קֳדָם יְיָ וּנְכִיסוּ נִיכְסַת קוּדְשִׁין: [Targum Jonathan on Joshua / 8 / 32] וּכְתַב תַּמָן עַל אַבְנַיָא יַת פַּתְשֶׁגֶן אוֹרַיְתָא דְמֹשֶׁה דִכְתַב קֳדָם בְּנֵי יִשְׂרָאֵל: [Targum Jonathan on Joshua / 8 / 33] וְכָל יִשְׂרָאֵל וְסַבוֹהִי וְסַרְכוֹהִי וְדַיָנוֹהִי קַיְמִין מִכָּא וּמִכָּא לַאֲרוֹנָא קֳדָם כַּהֲנַיָא לֵוָאֵי נָטְלֵי אֲרוֹנָא דִקְיָמָא דַייָ כְּגִיוֹרָא כְּיַצִיבָא פַּלְגֵיהוֹן לָקֳבֵל טוּרָא דִגְרִיזִין וּפַלְגֵיהוֹן לָקֳבֵל טוּרָא דְעֵיבָל כְּמָא דְפַקֵיד מֹשֶׁה עַבְדָא דַייָ לְבָרָכָא יַת עַמָא יִשְׂרָאֵל בְּקַדְמֵיתָא: [Targum Jonathan on Joshua / 8 / 34] וּבָתַר כֵּן קְרָא יַת כָּל פִּתְגָמֵי אוֹרַיְיתָא בִּרְכָן וּלְוָטִין כְּכָל דִכְתִיב בְּסִפְרָא דְאוֹרַיְתָא: [Targum Jonathan on Joshua / 8 / 35] לָא הֲוָה פִּתְגָמָא מִכָּל דִי פַקֵיד מֹשֶׁה דְלָא קְרָא יְהוֹשֻׁעַ קֳדָם כָּל קְהָלָא דְיִשְׂרָאֵל וּנְשַׁיָא וְטַפְלָא וְגִיוֹרַיָא דְאָזְלִין בֵּינֵיהוֹן:

Study this passage

Prepare a passage questionPassage ID & source details Where did this come from?

Targum Jonathan on Joshua — 9

[Targum Jonathan on Joshua / 9 / 1] וַהֲוָה כַּד שְׁמָעוּ כָּל מַלְכַיָא דִי בְּעִבְרָא דְיַרְדְנָא בְּטוּרָא וּבִשְׁפֶלְתָּא וּבְכָל סְפַר יַמָא רַבָּא דִי לָקֳבֵיל לִיבְנָן חִתָּאֵי וֶאֱמוֹרָאֵי כְּנַעֲנָאֵי פְּרִיזָאֵי חִוָאֵי וִיבוּסָאֵי: [Targum Jonathan on Joshua / 9 / 2] וְאִתְכְּנָשׁוּ כַּחֲדָא לְאַגָחָא קְרָבָא עִם יְהוֹשֻׁעַ וְעִם יִשְׂרָאֵל סִיעָא חָדָא: [Targum Jonathan on Joshua / 9 / 3] וְיַתְבֵי גִבְעוֹן שְׁמָעוּ יַת דִי עֲבַד יְהוֹשֻׁעַ לִירִיחוֹ וְלָעָי: [Targum Jonathan on Joshua / 9 / 4] וַעֲבַדוּ אַף אִינוּן בְּחוּכְמָא וְאִזְדַוָדוּ וּנְסִיבוּ שַׂקִין בָּלָן לַחֲמָרֵיהוֹן וְזִיקִין דַחֲמָר בָּלָן וּמְבַזְעִין וּמְצָרְרִין: [Targum Jonathan on Joshua / 9 / 5] וּמְסָנָן בָּלָן וּמְרַקְעִין בְּרִגְלֵיהוֹן וּכְסוּתָא בָלְיָא עֲלֵיהוֹן וְכָל לְחַם זְוָדֵיהוֹן יָבֵשׁ הֲוָה כִסְנִין: [Targum Jonathan on Joshua / 9 / 6] וַאֲזַלוּ לְוַת יְהוֹשֻׁעַ לְמַשְׁרִיתָא לְגִלְגְלָא וַאֲמַרוּ לֵיהּ וּלְאֱנַשׁ יִשְׂרָאֵל מֵאַרְעָא רְחִיקָא אָתֵינָא וּכְעַן גְזָרוּ לָנָא קְיָם: [Targum Jonathan on Joshua / 9 / 7] וַאֲמַרוּ אֱנַשׁ יִשְׂרָאֵל לְחִוָאָה דִלְמָא בֵּינָנָא אַתּוּן יַתְבוּן וְאֵיכְדֵין נִגְזַר לְכוֹן קְיָם: [Targum Jonathan on Joshua / 9 / 8] וַאֲמַרוּ לִיהוֹשֻׁעַ עַבְדָךְ אֲנַחְנָא וַאֲמַר לְהוֹן יְהוֹשֻׁעַ מָן אַתּוּן וּמְנָן אֲתֵיתוּן: [Targum Jonathan on Joshua / 9 / 9] וַאֲמַרוּ לֵיהּ מֵאַרַע רְחִיקָא לַחֲדָא אֲתוֹ עַבְדָךְ לִשְׁמָא דַייָ אֱלָהָךְ אֲרֵי שְׁמַעְנָא יַת שְׁמַע גְבוּרְתֵּיהּ וְיַת כָּל דַעֲבַד בְּמִצְרָיִם: [Targum Jonathan on Joshua / 9 / 10] וְיַת כָּל דַעֲבַד לִתְרֵין מַלְכֵי אֱמוֹרָאֵי דִי בְּעִבְרָא דְיַרְדְנָא לְסִיחוֹן מַלְכָּא דְחֶשְׁבּוֹן וּלְעוֹג מַלְכָּא דְמַתְנַן דִבְעַשְׁתָּרוֹת: [Targum Jonathan on Joshua / 9 / 11] וַאֲמַרוּ לָנָא סָבָנָא וְכָל יַתְבֵי אַרְעָנָא לְמֵימַר סָבוּ בְּיָדְכוֹן זְוָדִין לְאוֹרְחָא וֶאֱזִילוּ לִקֳדָמוּתְהוֹן וְתֵימְרוּן לְהוֹן עַבְדֵיכוֹן אֲנַחְנָא וּכְעַן גְזוּרוּ לָנָא קְיָם: [Targum Jonathan on Joshua / 9 / 12] דֵין לַחְמָנָא כַּד חַמִים אִזְדְוָדְנָא יָתֵיהּ מִבָּתָּנָא בְּיוֹם מִפְקָנָא לְמֵיתֵי לְוַתְכוֹן וּכְעַן הָא יָבֵשׁ וַהֲוָה כִסְנִין: [Targum Jonathan on Joshua / 9 / 13] וְאִלֵין זִיקִין דַחֲמַר דִי מְלֵינָא כַּד חַדְתִּין וְהָא אִתְבְּזָעוּ וְאִלֵין תּוֹתְבָנָא וּמְסָנָנָא בְּלִיאוּ מִסְגֵי אוֹרְחָא לַחְדָא: [Targum Jonathan on Joshua / 9 / 14] וְקַבִּילוּ גַבְרַיָא לְפִּתְגָמֵיהוֹן וְאוּלְפַן מִן קֳדָם יְיָ לָא תְּבָעוּ: [Targum Jonathan on Joshua / 9 / 15] וַעֲבַד לְהוֹן יְהוֹשֻׁעַ שְׁלָם וּגְזַר לְהוֹן קְיָם לְקַיָמוּתְהוֹן וְקַיְימוּ לְהוֹ רַבְרְבֵי כְּנִשְׁתָּא: [Targum Jonathan on Joshua / 9 / 16] וַהֲוָה מִסוֹף תְּלָתָא יוֹמִין בָּתַר דִגְזָרוּ לְהוֹן קְיָם וּשְׁמָעוּ אֲרֵי קְרִיבִין אִינוּן לֵיהּ וּבֵינֵיהוֹן אִינוּן יָתְבִין: [Targum Jonathan on Joshua / 9 / 17] וּנְטָלוּ בְנֵי יִשְׂרָאֵל וַאֲתוֹ לְקִרְוֵיהוֹן בְּיוֹמָא תְלִיתָאָה וְקִרְוֵיהוֹן גִבְעוֹן וּכְפִירָה וּבְאֵרוֹת וְקִרְיַת יְעָרִים: [Targum Jonathan on Joshua / 9 / 18] וְלָא מְחוֹנוּן בְּנֵי יִשְׂרָאֵל אֲרֵי קַיְימוּ לְהוֹן רַבְרְבֵי כְנִשְׁתָּא בְּמֵימְרָא דַייָ אֱלָהָא דְיִשְׂרָאֵל וְאִתְרַעֲמוּ כָּל כְּנִשְׁתָּא עַל רַבְרְבַיָא: [Targum Jonathan on Joshua / 9 / 19] וַאֲמַרוּ כָּל רַבְרְבַיָא לְכָל כְּנִשְׁתָּא אֲנַחְנָא קַיֵימְנָא לְהוֹן בְּמֵימְרָא דַייָ אֱלָהָא דְיִשְׂרָאֵל וּכְעַן לָא נִכּוּל לְאַנְזָקָא בְּהוֹן: [Targum Jonathan on Joshua / 9 / 20] דָא נַעֲבֵּיד לְהוֹן וּנְקַיֵם יַתְהוֹן וְלָא יְהֵי עֲלָנָא רֻגְזָא עַל קְיָמָא דִי קַיָימְנָא לְהוֹן: [Targum Jonathan on Joshua / 9 / 21] וַאֲמַרוּ לְהוֹן רַבְרְבַיָא יֵיחוֹן וַהֲווֹ מְלַקְטֵי אָעִין וּמְלָן מַיָא לְכָל כְּנִשְׁתָּא כְּמָא דְמַלִילוּ לְהוֹן רַבְרְבַיָא: [Targum Jonathan on Joshua / 9 / 22] וּקְרָא לְהוֹן יְהוֹשֻׁעַ וּמַלֵיל עִמְהוֹן לְמֵימָר לְמָא שְׁקַרְתּוּן בָּנָא לְמֵימָר רְחִיקִין אֲנַחְנָא מִנְכוֹן לַחֲדָא וְאַתּוּן בֵּינָנָא יָתְבִין: [Targum Jonathan on Joshua / 9 / 23] וּכְעַן לִיטִין אַתּוּן וְלָא יִפְסְקוּן מִנְכוֹן עַבְדִין וּמְלַקְטֵי אָעִין וּמָלָן מַיָא לְבֵית מַקְדְשָׁא דֶאֱלָהֵי: [Targum Jonathan on Joshua / 9 / 24] וַאֲתִיבוּ יַת יְהוֹשֻׁעַ וַאֲמַרוּ אֲרֵי חַוָאָה אִתְחַוָא לְעַבְדָךְ יַת דְפַקֵד יְיָ אֱלָהָךְ יַת מֹשֶׁה עַבְדֵיהּ לְמִתַּן לְכוֹן יַת כָּל אַרְעָא וּלְשֵׁיצָאָה יַת כָּל יָתְבֵי אַרְעָא מִן קֳדָמֵיכוֹן וּדְחִילְנָא לַחֲדָא לְנַפְשָׁתָנָא מִן קֳדָמֵיכוֹן וַעֲבַדְנָא יַת פִּתְגָמָא הָדֵין: [Targum Jonathan on Joshua / 9 / 25] וּכְעַן הָא אֲנַחְנָא מְסִירִין בִּידָךְ כְּמָא דְתַקִין וּכְמָא דְכָשַׁר בְּעֵינָךְ לְמֶעְבַּד לָנָא עַבָד: [Targum Jonathan on Joshua / 9 / 26] וַעֲבַד לְהוֹן כֵן וְשֵׁזִיב יַתְהוֹן מִיַד בְּנֵי יִשְׂרָאֵל וְלָא קַטְלוּנוּן: [Targum Jonathan on Joshua / 9 / 27] וּמַנִינוּן יְהוֹשֻׁעַ בְּיוֹמָא הַהוּא לָקְטֵי אָעִין וּמָלָן מַיָא לִכְנִשְׁתָּא וּלְמַדְבְּחָא דַייָ עַד יוֹמָא הָדֵין לְאַתְרָא דִי יִתְרְעֵי:

Study this passage

Prepare a passage questionPassage ID & source details Where did this come from?

Targum Jonathan on Joshua — 10

[Targum Jonathan on Joshua / 10 / 1] וַהֲוָה כַּד שְׁמַע אֲדֹנִי צֶדֶק מַלְכָּא דִירוּשְׁלֵם אֲרֵי כְּבַשׁ יְהוֹשֻׁעַ יַת עַי וְגַמְרָהּ כְּמָא דַעֲבַד לִירִיחוֹ וּלְמַלְכָּהּ כֵּן עֲבַד לָעַי וּלְמַלְכָּה וַאֲרֵי אַשְׁלִימוּ יַתְבֵי גִבְעוֹן עִם יִשְׂרָאֵל וַהֲווֹ בֵּינֵיהוֹן: [Targum Jonathan on Joshua / 10 / 2] וּדְחִילוּ לַחֲדָא אֲרֵי קַרְתָּא רַבְּתָא גִבְעוֹן כַּחֲדָא מִקִרְוֵי מַלְכְּוָתָא וַאֲרֵי הִיא רַבָּא מִן עָי וְכָל גַבְרָהָא גִבָּרִין: [Targum Jonathan on Joshua / 10 / 3] וּשְׁלַח אֲדֹנִי צֶדֶק מַלְכָּא דִירוּשְׁלֵם לְוַת הוֹהָם מַלְכָּא דְחֶבְרוֹן וּלְוַת פִּרְאָם מַלְכָּא דְיַרְמוּת וּלְוַת יָפִיעַ מַלְכָּא דְלָכִישׁ וּלְוַת דְבִיר מַלְכָּא דְעֶגְלוֹן לְמֵימָר: [Targum Jonathan on Joshua / 10 / 4] סַקוּ לְוָתִי וְסַעֲדוּנִי וְנִמְחֵי יַת יַתְבֵי גִבְעוֹן אֲרֵי אַשְׁלֵמַת עִם יְהוֹשֻׁעַ וְעִם בְּנֵי יִשְׂרָאֵל: [Targum Jonathan on Joshua / 10 / 5] וְאִתְכְּנָשׁוּ וּסְלִיקוּ חַמְשָׁא מַלְכֵי אֱמוֹרָאָה מַלְכָּא דִירוּשְׁלֵם מַלְכָּא דְחֶבְרוֹן מַלְכָּא דְיַרְמוּת מַלְכָּא דְלָכִישׁ מַלְכָּא דְעֶגְלוֹן אִינוּן וְכָל מַשִׁרְיַתְהוֹן וּשְׁרוֹ עַל גִבְעוֹן וְאַגִיחוּ קְרָבָא עֲלָה: [Targum Jonathan on Joshua / 10 / 6] וּשְׁלַחוּ אֲנָשֵׁי גִבְעוֹן לְוַת יְהוֹשֻׁעַ לְמַשְׁרִיתָא לְגִלְגָלָא לְמֵיְמַר לָא תְרַשֵׁל יְדָךְ מַעֲבְדָךְ סַק לְוָתָנָא בִּפְרִיעַ וּפְרוֹק לָנָא וְסַעֲדָנָא אֲרֵי אִתְכְּנָשׁוּ עֲלָנָא כָּל מַלְכֵי אֱמוֹרָאָה יַתְבֵי טוּרָא: [Targum Jonathan on Joshua / 10 / 7] וּסְלֵיק יְהוֹשֻׁעַ מִן גִלְגָלָא הוּא וְכָל עַמָא עָבְדֵי קְרָבָא עִמֵיהּ וְכָל גִבָּרֵי חֵילָא: [Targum Jonathan on Joshua / 10 / 8] וַאֲמַר יְיָ לִיהוֹשֻׁעַ לָא תִדְחַל מִנְהוֹן אֲרֵי בִּידָךְ מְסַרְתִּינוּן לָא יִתְעַתַּד אֱנַשׁ מִנְהוֹן קָדָמָךְ: [Targum Jonathan on Joshua / 10 / 9] וַאֲתָא לְוַתְהוֹן יְהוֹשֻׁעַ בִּתְכֵּיף כָּל לֵילְיָא סְלִיק מִן גִלְגְלָא: [Targum Jonathan on Joshua / 10 / 10] וְתַבְּרִינוּן יְיָ קֳדָם יִשְׂרָאֵל וּמְחָנוּן מַחֲתָא רַבָּא בְּגִבְעוֹן וּרְדָפוּנוּן בְּאוֹרַח מַסְקְנָא דְבֵית חוֹרוֹן וּמְחָנוּן עַד עֲזֵקָה וְעַד מַקֵדָה: [Targum Jonathan on Joshua / 10 / 11] וַהֲוָה בְּמִפְּכֵיהוֹן מִן קֳדָם יִשְׂרָאֵל אִינוּן בְּמַחְתָנָא דְבֵית חוֹרוֹן וּמִן קֳדָם יְיָ אִתְרְמִיאָה עֲלֵיהוֹן אַבְנִין רַבְרְבָן מִן שְׁמַיָא עַד דַאֲתוֹ לַעֲזֵקָה וּמִיתוּ סַגִיאִין דְמִיתוּ בְּאַבְנֵי בַרְדָא מִדְקַטוּלוּ בְּנֵי יִשְׂרָאֵל בְּחַרְבָּא: [Targum Jonathan on Joshua / 10 / 12] בְּכֵן שַׁבַּח יְהוֹשֻׁעַ קֳדָם יְיָ בְּיוֹמָא דִמְסַר יְיָ יַת אֱמוֹרָאָה קֳדָם בְּנֵי יִשְׂרָאֵל וַאֲמַר לְעֵינֵי יִשְׂרָאֵל שִׁמְשָׁא בְּגִבְעוֹן אוֹרִיךְ וְסִיהֲרָא בְּמֵישַׁר אַיָלוֹן: [Targum Jonathan on Joshua / 10 / 13] וְאוֹרְיַךְ שִׁמְשָׁא וְסִיהֲרָה קָם עַד דְאִתְפְּרַע עַמָא יִשְׂרָאֵל מִבַּעֲלֵי דְבָבֵיהוֹן הֲלָא הִיא כְתִיבָא עַל סִפְרָא דְאוֹרַיְיתָא וְקָם שִׁמְשָׁא בְּפַלְגוּת שְׁמַיָא וְלָא דָחַק לְמֵיעַל כְּיוֹם שְׁלִים: [Targum Jonathan on Joshua / 10 / 14] וְלָא הֲוָה כְּיוֹמָא הַהוּא קֳדָמוֹהִי וּבַתְרוֹהִי דְאִתְקַבָּלַת קֳדָם יְיָ צְלוֹת אֱנָשׁ אֲרֵי בְּמֵימְרֵיהּ יְיָ מֵגִיחַ קְרָבָא לְיִשְׂרָאֵל: [Targum Jonathan on Joshua / 10 / 15] וְתָב יְהוֹשֻׁעַ וְכָל יִשְׂרָאֵל עִמֵיהּ לְמַשְׁרִיתָא לְגִלְגָלָא: [Targum Jonathan on Joshua / 10 / 16] וְאַפָּכוּ חַמְשָׁא מַלְכַיָא הָאִלֵין וְאִטַמָרוּ בִּמְעַרְתָּא בְּמַקֵדָה: [Targum Jonathan on Joshua / 10 / 17] וְאִתְחַוָא לִיהוֹשֻׁעַ לְמֵימָר אִשְׁתְּכָחוּ חַמְשָׁא מַלְכַיָא טְמִירִין בִּמְעַרְתָּא בְּמַקֵדָה: [Targum Jonathan on Joshua / 10 / 18] וַאֲמַר יְהוֹשֻׁעַ קְרִיבוּ אַבְנִין רַבְרְבִין קֳדָם פּוּמָא דִמְעַרְתָּא וּמַנוֹ עֲלָהּ גַבְרִין לְמִטַרְהוֹן: [Targum Jonathan on Joshua / 10 / 19] וְאַתּוּן לָא תְקוּמוּן רְדוּפוּ בָּתַר בַּעֲלֵי דְבָבֵיכוֹן וְתִדְבְּקוּן יַתְהוֹן לָא תִשְׁבְּקוּנוּן לְמֵיעַל לְקִרְוֵיהוֹן אֲרֵי מְסָרִינוּן יְיָ אֱלָהָכוֹן בִּידֵיכוֹן: [Targum Jonathan on Joshua / 10 / 20] וַהֲוָה כַּד שֵׁיצֵי יְהוֹשֻׁעַ וּבְנֵי יִשְׂרָאֵל לְמִמְחֵיהוֹן מְחָתָא רַבְּתָא לַחֲדָא עַד דִשְׁלִימוּ וּמְשֵׁיזְבַיָא אִשְׁתֵּזִיבוּ מִנְהוֹן וְעָלוּ לְקִרְוִין כְּרִיכָן: [Targum Jonathan on Joshua / 10 / 21] וְתָבוּ כָל עַמָא לְמַשְׁרִיתָא לְוַת יְהוֹשֻׁעַ לְמַקֵדָה בִּשְׁלָם לָא הֲוָה נִזְקָא לִבְנֵי יִשְׂרָאֵל לְמִדְחַק גְבַר יַת נַפְשֵׁיהּ: [Targum Jonathan on Joshua / 10 / 22] וַאֲמַר יְהוֹשֻׁעַ פְּתָחוּ יַת פּוּמָא דִמְעַרְתָּא וְאַפִּיקוּ לְוָתִי יַת חַמְשָׁא מַלְכַיָא הָאִלֵין מִן מְעַרְתָּא: [Targum Jonathan on Joshua / 10 / 23] וַעֲבַדוּ כֵן וְאַפִּיקוּ לְוָתֵיהּ יַת חַמְשָׁא מַלְכַיָא הָאִלֵין מִן מְעַרְתָּא יַת מַלְכָּא דִירוּשְׁלֵם יַת מַלְכָּא דְחֶבְרוֹן יַת מַלְכָּא דְיַרְמוּת יַת מַלְכָּא דְלָכִישׁ יַת מַלְכָּא דְעֶגְלוֹן: [Targum Jonathan on Joshua / 10 / 24] וַהֲוָה כַּד אַפִּיקוּ יַת מַלְכַיָא הָאִלֵין לְוַת יְהוֹשֻׁעַ וּקְרָא יְהוֹשֻׁעַ לְכָל אֱנָשׁ יִשְׂרָאֵל וַאֲמַר לְשִׁלְטוֹנֵי גַבְרֵי מְגִיחֵי קְרָבָא דַאֲזַלוּ עִמֵיהּ קִרְבוּ שַׁווּ יַת רִגְלֵיכוֹן עַל צַוְארֵי מַלְכַיָא הָאִלֵין וּקְרִיבוּ וְשַׁוִיאוּ יַת רִגְלֵיהוֹן עַל צַוְארֵיהוֹן: [Targum Jonathan on Joshua / 10 / 25] וַאֲמַר לְהוֹן יְהוֹשֻׁעַ לָא תִדַחֲלוּן וְלָא תִתַּבְּרוּן תַּקִיפוּ וַעֲלִימוּ אֲרֵי כְּדֵין יַעֲבֵּד יְיָ לְכָל בַּעֲלֵי דְבָבֵיכוֹן דְאַתּוּן מַגִיחִין קְרָבָא בְהוֹן: [Targum Jonathan on Joshua / 10 / 26] וּמְחָנוּן יְהוֹשֻׁעַ בָּתַר כֵּן וְקַטְלִינוּן וְצַלְבִינוּן עַל חַמְשָׁא צְלִיבִין וַהֲווֹ צְלִיבִין עַל צְלִיבַיָא עַד רַמְשָׁא: [Targum Jonathan on Joshua / 10 / 27] וַהֲוָה לְעִידָן מֵיעַל שִׁמְשָׁא פַּקֵד יְהוֹשֻׁעַ וְאַחִיתוּנוּן מֵעַל צְלִיבַיָא וּרְמוֹנוּן לִמְעַרְתָּא דְאִטַמָרוּ תַמָן וְשַׁוִיאוּ אַבְנִין רַבְרְבָן עַל פּוּמָא דִמְעַרְתָּא עַד כְּרַן יוֹמָא הָדֵין: [Targum Jonathan on Joshua / 10 / 28] וְיַת מַקֵדָה כְּבַשׁ יְהוֹשֻׁעַ בְּיוֹמָא הַהוּא וּמְחָא לְפִתְגַם דְחָרֶב וְיַת מַלְכָּא גַמַר יַתְהוֹן וְיַת כָּל נַפְשָׁתָא דִי בָהּ לָא אַשְׁאֵר מְשֵׁזִיב וַעֲבַד לְמַלְכָּא דְמַקֵדָה כְּמָא דַעֲבַד לְמַלְכָּא דִירִיחוֹ: [Targum Jonathan on Joshua / 10 / 29] וַעֲבַר יְהוֹשֻׁעַ וְכָל יִשְׂרָאֵל עִמֵיהּ מִמַקֵדָה לְלִבְנָה וְאַגִיחַ קְרָבָא עִם לִבְנָה: [Targum Jonathan on Joshua / 10 / 30] וּמְסַר יְיָ אַף יָתָהּ בִּידָא דְיִשְׂרָאֵל וְיַת מַלְכָּהּ וּמְחָהּ לְפִּתְגָם דְחָרֶב וְיַת כָּל נַפְשָׁתָא דִי בָּהּ לָא אַשְׁאַר בָּהּ מְשֵׁזִיב וַעֲבַד לְמַלְכָּא כְּמָא דַעֲבַד לְמַלְכָּהּ דִירִיחוֹ: [Targum Jonathan on Joshua / 10 / 31] וַעֲבַר יְהוֹשֻׁעַ וְכָל יִשְׂרָאֵל עִמֵיהּ מִלִבְנָה לְלָכִישׁ וּשְׁרָא עֲלָהּ וְאַגִיחַ קְרָבָא בָּהּ: [Targum Jonathan on Joshua / 10 / 32] וּמְסַר יְיָ יַת לָכִישׁ בִּידָא דְיִשְׂרָאֵל וְכַבְשָׁהּ בְּיוֹמָא תִנְיָנָא וּמְחָהּ לְפִתְגַם דְחָרֶב וְיַת כָּל נַפְשָׁתָא דְבָהּ כְּכָל דַעֲבַד לְלִבְנָה: [Targum Jonathan on Joshua / 10 / 33] בְּכֵן סְלִיק הוֹרָם מַלְכָּא דְגֶזֶר לְמִסְעַד יַת לָכִישׁ וּמְחָהִי יְהוֹשֻׁעַ וְיַת עַמֵיהּ עַד דְלָא אִשְׁתָּאַר לֵיהּ מְשֵׁזִיב: [Targum Jonathan on Joshua / 10 / 34] וַעֲבַר יְהוֹשֻׁעַ וְכָל יִשְׂרָאֵל עִמֵיהּ מִלָכִישׁ לְעֶגְלוֹן וּשְׁרוֹ עֲלָהּ וְאַגִיחוּ קְרָבָא עֲלָהּ: [Targum Jonathan on Joshua / 10 / 35] וְכַבְשׁוּהָ בְּיוֹמָא הַהוּא וּמְחוּהָא לְפִתְגָם דְחָרֶב וְיַת כָל נַפְשָׁתָא דְבָהּ בְּיוֹמָא הַהוּא גַמַר כְּכֹל דַעֲבַד לְלָכִישׁ: [Targum Jonathan on Joshua / 10 / 36] וּסְלִיק יְהוֹשֻׁעַ וְכָל יִשְׂרָאֵל עִמֵיהּ מֵעֶגְלוֹן לְחֶבְרוֹן וְאַגִיחוּ קְרָבָא עֲלָהּ: [Targum Jonathan on Joshua / 10 / 37] וְכַבְשׁוּהָא וּמְחוּהָא לְפִתְגָם דְחָרֶב וְיַת מַלְכָּהּ וְיַת כָּל קִרְוָהָא וְיַת כָּל נַפְשָׁתָא דְבָהּ לָא אַשְׁאַר מְשֵׁזִיב כְּכֹל דַעֲבַד לְעֶגְלוֹן וְגַמַר יָתָהּ וְיַת כָּל נַפְשָׁתָא דְבָהּ: [Targum Jonathan on Joshua / 10 / 38] וְתַב יְהוֹשֻׁעַ וְכָל יִשְׂרָאֵל עִמֵיהּ לִדְבִיר וְאַגִיחַ קְרָבָא עֲלָהּ: [Targum Jonathan on Joshua / 10 / 39] וְכַבְשָׁהּ וְיַת מַלְכָּהּ וְיַת כָּל קִרְוָהָא וּמְחוֹנוּן לְפִּתְגַם דְחָרֶב וּגְמִירוּ יַת כָּל נַפְשָׁתָא דִי בָהּ לָא אַשְׁאַר מְשֵׁזִיב כְּמָא דַעֲבַד לְחֶבְרוֹן כֵּן עֲבַד לִדְבִיר וּלְמַלְכָּהּ וּכְמָא דַעֲבַד לְלִבְנָה וּלְמַלְכָּהּ: [Targum Jonathan on Joshua / 10 / 40] וּמְחָא יְהוֹשֻׁעַ יַת כָּל אַרְעָא טוּרָא וְדָרוֹמָא וּשְׁפֶלְתָּא וּמַשְׁפַּךְ מְרָמָתָא וְיַת כָּל מַלְכֵיהוֹן לָא אַשְׁאַר מְשֵׁזִיב וְיַת כָּל נִשְׁמָא גַמַר כְּמָא דְפַקֵד יְיָ אֱלָהָא דְיִשְׂרָאֵל: [Targum Jonathan on Joshua / 10 / 41] וּמְחָנוּן יְהוֹשֻׁעַ מֵרְקָם גֵיאָה וְעַד עַזָה וְיַת כָּל אֲרַע גּוֹשֶׁן וְעַד גִבְעוֹן: [Targum Jonathan on Joshua / 10 / 42] וְיַת כָּל מַלְכַיָא הָאִילֵין וְיַת אַרְעֲהוֹן כְּבַשׁ יְהוֹשֻׁעַ בְּזִמְנָא חָדָא אֲרֵי יְיָ אֱלָהָא דְיִשְׂרָאֵל בְּמֵימְרֵיהּ אַגִיחַ קְרָבָא לְיִשְׂרָאֵל: [Targum Jonathan on Joshua / 10 / 43] וְתַב יְהוֹשֻׁעַ וְכָל יִשְׂרָאֵל עִמֵיהּ לְמַשְׁרִיתָא לְגִלְגָלָא:

Study this passage

Prepare a passage questionPassage ID & source details Where did this come from?

Targum Jonathan on Joshua — 11

[Targum Jonathan on Joshua / 11 / 1] וַהֲוָה כַּד שְׁמַע יָבִין מַלְכָּא דְחָצוֹר וּשְׁלַח לְוַת יוֹבָב מַלְכָּא דְמָדוֹן וּלְוַת מַלְכָּא דְשִׁמְרוֹן וּלְוַת מַלְכָּא דְאַכְשָׁף: [Targum Jonathan on Joshua / 11 / 2] וּלְוַת מַלְכַיָא דְמִצְפּוּנָא בְּטוּרָא וּבְמֵישְׁרָא דָרוֹם גִינוֹסָר וּבִשְׁפֶלְתָּא וּבְפִלְכֵי דוֹר מַעֲרָבָא: [Targum Jonathan on Joshua / 11 / 3] כְּנַעֲנָאָה מִמַדִינְחָא וּמִמַעֲרָבָא וֶאֱמוֹרָאָה וְחִתָּאָה וּפְרִיזָאָה וִיבוּסָאָה בְּטוּרָא וְחִוָאָה בְּשִׁפּוּלֵי חֶרְמוֹן בַּאֲרַע מִצְפַּיָא: [Targum Jonathan on Joshua / 11 / 4] וּנְפָקוּ אִינוּן וְכָל מַשִׁרְיַתְהוֹן עִמְהוֹן עַם סַגִי כְּחָלָא דְעַל כֵּיף יַמָא לִסְגֵי וְסוּסְוַן וּרְתִיכוּן סַגִי לַחֲדָא: [Targum Jonathan on Joshua / 11 / 5] וְאִזְדַמְנוּ כֹּל מַלְכַיָא הָאִילֵין וַאֲתוֹ וּשְׁרוֹ כַחְדָא עַל מֵי מֵרוֹם לְאַגָחָא קְרָבָא עִם יִשְׂרָאֵל: [Targum Jonathan on Joshua / 11 / 6] וַאֲמַר יְיָ לִיהוֹשֻׁעַ לָא תִדְחַל מִן קֳדָמֵיהוֹן אֲרֵי מְחַר כְּעִידָנָא הָדֵין אֲנָא מְסַר יַת כּוּלְהוֹן קְטִילִין קֳדָם יִשְׂרָאֵל יַת סוּסְוָתְהוֹן תְּעַקֵר וְיַת רְתִיכֵיהוֹן תּוֹקֵד בְּנוּרָא: [Targum Jonathan on Joshua / 11 / 7] וַאֲתָא יְהוֹשֻׁעַ וְכָל עַמָא עָבְדֵי קְרָבָא עִמֵיהּ עֲלֵיהוֹן וְאִינוּן שָׁרָן עַל מֵי מֵרוֹם בִּתְכֵיף וּנְפַלוּ בְהוֹן: [Targum Jonathan on Joshua / 11 / 8] וּמַסְרִינוּן יְיָ בִּידָא דְיִשְׂרָאֵל וּמְחוּנוּן וּרְדָפוּנוּן עַד צִידוֹן רַבְּתָא וְעַד חַרְצֵי יַמָא וְעַד בִּקְעַת מִצְפַּיָא מַדִינְחָא וּמְחוּנוּן עַד דְלָא אִישְׁתָּאַר לְהוֹן מְשֵׁזִיב: [Targum Jonathan on Joshua / 11 / 9] וַעֲבַד לְהוֹן יְהוֹשֻׁעַ כְּמָא דַאֲמַר לֵיהּ יְיָ יַת סוּסְוָתְהוֹן עִקַר וְיַת רְתִיכֵיהוֹן אוֹקֵד בְּנוּרָא: [Targum Jonathan on Joshua / 11 / 10] וְתַב יְהוֹשֻׁעַ בְּעִדָנָא הַהִיא וּכְבַשׁ יַת חָצוֹר וְיַת מַלְכָּהּ קְטַל בְּחַרְבָּא אֲרֵי חָצוֹר מִלְקַדְמִין הִיא רֵישׁ כָּל מַלְכְּוָתָא הָאִלֵין: [Targum Jonathan on Joshua / 11 / 11] וּמְחוֹ יַת כָּל נַפְשָׁתָא דִי בָהּ לְפִתְגַם דְחָרֶב גְמִירָא לָא אַשְׁאַר כָּל נִשְׁמָא וְיַת חָצוֹר אוֹקֵד בְּנוּרָא: [Targum Jonathan on Joshua / 11 / 12] וְיַת כָּל קִרְוֵי מַלְכַיָא הָאִילֵין וְיַת כָּל מַלְכֵיהוֹן כְּבַשׁ יְהוֹשֻׁעַ וּמְחָנוּן לְפִתְגַם דְחָרֶב גַמַר יַתְהוֹן כְּמָא דְפַקֵד מֹשֶׁה עַבְדָא דַיָי: [Targum Jonathan on Joshua / 11 / 13] לְחוֹד כָּל קִרְוַיָא דְקַיְמִין עַל תּוּקְפֵיהוֹן לָא אוֹקְדִינוּן יִשְׂרָאֵל אֱלָהֵין יַת חָצוֹר בִּלְחוֹדָהּ אוֹקֵיד יְהוֹשֻׁעַ: [Targum Jonathan on Joshua / 11 / 14] וְכָל עֲדֵי קִרְוַיָא הָאִלֵין וּבְעִירָא בְּזוֹ לְהוֹן בְּנֵי יִשְׂרָאֵל לְחוֹד יַת כָּל אֱנָשָׁא מְחוֹ לְפִתְגַם דְחָרֶב עַד דִי שֵׁיצִיאוּ יַתְהוֹן לָא אַשְׁאָרוּ כָּל נִשְׁמָא: [Targum Jonathan on Joshua / 11 / 15] כְּמָא דְפַקֵיד יְיָ יַת מֹשֶׁה עַבְדֵיהּ כֵן פַּקֵד מֹשֶׁה יַת יְהוֹשֻׁעַ וְכֵן עֲבַד יְהוֹשֻׁעַ לָא בַטֵיל פִּתְגָמָא מִכָּל דְפַקֵיד יְיָ יַת מֹשֶׁה: [Targum Jonathan on Joshua / 11 / 16] וְאַחְסִין יְהוֹשֻׁעַ יַת כָּל אַרְעָא הָדָא טוּרָא וְיַת כָּל דָרוֹמָא וְיַת כָּל אַרְעָא דְגוֹשֶׁן וְיַת שְׁפֶלְתָּא וְיַת מֵישְׁרָא וְיַת טוּרָא דְיִשְׂרָאֵל וּשְׁפֵלָתֵיהּ: [Targum Jonathan on Joshua / 11 / 17] מִן טוּרָא פְּלִיגָא דְסָלִיק לְשֵׂעִיר וְעַד מֵישַׁר גָד בְּבִקְעַת לִבְנָן שְׁפּוּלֵי טוּרָא דְחֶרְמוֹן וְיַת כָּל מַלְכֵיהוֹן כְּבַשׁ וּמְחָנוּן וְקַטְלִינוּן: [Targum Jonathan on Joshua / 11 / 18] יוֹמִין סַגִיאִין עֲבַד יְהוֹשֻׁעַ יַת כָּל מַלְכַיָא הָאִלֵין קְרָבָא: [Targum Jonathan on Joshua / 11 / 19] לָא הֲוַת קַרְתָּא דְאַשְׁלֵימַת עִם בְּנֵי יִשְׂרָאֵל אֱלָהֵן חִוָאָה יַתְבֵי גִבְעוֹן יַת כּוֹלָא נְסִיבוּ בִּקְרָבָא: [Targum Jonathan on Joshua / 11 / 20] אֲרֵי מִן קֳדָם יְיָ הֲוַת לְתַקָפָא יַת לִבְּהוֹן לְסַדָרָא קְרָבָא עִם יִשְׂרָאֵל בְּדִיל לְגַמָרוּתְהוֹן בְּדִיל דְלָא לְמֶהֱוֵי לְהוֹן רַחֲמִין אֲרֵי בְּדִיל לְשֵׁצָיוּתְהוֹן כְּמָא דְפַקֵד יְיָ יַת מֹשֶׁה: [Targum Jonathan on Joshua / 11 / 21] וַאֲתָא יְהוֹשֻׁעַ בְּעִדָנָא הַהִיא וְשֵׁיצֵי יַת גִבָּרַיָא מִן טוּרָא מִן חֶבְרוֹן מִן דְבִיר מִן עֲנָב וּמִכֹּל טוּרָא דִיהוּדָה וּמִכֹּל טוּרָא דְיִשְׂרָאֵל עִם קִרְוֵיהוֹן גַמְרוּנוּן יְהוֹשֻׁעַ: [Targum Jonathan on Joshua / 11 / 22] לָא אִשְׁתָּאַר גִבָּרַיָא בַּאֲרַע בְּנֵי יִשְׂרָאֵל לְחוֹד בְּעַזָה בְּגַת וּבְאַשְׁדוֹד אִשְׁתָּאֲרוּ: [Targum Jonathan on Joshua / 11 / 23] וּנְסִיב יְהוֹשֻׁעַ יַת כָּל אַרְעָא כְּכֹל דִי מַלֵיל יְיָ עִם מֹשֶׁה וְיַהֲבָהּ יְהוֹשֻׁעַ לְאַחֲסָנָא לְיִשְׂרָאֵל כְּפַלְגוּתֵיהוֹן לְשִׁבְטֵיהוֹן וְאַרְעָא שָׁדוֹכָת מִלְמֶעְבַּד קְרָבָא:

Study this passage

Prepare a passage questionPassage ID & source details Where did this come from?

Targum Jonathan on Joshua — 12

[Targum Jonathan on Joshua / 12 / 1] וְאִלֵין מַלְכֵי אַרְעָא דִמְחוֹ בְּנֵי יִשְׂרָאֵל וִירִיתוּ יַת אַרְעֲהוֹן בְּעִבְרָא דְיַרְדְנָא מַדְנַח שִׁמְשָׁא מִנַחֲלָא דְאַרְנוֹן עַד טוּרָא דְחֶרְמוֹן וְכָל מֵישְׁרָא מַדִינְחָא: [Targum Jonathan on Joshua / 12 / 2] סִיחוֹן מַלְכָּא אֱמוֹרָאָה דְיָתֵיב בְּחֶשְׁבּוֹן שַׁלִיט מֵעֲרוֹעֵר דְעַל כֵּיף נַחֲלָא דְאַרְנוֹן וְגוֹ נַחֲלָא וּפַלְגוּת אֲרַע גִלְעָד וְעַד יוּבְקָא דְנַחֲלָא תְּחוּמָא דִבְנֵי עַמוֹן: [Targum Jonathan on Joshua / 12 / 3] וּמֵישְׁרָא עַד יַם גִינוֹסַר מַדִינְחָא וְעַד יַמָא דְמֵישְׁרָא יַמָא דְמִלְחָא מַדִינְחָא אוֹרַח בֵּית יְשִׁמוֹת וּמִדָרוֹמָא תְּחוֹת מַשְׁפַּךְ מֵרָמָתָא: [Targum Jonathan on Joshua / 12 / 4] וּתְחוּם עוֹג מַלְכָּא דְמַתְנָן מִשְׁאַר גִבָּרַיָא דְיָתֵיב בְּעַשְׁתָּרוֹת וּבְאֶדְרְעִי: [Targum Jonathan on Joshua / 12 / 5] וְשַׁלִיט בְּטוּרָא דְחֶרְמוֹן וּבְסַלְכָה וּבְכָל מַתְנָן עַד תְּחוּם גְשׁוּרָאָה וְאַפְקֵירוֹס וּפַלְגוּת אֲרַע דְגִלְעָד תְּחוּם סִיחוֹן מַלְכָּא דְחֶשְׁבוֹן: [Targum Jonathan on Joshua / 12 / 6] מֹשֶׁה עַבְדָא דַייָ וּבְנֵי יִשְׂרָאֵל מְחוּנוּן וְיַהְבָהּ מֹשֶׁה עַבְדָא דַייָ יְרוּתָא לְשִׁבְטָא דִרְאוּבֵן וּלְשִׁבְטָא דְגָד וּלְפַלְגוּת שִׁבְטָא דִמְנַשֶׁה: [Targum Jonathan on Joshua / 12 / 7] וְאִלֵין מַלְכֵי אַרְעָא דִי מְחָא יְהוֹשֻׁעַ וּבְנֵי יִשְׂרָאֵל בְּעִבְרָא דְיַרְדְנָא מַעַרְבָא מִמֵישַׁר גָד בְּבִקְעַת לִבְנָן וְעַד טוּרָא פְלִיגָא דְסָלִיק לְשֵׂעִיר וְיַהֲבָהּ יְהוֹשֻׁעַ לְשִׁבְטָא יִשְׂרָאֵל יְרוּתָא כְּפַלְגוּתְהוֹן: [Targum Jonathan on Joshua / 12 / 8] בְּטוּרָא וּבַשְׁפֶלְתָּא וּבְמֵישְׁרָא וּבְמַשְׁפַּךְ מְרָמָתָא וּבְמַדְבְּרָא וּבְדָרוֹמָא חִתָּאֵי וֶאֱמוֹרָאֵי וּכְנַעֲנָאֵי וּפְרִיזָאֵי וְחִוָאֵי וִיבוּסָאֵי: [Targum Jonathan on Joshua / 12 / 9] מַלְכָּא דִירִיחוֹ חָד מַלְכָּא דְעַי דְבִסְטַר בֵּית אֵל חָד: [Targum Jonathan on Joshua / 12 / 10] מַלְכָּא דִירוּשְׁלֵם חָד מַלְכָּא דְחֶבְרוֹן חָד: [Targum Jonathan on Joshua / 12 / 11] מַלְכָּא דְיַרְמוּת חָד מַלְכָּא דְלָכִישׁ חָד: [Targum Jonathan on Joshua / 12 / 12] מַלְכָּא דְעֶגְלוֹן חָד מַלְכָא דְגֶזֶר חָד: [Targum Jonathan on Joshua / 12 / 13] מַלְכָּא דִדְבִיר חָד מַלְכָּא דְגֶדֶר חָד: [Targum Jonathan on Joshua / 12 / 14] מַלְכָּא דְחָרְמָה חָד מַלְכָּא דַעֲרָד חָד: [Targum Jonathan on Joshua / 12 / 15] מַלְכָּא דְלִבְנָא חָד מַלְכָּא דַעֲדֻלָם חָד: [Targum Jonathan on Joshua / 12 / 16] מַלְכָּא דְמַקֵדָה חָד מַלְכָּא דְבֵית אֵל חָד: [Targum Jonathan on Joshua / 12 / 17] מַלְכָּא דְתַּפּוּחַ חָד מַלְכָּא דְחֵפֶר חָד: [Targum Jonathan on Joshua / 12 / 18] מַלְכָּא דַאֲפֵק חָד מַלְכָּא דְלַשָׁרוֹן חָד: [Targum Jonathan on Joshua / 12 / 19] מַלְכָּא דְמָדוֹן חָד מַלְכָּא דְחָצוֹר חָד: [Targum Jonathan on Joshua / 12 / 20] מַלְכָּא דְשִׁמְרוֹן מְראוֹן חָד מַלְכָּא דְאַכְשָׁף חָד: [Targum Jonathan on Joshua / 12 / 21] מַלְכָּא דְתַעְנַךְ חָד מַלְכָּא דִמְגִדוֹ חָד: [Targum Jonathan on Joshua / 12 / 22] מַלְכָּא דְקֶדֶשׁ חָד מַלְכָּא דְיָקְנְעָם לְכַרְמְלָא חָד: [Targum Jonathan on Joshua / 12 / 23] מַלְכָּא דְדוֹר לְפִלְכֵי דוֹר חָד מַלְכָּא דְעַמְמִין לְגִלְגָלָא חָד: [Targum Jonathan on Joshua / 12 / 24] מַלְכָּא דְתִרְצָה חָד כֹּל מַלְכַיָא תְּלָתִין וְחָד:

Study this passage

Prepare a passage questionPassage ID & source details Where did this come from?

Targum Jonathan on Joshua — 13

[Targum Jonathan on Joshua / 13 / 1] וִיהוֹשֻׁעַ סִיב עָל בְּיוֹמִין וַאֲמַר יְיָ לֵיהּ אַתְּ סַבְתָּא עַלְתָא בְיוֹמִין וְאַרְעָא אִשְׁתָּאֲרַת סַגִיאָה לַחֲדָא לִמֵירְתָהּ: [Targum Jonathan on Joshua / 13 / 2] דָא אַרְעָא דְאִשְׁתָּאֲרַת כָּל תְּחוּמֵי פְּלִשְׁתָּאֵי וְכָל גְשׁוּרָאֵי: [Targum Jonathan on Joshua / 13 / 3] מִן שִׁיחוֹר דִי עַל אַפֵּי מִצְרַיִם וְעַד תְּחוּם עֶקְרוֹן צִפּוּנָא עַל אַרְעָא כְנַעֲנָאֵי תִּתְמְנִי חַמְשָׁא טוּרְנֵי פְּלִשְׁתָּאֵי עֲזָתָאֵי וְאַשְׁדוֹדָאֵי אַשְׁקְלוֹנָאֵי גִתָּאֵי וְעֶקְרוֹנָאֵי וְעַוָאֵי: [Targum Jonathan on Joshua / 13 / 4] מִדָרוֹמָא כָּל אַרְעָא כְנַעֲנָאֵי וּמְעַרְתָּא דִי לְצִידוֹנָאָה עַד אֲפֵק עַד תְחוּם אֱמוֹרָאָה: [Targum Jonathan on Joshua / 13 / 5] וְאַרְעָא גִבְלִי וְכָל לִבְנָן מִדְנַח שִׁמְשָׁא מִמֵישַׁר גָד שִׁפּוּלֵי טוּרָא דְחֶרְמוֹן עַד מַעֲלָנָא דַחֲמָת: [Targum Jonathan on Joshua / 13 / 6] כָּל יַתְבֵי טוּרָא מִן לִבְנַן עַד חַרְצֵי יַמָּא כָּל צִידוֹנָאֵי בְּמֵימְרִי אֲתָרְכִינוּן מִן קֳדָם בְּנֵי יִשְׂרָאֵל לְחוֹד פְּלִיגְהָא לְיִשְׂרָאֵל בְּאַחֲסָנָא כְּמָא דְפַקִידְתָּךְ: [Targum Jonathan on Joshua / 13 / 7] וּכְעַן פַּלֵיג יַת אַרְעָא הָדָא בְּאַחְסָנָא לְתִשְׁעָה שִׁבְטִין וּפַלְגוּת שִׁבְטָא דִמְנַשֶׁה: [Targum Jonathan on Joshua / 13 / 8] עִמֵיהּ שִׁבְטָא דִרְאוּבֵן וְשִׁבְטָא גָד קַבִּילוּ אַחֲסַנְתְּהוֹן דִיהַב לְהוֹן מֹשֶׁה בְּעִבְרָא דְיַרְדְנָא מַדִינְחָא כְּמָא דִיהַב לְהוֹן מֹשֶׁה עַבְדָא דַיָי: [Targum Jonathan on Joshua / 13 / 9] מֵעֲרוֹעֵר דְעַל כֵּיף נַחֲלָא דְאַרְנוֹן וְקַרְתָּא דִי בְגוֹ נַחֲלָא וְכָל מֵישַׁר מֵידְבָא עַד דִיבוֹן: [Targum Jonathan on Joshua / 13 / 10] וְכָל קִרְוֵי סִיחוֹן מַלְכָּא דֶאֱמוֹרָאָה דִי מְלַךְ בְּחֶשְׁבּוֹן עַד תְּחוּם בְּנֵי עַמוֹן: [Targum Jonathan on Joshua / 13 / 11] וְאַרְעָא גִלְעָד וּתְחוּם גְשׁוּרָאָה וַאֲפִיקֵירוֹס וְכָל טוּרָא דְחֶרְמוֹן וְכָל מַתְנָן עַד סַלְכָה: [Targum Jonathan on Joshua / 13 / 12] כָּל מַלְכוּת עוֹג בְּמַתְנָן דִי מְלַךְ בְּעַשְׁתָּרוֹת וּבְאֶדְרֶעִי וְהוּא אִשְׁתָּאַר מִשְׁאַר גִבָּרַיָא וּמְחָנוּן מֹשֶׁה וְתַרְכִינוּן: [Targum Jonathan on Joshua / 13 / 13] וְלָא תָרִיכוּ בְּנֵי יִשְׂרָאֵל יַת גְשׁוּרָאָה וְיַת אֲפִיקֵירוֹס וִיתֵיב גְשׁוּרָאָה וַאֲפִיקֵירוֹס בְּגוֹ יִשְׂרָאֵל עַד יוֹמָא הָדֵין: [Targum Jonathan on Joshua / 13 / 14] לְחוֹד לְשִׁבְטָא דְלֵוִי לָא יְהַב אַחְסָנָא קוּרְבָּנַיָא דַייָ אֱלָהָא דְיִשְׂרָאֵל אִינוּן אַחֲסַנְתֵּיהּ כְּמָא דְמַלֵל לֵיהּ: [Targum Jonathan on Joshua / 13 / 15] וִיהַב מֹשֶׁה לְשִׁבְטָא דִבְנֵי רְאוּבֵן לְזַרְעֲיַתְהוֹן: [Targum Jonathan on Joshua / 13 / 16] וַהֲוָה לְהוֹן תְּחוּמָא מֵעֲרוֹעֵר דִי עַל כֵּיף נַחֲלָא דְאַרְנוֹן וְקַרְתָּא דִי בְגוֹ נַחֲלָא וְכָל מֵישְׁרָא עַד מֵידְבָא: [Targum Jonathan on Joshua / 13 / 17] חֶשְׁבּוֹן וְכָל קִרְוָהָא דִי בְמֵישְׁרָא דִיבוֹן וּבָמוֹת בַּעַל וּבֵית בַּעַל מְעוֹן: [Targum Jonathan on Joshua / 13 / 18] וְיָהֲצָה וּקְדֵמוֹת וּמֵפָעַת: [Targum Jonathan on Joshua / 13 / 19] וְקִרְיָתַיִם וְשִׂבְמָה וְצֶרֶת הַשַׁחַר בְּטוּרָא דְמֵישְׁרָא: [Targum Jonathan on Joshua / 13 / 20] וּבֵית פְּעוֹר וּמַשְׁפַּךְ מְרָמָתָא וּבֵית יְשִׁמוֹת: [Targum Jonathan on Joshua / 13 / 21] וְכָל קִרְוֵי מֵישְׁרָא וְכָל מַלְכְּוַת סִיחוֹן מַלְכָּא דֶאֱמוֹרָאָה דִמְלַךְ בְּחֶשְׁבּוֹן דִמְחָא מֹשֶׁה יָתֵיהּ וְיַת רַבְרְבֵי מִדְיָן יַת אֱוִי וְיַת רֶקֶם וְיַת צוּר וְיַת חוּר וְיַת רֶבַע רַבְרְבֵי סִיחוֹן יַתְבֵי אַרְעָא: [Targum Jonathan on Joshua / 13 / 22] וְיַת בִּלְעָם בַּר בְּעוֹר קִסְמָא קְטָלוּ בְּנֵי יִשְׂרָאֵל בְּחַרְבָּא עַל קְטִילֵיהוֹן: [Targum Jonathan on Joshua / 13 / 23] וַהֲוָה תְּחוּם בְּנֵי רְאוּבֵן יַרְדְנָא וּתְחוּמֵיהּ דָא אַחֲסָנַת בְּנֵי רְאוּבֵן לְזַרְעֲיַתְהוֹן קִרְוַיָא וּפַצְחֵיהֶן: [Targum Jonathan on Joshua / 13 / 24] וִיהַב מֹשֶׁה לְשִׁבְטָא דְגָד לִבְנֵי גָד לְזַרְעֲיַתְהוֹן: [Targum Jonathan on Joshua / 13 / 25] וַהֲוָה לְהוֹן תְּחוּמָא יַעְזֵר וְכָל קִרְוֵי גִלְעָד וּפַלְגוּת אַרְעָא בְּנֵי עַמוֹן עַד עֲרוֹעֵר דִי עַל אַפֵּי רַבָּה: [Targum Jonathan on Joshua / 13 / 26] וּמֵחֶשְׁבּוֹן עַד רָמַת מִצְפַּיָא וּבְטוֹנִים וּמִמַחֲנָיִם עַד תְחוּם לִדְבִיר: [Targum Jonathan on Joshua / 13 / 27] וּבְמֵישְׁרָא בֵּית הָרָם וּבֵית נִמְרָה וְסֻכּוֹת וְצִפוּנָא שְׁאָר מַלְכוּת סִיחוֹן מַלְכָּא דְחֶשְׁבּוֹן יַרְדְנָא וּתְחוּמֵיהּ עַד סְיָפֵי יַם גִינוֹסַר עַבְרָא דְיַרְדְנָא מַדִינְחָא: [Targum Jonathan on Joshua / 13 / 28] דָא אַחֲסָנַת בְּנֵי גָד לְזַרְעֲיַתְהוֹן קִרְוַיָא וּפַצְחֵיהֶן: [Targum Jonathan on Joshua / 13 / 29] וִיהַב מֹשֶׁה לְפַלְגוּת שִׁבְטַיָא דִמְנַשֶׁה וַהֲוָה לְפַּלְגוּת שִׁבְטַיָא דִבְנֵי מְנַשֶׁה לְזַרְעֲיַתְהוֹן: [Targum Jonathan on Joshua / 13 / 30] וַהֲוָה תְּחוּמֵיהוֹן מִמַחֲנַיִם כָּל מַתְנָן כָּל מַלְכוּתֵיהּ דְעוֹג מַלְכָּא דְמַתְנָן וְכָל כַּפְרָנֵי יָאִיר דִבְמַתְנָן שִׁתִּין קִרְוִין: [Targum Jonathan on Joshua / 13 / 31] וּפַלְגוּת אַרְעָא דְגִלְעָד וְעַשְׁתָּרוֹת וְאֶדְרֶעִי קִרְוַיָא מַלְכוּתֵיהּ דְעוֹג בְּמַתְנָן לִבְנֵי מָכִיר בַּר מְנַשֶׁה לְפַלְגוּת בְּנֵי מָכִיר לְזַרְעֲיַתְהוֹן: [Targum Jonathan on Joshua / 13 / 32] אִלֵין דִי אַחֲסִין מֹשֶׁה בְּמֵישְׁרַיָא דְמוֹאָב מֵעִיבְרָא לְיַרְדְנָא דִירִיחוֹ מַדִינְחָא: [Targum Jonathan on Joshua / 13 / 33] וּלְשִׁבְטָא דְלֵוִי לָא יְהַב מֹשֶׁה אַחֲסָנָא מַתְּנָן דִיהַב לְהוֹן יְיָ אֱלָהָא דְיִשְׂרָאֵל אִינוּן אַחֲסַנְתְּהוֹן כְּמָא דְמַלֵיל לְהוֹן:

Study this passage

Prepare a passage questionPassage ID & source details Where did this come from?

Targum Jonathan on Joshua — 14

[Targum Jonathan on Joshua / 14 / 1] וְאִלֵין דְאַחֲסִינוּ בְּנֵי יִשְׂרָאֵל בְּאַרְעָא דִכְנָעַן דְאַחֲסִינוּ יַתְהוֹן אֶלְעָזָר כַּהֲנָא וִיהוֹשֻׁעַ בַּר נוּן וְרֵישֵׁי אֲבָהַת שִׁבְטַיָא לִבְנֵי יִשְׂרָאֵל: [Targum Jonathan on Joshua / 14 / 2] בְּעַדְבָא אִתְפַּלְגַת לְהוֹן אַחֲסַנְתְּהוֹן כְּמָא דְפַקֵד יְיָ בִּידָא דְמֹשֶׁה לְתִשְׁעַת שִׁבְטִין וּפַלְגוּת שִׁבְטָא: [Targum Jonathan on Joshua / 14 / 3] אֲרֵי יְהַב מֹשֶׁה אַחֲסָנַת תְּרֵין שִׁבְטִין וּפַלְגוּת שִׁבְטָא מֵעִיבְרָא לְיַרְדְנָא וּלְלֵוָאֵי לָא יְהַב אַחֲסָנָא בֵּינֵיהוֹן: [Targum Jonathan on Joshua / 14 / 4] אֲרֵי הֲווֹ בְנֵי יוֹסֵף תְּרֵין שִׁבְטִין מְנַשֶׁה וְאֶפְרָיִם וְלָא יְהָבוּ חוּלֵק לְלֵוָאֵי בְּאַרְעָא אֱלָהֵן קִרְוִין לְמִתַּב וּרְוָחֵיהוֹן לִבְעִירֵיהוֹן וּלְגֵיתֵיהוֹן: [Targum Jonathan on Joshua / 14 / 5] כְּמָא דְפַקֵד יְיָ יַת מֹשֶׁה כֵּן עֲבָדוּ בְּנֵי יִשְׂרָאֵל וּפַלִיגוּ יַת אַרְעָא: [Targum Jonathan on Joshua / 14 / 6] וּקְרִיבוּ בְנֵי יְהוּדָה לְוַת יְהוֹשֻׁעַ בְּגִלְגָלָא וַאֲמַר לֵיהּ כָּלֵב בַּר יְפֻנֶה קְנִיזָאָה אַתְּ יְדַעְתָּא יַת פִּתְגָמָא דְמַלֵיל יְיָ עִם מֹשֶׁה נְבִיָא דַייָ עַל עֵסַק דִילִי וְעַל עֵסַק דִילָךְ בִּרְקַם גֵיאָה: [Targum Jonathan on Joshua / 14 / 7] בַּר אַרְבְּעִין שְׁנִין אֲנָא כַּד שְׁלַח מֹשֶׁה עַבְדָא דַייָ יָתִי מֵרְקַם גֵיאָה לַאֲלָלָא יַת אַרְעָא וַאֲתֵיבִית יָתֵיהּ פִתְגָמָא כְּמָא דַהֲוָה עִם לִבִּי: [Targum Jonathan on Joshua / 14 / 8] וְאַחַי דִסְלִיקוּ עִמִי תְּבַרוּ יַת לִבָּא דְעַמָא וַאֲנָא אַשְׁלֵמִית בָּתַר דַחַלְתָּא דַייָ אֱלָהִי: [Targum Jonathan on Joshua / 14 / 9] וְקַיֵם מֹשֶׁה בְּיוֹמָא הַהוּא לְמֵימָר אִם לָא אַרְעָא דִי דְרָכַת פַּרְסַת רִגְלָךְ בָּהּ דִילָךְ תְּהֵי לְאַחֲסָנָא וְלִבְנָךְ עַד עָלְמָא אֲרֵי אַשְׁלֵימְתָּא בָּתַר דַחַלְתָּא דַייָ אֱלָהִי: [Targum Jonathan on Joshua / 14 / 10] וּכְעַן הָא קַיֵים יְיָ יָתִי כְּמָא דִי מַלֵיל דְנַן אַרְבְּעִין וַחֲמֵשׁ שְׁנִין מֵעִידָן דְמַלֵיל יְיָ יַת פִּתְגָמָא הָדֵין עִם מֹשֶׁה דַאֲזַל יִשְׂרָאֵל בְּמַדְבְּרָא וּכְעַן הָא אַנָא יוֹמָא דֵין בַּר תַּמְנָן וְחָמֵשׁ שְׁנִין: [Targum Jonathan on Joshua / 14 / 11] עַד כְּעַן אֲנָא יוֹמָא דֵין תַּקִיף כִּדְבְּיוֹמָא דִשְׁלַח יָתִי מֹשֶׁה כְּחֵילִי כִּבְכֵן וְכֵן חֵילִי דִכְעָן לְאַגָחָא קְרָבָא וּלְמִפַּק וּלְמֵיעָל: [Targum Jonathan on Joshua / 14 / 12] וּכְעַן הַב לִי יַת טוּרָא הָדֵין דְמַלֵיל יְיָ בְּיוֹמָא הַהוּא אֲרֵי אַתְּ שְׁמַעְתָּא בְּיוֹמָא הַהוּא אֲרֵי גִבָּרִין תַמָן וְקִרְוִין רַבְרְבָן כְּרִיכָן מָאִים יְהֵא מֵימְרָא דַייָ בְּסַעֲדִי וְאֵירְתִינוּן כְּמָא דִי מַלֵיל יְיָ: [Targum Jonathan on Joshua / 14 / 13] וּבָרְכֵיהּ יְהוֹשֻׁעַ וִיהַב יַת חֶבְרוֹן לְכָּלֵב בַּר יְפֻנֶה לְאַחְסָנָא: [Targum Jonathan on Joshua / 14 / 14] עַל כֵּן הֲוַת חֶבְרוֹן לְכָלֵב בַּר יְפֻנֶה קְנִזָאָה לְאַחֲסָנָא עַד יוֹמָא הָדֵין חֲלַף דְאַשְׁלֵם בָּתַר דַחַלְתָּא דַייָ אֱלָהָא דְיִשְׂרָאֵל: [Targum Jonathan on Joshua / 14 / 15] וְשׁוּם חֶבְרוֹן מִלְקָדְמִין קִרְיַת אַרְבַּע אֱנָשׁ רַב בְּגִבָּרַיָא הוּא וְאַרְעָא שְׁדוֹכַת מִלְמֶעְבַּד קְרָבָא:

Study this passage

Prepare a passage questionPassage ID & source details Where did this come from?

Targum Jonathan on Joshua — 15

[Targum Jonathan on Joshua / 15 / 1] וַהֲוָה עַדְבָא לְשִׁבְטָא דִבְנֵי יְהוּדָה לְזַרְעֲיַתְהוֹן עַל תְּחוּם אֱדוֹם מַדְבְּרָא דְצִין דָרוֹמָא מִסְיָפֵי דָרוֹמָא: [Targum Jonathan on Joshua / 15 / 2] וַהֲוָה לְהוֹן תְּחוּם דָרוֹמָא מִסְיָפֵי יַמָא דְמִלְחָא מִן כֵּיפָא דְמִתְפְּנֵי לְדָרוֹמָא: [Targum Jonathan on Joshua / 15 / 3] וְנָפַק לְמִדָרוֹמָא לְמַסְקָנָא דְעַקְרַבִּין וַעֲבַר לְצִין וּסְלֵיק מִדָרוֹמָא לִרְקַם גֵיאָה וַעֲבַר לְחֶצְרוֹן וּסְלֵיק לְאַדָר וּמִסְתְּחַר לְקַרְקָעָה: [Targum Jonathan on Joshua / 15 / 4] וַעֲבַר לְעַצְמוֹן וְנָפֵק לְנַחְלָא דְמִצְרַיִם וַהֲווֹ מַפְקָנוֹהִי דִתְחוּמָא לְמַעֲרָבָה דֵין יְהֵא לְכוֹן תְּחוּם דָרוֹמָא: [Targum Jonathan on Joshua / 15 / 5] וּתְחוּם קִידוּמָא יַמָא דְמִלְחָא עַד סְיָפֵי יַרְדְנָא וּתְחוּמָא לְרוּחַ צִפּוּנָא מִכֵּיף יַמָא מִסְיָפֵי יַרְדְנָא: [Targum Jonathan on Joshua / 15 / 6] וְסָלֵק תְּחוּמָא לְבֵית חָגְלָה וְעָבַר מִצִפּוּנָא לְבֵית מֵישְׁרָא וְסָלֵיק תְּחוּמָא לְאֶבֶן בּוֹהַן בַּר רְאוּבֵן: [Targum Jonathan on Joshua / 15 / 7] וְסָלֵק תְּחוּמָא לִדְבִיר מִמֵישַׁר עָכוֹר וְצִפּוּנָא מִתְפְּנֵי לְגִלְגָלָא דְלָקֳבֵיל מַסְקָנָא דַאֲדֻמִים דְמִדָרוֹם לְנַחֲלָא וְעָבַר תְּחוּמָא לְמֵי עֵין שֶׁמֶשׁ וַהֲוָן מַפְקָנוֹהִי לְעֵין קַצְרָה: [Targum Jonathan on Joshua / 15 / 8] וְסָלֵיק תְּחוּמָא לְחֵילַת בַּר הִנֹם דִלְעִיבַּר יְבוּס מִדָרוֹמָא הִיא יְרוּשְׁלֵם וְסָלֵק תְּחוּמָא לְרֵישׁ טוּרָא דְעַל אַפֵּי חֵילַת הִנֹם מַעַרְבָא דְבִּסְיָפֵי מֵישַׁר גִבָּרַיָא צִפּוּנָא: [Targum Jonathan on Joshua / 15 / 9] וְיִסְחַר תְּחוּמָא מֵרֵישׁ טוּרָא לְמַבּוּעֵי מֵי נֶפְתּוֹחַ וְנָפֵק לְקִרְוֵי טוּרָא דְעֶפְרוֹן וְיִסְחַר תְּחוּמָא לְבַעֲלָה הִיא קִרְיַת יְעָרִים: [Targum Jonathan on Joshua / 15 / 10] וּמִסְתַּחַר תְּחוּמָא מִבַּעֲלָה לְיַמָא לְטוּרָא דְשֵׂעִיר וַעֲבַר לְעִיבַּר טוּר יְעָרִים מִצִפּוּנָא הִיא כְסָלוֹן וְנָחִית לְבֵית שֶׁמֶשׁ וַעֲבַר לְתִמְנָא: [Targum Jonathan on Joshua / 15 / 11] וְנָפַק תְּחוּמָא לְעִבַּר עֶקְרוֹן לְצִפּוּנָא וְיִסְחַר תְּחוּמָא לְשִׁכָּרוֹן וַעֲבַר לְטוּר בַּעֲלָה וְנָפֵק לְיַבְנְאֵל וַהֲווֹן מַפְקָנוֹהִי דִתְחוּמָא לְיַמָא: [Targum Jonathan on Joshua / 15 / 12] וּתְחוּם מַעַרְבָא יַמָא רַבָּא וּתְחוּמָא דֵין תְּחוּם בְּנֵי יְהוּדָה סְחוֹר סְחוֹר לְזַרְעֲיַתְהוֹן: [Targum Jonathan on Joshua / 15 / 13] וּלְכָלֵב בַּר יְפוּנֶה יְהַב חוּלְקָא בְּגוֹ בְּנֵי יְהוּדָה עַל מֵימְרָא דַייָ לִיהוֹשֻׁעַ יַת קִרְיַת אַרְבַּע אֲבוּהוֹן דְגִבָּרַיָא הִיא חֶבְרוֹן: [Targum Jonathan on Joshua / 15 / 14] וְתָרֵיךְ מִתַּמָן כָּלֵב יַת תְּלָתָא בְּנֵי גִבָּרַיָא יַת שֵׁשַׁי וְיַת אֲחִימָן וְיַת תַּלְמַי בְנֵי גִבָּרַיָא: [Targum Jonathan on Joshua / 15 / 15] וּסְלֵיק מִתַּמָן לְוַת יַתְבֵי דְבִר וְשׁוּם דְבַר מִלְקַדְמִין קִרְיַת אַרְכֵי: [Targum Jonathan on Joshua / 15 / 16] וַאֲמַר כָּלֵב דִמְחֵי יַת קִרְיַת אַרְכֵי וְיִכְבְּשִׁינָהּ וְאֶתֵּן לֵיהּ יַת עַכְסָה בְּרַתִּי לְאִתּוּ: [Targum Jonathan on Joshua / 15 / 17] וְכַבְּשָׁהּ עָתְנִיאֵל בַּר קְנַז אֲחוּהִי דְכָלֵב וִיהַב לֵיהּ יַת עַכְסָה בְּרַתֵּיהּ לְאִתּוּ: [Targum Jonathan on Joshua / 15 / 18] וַהֲוָה בְּמֵיעֲלָהּ וְאַמְלַכְתֵּיהּ לְמִשְׁאַל מִן אֲבוּהָא אַחְסַנְתָּא וְאִתְרְכִינַת מֵעַל חַמְרָא וַאֲמַר לָהּ כָּלֵב מַה לִיךְ: [Targum Jonathan on Joshua / 15 / 19] וַאֲמַרַת הַב לִי אַחְסַנְתָּא אֲרֵי לְאַרַע דָרוֹמָא יְהַבְתַּנִי וְתִתֶּן לִי אֲתַר בֵּית שַׁקְיָא דְמַיָא וִיהַב לָהּ יַת בֵּית שַׁקְיָא עִילָאָה וְיַת בֵּית שַׁקְיָא תַּחְתָּאָה: [Targum Jonathan on Joshua / 15 / 20] דָא אַחְסָנַת שִׁבְטָא דִבְנֵי יְהוּדָה לְזַרְעֲיַתְהוֹן: [Targum Jonathan on Joshua / 15 / 21] וַהֲוָה קִרְוַיָא מִסְיָפֵי לְשִׁבְטָא דִבְנֵי יְהוּדָה עַל תְּחוּם אֱדוֹם בְּדָרוֹמָא קַבְצְאֵל וָעֵדֶר וְיָגוּר: [Targum Jonathan on Joshua / 15 / 22] וְקִינָה וְדִימוֹנָה וְעַדְעָדָה: [Targum Jonathan on Joshua / 15 / 23] וְקֶרֶשׁ וְחָצוֹר וְיִתְנָן: [Targum Jonathan on Joshua / 15 / 24] זִיף וָטֶלֶם וּבְעָלוֹת: [Targum Jonathan on Joshua / 15 / 25] וְחָצוֹר חֲדַתָּה וּקְרִיוֹת חֶצְרוֹן הִיא חָצוֹר: [Targum Jonathan on Joshua / 15 / 26] אֲמָם וּשְׁמָע וּמוֹלָדָה: [Targum Jonathan on Joshua / 15 / 27] וַחֲצַר גַדָה וְחֶשְׁמוֹן וּבֵית פָּלֵט: [Targum Jonathan on Joshua / 15 / 28] וַחֲצַר שׁוּעָל וּבְאֵר שֶׁבַע וּבִזְיוֹתְיָה: [Targum Jonathan on Joshua / 15 / 29] בַּעֲלָה וְעִיִים וָעָצֶם: [Targum Jonathan on Joshua / 15 / 30] וְאֶלְתּוֹלַד וּכְסִיל וְחָרְמָה: [Targum Jonathan on Joshua / 15 / 31] וְצִקְלַג וּמַדְמַנָה וְסַנְסַנָה: [Targum Jonathan on Joshua / 15 / 32] וּלְבָאוֹת וְשִׁלְחִים וְעַיִן וְרִמוֹן כָּל קִרְוַיָא עַשְׂרִין וּתְשַׁע וּפַצְחֵיהֶן: [Targum Jonathan on Joshua / 15 / 33] בִּשְׁפֶלְתָּא אֶשְׁתָּאוֹל וְצָרְעָה וְאַשְׁנָה: [Targum Jonathan on Joshua / 15 / 34] וְזָנוֹחַ וְעֵין גַנִים תַּפּוּחַ וְהָעֵינָם: [Targum Jonathan on Joshua / 15 / 35] יַרְמוּת וַעֲדֻלָם שׁוֹכֹה וַעֲזֵקָה: [Targum Jonathan on Joshua / 15 / 36] וְשַׁעֲרַיִם וַעֲדִיתַיִם וְהַגְדֵרָה וּגְדֵרוֹתָיִם קִרְוִין אַרְבַּע עַסְרֵי וּפַצְחֵיהֶן: [Targum Jonathan on Joshua / 15 / 37] צְנָן וַחֲדָשָׁה וּמִגְדַל גָד: [Targum Jonathan on Joshua / 15 / 38] וְדִלְעָן וְהַמִצְפֶּה וְיָקְתְאֵל: [Targum Jonathan on Joshua / 15 / 39] לָכִישׁ וּבָצְקַת וְעֶגְלוֹן: [Targum Jonathan on Joshua / 15 / 40] וְכַבּוֹן וְלַחְמָס וְכִתְלִישׁ: [Targum Jonathan on Joshua / 15 / 41] וּגְדֵרוֹת בֵּית דָגוֹן וְנַעֲמָה וּמַקֵדָה קִרְוִין שִׁית עַסְרֵי וּפַצְחֵיהֶן: [Targum Jonathan on Joshua / 15 / 42] לִבְנָה וָעֶתֶר וְעָשָׁן: [Targum Jonathan on Joshua / 15 / 43] וְיִפְתָּח וְאַשְׁנָה וּנְצִיב: [Targum Jonathan on Joshua / 15 / 44] וּקְעִילָה וְאַכְזִיב וּמָרֵאשָׁה קִרְוִין תְּשַׁע וּפַצְחֵיהֶן: [Targum Jonathan on Joshua / 15 / 45] עֶקְרוֹן וְכַפְרָנָהָא וּפַצְחָהָא: [Targum Jonathan on Joshua / 15 / 46] מֵעֶקְרוֹן וּמַעַרְבָא כָּל קִרְוַיָא דְעַל תְּחוּם אַשְׁדוֹד וּפַצְחֵיהֶן: [Targum Jonathan on Joshua / 15 / 47] אַשְׁדוֹד כַּפְרָנָהָא וּפַצְחָהָא עַזָה כַּפְרָנָהָא וּפַצְחָהָא עַד נַחֲלָא דְמִצְרָיִם וְיַמָא רַבָּה וּתְחוּמֵיהּ: [Targum Jonathan on Joshua / 15 / 48] וּבְטוּרָא שָׁמִיר וְיַתִּיר וְשׁוֹכֹה: [Targum Jonathan on Joshua / 15 / 49] וְדַנָה וְקִרְיַת סַנָה הִיא דְבִיר: [Targum Jonathan on Joshua / 15 / 50] וַעֲנָב וְאִשְׁתְּמֹה וְעָנִים: [Targum Jonathan on Joshua / 15 / 51] וְגֹשֶׁן וְחֹלֹן וְגִלֹה קִרְוִין חֲדָא עַסְרֵי וּפַצְחֵיהֶן: [Targum Jonathan on Joshua / 15 / 52] אֲרַב וְדוּמָה וְאֶשְׁעָן: [Targum Jonathan on Joshua / 15 / 53] וְיָנוּם וּבֵית תַּפּוּחַ וַאֲפֵקָה: [Targum Jonathan on Joshua / 15 / 54] וְחֻמְטָה וְקִרְיַת אַרְבַּע הִיא חֶבְרוֹן וְצִיעֹר קִרְוִין תְּשַׁע וּפַצְחֵיהֶן: [Targum Jonathan on Joshua / 15 / 55] מָעוֹן כַּרְמֶל וָזִיף וְיוּטָה: [Targum Jonathan on Joshua / 15 / 56] וְיִזְרְעֶאל וְיָקְדְעָם וְזָנוֹחַ: [Targum Jonathan on Joshua / 15 / 57] הַקַיִן גִבְעָה וְתִמְנָה קִרְוִין עֲסַר וּפַצְחֵיהֶן: [Targum Jonathan on Joshua / 15 / 58] חַלְחוּל בֵּית צוּר וּגְדוֹר: [Targum Jonathan on Joshua / 15 / 59] וּמַעֲרָת וּבֵית עֲנוֹת וְאֶלְתְּקֹן קִרְוִין שִׁית וּפַצְחֵיהֶן: [Targum Jonathan on Joshua / 15 / 60] קִרְיַת בַּעַל הִיא קִרְיַת יְעָרִים וְהָרַבָּה קִרְוִין תַּרְתֵּין וּפַצְחֵיהֶן: [Targum Jonathan on Joshua / 15 / 61] בְּמַדְבְּרָא בֵּית מֵישְׁרָא מִדִין וּסְכָכָה: [Targum Jonathan on Joshua / 15 / 62] וְנִבְשָׁן וְקִרְיַת מֶלַח וְעֵין גֶדִי קִרְוִין שִׁית וּפַצְחֵיהֶן: [Targum Jonathan on Joshua / 15 / 63] וְיַת יְבוּסָאֵי יַתְבֵי יְרוּשְׁלֵם לָא יְכִילוּ בְּנֵי יְהוּדָה לְתָרָכוּתְהוֹן וִיתִיבוּ יְבוּסָאֵי עִם בְּנֵי יְהוּדָה בִּירוּשְׁלֵם עַד יוֹמָא הַדִין:

Study this passage

Prepare a passage questionPassage ID & source details Where did this come from?

Targum Jonathan on Joshua — 16

[Targum Jonathan on Joshua / 16 / 1] וּנְפַק עַדְבָא לִבְנֵי יוֹסֵף מִיַרְדְנָא דִירִיחוֹ לְמַיָא יְרִיחוֹ מַדִינְחָא לְמַדְבְּרָא דְסָלִיק מִירִיחוֹ בְּטוּרָא לְבֵית אֵל: [Targum Jonathan on Joshua / 16 / 2] וְנָפֵק מִבֵּית אֵל לְלוּז וַעֲבַר לִתְּחוּם אַרְכִּי לַעֲטָרוֹת: [Targum Jonathan on Joshua / 16 / 3] וְנָחִית לְיַמָא לִתְחוּם יַפְלֵיט עַד תְּחוּם בֵּית חוֹרוֹן אַרְעָאָה וְעַד גָזֶר וַהֲווֹן מַפְקָנוֹהִי לְיַמָא: [Targum Jonathan on Joshua / 16 / 4] וְאַחֲסִינוּ בְנֵי יוֹסֵף מְנַשֶׁה וְאֶפְרָיִם: [Targum Jonathan on Joshua / 16 / 5] וַהֲוָה תְחוּם בְּנֵי אֶפְרַיִם לְזַרְעֲיַתְהוֹן וַהֲוָה תְחוּם אַחְסַנְתְּהוֹן מַדִינְחָא עַטְרוֹת אֲדָר עַד בֵּית חוֹרוֹן עִילָאָה: [Targum Jonathan on Joshua / 16 / 6] וּנְפַק תְּחוּמָא לְיַמָא לְמִכְמְתָת מִצִפּוּנָא וּמִסְתְּחַר תְּחוּמָא מִמַדִינְחָא לְתַאֲנַת שִׁלֹה וְעָבַר לֵיהּ מִמַדְנַח לְיָנוֹחַ: [Targum Jonathan on Joshua / 16 / 7] וְנָחֵית מִיָנוֹחַ לַעֲטָרוֹת וּלְנַעֲרָתָה וּמְעָרַע בִּירִיחוֹ וְנָפַק לְיַרְדְנָא: [Targum Jonathan on Joshua / 16 / 8] מִתַּפּוּחַ אָזִיל תְּחוּמָא לְיַמָא לְנַחֲלָא דְקָנָה וַהֲווֹן מִפְקָנוֹהִי לְיַמָא דָא אַחֲסָנַת שִׁבְטָא דִבְנֵי אֶפְרַיִם לְזַרְעֲיַתְהוֹן: [Targum Jonathan on Joshua / 16 / 9] וְקִרְוַיָא דְמַפְרְשָׁן לִבְנֵי אֶפְרַיִם בְּנוֹ אַחְסָנַת בְּנֵי מְנַשֶׁה כָּל קִרְוַיָא וּפַצְחֵיהֶן: [Targum Jonathan on Joshua / 16 / 10] וְלָא תָרִיכוּ יַת כְּנַעֲנָאֵי דְיָתֵיב בְּגָזֶר וִיתִיבוּ כְּנַעֲנָאֵי בְּגוֹ בֵּית אֶפְרַיִם עַד יוֹמָא הָדֵין וַהֲווֹ לְמַסְקֵי מִסִין פַּלְחִין:

Study this passage

Prepare a passage questionPassage ID & source details Where did this come from?

Targum Jonathan on Joshua — 17

[Targum Jonathan on Joshua / 17 / 1] וַהֲוָה עַדְבָא לְשִׁבְטָא דִמְנַשֶׁה אֲרֵי הוּא בּוּכְרָא דְיוֹסֵף לְמָכִיר בּוּכְרָא דִמְנַשֶׁה אֲבוּהִי דְגִלְעָד אֲרֵי הוּא הֲוָה גְבַר עָבֵיד קְרָבִין וַהֲוָה לֵיהּ אַרְעָא גִלְעָד וּמַתְנָן: [Targum Jonathan on Joshua / 17 / 2] וַהֲוָה לִבְנֵי מְנַשֶׁה דְאִשְׁתָּאֲרוּ לְזַרְעֲיַתְהוֹן וְלִבְנֵי אֲבִיעֶזֶר וְלִבְנֵי חֵלֶק וְלִבְנֵי אַשְׂרִיאֵל וְלִבְנֵי שֶׁכֶם וְלִבְנֵי חֵפֶר וְלִבְנֵי שְׁמִידָע אִילֵן בְּנֵי מְנַשֶׁה בַּר יוֹסֵף דָכְרַיָא לְזַרְעֲיַתְהוֹן: [Targum Jonathan on Joshua / 17 / 3] וְלִצְלָפְחָד בַּר חֵפֶר בַּר גִלְעָד בַּר מָכִיר בַּר מְנַשֶׁה לָא הֲווֹ לֵיהּ בְּנִין אֱלָהֵן בְּנָן וְאִלֵין שְׁמָהַת בְּנָתֵיהּ מַחְלָה וְנֹעָה חָגְלָה מִלְכָּה וְתִרְצָה: [Targum Jonathan on Joshua / 17 / 4] וְקָרִיבָא לָקֳדָם אֶלְעָזָר כַּהֲנָא וְלִקֳדָם יְהוֹשֻׁעַ בַּר נוּן וְלִקֳדָם רַבְרְבַיָא לְמֵימַר יְיָ פַּקֵיד יַת מֹשֶׁה לְמִתַּן לָנָא אַחֲסָנָא בְּגוֹ אַחָנָא וִיהַב לְהוֹן עַל מֵימְרָא דַייָ אַחֲסָנָא בְּגוֹ אֲחֵי אֲבוּהֶן: [Targum Jonathan on Joshua / 17 / 5] וּנְפָלוּ עַדְבֵי מְנַשֶׁה עַסְרָא בַּר מֵאֲרְעָא דְגִלְעָד וּמַתְנָן דְמֵעִיבְרָא לְיַרְדְנָא: [Targum Jonathan on Joshua / 17 / 6] אֲרֵי בְּנַת מְנַשֶׁה אַחֲסִינוּ אַחֲסָנָא בְּגוֹ בְנוֹהִי וְאַרְעָא גִלְעָד הֲוַת לִבְנֵי מְנַשֶׁה דְאִשְׁתָּאֲרוּ: [Targum Jonathan on Joshua / 17 / 7] וַהֲוָה תְּחוּם מְנַשֶׁה מֵאָשֵׁר לְמִכְמְתָת דִי עַל אַפֵּי שְׁכֶם וַאֲזַל תְּחוּמָא לִימִינָא לְיַתְבֵי עֵין תַּפּוּחַ: [Targum Jonathan on Joshua / 17 / 8] לִמְנַשֶׁה הֲוַת אֲרַע תַּפּוּחַ וְתַפּוּחַ עַל תְּחוּם מְנַשֶׁה לִבְנֵי אֶפְרַיִם: [Targum Jonathan on Joshua / 17 / 9] וְנָחִית תְּחוּמָא לְנַחֲלָא דְקָנָה לְדָרוֹמָא לְנַחֲלָא קִרְוַיָא הָאִלֵין לְאֶפְרַיִם בְּגוֹ קִרְוֵי מְנַשֶׁה וּתְחוּם מְנַשֶׁה מִצִפּוּנָא לְנַחֲלָא וַהֲוָן מַפְקָנוֹהִי לְיַמָא: [Targum Jonathan on Joshua / 17 / 10] דָרוֹמָא לְאֶפְרַיִם וְצִפּוּנָא לִמְנַשֶׁה וַהֲוָה יַמָא תְּחוּמֵיהּ וּבְאָשֵׁר מְעַרְעִין מִצִפּוּנָא וּבְיִשָׂשכָר מִמַדִינְחָא: [Targum Jonathan on Joshua / 17 / 11] וַהֲוָה לִמְנַשֶׁה בְּיִשָׂשכָר וּבְאָשֵׁר בֵּית שְׁאָן וְכַפְרָנָהָא וְיִבְלְעָם וְכַפְרָנָהָא וְיַת יַתְבֵי דֹאר וְכַפְרָנָהָא וְיַתְבֵי עֵין דֹר וְכַפְרָנָהָא וְיַתְבֵי תַעְנַךְ וְכַפְרָנָהָא וְיַתְבֵי מְגִדוֹ וְכַפְרָנָהָא תְּלָתָא פִּלְכִין: [Targum Jonathan on Joshua / 17 / 12] וְלָא יָכִילוּ בְּנֵי מְנַשֶׁה לְתָרָכָא יַת קִרְוַיָא הָאִלֵין וּשְׁרֵי כְנַעֲנָאָה לְמִתַּב בְּאַרְעָא הָדָא: [Targum Jonathan on Joshua / 17 / 13] וַהֲוָה כַּד תַּקִיפוּ בְּנֵי יִשְׂרָאֵל וּמַנִיאוּ יַת כְּנַעֲנָאֵי לְמַסְקֵי מִסִין וְתָרָכָא לָא תָרְכִינוּן: [Targum Jonathan on Joshua / 17 / 14] וּמַלִילוּ בְּנֵי יוֹסֵף עִם יְהוֹשֻׁעַ לְמֵימָר מָא דֵין יְהָבְתָּ לִי אַחֲסָנָא עַדְבָא חָד וְחוּלַק חָד וַאֲנָא עַם סַגִי עַד לִסְגֵי בָּרְכַנִי יְיָ: [Targum Jonathan on Joshua / 17 / 15] וַאֲמַר לְהוֹן יְהוֹשֻׁעַ אִם עַם סַגִי אַתּוּן סַקוּ לְכוֹן לְחוּרְשָׁא וּתְתַקֵן לָךְ תַמָן אֲתַר בְּאַרַע פְּרִזָאֵי וְגִבָּרַיָא אֲרֵי עָק לְכוֹן טוּרָא דְהַר אֶפְרָיִם: [Targum Jonathan on Joshua / 17 / 16] וַאֲמַרוּ בְּנֵי יוֹסֵף לָא יַסְפֵּק לָנָא טוּרָא וּרְתִיכִין דְפַרְזְלָא בְּכָל כְּנַעֲנָאֵי דְיַתְבִין בְּאֲרַע מֵישְׁרָא לְדִי בְּבֵית שְׁאָן וְכַפְרָנָהָא וּלְדִי בְּמֵישַׁר יִזְרְעֶאל: [Targum Jonathan on Joshua / 17 / 17] וַאֲמַר יְהוֹשֻׁעַ לְבֵית יוֹסֵף לְאֶפְרַיִם וְלִמְנַשֶׁה לְמֵימַר עַם סַגִי אַתּוּן וְחֵיל סַגִי לְכוֹן לָא יְהֵי לְכוֹן עַדְבָא חָד: [Targum Jonathan on Joshua / 17 / 18] אֲרֵי טוּרָא יְהֵי לָךְ אֲרֵי חוּרְשָׁא הוּא וְתַתְקְנִינֵיהּ וִיהֵי לָךְ מַפְקָנוֹהִי אֲרֵי תְתַרְכוּן יַת כְּנַעֲנָאֵי אֲרֵי רְתִיכִין דְפַרְזְלָא לֵיהּ אֲרֵי תַּקִיפִין אִינוּן:

Study this passage

Prepare a passage questionPassage ID & source details Where did this come from?

Targum Jonathan on Joshua — 18

[Targum Jonathan on Joshua / 18 / 1] וְאִתְכַּנָשׁוּ כָּל כְּנִשְׁתָּא דִבְנֵי יִשְׂרָאֵל לְשִׁלֹה וְאַשְׁרִיאוּ תַמָן יַת מַשְׁכַּן זִמְנָא וְאַרְעָא אִתְכְּבִישַׁת קֳדָמֵיהוֹן: [Targum Jonathan on Joshua / 18 / 2] וְאִשְׁתָּאֲרוּ בִּבְנֵי יִשְׂרָאֵל דְלָא פַּלִיגוּ יַת אַחְסַנְתְּהוֹן שַׁבְעָה שִׁבְטִין: [Targum Jonathan on Joshua / 18 / 3] וַאֲמַר יְהוֹשֻׁעַ לִבְנֵי יִשְׂרָאֵל עַד אֵימָתַי אַתּוּן מִתְרַשְׁלִין לְמֵיעַל לְמֵירַת יַת אַרְעָא דִיהַב לְכוֹן יְיָ אֱלָהָא דְאַבְהַתְכוֹן: [Targum Jonathan on Joshua / 18 / 4] הָבוּ לְכוֹן תְּלָתָא גַבְרִין לְשִׁבְטָא וְאֶשְׁלָחִינוּן וִיקוּמוּן וִיהַלְכוּן בְּאַרְעָא וְיִכְתְּבוּן יָתָהּ לְפוּם אַחְסַנְתְּהוֹן וְיֵיתוּן לְוָתִי: [Targum Jonathan on Joshua / 18 / 5] וִיפַלְגוּן יָתָהּ לְשִׁבְעָה חוּלְקִין דְבֵית יְהוּדָה יְקוּמוּן עַל תְּחוּמֵיהוֹן מִדָרוֹמָא וּדְבֵית יוֹסֵף יְקוּמוּן עַל תְּחוּמֵיהוֹן מִצִפּוּנָא: [Targum Jonathan on Joshua / 18 / 6] וְאַתּוּן תִּכְתְּבוּן יַת אַרְעָא לְשִׁבְעָא חוּלְקִין וְתַיְתוּן לְוָתִי הַלְכָא וְאַרְמֵי לְכוֹן עַדְבָא הַלְכָא קֳדָם יְיָ אֱלָהָנָא: [Targum Jonathan on Joshua / 18 / 7] אֲרֵי לֵית חוּלַק לְלֵוָאֵי בֵּינֵיכוֹן אֱלָהֵן מַתְּנָן דִיהַב לְהוֹן יְיָ אִינוּן אַחְסַנְתְּהוֹן וְגָד וּרְאוּבֵן וּפַלְגוּת שִׁבְטָא דִמְנַשֶׁה קַבִּילוּ אַחְסַנְתְּהוֹן מֵעִבְרָא לְיַרְדְנָא מַדִינְחָא דִיהַב לְהוֹן מֹשֶׁה עַבְדָא דַיָי: [Targum Jonathan on Joshua / 18 / 8] וְקָמוּ גַבְרַיָא וַאֲזַלוּ וּפַקֵיד יְהוֹשֻׁעַ יַת דַאֲזַלוּ לְמִכְתַּב יַת אַרְעָא לְמֵימָר אֱזִילוּ וְהַלִיכוּ בְאַרְעָא וּכְתוּבוּ יָתָהּ וְתוּבוּ לְוָתִי וְהָכָא אֶרְמֵי לְכוֹן עַדְבִין קֳדָם יְיָ בְּשִׁלֹה: [Targum Jonathan on Joshua / 18 / 9] וַאֲזַלוּ גִבָּרַיָא וַעֲבָרוּ בְּאַרְעָא וְכַתְבוּהָ לְקִרְוַיָא לְשַׁבְעָא חוּלְקִין עַל סִפְרָא וַאֲתוֹ לְוַת יְהוֹשֻׁעַ לְמַשְׁרִיתָא לְשִׁלֹה: [Targum Jonathan on Joshua / 18 / 10] וּרְמָא לְהוֹן יְהוֹשֻׁעַ עַדְבָא בְּשִׁלֹה קֳדָם יְיָ וּפַלֵיג תַּמָן יְהוֹשֻׁעַ יַת אַרְעָא לִבְנֵי יִשְׂרָאֵל כְּפַלְגוּתְהוֹן: [Targum Jonathan on Joshua / 18 / 11] וּסְלִיק עַדְבָא שִׁבְטָא דִבְנֵי בִנְיָמִן לְזַרְעֲיַתְהוֹן וּנְפַק תְּחוּם עַדְבֵיהוֹן בֵּין בְּנֵי יְהוּדָה וּבֵין בְּנֵי יוֹסֵף: [Targum Jonathan on Joshua / 18 / 12] וַהֲוָה לְהוֹן תְּחוּמָא לְרוּחַ צִפּוּנָא מִן יַרְדְנָא וְסָלִיק תְּחוּמָא לְעִיבַר יְרִיחוֹ מִצִפּוּנָא וְסָלֵיק בְּטוּרָא לְיַמָא וַהֲוָן מַפְקָנוֹהִי לְמַדְבַּר בֵּית אָוֶן: [Targum Jonathan on Joshua / 18 / 13] וַעֲבַר מִתַּמָן תְּחוּמָא לְלוּז דִלְעִבַּר דְלוּז דָרוֹמָא הִיא בֵּית אֵל וְנָחִית תְּחוּמָא עַטְרוֹת אַדָר עַל טוּרָא דִמִדָרוֹם לְבֵית חוֹרוֹן אַרְעָאָה: [Targum Jonathan on Joshua / 18 / 14] וְתָאַר תְּחוּמָא וּמִסְתְּחַר לְרוּחַ מַעַרְבָא לְדָרוֹמָא מִן טוּרָא דִי עַל אַפֵּי בֵּית חוֹרוֹן דָרוֹמָא וַהֲווֹן מַפְקָנוֹהִי עַל קִרְיַת בַּעַל הִיא קִרְיַת יְעָרִים קַרְתָּא דִבְנֵי יְהוּדָה דָא רוּחַ מַעַרְבָא: [Targum Jonathan on Joshua / 18 / 15] וְרוּחַ דָרוֹמָא מִסְיָפֵי קִרְיַת יְעָרִים וְנָפַק תְּחוּמָא לְיַמָא וְנָפֵיק לְמַבּוּעֵי מֵי נֶפְתּוֹחַ: [Targum Jonathan on Joshua / 18 / 16] וְנָחִית תְּחוּמָא לִסְטַר טוּרָא דִי עַל אַפֵּי חֵילַת בַּר הִנֹם דִי בְּמֵישַׁר גִבָּרַיָא צִפוּנָא וְנָחִית לְחֵילַת בַּר הִנֹם לְעִיבַר יְבוּס דָרוֹמָא וְנָחִית לְעֵין קַצְרָא: [Targum Jonathan on Joshua / 18 / 17] וְתָאַר מִצָפוֹן וְנָפַק לְעֵין שֶׁמֶשׁ וְנָפֵיק לִגְלִילָא דִי לָקֳבֵיל מַסְקָנָא דַאֲדֻמִים וְנָחִית לְאֶבֶן בּוֹהַן בַּר רְאוּבֵן: [Targum Jonathan on Joshua / 18 / 18] וַעֲבַר לְעִיבְרָא דִלָקֳבֵיל מֵישְׁרָא צִפּוּנָא וְנָחִית לְעַרְבָתָה: [Targum Jonathan on Joshua / 18 / 19] וַעֲבַר תְּחוּמָא לְעִיבַר בֵּית חָגְלָה לְצִפּוּנָא וַהֲווֹן מַפְקָנוֹהִי דִתְחוּמָה לְכֵיף יַמָא דְמִלְחָא צִפּוּנָא לִסְיָפֵי יַרְדְנָא דָרוֹמָא דֵין תְּחוּם דָרוֹמָא: [Targum Jonathan on Joshua / 18 / 20] וְיַרְדְנָא תְּחוּמָא לֵיהּ לְרוּחַ קִידוּמָא דָא אַחְסָנַת בְּנֵי בִנְיָמִין לִתְחוּמָהָא סְחוֹר סְחוֹר לְזַרְעֲיַתְהוֹן: [Targum Jonathan on Joshua / 18 / 21] וַהֲוָה קִרְוַיָא לְשִׁבְטָא דִבְנֵי בִנְיָמִין לְזַרְעֲיַתְהוֹן יְרִיחוֹ וּבֵית חָגְלָה וּמֵישַׁר קְצִיץ: [Targum Jonathan on Joshua / 18 / 22] וּבֵית מֵישְׁרָא וּצְמָרַיִם וּבֵית אֵל: [Targum Jonathan on Joshua / 18 / 23] וְהָעַוִים וְהַפָרָה וְעָפְרָה: [Targum Jonathan on Joshua / 18 / 24] וּכְפַר הָעַמוֹנָה וְהָעָפְנִי וְגָבַע קִרְוִין תַּרְתָּא עַסְרֵי וּפַצְחַיהֶן: [Targum Jonathan on Joshua / 18 / 25] גִבְעוֹן וְרָמָתָא וּבְאֵרוֹת: [Targum Jonathan on Joshua / 18 / 26] וּמִצְפַּיָא וּכְפִירָה וְהַמֹצָה: [Targum Jonathan on Joshua / 18 / 27] וְרֶקֶם וְיִרְפְּאֵל וְתַרְאֲלָה: [Targum Jonathan on Joshua / 18 / 28] וּצְלַע אֶלֶף וִיבוּסָאֵי הִיא יְרוּשְׁלֵם גִבְעַת קִרְיַת קִרְוִין אַרְבַּע עַסְרֵי וּפַצְחֵיהֶן דָא אַחֲסָנַת בְּנֵי בִנְיָמִין לְזַרְעֲיַתְהוֹן:

Study this passage

Prepare a passage questionPassage ID & source details Where did this come from?

Targum Jonathan on Joshua — 19

[Targum Jonathan on Joshua / 19 / 1] וּנְפַק עַדְבָא תִנְיָנָא לְשִׁמְעוֹן לְשִׁבְטָא דִבְנֵי שִׁמְעוֹן לְזַרְעֲיַתְהוֹן וַהֲוָה אַחֲסַנְתְּהוֹן בְּגוֹ אַחֲסָנַת בְּנֵי יְהוּדָה: [Targum Jonathan on Joshua / 19 / 2] וַהֲוָה לְהוֹן בְּאַחֲסַנְתְּהוֹן בְּאֵר שֶׁבַע וְשֶׁבַע וּמוֹלָדָה: [Targum Jonathan on Joshua / 19 / 3] וַחֲצַר שׁוּעָל וּבָלָה וְעֶצֶם: [Targum Jonathan on Joshua / 19 / 4] וְאֶלְתּוֹלַד וּבְתוּל וְחָרְמָה: [Targum Jonathan on Joshua / 19 / 5] וְצִקְלַג וּבֵית הַמַרְכָּבֹת וַחֲצַר סוּסָה: [Targum Jonathan on Joshua / 19 / 6] וּבֵית לְבָאוֹת וְשָׁרוּחֶן קִרְוִין תְּלַת עַסְרֵי וּפַצְחֵיהֶן: [Targum Jonathan on Joshua / 19 / 7] עַיִן רִמוֹן וְעֶתֶר וְעָשָׁן קִרְוִין אַרְבַּע וּפַצְחֵיהֶן: [Targum Jonathan on Joshua / 19 / 8] וְכָל פַּצְחַיָא דִי בְּסַחְרָנוּת קִרְוַיָא הָאִלֵין עַד בַּעֲלַת בְּאֵר רָאמַת דָרוֹמָא דָא אַחְסָנַת שִׁבְטָא דִבְנֵי שִׁמְעוֹן לְזַרְעֲיַתְהוֹן: [Targum Jonathan on Joshua / 19 / 9] מֵעֲדַב בְּנֵי יְהוּדָה אַחְסָנַת בְּנֵי שִׁמְעוֹן אֲרֵי הֲוָה חִילַק בְּנֵי יְהוּדָה סַגִי מִנְהוֹן וְאַחְסִינוּ בְּנֵי שִׁמְעוֹן בְּגוֹ אַחְסַנְתְּהוֹן: [Targum Jonathan on Joshua / 19 / 10] וּסְלֵיק עַדְבָא תְלִיתָאָה לִבְנֵי זְבוּלֻן לְזַרְעֲיַתְהוֹן וַהֲוָה תְּחוּם אַחְסַנְתְּהוֹן עַד שָׂרִיד: [Targum Jonathan on Joshua / 19 / 11] וּסְלִיק תְּחוּמְהוֹן לְיַמָא וּמַרְעֲלָא וּמְעָרַע בְּדַבָּשֶׁת וּמְעָרַע בְּנַחֲלָא דִי עַל אַפֵי יָקְנְעָם: [Targum Jonathan on Joshua / 19 / 12] וְתַב מִשָׂרִיד לְקִידוּמָא מַדְנַח שִׁמְשָׁא עַל תְּחוּם כִּסְלוֹת תָּבוֹר וְנָפֵיק לְדֻבְּרַת וּסְלִיק לְיָפִיעַ: [Targum Jonathan on Joshua / 19 / 13] וּמִתַּמָן עֲבַר לִקְדוּמָא מַדִינְחָא גִתָּה חֵפֶר עִתָּה קָצִין וְנָפֵיק לְרִמוֹן דִמְתוֹאַר וּמִתַּמָן מִסְתְּחַר לְנֵעָה: [Targum Jonathan on Joshua / 19 / 14] וּמִסְתְּחַר לֵיהּ תְּחוּמָא מִצִפּוּנָא לְחַנָתוֹן וַהֲווֹן מַפְקָנוֹהִי לְחֵילַת יִפְתַּח אֵל: [Targum Jonathan on Joshua / 19 / 15] וְקַטָת וְנַהֲלָל וְשִׁמְרוֹן וְיִדְאֲלָה וּבֵית לָחֶם קִרְוִין תַּרְתָּא עַסְרֵי וּפַצְחֵיהֶן: [Targum Jonathan on Joshua / 19 / 16] דָא אַחְסָנַת בְּנֵי זְבוּלֻן לְזַרְעֲיַתְהוֹן קִרְוַיָא הָאִלֵין וּפַצְחֵיהֶן: [Targum Jonathan on Joshua / 19 / 17] לְיִשָׂשכָר נְפַק עַדְבָא רְבִיעָאָה לִבְנֵי יִשָׂשכָר לְזַרְעֲיָתְהוֹן: [Targum Jonathan on Joshua / 19 / 18] וַהֲוָה תְּחוּמְהוֹן יִזְרְעֶאל וּכְסֻלוֹת וְשׁוּנֵם: [Targum Jonathan on Joshua / 19 / 19] וַחַפָרַיִם וְשִׁיאוֹן וַאֲנָחֲרָת: [Targum Jonathan on Joshua / 19 / 20] וְהָרַבִּית וְקִשְׁיוֹן וָאָבֶץ: [Targum Jonathan on Joshua / 19 / 21] וְרֶמֶת וְעֵין גַנִים וְעֵין חַדָה וּבֵית פַּצֵץ: [Targum Jonathan on Joshua / 19 / 22] וּמְעָרַע תְּחוּמָא בְּתָבוֹר וְשַׁחֲצִימָה וּבֵית שֶׁמֶשׁ וַהֲווֹן מַפְקָנוֹהִי דִתְחוּמְהוֹן לְיַרְדְנָא קִרְוִין שִׁית עַסְרֵי וּפַצְחֵיהֶן: [Targum Jonathan on Joshua / 19 / 23] דָא אַחְסָנַת שִׁבְטָא דִבְנֵי יִשָׂשכָר לְזַרְעֲיַתְהוֹן קִרְוַיָא וּפַצְחֵיהֶן: [Targum Jonathan on Joshua / 19 / 24] וּנְפַק עַדְבָא חֲמִישָׁאָה לְשִׁבְטָא דִבְנֵי אָשֵׁר לְזַרְעֲיַתְהוֹן: [Targum Jonathan on Joshua / 19 / 25] וַהֲוָה תְּחוּמְהוֹן חֶלְקַת וַחֲלִי וָבֶטֶן וְאַכְשָׁף: [Targum Jonathan on Joshua / 19 / 26] וְאַלַמֶלֶךְ וְעַמְעָד וּמִשְׁאָל וּמְעָרַע בְּכַרְמְלָא לְיַמָא וּבְשִׁיחוֹר לִבְנָת: [Targum Jonathan on Joshua / 19 / 27] וְתַב מִמַדְנַח שִׁמְשָׁא בֵּית דָגוֹן וּמְעָרַע בִּזְבוּלֻן וּבְחֵילַת יִפְתַּח אֵל לְצִפּוּנָא בֵּית מֵישְׁרָא וּנְעִיאֵל וְנָפֵיק לְכָבוּל מִשְׂמָאלָא: [Targum Jonathan on Joshua / 19 / 28] וְעֶבְרוֹן וּרְחֹב וְחַמוֹן וְקָנָה עַד צִידוֹן רַבָּה: [Targum Jonathan on Joshua / 19 / 29] וְתַב תְּחוּמָא לְרָמָתָא וְעַד קִרְוִין כְּרִיכָן קִרְוֵי תוּקְפָא וְתַב תְּחוּמָא לְחוֹסָה וִיהוֹן מַפְקָנוֹהִי לְיַמָא מֵעֲדַב אַכְזִיב: [Targum Jonathan on Joshua / 19 / 30] וְעֻמָה וַאֲפֵק וּרְחוֹב קִרְוִין תַּרְתֵּין וְעֶשְׂרִין וּפַצְחֵיהֶן: [Targum Jonathan on Joshua / 19 / 31] דָא אַחֲסָנַת שִׁבְטָא דִבְנֵי אָשֵׁר לְזַרְעֲיַתְהוֹן קִרְוַיָא הָאִלֵין וּפַצְחֵיהֶן: [Targum Jonathan on Joshua / 19 / 32] לִבְנֵי נַפְתָּלִי נְפַק עַדְבָא שְׁתִיתָאָה לִבְנֵי נַפְתָּלִי לְזַרְעֲיַתְהוֹן: [Targum Jonathan on Joshua / 19 / 33] וַהֲוָה תְּחוּמְהוֹן מֵחֵלֶף מֵאַלוֹן בְּצַעֲנַנִים וַאֲדָמִי הַנֶקֶב וְיַבְנְאֵל עַד לַקוּם וַהֲווֹן מַפְקָנוֹהִי לְיַרְדְנָא: [Targum Jonathan on Joshua / 19 / 34] וְתַב תְּחוּמָא לְיַמָא לְאַזְנוֹת תָּבוֹר וּנְפַק מִתַּמָן לְחֻקֹקָה וּמְעָרַע בִּזְבוּלֻן מִדָרוֹמָא וּבְאָשֵׁר יְעָרַע מִמַעֲרָבָא וּבִיהוּדָה יַרְדְנָא מַדְנַח שִׁמְשָׁא: [Targum Jonathan on Joshua / 19 / 35] וְקִרְוִין כְרִיכָן הַצִדִים צֵר וְחַמַת רַקַת וְכִנָרֶת: [Targum Jonathan on Joshua / 19 / 36] וַאֲדָמָה וְהָרָמָה וְחָצוֹר: [Targum Jonathan on Joshua / 19 / 37] וְקֶדֶשׁ וְאֶדְרֶעִי וְעֵין חָצוֹר: [Targum Jonathan on Joshua / 19 / 38] וְיִרְאוֹן וּמִגְדַל אֵל חָרֵם וּבֵית עֲנָת וּבֵית שֶׁמֶשׁ קִרְוִין תְּשַׁע עַשְׂרֵי וּפַצְחֵיהֶן: [Targum Jonathan on Joshua / 19 / 39] דָא אַחֲסָנַת שִׁבְטָא דִבְנֵי נַפְתָּלִי לְזַרְעֲיַתְהוֹן קִרְוַיָא וּפַצְחֵיהֶן: [Targum Jonathan on Joshua / 19 / 40] לְשִׁבְטָא דִבְנֵי דָן לְזַרְעֲיַתְהוֹן נַפְקָא עַדְבָא שְׁבִיעָאָה: [Targum Jonathan on Joshua / 19 / 41] וַהֲוָה תְּחוּם אַחְסַנְתְּהוֹן צָרְעָה וְאֶשְׁתָּאוֹל וְקִרְיַת שִׁמְשָׁא: [Targum Jonathan on Joshua / 19 / 42] וְשַׁעֲלַבִּין וְאַיָלוֹן וְיִתְלָה: [Targum Jonathan on Joshua / 19 / 43] וְאֵילוֹן וְתִמְנָתָה וְעֶקְרוֹן: [Targum Jonathan on Joshua / 19 / 44] וְאֶלְתְּקֵה וְגִבְּתוֹן וּבַעֲלָת: [Targum Jonathan on Joshua / 19 / 45] וִיהֻד וּבְנֵי בְרַק וְגַת רִמוֹן: [Targum Jonathan on Joshua / 19 / 46] וּמֵי הַיַרְקוֹן וְרַקוֹן עִם תְּחוּמָא דִי לָקֳבֵיל יָפוֹ: [Targum Jonathan on Joshua / 19 / 47] וּנְפַק תְּחוּם בְּנֵי דָן מִנְהוֹן וּסְלִיקוּ בְּנֵי דָן וְאַגִיחוּ קְרָבָא עִם לֶשֶׁם וּכְבַשׁוּ יָתָהּ וּמְחוֹ יָתָה לְפִתְגַם דְחֶרֶב וִירִיתוּ יָתָהּ וִיתִיבוּ בָהּ וּקְרוֹ לְלֶשֶׁם דָן כְּשׁוּם דָן אֲבוּהוֹן: [Targum Jonathan on Joshua / 19 / 48] דָא אַחֲסָנַת שַׁבְטָא דִבְנֵי דָן לְזַרְעֲיַתְהוֹן קִרְוַיָא הָאִלֵין וּפַצְחֵיהֶן: [Targum Jonathan on Joshua / 19 / 49] וְשֵׁיצִיאוּ לְאַחְסָנָא יַת אַרְעָא לִתְחוּמָהָא וִיהָבוּ בְנֵי יִשְׂרָאֵל אַחֲסָנָא לִיהוֹשֻׁעַ בַּר נוּן בֵּינֵיהוֹן: [Targum Jonathan on Joshua / 19 / 50] עַל מֵימְרָא דַייָ יְהֲבוּ לֵיהּ יַת קַרְתָּא דִי שְׁאֵל יַת תִּמְנַת סָרַח בְּטוּרָא דְאֶפְרָיִם וּבְנָא יַת קַרְתָּא וִיתִיב בָּהּ: [Targum Jonathan on Joshua / 19 / 51] אִילֵן אַחֲסַנְתַּיָא דִי אַחֲסִין אֶלְעָזָר כַּהֲנָא וִיהוֹשֻׁעַ בַּר נוּן וְרֵישֵׁי אַבְהָתָא לְשִׁבְטַיָא דִבְנֵי יִשְׂרָאֵל בְּעַדְבָא בְּשִׁלֹה קֳדָם יְיָ בִּתְרַע מַשְׁכַּן זִמְנָא וְשֵׁיצִיאוּ מִלְפַלָגָא יַת אַרְעָא:

Study this passage

Prepare a passage questionPassage ID & source details Where did this come from?

Targum Jonathan on Joshua — 20

[Targum Jonathan on Joshua / 20 / 1] וּמַלֵל יְיָ עִם יְהוֹשֻׁעַ לְמֵימָר: [Targum Jonathan on Joshua / 20 / 2] מַלֵיל עִם בְּנֵי יִשְׂרָאֵל לְמֵימַר הָבוּ לְכוֹן יַת קִרְוֵי שֵׁיזָבוּתָא דְמַלֵילִית עִמְכוֹן בִּידָא דְמֹשֶׁה: [Targum Jonathan on Joshua / 20 / 3] לְמֵעֲרוֹק לְתַמָן קָטוֹלָא דְיִקְטוֹל נַפְשָׁא בְּשָׁלוּ בְּלָא מַדְעֵיה וְיֶהֱוְיָן לְכוֹן לְשֵׁזָבָא מִגָאֵל דְמָא: [Targum Jonathan on Joshua / 20 / 4] וְיַעֲרוֹק לַחֲדָא מִקִרְוַיָא הָאִלֵין וִיקוּם בְּמַעֲלָנָא דִתְרַע קַרְתָּא וִימַלֵיל קֳדָם סָבֵי קַרְתָּא הַהִיא יַת פִּתְגָמוֹהִי וִיכַנְשׁוּן יָתֵיהּ לְקַרְתָּא לְוַתְהוֹן וְיִתְּנוּן לֵיהּ אֲתַר וִיתֵיב עִמְהוֹן: [Targum Jonathan on Joshua / 20 / 5] וַאֲרֵי יִרְדוֹף גָאֵל דְמָא בַּתְרוֹהִי וְלָא יִמְסְרוּן יַת קָטוֹלָא בִּידֵיהּ אֲרֵי בְּלָא מַדָעֵיהּ קְטַל יַת חַבְרֵיהּ וְלָא שָׂנֵי הוּא לֵיהּ מֵאִתְמָלֵי וּמִדְקֳדָמוֹהִי: [Targum Jonathan on Joshua / 20 / 6] וִיתֵיב בְּקַרְתָּא הַהִיא עַד דִיקוּם קֳדָם כְנִשְׁתָּא לְדִינָא עַד דִימוּת כַּהֲנָא רַבָּא דִי יְהֵי בְיוֹמַיָא הָאִינוּן בְּכֵן יְתוּב קְטוֹלָא וְיֵיעוֹל לְקַרְתֵּיהּ וּלְבֵיתֵיהּ לְקַרְתָּא דִי עֲרַק מִתַּמָן: [Targum Jonathan on Joshua / 20 / 7] וְזַמִינוּ יַת קֶדֶשׁ בְּגִלִילָא בְּטוּרָא דְבֵית נַפְתָּלִי וְיַת שְׁכֶם בְּטוּרָא דְבֵית אֶפְרָיִם וְיַת קִרְיַת אַרְבַּע הִיא חֶבְרוֹן בְּטוּרָא דְבֵית יְהוּדָה: [Targum Jonathan on Joshua / 20 / 8] וּמֵעִיבְרָא לְיַרְדְנָא דִירִיחוֹ מַדִינְחָא יְהָבוּ יַת בֶּצֶר בְּמַדְבְּרָא בְּמֵישְׁרָא מִשִׁבְטָא דִרְאוּבֵן וְיַת רָאמוֹת בְּגִלְעָד מִשִׁבְטָא דְגָד וְיַת גוֹלָן בְּמַתְנָן מִשִׁבְטָא דִמְנַשֶׁה: [Targum Jonathan on Joshua / 20 / 9] אִלֵין הֲוָאָה קִרְוַיָא דִמְזַמְנָן לְכֹל בְּנֵי יִשְׂרָאֵל וּלְגִיוֹרַיָא דִי יִתְגַיְירוּן בֵּינֵיהוֹן לְמֶעְרָק לְתַמָן כָּל דְיִקְטוֹל נַפְשָׁא בְּשָׁלוּ וְלָא יְמוּת בִּידָא דְגָאֵיל דְמָא עַד דִיקוּם קֳדָם כְּנִשְׁתָּא:

Study this passage

Prepare a passage questionPassage ID & source details Where did this come from?

Targum Jonathan on Joshua — 21

[Targum Jonathan on Joshua / 21 / 1] וּקְרִיבוּ רֵישֵׁי אֲבָהַת לֵיוָאֵי לְוַת אֶלְעָזָר כַּהֲנָא וּלְוַת יְהוֹשֻׁעַ בַּר נוּן וּלְוַת רֵישֵׁי אֲבָהַת שִׁבְטַיָא לִבְנֵי יִשְׂרָאֵל: [Targum Jonathan on Joshua / 21 / 2] וּמַלִילוּ עִמְהוֹן בְּשִׁלֹה בְּאַרְעָא דִכְנָעַן לְמֵימַר יְיָ פַּקֵיד בְּיַד מֹשֶׁה לְמִתַּן לָנָא קִרְוִין לְמִתַּב וּרְוָחֵיהֶן לִבְעִירָנָא: [Targum Jonathan on Joshua / 21 / 3] וִיהָבוּ בְּנֵי יִשְׂרָאֵל לְלֵוָאֵי מֵאַחֲסַנְתְּהוֹן עַל מֵימְרָא דַייָ יַת קִרְוַיָא הָאִלֵין וְיַת רְוָחֵיהֶן: [Targum Jonathan on Joshua / 21 / 4] וּנְפַק עַדְבָא לְזַרְעֲיַת קְהָת וַהֲוָה לִבְנֵי אַהֲרֹן כַּהֲנָא מִן לֵוָאֵי מִשִׁבְטָא דִיהוּדָה וּמִשִׁבְטָא דְשִׁמְעוֹן וּמִשִׁבְטָא דְבִנְיָמִין בְּעַדְבָא קִרְוַיָא תְּלַת עַשְׂרֵי: [Targum Jonathan on Joshua / 21 / 5] וְלִבְנֵי קְהָת דְאִשְׁתָּאֲרוּ מִזַרְעִית שִׁבְטָא דְאֶפְרַיִם וּמִשִׁבְטָא דְדָן וּמִפַּלְגוּת שִׁבְטָא דִמְנַשֶׁה בְּעַדְבָא קִרְוִין עָשֶׂר: [Targum Jonathan on Joshua / 21 / 6] וְלִבְנֵי גֵרְשׁוֹן מִזַרְעֲיַת שִׁבְטָא דְיִשָׂשכָר וּמִשִׁבְטָא דְאָשֵׁר וּמִשִׁבְטָא דְנַפְתָּלִי וּמִפַּלְגוּת שִׁבְטָא דִמְנַשֶׁה בְּמַתְנַן בְּעַדְבָא קִרְוִין תְּלַת עַשְׂרֵי: [Targum Jonathan on Joshua / 21 / 7] לִבְנֵי מְרָרִי לְזַרְעֲיַתְהוֹן מִשִׁבְטָא דִרְאוּבֵן וּמִשִׁבְטָא דְגָד וּמִשִׁבְטָא דִזְבוּלֻן קִרְוִין תַּרְתֵּי עַשְׂרֵי: [Targum Jonathan on Joshua / 21 / 8] וִיהָבוּ בְּנֵי יִשְׂרָאֵל לְלֵוָאֵי יַת קִרְוַיָא הָאִילֵן וְיַת רְוָחֵיהֶן כְּמָא דְפַקֵד יְיָ בִּידָא דְמֹשֶׁה בְּעַדְבָא: [Targum Jonathan on Joshua / 21 / 9] וִיהָבוּ מִשִׁבְטָא דִבְנֵי יְהוּדָה וּמִשִׁבְטָא דִבְנֵי שִׁמְעוֹן יַת קִרְוַיָא הָאִלֵין דְאִתְפְּרָשָׁא בִּשְׁמָהָן: [Targum Jonathan on Joshua / 21 / 10] וַהֲוָה לִבְנֵי אַהֲרֹן מִזַרְעֲיַת קְהָת מִבְּנֵי לֵוָאֵי אֲרֵי לְהוֹן הֲוָה עַדְבָא בְּקַדְמֵיתָא: [Targum Jonathan on Joshua / 21 / 11] וִיהָבוּ לְהוֹן יַת קִרְיַת אַרְבַּע אֲבוּהוֹן דְגִבָּרַיָא הִיא חֶבְרוֹן בְּטוּרָא דִיהוּדָה וְיַת רְוָחָהָא סַחֲרָנָהָא: [Targum Jonathan on Joshua / 21 / 12] וְיַת חֲקַל קַרְתָּא וְיַת פַּצְחָהָא יְהָבוּ לְכָלֵב בַּר יְפֻנֶה בְּאַחְסַנְתֵּיהּ: [Targum Jonathan on Joshua / 21 / 13] וְלִבְנֵי אַהֲרֹן כַּהֲנָא יְהָבוּ יַת קִרְיַת שֵׁזָבוּת קָטוֹלָא יַת חֶבְרוֹן וְיַת רְוָחָהָא וְיַת לִבְנָה וְיַת רְוָחָהָא: [Targum Jonathan on Joshua / 21 / 14] וְיַת יַתִּר וְיַת רְוָחָהָא וְיַת אֶשְׁתְּמֹעַ וְיַת רְוָחָהָא: [Targum Jonathan on Joshua / 21 / 15] וְיַת חֹלֹן וְיַת רְוָחָהָא וְיַת דְבִיר וְיַת רְוָחָהָא: [Targum Jonathan on Joshua / 21 / 16] וְיַת עַיִן וְיַת רְוָחָהָא וְיַת יֻטָה וְיַת רְוָחָהָא יַת בֵּית שֶׁמֶשׁ וְיַת רְוָחָהָא קִרְוִין תְּשַׁע מִן תְּרֵין שִׁבְטַיָא הָאִלֵין: [Targum Jonathan on Joshua / 21 / 17] וּמִשִׁבְטָא דְבִנְיָמִין יַת גִּבְעוֹן וְיַת רְוָחָהָא יַת גֶבַע וְיַת רְוָחָהָא: [Targum Jonathan on Joshua / 21 / 18] יַת עֲנָתוֹת וְיַת רְוָחָהָא וְיַת עַלְמוֹן וְיַת רְוָחָהָא קִרְוִין אַרְבַּע: [Targum Jonathan on Joshua / 21 / 19] כָּל קִרְוֵי בְּנֵי אַהֲרֹן כַּהֲנַיָא תְּלַת עַשְׂרֵי קִרְוִין וּרְוָחֵיהֶן: [Targum Jonathan on Joshua / 21 / 20] וּלְזַרְעֲיַת בְּנֵי קְהָת לְוָאֵי דְאִשְׁתָּאֲרוּ מִבְּנֵי קְהָת וַהֲוָאָה קִרְוֵי עַדְבֵיהוֹן מִשִׁבְטָא דִבְנֵי אֶפְרָיִם: [Targum Jonathan on Joshua / 21 / 21] וִיהָבוּ לְהוֹן יַת קִרְיַת שֵׁזָבוּת קָטוֹלָא יַת שְׁכֶם וְיַת רְוָחָהָא בְטוּרָא דְבֵית אֶפְרַיִם וְיַת גֶזֶר וְיַת רְוָחָהָא: [Targum Jonathan on Joshua / 21 / 22] וְיַת קִבְצַיִם וְיַת רְוָחָהָא וְיַת בֵּית חוֹרוֹן וְיַת רְוָחָהָא קִרְוִין אַרְבַּע: [Targum Jonathan on Joshua / 21 / 23] וּמִשִׁבְטָא דְדָן יַת אֶלְתְּקֵא וְיַת רְוָחָהָא יַת גִבְּתוֹן וְיַת רְוָחָהָא: [Targum Jonathan on Joshua / 21 / 24] יַת אַיָלוֹן וְיַת רְוָחָהָא יַת גַת רִמוֹן וְיַת רְוָחָהָא קִרְוִין אַרְבַּע: [Targum Jonathan on Joshua / 21 / 25] וּמִפַּלְגוּת שִׁבְטָא דִמְנַשֶׁה יַת תַּעֲנָךְ וְיַת רְוָחָהָא וְיַת גַת רִמוֹן וְיַת רְוָחָהָא קִרְוִין תַּרְתֵּין: [Targum Jonathan on Joshua / 21 / 26] כָּל קִרְוִין עֲשַׂר וּרְוָחֵיהוֹן לְזַרְעֲיַת בְּנֵי קְהָת דְאִשְׁתָּאֲרוּ: [Targum Jonathan on Joshua / 21 / 27] וְלִבְנֵי גֵרְשׁוֹן מִזַרְעֲיַת לֵוָאֵי מִפַּלְגוּת שִׁבְטָא דִמְנַשֶׁה יַת קִרְיַת שֵׁזָבוּת קָטוֹלָא יַת גוֹלָן בְּמַתְנָן וְיַת רְוָחָהָא וְיַת בְּעֶשְׁתְּרָה וְיַת רְוָחָהָא קִרְוִין תַּרְתֵּין: [Targum Jonathan on Joshua / 21 / 28] וּמִשִׁבְטָא דְיִשָׂשכָר יַת קִשְׁיוֹן וְיַת רְוָחָהָא יַת דָבְרַת וְיַת רְוָחָהָא: [Targum Jonathan on Joshua / 21 / 29] יַת יַרְמוּת וְיַת רְוָחָהָא יַת עֵין גַנִים וְיַת רְוָחָהָא קִרְוִין אַרְבַּע: [Targum Jonathan on Joshua / 21 / 30] וּמִשִׁבְטָא דְאָשֵׁר יַת מִשְׁאָל וְיַת רְוָחָהָא יַת עַבְדוֹן וְיַת רְוָחָהָא: [Targum Jonathan on Joshua / 21 / 31] יַת חֶלְקַת וְיַת רְוָחָהָא וְיַת רְחוֹב וְיַת רְוָחָהָא קִרְוִין אַרְבַּע: [Targum Jonathan on Joshua / 21 / 32] וּמִשִׁבְטָא דְנַפְתָּלִי יַת קִרְיַת שֵׁזָבוּת קָטוֹלָא יַת קֶדֶשׁ בְּגָלִיל וְיַת רְוָחָהָא וְיַת חַמוֹת דֹאר וְיַת רְוָחָהָא וְיַת קַרְתָּן וְיַת רְוָחָהָא קִרְוִין תְּלָת: [Targum Jonathan on Joshua / 21 / 33] כָּל קִרְוֵי בְּנֵי גֵרְשׁוֹן לְזַרְעֲיַתְהוֹן תְּלַת עַסְרֵי קִרְוִין וּרְוָחֵיהֶן: [Targum Jonathan on Joshua / 21 / 34] וּלְזַרְעֲיַת בְּנֵי מְרָרִי לֵוָאֵי דִי אִשְׁתַּאֲרוּ מִן שִׁבְטָא דִזְבוּלֻן יַת יָקְנְעָם וְיַת רְוָחָהָא יַת קַרְתָּה וְיַתְ רְוָחָהָא: [Targum Jonathan on Joshua / 21 / 35] יַת דִמְנָה וְיַת רְוָחָהָא יַת נַהֲלָל וְיַת רְוָחָהָא קִרְוִין אַרְבַּע: [Targum Jonathan on Joshua / 21 / 36] (וּמִשִׁבְטָא דִרְאוּבֵן יַת קִרְיַת שֵׁזָבוּת קָטוֹלָא יַת בֶּצֶר בְּמַדְבְּרָא יַת יָהְצָה וְיַת רְוָחָהָא: [Targum Jonathan on Joshua / 21 / 37] יַת קְדֵמוֹת וְיַת רְוָחָהָא יַת מֵיפָעַת וְיַת רְוָחָהָא קִרְוִין אַרְבַּע:) [Targum Jonathan on Joshua / 21 / 38] וּמִשִׁבְטָא דְגָד יַת קִרְיַת שֵׁזָבוּת קָטוֹלָא יַת רָמוֹת בַּגִלְעָד וְיַת רְוָחָהָא וְיַת מַחֲנַיִם וְיַת רְוָחָהָא: [Targum Jonathan on Joshua / 21 / 39] יַת חֶשְׁבוֹן וְיַת רְוָחָהָא יַת יַעְזֵר וְיַת רְוָחָהָא כָּל קִרְוִין אַרְבַּע: [Targum Jonathan on Joshua / 21 / 40] כָּל קִרְוַיָא לִבְנֵי מְרָרִי לְזַרְעֲיַתְהוֹן דִי אִשְׁתָּאֲרוּ מִזַרְעֲיַת לֵיוָאֵי וַהֲוָה עַדְבְהוֹן קִרְוִין תַּרְתֵּי עַסְרֵי: [Targum Jonathan on Joshua / 21 / 41] כָּל קִרְוֵי לְוָאֵי בְּגוֹ אַחֲסָנַת בְּנֵי יִשְׂרָאֵל קִרְוִין אַרְבְּעִין וְתַמְנֵי וּרְוָחֵיהֶן: [Targum Jonathan on Joshua / 21 / 42] יֶהֶוְיָן קִרְוַיָא הָאִלֵין קִרְוֵי קִרְוֵי וְרַוְחָהָא סַחֲרָנָהָא כֵּן לְכָל קִרְוַיָא הָאִלֵין: [Targum Jonathan on Joshua / 21 / 43] וִיהַב יְיָ לְיִשְׂרָאֵל יַת כָּל אַרְעָא דִי קַיֵם לְמִתַּן לַאֲבָהַתְהוֹן וְאַחֲסִינוּהָ וִיתִיבוּ בָהּ: [Targum Jonathan on Joshua / 21 / 44] וְאַנִיחַ יְיָ לְהוֹן מִסְחוֹר סְחוֹר כְּכֹל דְקַיֵם לַאֲבָהַּתְהוֹן וְלָא קָם אֱנָשׁ מִן קֳדָמֵיהוֹן מִן כָּל בַּעֲלֵי דְבָבֵיהוֹן יַת כָּל בַּעֲלֵי דְבָבֵיהוֹן מְסַר יְיָ בִּידֵיהוֹן: [Targum Jonathan on Joshua / 21 / 45] לָא בַטִיל פִּתְגָמָא מִכֹּל פִּתְגָמוֹהִי תַקְנַיָא דִי מַלֵיל יְיָ עַל בֵּית יִשְׂרָאֵל כּוּלְהוֹן אִתְקַיָימוּ:

Study this passage

Prepare a passage questionPassage ID & source details Where did this come from?

Targum Jonathan on Joshua — 22

[Targum Jonathan on Joshua / 22 / 1] בְּכֵן קְרָא יְהוֹשֻׁעַ לְשִׁבְטָא דִרְאוּבֵן וּלְשִׁבְטָא דְגָד וּלְפַלְגוּת שִׁבְטָא דִמְנַשֶׁה: [Targum Jonathan on Joshua / 22 / 2] וַאֲמַר לְהוֹן אַתּוּן נְטַרְתּוּן יַת כָּל דְפַקֵד יַתְכוֹן מֹשֶׁה עַבְדָא דַייָ וְקַבֵּילְתּוּן לְמֵימְרִי לְכֹל דִי פַקְדֵית יַתְכוֹן: [Targum Jonathan on Joshua / 22 / 3] לָא שְׁבַקְתּוּן יַת אֲחוּכוֹן דְנַן יוֹמִין סַגִיאִין עַד יוֹמָא הָדֵין וּנְטַרְתּוּן יַת מַטְרַת תַּפְקֵידְתָּא מֵמְרָא דַייָ אֱלָהָכוֹן: [Targum Jonathan on Joshua / 22 / 4] וּכְעַן אַנִיחַ יְיָ אֱלָהָכוֹן לַאֲחוּכוֹן כְּמָא דִי מַלֵיל לְהוֹן וּכְעַן אִתְפְּנִיאוּ וֶאֱזִילוּ לְכוֹן לְקִרְוֵיכוֹן לְאַרְעָא אַחְסַנְתְּכוֹן דִיהַב לְכוֹן מֹשֶׁה עַבְדָא דַייָ בְּעִבְרָא דְיַרְדְנָא: [Targum Jonathan on Joshua / 22 / 5] לְחוֹד אִסְתַּמָרוּ לַחֲדָא לְמֶעֱבַּד יַת תַפְקֵדְתָּא וְיַת אוֹרַיְתָא דִי פַקֵיד יַתְכוֹן מֹשֶׁה עַבְדָא דַייָ לְמִרְחַם יַת יְיָ אֱלָהָכוֹן וְלִמְהַךְ בְּכָל אוֹרְחָן דְתַקְנָן קֳדָמוֹהִי וּלְמִטַר פִּקוּדֹהִי וּלְאִתְקְרָבָא לִדְחַלְתֵּיהּ וּלְמִפְלַח קֳדָמוֹהִי בְּכָל לִבְּכוֹן וּבְכָל נַפְשְׁכוֹן: [Targum Jonathan on Joshua / 22 / 6] וּבָרְכִינוּן יְהוֹשֻׁעַ וְשַׁלְחִינוּן וַאֲזַלוּ לְקִרְוֵיהוֹן: [Targum Jonathan on Joshua / 22 / 7] וּלְפַלְגוּת שִׁבְטָא דִמְנַשֶׁה יְהַב מֹשֶׁה בְּמַתְנָן וּלְפַלְגֵיהוֹן יְהַב יְהוֹשֻׁעַ עִם אֲחֵיהוֹן בְּעִבְרָא דְיַרְדְנָא לְמַעֲרָבָא וְאַף אֲרֵי שַׁלְחִינוּן יְהוֹשֻׁעַ לְקִרְוֵיהוֹן וּבָרְכִינוּן: [Targum Jonathan on Joshua / 22 / 8] וַאֲמַר לְהוֹן לְמֵימָר בְּנִכְסִין סַגִיאִין תּוּבוּ לְקִרְוֵיכוֹן וּבִבְעִירָא סַגִי לַחֲדָא בְּכַסְפָּא וּבְדַהֲבָא וּבִנְחָשָׁא וּבְפַרְזְלָא וּבִלְבוּשִׁין סַגִי לַחֲדָא פַּלִיגוֹ בִּזַת בַּעֲלֵי דְבָבֵיכוֹן עִם אֲחֵיכוֹן: [Targum Jonathan on Joshua / 22 / 9] וְתָבוּ וַאֲזַלוּ בְּנֵי רְאוּבֵן וּבְנֵי גָד וּפַלְגוּת שִׁבְטָא דִמְנַשֶׁה מִלְוַת בְּנֵי יִשְׂרָאֵל מִשִׁלֹה דִי בְאַרְעָא דִכְנָעַן לְמֵיזַל לְאַרְעָא דְגִלְעָד לְאַרְעָא אַחְסַנְתְּהוֹן דְאַחֲסִינוּ בָהּ עַל מֵימְרָא דַייָ בִּידָא דְמֹשֶׁה: [Targum Jonathan on Joshua / 22 / 10] וַאֲתוֹ לִגְלִילֵי יַרְדְנָא דִי בְּאַרְעָא דִכְנָעַן וּבְנוֹ בְנֵי רְאוּבֵן וּבְנֵי גָד וּפַלְגוּת שִׁבְטָא דִמְנַשֶׁה תַּמָן מַדְבְּחָא עַל יַרְדְנָא מַדְבַּח רַב לְמֶחֱזֵי: [Targum Jonathan on Joshua / 22 / 11] וּשְׁמָעוּ בְנֵי יִשְׂרָאֵל לְמֵימָר הָא בְּנוֹ בְּנֵי רְאוּבֵן וּבְנֵי גָד וּפַלְגוּת שִׁבְטָא דִמְנַשֶׁה יַת מַדְבְּחָא לָקֳבֵיל אַרְעָא דִכְנָעַן בִּגְלִילֵי יַרְדְנָא דִלְעִבַּר בְּנֵי יִשְׂרָאֵל: [Targum Jonathan on Joshua / 22 / 12] וּשְׁמָעוּ בְּנֵי יִשְׂרָאֵל וְאִתְכְּנִישׁוּ כָּל כְּנִשְׁתָּא דִבְנֵי יִשְׂרָאֵל לְשִׁלֹה לְמֵיסַק עֲלֵיהוֹן לְחֵילָא: [Targum Jonathan on Joshua / 22 / 13] וּשְׁלָחוּ בְּנֵי יִשְׂרָאֵל לְוַת בְּנֵי רְאוּבֵן וּלְוַת בְּנֵי גָד וּלְוַת פַּלְגוּת שִׁבְטָא דִמְנַשֶׁה לְאַרְעָא גִלְעָד יַת פִּנְחָס בַּר אֶלְעָזָר כַּהֲנָא: [Targum Jonathan on Joshua / 22 / 14] וְעַשְׂרָא רַבְרְבִין עִמֵיהּ רַבָּא חָד רַבָּא חָד לְבֵית אַבָּא לְכָל שִׁבְטַיָא דְיִשְׂרָאֵל וּגְבַר רֵישׁ בֵּית אֲבָהַתְהוֹן אִינוּן לְאַלְפַיָא דְיִשְׂרָאֵל: [Targum Jonathan on Joshua / 22 / 15] וַאֲתוֹ לְוַת בְּנֵי רְאוּבֵן וּלְוַת בְּנֵי גָד וּלְוַת פַּלְגוּת שִׁבְטָא דִמְנַשֶׁה לְאַרְעָא דְגִלְעָד וּמַלִילוּ עִמְהוֹן לְמֵימָר: [Targum Jonathan on Joshua / 22 / 16] כְּדֵין אֲמַרוּ כָּל כְּנִשְׁתָּא דַייָ מָא שִׁקְרָא הָדֵין דִי שְׁקַרְתּוּן בְּמֵימְרָא דֶאֱלָהָא יִשְׂרָאֵל לְמִיתַב יוֹמָא דֵין מִבָּתַר פּוּלְחָנָא דַייָ בְּמִבְנְכֹן לְכוֹן מַדְבְּחָא לְמִמְרַדְכוֹן יוֹמָא דֵין בְּמֵימְרָא דַיָי: [Targum Jonathan on Joshua / 22 / 17] הַזְעֵיר לָנָא יַת חוֹבָא דִפְעוֹר דְלָא אִדַכִּינָא מִנֵיהּ עַד יוֹמָא הָדֵין וַהֲוַת מְחָתָא בִּכְנִשְׁתָּא דַיָי: [Targum Jonathan on Joshua / 22 / 18] וְאַתּוּן תְּתוּבוּן יוֹמָא דֵין מִבָּתַר פּוּלְחָנָא דַייָ וִיהֵי אַתּוּן תִּמְרְדוּן יוֹמָא דֵין בְּמֵימְרָא דַייָ וּמְחַר עַל כָּל כְּנִשְׁתָּא דְיִשְׂרָאֵל יְהֵי רוּגְזָא: [Targum Jonathan on Joshua / 22 / 19] וּבְרַם אִם מְסָאֲבָא אֲרַע אַחְסַנְתְּכוֹן עֲבָרוּ לְכוֹן לַאֲרַע אַחְסַנַת עַמָא דַייָ דִי שְׁרָא תַמָן מַשְׁכְּנָא דַייָ וְאַחֲסִינוּ בֵּינָנָא וּבְמֵימְרָא דַייָ לָא תִמְרְדוּן וּבָנָא לָא תִמְרְדוּן בְּמִבְנֵיכוֹן לְכוֹן מַדְבְּחָא בַּר מִמַדְבְּחָא דַייָ אֱלָהָנָא: [Targum Jonathan on Joshua / 22 / 20] הֲלָא עָכָן בַּר זָרַח שְׁקַר שִׁקְרָא בְּחֶרְמָא וְעַל כָּל כְּנִשְׁתָּא דְיִשְׂרָאֵל הֲוָה רוּגְזָא וְהוּא גַבְרָא חָד לָא מִית בְּחוֹבֵיהּ: [Targum Jonathan on Joshua / 22 / 21] וַאֲתִיבוּ בְּנֵי רְאוּבֵן וּבְנֵי גָד וּפַלְגוּת שִׁבְטָא דִמְנָשֶׁה וּמַלִילוּ עִם רֵישֵׁי אַלְפַיָא דְיִשְׂרָאֵל: [Targum Jonathan on Joshua / 22 / 22] אֵל אֱלֹהִים יְיָ אֵל אֱלֹהִים יְיָ קֳדָמוֹהִי יְדִיעַ וְיִשְׂרָאֵל בְּסוֹפָא יֵדַע אִם בְּמֵרְדָא וְאִם בְּשִׁקְרָא שְׁקַרְנָא בְמֵימְרָא דַייָ לָא תִפְרְקִינָנָא יוֹמָא הָדֵין: [Targum Jonathan on Joshua / 22 / 23] לְמִבְנָא לָנָא מַדְבְּחָא לְמֵיתַב מִבָּתַר פּוּלְחָנָא דַייָ וְאִם לְאַסָקָא עֲלוֹהִי עֲלָתָא וּמִנְחָתָא וְאִם לְמֶעְבַּד עֲלוֹהִי נִכְסַת קוּדְשִׁין יְיָ הוּא יִתְבַּע: [Targum Jonathan on Joshua / 22 / 24] וְאִם לָא מְיוֹצְפָא מִפִּתְגַם עָבַדְנָא יַת דָא לְמֵימָר מְחַר יֵימְרוּן בְּנֵיכוֹן לִבְנָנָא לְמֵימָר לֵית לְכוֹן חוּלַק בְּמֵימְרָא דַייָ אֱלָהָא דְיִשְׂרָאֵל: [Targum Jonathan on Joshua / 22 / 25] וּתְחוּמָא יְהַב יְיָ בֵּינָנָא וּבֵינֵיכוֹן בְּנֵי רְאוּבֵן וּבְנֵי גָד יַת יַרְדְנָא לֵית לְכוֹן חוּלַק בְּמֵימְרָא דַייָ וִיבַטְלוּן בְּנֵיכוֹן יַת בְּנָנָא בְּדִיל דְלָא לְמִדְחַל מִן קֳדָם יְיָ: [Targum Jonathan on Joshua / 22 / 26] וַאֲמַרְנָא נַעְבֵּיד כְּעַן לָנָא לְמִבְנֵי יַת מַדְבְּחָא לָא לַעֲלָתָא וְלָא לְנִכְסַת קוּדְשַׁיָא: [Targum Jonathan on Joshua / 22 / 27] אֲרֵי סָהִיד הוּא בֵּינָנָא וּבֵינֵיכוֹן וּבֵין דָרָנָא בַּתְרָנָא לְמִפְלַח יַת פּוּלְחָנָא דַייָ קֳדָמוֹהִי בְּעַלָוְתָנָא וּבְדִבְחָנָא וּבְנִכְסַת קוּדְשָׁנָא וְלָא יֵמְרוּן בְּנֵיכוֹן לִבְנָנָא מְחַר לֵית לְכוֹן חוּלַק בְּמֵימְרָא דַיָי: [Targum Jonathan on Joshua / 22 / 28] וַאֲמַרְנָא וִיהֵי אֲרֵי יֵימְרוּן לָנָא וּלְדָרָנָא מְחַר וְנֵימַר חֲזוֹ יַת דְמוּת מַדְבְּחָא דַייָ דִי עֲבַדוּ אַבְהָתָנָא לָא לַעֲלָתָא וְלֹא לְנִכְסַת קוּדְשַׁיָא אֲרֵי סָהִיד הוּא בֵּינָנָא וּבֵינֵיכוֹן: [Targum Jonathan on Joshua / 22 / 29] חַס לָנָא מִנָנָא מִלְמֶחְטֵי קֳדָמוֹהִי מִלְמֵרַד בְּמֵימְרָא דַייָ וּלְמִיתַב יוֹמָא דֵין מִבָּתַר פּוּלְחָנָא דַייָ לְמִבְנֵי מַדְבְּחָא לַעֲלָתָא לְמִנְחָתָא וּלְנִכְסַת קוּדְשַׁיָא בַּר מִמַדְבְּחָא דַייָ אֱלָהָנָא דִי קֳדָם מַשְׁכְּנֵיהּ: [Targum Jonathan on Joshua / 22 / 30] וּשְׁמַע פִּינְחָס כַּהֲנָא וְרַבְרְבֵי כְנִשְׁתָּא וְרֵישֵׁי אַלְפַיָא דְיִשְׂרָאֵל דִי עִמֵיהּ יַת פִּתְגָמַיָא דִי מַלִילוּ בְּנֵי רְאוּבֵן וּבְנֵי גָד וּבְנֵי מְנַשֶׁה וּשְׁפַר בְּעֵינֵיהוֹן: [Targum Jonathan on Joshua / 22 / 31] וַאֲמַר פִינְחָס בַּר אֶלְעָזָר כַּהֲנָא לִבְנֵי רְאוּבֵן וְלִבְנֵי גָד וְלִבְנֵי מְנַשֶׁה יוֹמָא דֵין יְדַעְנָא אֲרֵי בֵינָנָא שַׁרְיָא שְׁכִינְתָּא דַייָ דְלָא שְׁקַרְתּוּן בְּמֵימְרָא דַייָ שִׁקְרָא הָדֵין בְּכֵן שֵׁיזַבְתּוּן יַת בְּנֵי יִשְׂרָאֵל מִיַד מֵימְרָא דַיָי: [Targum Jonathan on Joshua / 22 / 32] וְתַב פִינְחָס בַּר אֶלְעָזָר כַּהֲנָא וְרַבְרְבַיָא מִלְוַת בְּנֵי רְאוּבֵן וּמִלְּוַת בְּנֵי גָד מֵאַרְעָא גִלְעָד לְאַרְעָא דִכְנָעַן לְוַת בְּנֵי יִשְׂרָאֵל וַאֲתִיבוּ יַתְהוֹן פִּתְגָמָא: [Targum Jonathan on Joshua / 22 / 33] וּשְׁפַר פִּתְגָמָא בְּעֵינֵי בְּנֵי יִשְׂרָאֵל וְאוֹדִיאוּ קֳדָם יְיָ בְּנֵי יִשְׂרָאֵל וְלָא אֲמַרוּ לְמִיסַק עֲלֵיהוֹן לְחֵילָא לְחַבָּלָא יַת אַרְעָא דִבְנֵי רְאוּבֵן וּבְנֵי גָד יַתְבִין בָּהּ: [Targum Jonathan on Joshua / 22 / 34] וּקְרוֹ בְּנֵי רְאוּבֵן וּבְנֵי גָד לְמַדְבְּחָא אֲרֵי סָהִיד הוּא בֵּינָנָא אֲרֵי יְיָ הוּא אֱלֹהִים:

Study this passage

Prepare a passage questionPassage ID & source details Where did this come from?

Targum Jonathan on Joshua — 23

[Targum Jonathan on Joshua / 23 / 1] וַהֲוָה לִזְמַן יוֹמִין סַגִיאִין בָּתַר דְאַנִיחַ יְיָ לְיִשְׂרָאֵל מִכָּל בַּעֲלֵי דְבָבֵיהוֹן מִסְחוֹר סְחוֹר וִיהוֹשֻׁעַ סִיב עַל בְּיוֹמִין: [Targum Jonathan on Joshua / 23 / 2] וּקְרָא יְהוֹשֻׁעַ לְכָל יִשְׂרָאֵל לְסָבוֹהִי וּלְרֵישׁוֹהִי וּלְדַיָנוֹהִי וּלְסַרְכוֹהִי וַאֲמַר לְהוֹן אֲנָא סִיבִית עָלִית בְּיוֹמִין: [Targum Jonathan on Joshua / 23 / 3] וְאַתּוּן חֲזֵיתוּן יַת כָּל דַעֲבַד יְיָ אֱלָהָכוֹן לְכָל עַמְמַיָא הָאִלֵין מִן קֳדָמֵיכוֹן אֲרֵי יְיָ אֱלָהָכוֹן מֵימְרֵיהּ מֵגִיחַ לְכוֹן: [Targum Jonathan on Joshua / 23 / 4] חֲזוֹ דִי פַלְגִית לְכוֹן יַת עַמְמַיָא דִי אִשְׁתָּאֲרוּ הָאִלֵין בְּאַחֲסָנָא לְשִׁבְטֵיכוֹן מִן יַרְדְנָא וְכָל עַמְמַיָא דִי שֵׁיצֵיתִי וְיַמָא רַבָּא מַעֲלָנֵי שִׁמְשָׁא: [Targum Jonathan on Joshua / 23 / 5] וַיָי אֱלָהָכוֹן הוּא יִתְבְּרִינוּן מִן קֳדָמֵיכוֹן וִיתָרֵךְ יַתְהוֹן מִן קֳדָמֵיכוֹן וְתֵרְתוּן יַת אַרְעֲהוֹן כְּמָא דִי מַלֵיל יְיָ אֱלָהָכוֹן לְכוֹן: [Targum Jonathan on Joshua / 23 / 6] וְתִתְקְפוּן לַחֲדָא לְמִטַר וּלְמֶעְבַּד יַת כָּל דִכְתִיב בְּסֵפֶר אוֹרַיְתָא דְמֹשֶׁה בְּדִיל דְלָא לְמִיסְטֵי מִינֵיהּ לְיַמִינָא וְלִשְׂמָאלָא: [Targum Jonathan on Joshua / 23 / 7] בְּדִיל דְלָא לְאִתְעֲרָבָא בְּעַמְמַיָא הָאִלֵין דִי אִשְׁתָּאֲרוּ הָאִלֵין עִמְכוֹן וּבְשׁוּם טַעֲוַתְהוֹן לָא תִדְכְּרוּן וְלָא תְקִימוּן וְלָא תִפְלְחוּנוּן וְלָא תִסְגְדוּן לְהוֹן: [Targum Jonathan on Joshua / 23 / 8] אֱלָהֵן בְּדַחַלְתָּא דַייָ אֱלָהָכוֹן תִּדְבְּקוּן כְּמָא דַעֲבַדְתּוּן עַד יוֹמָא הָדֵין: [Targum Jonathan on Joshua / 23 / 9] וְתָרֵיךְ יְיָ מִן קֳדָמֵיכוֹן עַמְמִין רַבְרְבִין וְתַקִיפִין וְאַתּוּן לָא קָם אֱנַשׁ קֳדָמֵיכוֹן עַד יוֹמָא הָדֵין: [Targum Jonathan on Joshua / 23 / 10] גַבְרָא חָד מִנְכוֹן יִרְדוֹף אַלְפָא אֲרֵי יְיָ אֱלָהָכוֹן מֵימְרֵיהּ מֵגִיחַ לְכוֹן כְּמָא דִי מַלֵיל לְכוֹן: [Targum Jonathan on Joshua / 23 / 11] וְתִסְתַּמְרוּן לַחֲדָא לְנַפְשָׁתֵיכוֹן לְמִרְחַם יַת יְיָ אֱלָהָכוֹן: [Targum Jonathan on Joshua / 23 / 12] אֲרֵי אִם מֵיתַב תְּתוּבוּן וְתִדְבְּקוּן בִּשְׁאָר עַמְמַיָא הָאִלֵין דִי אִשְׁתָּאֲרוּ הָאִלֵין עִמְכוֹן וְתִתְחַתְּנוּן בְּהוֹן וְתִתְעַרְבוּן בְּהוֹן וְאִינוּן יִתְעַרְבוּן בְּכוֹן: [Targum Jonathan on Joshua / 23 / 13] מִדַע תֵּדְעוּן אֲרֵי לָא יוֹסִיף מֵימְרָא דַייָ אֱלָהָכוֹן לְתָרָכָא יַת עַמְמַיָא הָאִלֵין מִן קֳדָמֵיכוֹן וִיהוֹן לְכוֹן לִתְבִיר וּלְתַקְלָא וּלְסִיעַן נַטְלָן זְיָן לְקִבְלֵיכוֹן וּלְמַשִׁרְיָן מַקְפַּנְכוֹן עַד דְתֵבְדוּן מֵעַל אַרְעָא טַבְתָא הָדָא דִי יְהַב לְכוֹן יְיָ אֱלָהָכוֹן: [Targum Jonathan on Joshua / 23 / 14] וְהָא אֲנָא אָזֵיל יוֹמָא דֵין בְּאוֹרַח כָּל אַרְעָא וְתֵדְעוּן בְּכָל לִבְּכוֹן וּבְכָל נַפְשְׁכוֹן אֲרֵי לָא בַטִיל פִּתְגָמָא חָדָא מִכָּל פִּתְגָמַיָא תַקְנַיָא דִי מַלֵיל יְיָ אֱלָהָכוֹן עֲלֵיכוֹן כּוּלְהוֹן אִתְקַיְמוּ לְכוֹן לָא בָטֵיל מִנְכוֹן פִּתְגָמָא חָדָא: [Targum Jonathan on Joshua / 23 / 15] וִיהֵי כְּמָא דְאִתְקַיָמוּ עֲלֵיכוֹן כָּל פִּתְגָמַיָא תַקְנַיָא דִי מַלֵיל יְיָ אֱלָהָכוֹן עֲלֵיכוֹן כֵּן יַיְתֵי יְיָ עֲלֵיכוֹן יַת כָּל פִּתְגָמַיָא בִּישַׁיָא עַד דִישֵׁיצֵי יַתְכוֹן מֵעַל אַרְעָא טַבְתָא הָדָא דִי יְהַב לְכוֹן יְיָ אֱלָהָכוֹן: [Targum Jonathan on Joshua / 23 / 16] בְּמֶעְבַּרְכוֹן יַת קְיָמָא דַייָ אֱלָהָכוֹן דְפַקֵד יַתְכוֹן וְתַהֲכוּן וְתִפְלְחוּן לְטַעֲוַת עַמְמַיָא וְתִסְגְדוּן לְהוֹן וְיִתְקֵיף רוּגְזָא דַייָ בְּכוֹן וְתֵיבְדוּן בִּפְרִיעַ מֵעַל אַרְעָא טַבְתָא דִיהַב לְכוֹן:

Study this passage

Prepare a passage questionPassage ID & source details Where did this come from?

Targum Jonathan on Joshua — 24

[Targum Jonathan on Joshua / 24 / 1] וּכְנַשׁ יְהוֹשֻׁעַ יַת כָּל שִׁבְטַיָא דְיִשְׂרָאֵל לִשְׁכֶם וּקְרָא לְסָבֵי יִשְׂרָאֵל וּלְרֵישׁוֹהִי וּלְדַיָנוֹהִי וּלְסַרְכוֹהִי וְאִתְעַתְּדוּ קֳדָם יְיָ: [Targum Jonathan on Joshua / 24 / 2] וַאֲמַר יְהוֹשֻׁעַ לְכָל עַמָא כִּדְנַן אֲמַר יְיָ אֱלָהָא דְיִשְׂרָאֵל בְּעִבַּר פְּרָת יְתַבוּ אֲבָהַתְכוֹן מֵעַלְמָא תֶּרַח אֲבוּהִי דְאַבְרָהָם וַאֲבוּהִי דְנָחוֹר וּפְלָחוּ לְטַעֲוַת עַמְמַיָא: [Targum Jonathan on Joshua / 24 / 3] וְדַבְּרֵית יַת אֲבוּכוֹן יַת אַבְרָהָם מֵעִבַּר פְּרָת וְאוֹבֵלִית יָתֵיהּ בְּכָל אַרְעָא דִכְנָעַן וְאַסְגֵיתִי יַת בְּנוֹהִי וִיהָבִית לֵיהּ יַת יִצְחָק: [Targum Jonathan on Joshua / 24 / 4] וִיהָבִית לְיִצְחָק יַת יַעֲקֹב וְיַת עֵשָׂו וִיהָבִית לְעֵשָׂו יַת טוּרָא דְשֵׂעִיר לְמֵירַת יָתֵיהּ וְיַעֲקֹב וּבְנוֹהִי נְחָתוּ לְמִצְרָיִם: [Targum Jonathan on Joshua / 24 / 5] וְשַׁלְחֵית יַת מֹשֶׁה וְיַת אַהֲרֹן וּמָחִית יַת מִצְרָאֵי כְּמָא דְעַבְדִית בֵּינֵיהוֹן וּבָתַר כֵּן אַפְקֵית יַתְכוֹן: [Targum Jonathan on Joshua / 24 / 6] וְאַפְקֵית יַת אֲבָהַתְכוֹן מִמִצְרַיִם וַאֲתֵיתוּן לְיַמָא וּרְדָפוּ מִצְרָאֵי בָּתַר אֲבָהַתְכוֹן בִּרְתִיכִין וּבְפָרָשִׁין לְיַמָא דְסוּף: [Targum Jonathan on Joshua / 24 / 7] וּצְעִיקוּ קֳדָם יְיָ וְשַׁוִי קְבָלָא בֵּינֵיכוֹן וּבֵין מִצְרָאֵי וְאַיְתֵי עֲלוֹהִי יַת יַמָא וַחֲפָנוּן וַחֲזָאָה עֵינֵיכוֹן יַת דִי עַבְדֵית בְּמִצְרַיִם וִיתֵיבְתּוּן בְּמַדְבְּרָא יוֹמִין סַגִיאִין: [Targum Jonathan on Joshua / 24 / 8] וְאַעֲלֵית יַתְכוֹן לַאֲרַע אֱמוֹרָאָה דְיָתֵיב בְּעִבְרָא דְיַרְדְנָא וְאַגִיחוּ קְרָבָא עִמְכוֹן וּמְסָרִית יַתְהוֹן בְּיֶדְכוֹן וִירִיתְתּוּן יַת אַרְעֲהוֹן וְשֵׁיצִיתִינוּן מִן קֳדָמֵיכוֹן: [Targum Jonathan on Joshua / 24 / 9] וְקָם בָּלָק בַּר צִפּוֹר מַלְכָּא דְמוֹאָב וְאַגִיחַ קְרָבָא בְּיִשְׂרָאֵל וּשְׁלַח וּקְרָא לְבִלְעָם בַּר בְּעוֹר לְמֵילַט יַתְכוֹן: [Targum Jonathan on Joshua / 24 / 10] וְלָא אֲבִיתִי לְקַבָּלָא מִן בִּלְעָם וּבָרִיךְ בְּרָכָא יַתְכוֹן וְשֵׁיזְבוּת יַתְכוֹן מִן יְדֵיהּ: [Targum Jonathan on Joshua / 24 / 11] וַעֲבַרְתּוּן יַת יַרְדְנָא וַאֲתֵיתוּן לִירִיחוֹ וְאַגִיחוּ קְרָבָא בְּכוֹן יַתְבֵי יְרִיחוֹ אֱמוֹרָאֵי וּפְּרִזָאֵי וּכְנַעֲנָאֵי וְחִתָּאֵי וְגִרְגָשָׁאֵי חִוָאֵי וִיבוּסָאֵי וּמַסְרֵית יַתְהוֹן בְּיֶדְכוֹן: [Targum Jonathan on Joshua / 24 / 12] וּשְׁלָחִית קֳדָמֵיכוֹן יַת עַרְעִיתָא וְתָרְכֵית יַתְהוֹן מִן קֳדָמֵיכוֹן תְּרֵין מַלְכֵי אֱמוֹרָאֵי לָא בְחַרְבָּךְ וְלָא בְקַשְׁתָּךְ: [Targum Jonathan on Joshua / 24 / 13] וְיַהֲבֵית לְכוֹן אַרְעָא דִי לָא לְאִיתוּן בָּהּ וְקִרְוִין דִי לָא בְנִיתוּן וִיתֵיבְתּוּן בְּהוֹן כַּרְמִין וְזֵיתִין דִי לָא נְצֵיבְתּוּן אַתּוּן אָכְלִין: [Targum Jonathan on Joshua / 24 / 14] וּכְעַן דְחִילוּ מִן קֳדָם יְיָ וּפְלַחוּ קֳדָמוֹהִי בִּשְׁלָמוּתָא וּבְקוּשְׁטָא וְאַעֲדוּ יַת טַעֲוָתָא דִי פַלְחוּ אֲבָהַתְכוֹן בְּעִבַר פְּרָת וּבְמִצְרַיִם וּפְלַחוּ קֳדָם יְיָ: [Targum Jonathan on Joshua / 24 / 15] וְאִם בִּישׁ בְּעֵינֵיכוֹן לְמִפְלַח קֳדָם יְיָ בְּחָרוּ לְכוֹן יוֹמָא דֵין קֳדָם מָן תִּפְלְחוּן אִם יַת טַעֲוָתָא דִי פְלַחוּ אֲבָהַתְכוֹן דִבְעִיבְרָא דִפְרָת וְאִם יַת טַעֲוַת אֱמוֹרָאֵי דִי אַתּוּן יַתְבִין בְּאַרְעֲהוֹן בְּרַם אֲנָא וֶאֱנַשׁ בֵּיתִי נִפְלַח קֳדָם יְיָ: [Targum Jonathan on Joshua / 24 / 16] וַאֲתֵיב עַמָא וַאֲמַר חַס לָנָא מִלְמִשְׁבַּק יַת פּוּלְחָנָא דַייָ לְמִפְלַח לְטַעֲוַת עַמְמַיָא: [Targum Jonathan on Joshua / 24 / 17] אֲרֵי יְיָ אֱלָהָנָא הוּא דְאַסֵיק יָתָנָא וְיַת אַבְהָתָנָא מֵאַרְעָא דְמִצְרַיִם מִבֵּית עַבְדוּתָא וְדִי עֲבַד לְעֵינָנָא יַת אָתַיָא וְיַת רַבְרְבָתָא הָאִלֵין וּנְטָרָנָא בְּכָל אוֹרְחָא דִי הֲלִיכְנָא בָּהּ וּבְכָל עַמְמַיָא דִי עָבַרְנָא בֵּינֵיהוֹן: [Targum Jonathan on Joshua / 24 / 18] וְתָרֵיךְ יְיָ יַת כָּל עַמְמַיָא וְיַת אֱמוֹרָאָה יָתֵיב אַרְעָא מִן קֳדָמָנָא אַף אֲנַחְנָא נִפְלַח קֳדָם יְיָ אֲרֵי הוּא אֱלָהָנָא: [Targum Jonathan on Joshua / 24 / 19] וַאֲמַר יְהוֹשֻׁעַ לְעַמָא לָא תוּכְלוּן לְמִפְלַח קֳדָם יְיָ אֲרֵי אֱלָהָא קַדִישָׁא הוּא אֵל קַנָא הוּא מִן קֳדָם דִין דִקְשׁוֹט לָא יִשְׁבּוֹק לְחוֹבֵיכוֹן וּלְחַטָאֵיכוֹן: [Targum Jonathan on Joshua / 24 / 20] אֲרֵי תִשְׁבָּקוּן יַת פּוּלְחָנָא דַייָ וְתִפְלְחוּן טַעֲוַת עַמְמַיָא וִיתוּב וְיַבְאֵשׁ לְכוֹן וִישֵׁיצֵי יַתְכוֹן בָּתַר דְאוֹטֵיב לְכוֹן: [Targum Jonathan on Joshua / 24 / 21] וַאֲמַר עַמָא לִיהוֹשֻׁעַ לָא אֱלָהֵן קֳדָם יְיָ נִפְלָח: [Targum Jonathan on Joshua / 24 / 22] וַאֲמַר יְהוֹשֻׁעַ לְעַמָא סַהֲדִין אַתּוּן בְּנַפְשַׁתְכוֹן אֲרֵי אַתּוּן בְּחַרְתּוּן לְכוֹן יַת פּוּלְחָנָא דַייָ לְמִפְלַח קֳדָמוֹהִי וַאֲמַרוּ סַהֲדִין: [Targum Jonathan on Joshua / 24 / 23] וּכְעַן אַעֲדוֹ יַת טַעֲוַת עַמְמַיָא דִי בֵינֵיכוֹן וְאַפְנוּ יַת לִבְּכוֹן לְפוּלְחָנָא דַייָ אֱלָהָא דְיִשְׂרָאֵל: [Targum Jonathan on Joshua / 24 / 24] וַאֲמָרוּ עַמָא לִיהוֹשֻׁעַ יַת יְיָ אֱלָהָנָא נִפְלַח וּלְמֵימְרֵיהּ נְקַבֵּיל: [Targum Jonathan on Joshua / 24 / 25] וּגְזַר יְהוֹשֻׁעַ קְיָם לְעַמָא בְּיוֹמָא הַהוּא וְשַׁוִי לֵיהּ קְיָם וְדִין בִּשְׁכֶם: [Targum Jonathan on Joshua / 24 / 26] וּכְתַב יְהוֹשֻׁעַ יַת פִּתְגָמַיָא הָאִלֵין וְאַצְנְעִינוּן בְּסֵפֶר אוֹרַיְתָא דַייָ וּנְסִיב אַבְנָא רַבְּתָא וַאֲקִימָהּ תַּמָן תְּחוֹת אַלְתָא דִי בְּבֵית מַקְדְשָׁא דַיָי: [Targum Jonathan on Joshua / 24 / 27] וַאֲמַר יְהוֹשֻׁעַ לְכָל עַמָא הָא אַבְנָא הָדָא תְּהֵי לָנָא כִּתְרֵין לוּחֵי אֶבֶן קְיָמָא אֲרֵי יָתָהּ עֲבַדְנָא לְסַהֲדוּ אֲרֵי פִּתְגָמַיָא דִכְתִיבִין עֲלָהּ מֵעֵין כָּל פִּתְגָמַיָא דִי מַלֵיל עִמָנָא וּתְהֵי בְכוֹן לְדָכְרָן וּלְסַהֲדוּ דִילְמָא תְכַדְבוּן קֳדָם אֱלָהָכוֹן: [Targum Jonathan on Joshua / 24 / 28] וּשְׁלַח יְהוֹשֻׁעַ יַת עַמָא גְבַר לְאַחְסַנְתֵּיהּ: [Targum Jonathan on Joshua / 24 / 29] וַהֲוָה בָּתַר פִּתְגָמַיָא הָאִלֵין וּמִית יְהוֹשֻׁעַ בַּר נוּן עַבְדָא דַייָ בַּר מְאָה וַעֲשַׂר שְׁנִין: [Targum Jonathan on Joshua / 24 / 30] וּקְבַרוּ יָתֵיהּ בִּתְחוּם אַחֲסַנְתֵּיהּ בְּתִמְנַת סֶרַח דִי בְּטוּרָא דְבֵית אֶפְרַיִם מִצִפּוּנָא לְטוּר גָעַשׁ: [Targum Jonathan on Joshua / 24 / 31] וּפְלַח יִשְׂרָאֵל קֳדָם יְיָ כָּל יוֹמֵי יְהוֹשֻׁעַ וְכָל יוֹמֵי סָבַיָא דִי אוֹרִיכוּ יוֹמִין בָּתַר יְהוֹשֻׁעַ וְדִי יְדָעוּ יַת כָּל עוֹבְדָא דַייָ דִי עֲבַד לְיִשְׂרָאֵל: [Targum Jonathan on Joshua / 24 / 32] וְיַת גַרְמֵי יוֹסֵף דְאַסִיקוּ בְּנֵי יִשְׂרָאֵל מִמִצְרַיִם קְבָרוּ בִּשְׁכֶם בְּאַחְסָנַת חַקְלָא דִקְנָא יַעֲקֹב מִבְּנֵי חֲמוֹר אֲבוּהִי דִשְׁכֶם בְּמָא חוּרְפַן וַהֲווֹ לִבְנֵי יוֹסֵף לְאַחֲסָנָא: [Targum Jonathan on Joshua / 24 / 33] וְאֶלְעָזָר בַּר אַהֲרֹן מִית וּקְבָרוּ יָתֵיהּ בְּגִבְעֲתָא דְפִּנְחָס בְּרֵיהּ דְאִתְיְהִיבַת לֵיהּ בְּטוּרָא דְבֵית אֶפְרָיִם:

Study this passage

Prepare a passage questionPassage ID & source details Where did this come from?

Joshua · All reading sections

Choose an edition

Targum Jonathan on the Prophets — PD Aramaic
Available body coverage · arc
21 chapter/reading unit(s) · 380 nonempty passage record(s).
Supported chapters & passages
- Amos · 9 passage record(s)
- Ezekiel · 48 passage record(s)
- Habakkuk · 3 passage record(s)
- Haggai · 2 passage record(s)
- Hosea · 14 passage record(s)
- I-Kings · 22 passage record(s)
- I-Samuel · 31 passage record(s)
- II-Kings · 25 passage record(s)
- II-Samuel · 24 passage record(s)
- Isaiah · 66 passage record(s)
- Jeremiah · 52 passage record(s)
- Joel · 4 passage record(s)
- Jonah · 4 passage record(s)
- Joshua · 24 passage record(s)
- Judges · 21 passage record(s)
- Malachi · 3 passage record(s)
- Micah · 7 passage record(s)
- Nahum · 3 passage record(s)
- Obadiah · 1 passage record(s)
- Zechariah · 14 passage record(s)
- Zephaniah · 3 passage record(s)
Body coverage is separate from textual verification. Counts do not establish complete chapters or textual completeness.

Ask about this passage

About this edition

Targum Jonathan on the Prophets — PD Aramaic

Unverified edition

This reading is in arc. An English translation is not in this library yet.

Reading language: arc · Original language (catalog): Aramaic

Recorded completeness: All 21 acquired exact Prophets book exports, including the Twelve Minor Prophets. This is the Prophets Targum Jonathan, distinct from Pentateuch Pseudo-Jonathan. Actual language Aramaic in Hebrew script, despite upstream he bucket. Actual coverage: 21 exact source components, 380 chapter/section passages, 9296 nonempty original paragraph/verse rows. Reference labels are deterministic paths in the original JSON, not invented missing historical chapter numbers. Reader navigation uses actual source book, tractate or named section labels; source component order is retained in evidence.. Available reading sections are listed below.

Available body coverage · arc

21 chapter/reading unit(s) · 380 nonempty passage record(s).

Supported chapters & passages

Amos · 9 passage record(s)
Ezekiel · 48 passage record(s)
Habakkuk · 3 passage record(s)
Haggai · 2 passage record(s)
Hosea · 14 passage record(s)
I-Kings · 22 passage record(s)
I-Samuel · 31 passage record(s)
II-Kings · 25 passage record(s)
II-Samuel · 24 passage record(s)
Isaiah · 66 passage record(s)
Jeremiah · 52 passage record(s)
Joel · 4 passage record(s)
Jonah · 4 passage record(s)
Joshua · 24 passage record(s)
Judges · 21 passage record(s)
Malachi · 3 passage record(s)
Micah · 7 passage record(s)
Nahum · 3 passage record(s)
Obadiah · 1 passage record(s)
Zechariah · 14 passage record(s)
Zephaniah · 3 passage record(s)

Body coverage is separate from textual verification. Counts do not establish complete chapters or textual completeness.

Classification: Ancient biblical textual witness / translation
Edition type: Text derived from a recorded Edition source
Original language (catalog): Aramaic
Reading language: arc
Recorded publication basis: Public domain (recorded basis)
Governed review state: Unreviewed

Helpful Saints Literal Translation (HSLT) is a word-for-word translation prepared by Helpful Saints. Recorded status: Translation in progress.

Helpful Saints Readable Translation (HSRT) is a clearer reading prepared from the literal translation. It waits until a Helpful Saints literal translation exists.

Edition source: Targum Jonathan on the Prophets — PD Aramaic

Provenance: Unchanged original JSON embedded in explicit multi-source container. Reading body uses deterministic native wp_strip_all_tags, grouped by original parent array/section, with source-path labels and two-LF passage separators. Source component identities and native exact rights are retained. All 21 acquired exact Prophets book exports, including the Twelve Minor Prophets. This is the Prophets Targum Jonathan, distinct from Pentateuch Pseudo-Jonathan. Actual language Aramaic in Hebrew script, despite upstream he bucket. Actual coverage: 21 exact source components, 380 chapter/section passages, 9296 nonempty original paragraph/verse rows. Reference labels are deterministic paths in the original JSON, not invented missing historical chapter numbers. Reader navigation uses actual source book, tractate or named section labels; source component order is retained in evidence.

Recorded rights statement: No further rights statement is recorded in this view.

Attribution: Targum Jonathan on the Prophets — PD Aramaic

License: PUBLIC_DOMAIN

Source attribution and conditions: Exact identified historical public-domain version(s) supplied by Sefaria; full translator/publisher version titles retained in component evidence.

Rights territory and conditions depend on the recorded Edition source; worldwide clearance is not established by this label.

View Edition source

Scripture FirstSources ClassifiedEvidence VisibleCounterpoints PreservedMember Research PrivateAI Never Claims Divine Authority

Evidence Intelligence

Know what kind of evidence you are looking at.

Helpful Saints keeps direct biblical text, language evidence, ancient witnesses, historical context, research models, and open questions visibly distinct.

Primary

Direct Biblical Text

The explicit wording and literary context of canonical Scripture.

Primary Support

Original-Language Evidence

Hebrew, Aramaic, Greek, morphology, lemmas, semantic range, and textual comparison.

Comparative

Ancient Witness

Septuagint, Dead Sea Scrolls, ancient Jewish literature, and early Christian writings—clearly classified.

Contextual

Historical Context

Geography, material culture, chronology ranges, institutions, customs, and reception history.

Interpretive

Research Model

A configured chronology, theological synthesis, typological pattern, or proposed relationship.

Unresolved

Open Question

Evidence is incomplete, debated, or insufficient for a settled conclusion.

Targum Jonathan

Targum Jonathan on Joshua — 1

Targum Jonathan on Joshua — 2

Targum Jonathan on Joshua — 3

Targum Jonathan on Joshua — 4

Targum Jonathan on Joshua — 5

Targum Jonathan on Joshua — 6

Targum Jonathan on Joshua — 7

Targum Jonathan on Joshua — 8

Targum Jonathan on Joshua — 9

Targum Jonathan on Joshua — 10

Targum Jonathan on Joshua — 11

Targum Jonathan on Joshua — 12

Targum Jonathan on Joshua — 13

Targum Jonathan on Joshua — 14

Targum Jonathan on Joshua — 15

Targum Jonathan on Joshua — 16

Targum Jonathan on Joshua — 17

Targum Jonathan on Joshua — 18

Targum Jonathan on Joshua — 19

Targum Jonathan on Joshua — 20

Targum Jonathan on Joshua — 21

Targum Jonathan on Joshua — 22

Targum Jonathan on Joshua — 23

Targum Jonathan on Joshua — 24

Know what kind of evidence you are looking at.

Direct Biblical Text

Original-Language Evidence

Ancient Witness

Historical Context

Research Model

Open Question

Search & explore

Carry your study with you