Helpful Saints Corpus Reader

Targum Jonathan

II-Samuel

Reading display

Text size Line spacing Theme

Text size, spacing, and the sepia or night theme stay on this browser when storage is available.

Targum Jonathan on II Samuel — 1

[Targum Jonathan on II Samuel / 1 / 1] וַהֲוָה בָּתַר דָמִית שָׁאוּל וְדָוִד תַּב מִלְמִמְחֵי יַת דְבֵית עֲמָלֵק וִיתֵיב דָוִד בְּצִקְלָג יוֹמִין תְּרֵין: [Targum Jonathan on II Samuel / 1 / 2] וַהֲוָה בְּיוֹמָא תְלִיתָאָה וְהָא גַבְרָא אָתָא מִמַשְׁרִיתָא מִלְוַת שָׁאוּל וּלְבוּשׁוֹהִי מְבַזְעִין וְעַפְרָא רְמֵי בְּרֵישֵׁיהּ וַהֲוָה בְּמֵיתוֹהִי לְוַת דָוִד וּנְפַל עַל אַרְעָא וּסְגִיד: [Targum Jonathan on II Samuel / 1 / 3] וַאֲמַר לֵיהּ דָוִד אֵי מִדֵין אַתְּ אָתֵי וַאֲמַר לֵיהּ מִמַשְׁרִיתָא דְיִשְׂרָאֵל אִשְׁתְּזֵיבִית: [Targum Jonathan on II Samuel / 1 / 4] וַאֲמַר לֵיהּ דָוִד מֶה הֲוָה פִתְגָמָא חַוִי כְעַן לִי וַאֲמַר דְאַפִּיךְ עַמָא מִן קְרָבָא וְאַף סַגִי נְפַל מִן עַמָא וְאִתְקְטָלוּ וְאַף שָׁאוּל וִיהוֹנָתָן בְּרֵיהּ מִיתוּ: [Targum Jonathan on II Samuel / 1 / 5] וַאֲמַר דָוִד לְעוּלֵמָא דִמְחַוֵי לֵיהּ אֵיכְדִין יְדַעְתָּ אֲרֵי מִית שָׁאוּל וִיהוֹנָתָן בְּרֵיהּ: [Targum Jonathan on II Samuel / 1 / 6] וַאֲמַר עוּלֵמָא דִמְחַוֵי לֵיהּ אִתְעֲרָעָא אִתְעַרְעִית בְּטוּרָא דְגִלְבּוֹעַ וְהָא שָׁאוּל סָמִיךְ עַל מוּרְנִיתֵיהּ וְהָא רְתִיכַיָא וּמַשִׁרְיַת פְּרָשַׁיָא אַדְבְּקוֹהִי: [Targum Jonathan on II Samuel / 1 / 7] וְאִתְפְּנֵי לַאֲחוֹרוֹהִי וַחֲזָנִי וּקְרָא לִי וַאֲמַרִית הָא אֲנָא: [Targum Jonathan on II Samuel / 1 / 8] וַאֲמַר לִי מַן אַתְּ וַאֲמַרִית לֵיהּ עֲמַלְקָאָה אֲנָא: [Targum Jonathan on II Samuel / 1 / 9] וַאֲמַר לִי קוּם כְּעַן עֲלַי וּקְטוֹלָנִי אֲרֵי אַחֲדַנִי רְתִיתָא אֲרֵי כָל עוֹד נַפְשִׁי בִּי: [Targum Jonathan on II Samuel / 1 / 10] וְקָמִית עֲלוֹהִי וּקְטַלְתֵּיהּ אֲרֵי יָדַעְנָא אֲרֵי לָא יְחֵי בָתַר דִי נְפַל וּנְסֵיבִית כְּלִילָא דִי עַל רֵישֵׁיהּ וְטוֹטַפְתָּא דְעַל דַרְעֵיהּ וְאַיְתֵיתִינוּן לְוַת רִבּוֹנִי הַלְכָא: [Targum Jonathan on II Samuel / 1 / 11] וְאַתְקֵיף דָוִד בִּלְבוּשׁוֹהִי וּבַזְעִנוּן וְאַף כָּל גַבְרַיָא דְעִמֵיהּ: [Targum Jonathan on II Samuel / 1 / 12] וּסְפָדוּ וּבְכוֹ וְצָמוּ עַד רַמְשָׁא עַל שָׁאוּל וְעַל יְהוֹנָתָן בְּרֵיהּ וְעַל עַמָא דַייָ וְעַל בֵּית יִשְׂרָאֵל אֲרֵי אִתְקְטָלוּ בְּחַרְבָּא: [Targum Jonathan on II Samuel / 1 / 13] וַאֲמַר דָוִד לְעוּלֵמָא דִמְחַוֵי לֵיהּ אֵי מִדֵין אַתְּ וַאֲמַר בַּר גְבַר גִיוֹר עֲמַלְקָאָה אֲנָא: [Targum Jonathan on II Samuel / 1 / 14] וַאֲמַר לֵיהּ דָוִד אֵיכְדֵין לָא דְחַלְתָּא לְאוֹשָׁטָא יְדָךְ לְחַבָּלָא יַת מְשִׁיחָא דַיָי: [Targum Jonathan on II Samuel / 1 / 15] וּקְרָא דָוִד לְחַד מֵעוּלֵמַיָא וַאֲמַר קְרַב שְׁלוֹט בֵּיהּ וּמְחָהִי וְקַטְלֵיהּ: [Targum Jonathan on II Samuel / 1 / 16] וַאֲמַר לֵיהּ דָוִד חוֹבַת קְטוֹלָךְ תְּהֵי בְּרֵישָׁךְ אֲרֵי פּוּמָךְ אַסְהִיד בָּךְ לְמֵימַר אֲנָא קַטְלֵית יַת מְשִׁיחָא דַיָי: [Targum Jonathan on II Samuel / 1 / 17] וַאֲלָא דָוִד יַת אַלְיָא הָדֵין עַל שָׁאוּל וְעַל יְהוֹנָתָן בְּרֵיהּ: [Targum Jonathan on II Samuel / 1 / 18] וַאֲמַר לְאַלְפָא בְּנֵי יְהוּדָה מֵיגַד בְּקַשְׁתָּא הָא הִיא כְתִיבָה עַל סִפְרָא דְאוֹרַיְתָא: [Targum Jonathan on II Samuel / 1 / 19] אִתְעַתַּדְתּוּן יִשְׂרָאֵל עַל בֵּית תּוֹקְפֵיכוֹן אִתְרְמֵיתוּן קְטִילִין אֵיכְדֵין אִתְקְטָלוּ גִיבָּרַיָא: [Targum Jonathan on II Samuel / 1 / 20] לָא תְחַווּן בְּגַת לָא תְבַסְרוּן בְּשׁוּקֵי אַשְׁקְלוֹן דִלְמָא יְחַדְיָן בְגַת פְּלִשְׁתָּאֵי דִילְמָא יְדוּצוּן בְּגַת עֲרֵלַיָא: [Targum Jonathan on II Samuel / 1 / 21] טוּרֵי גִלְבּוֹעַ לָא יֵחוֹת עֲלֵיכוֹן טַלָא וּמִטְרָא לָא תְהֵי בְּכוֹן עֲלָלָא כְּמִסַת דְיַעְבְדוּן מִנֵיהּ חֲלָתָא אֲרֵי תַמָן אִיתְבָּרוּ תְּרֵיסֵי גִיבָּרַיָא תְּרֵיסָא דְשָׁאוּל דִמְשִׁיחַ כִּדְבְמִשְׁחָא: [Targum Jonathan on II Samuel / 1 / 22] מִדַם קְטִילִין מִתְּרַב גִבָּרִין גִירֵי קַשְׁתָּא דִיהוֹנָתָן לָא מְסַתַּחֲרִין לַאֲחוֹרָא וְחַרְבָּא דְשָׁאוּל לָא תַיְבָא רֵיקָן: [Targum Jonathan on II Samuel / 1 / 23] שָׁאוּל וִיהוֹנָתָן דִרְחִימִין וַחֲבִיבִין בְּחַיֵיהוֹן וּבְמוֹתְהוֹן לָא אִתְפָּרָשׁוּ מֵעִמְהוֹן מִנִשְׁרַיָא קַלִילִין מֵאַרְיְוָתָא גִבָּרִין: [Targum Jonathan on II Samuel / 1 / 24] בְּנַת יִשְׂרָאֵל עַל שָׁאוּל בְּכָאָה דַהֲוָה מַלְבִּישׁ לְכוֹן לְבוּשֵׁי צִבְעוֹנִין וּמוֹבִיל לְכוֹן תַּפְנוּקִין וּמַסִיק תִּיקוּנֵי דַהֲבָא עַל לְבוּשְׁכוֹן: [Targum Jonathan on II Samuel / 1 / 25] אֵיכְדֵין אִתְקְטְלוּ גִבָּרַיָא בְּגוֹ קְרָבָא יְהוֹנָתָן עַל בֵּית תּוּקְפָךְ אִתְקְטַלְתָּא: [Targum Jonathan on II Samuel / 1 / 26] עָקַת לִי עֲלָךְ אֲחִי יְהוֹנָתָן חֲבִיבַת לִי לַחֲדָא מַפְרְשָׁא רְחִמְתָּךְ לִי מֵרְחִימַת תַּרְתֵּין נְשִׁין: [Targum Jonathan on II Samuel / 1 / 27] אֵיכְדֵין אִתְקְטָלוּ גִבָּרַיָא וַאֲבָדוּ מָנֵי קְרָבָא:

Study this passage

Prepare a passage questionPassage ID & source details Where did this come from?

Targum Jonathan on II Samuel — 2

[Targum Jonathan on II Samuel / 2 / 1] וַהֲוָה בָּתַר כֵּן וּשְׁאֵיל דָוִד בְּמֵימְרָא דַייָ לְמֵימָר הַאֶסַק בַּחֲדָא מִקִרְוַיָא דְבֵית יְהוּדָה וַאֲמַר יְיָ לֵיהּ סַק וַאֲמַר דָוִד לְאָן אֲסַק וַאֲמַר לְחֶבְרוֹן: [Targum Jonathan on II Samuel / 2 / 2] וּסְלִיק תַּמָן דָוִד וְאַף תַּרְתֵּין נְשׁוֹהִי אֲחִינוֹעַם דְמִיִזְרְעֶאל וַאֲבִיגַיִל אִתַּת נָבָל דְמִכַּרְמְלָא: [Targum Jonathan on II Samuel / 2 / 3] וְגַבְרוֹהִי דְעִמֵיהּ אַסֵיק דָוִד גְבַר וֶאֱנַשׁ בֵּיתֵיהּ וִיתָבוּ בְּקִרְוֵי חֶבְרוֹן: [Targum Jonathan on II Samuel / 2 / 4] וַאֲתוֹ גַבְרֵי שֵׁבֶט יְהוּדָה וּמְשָׁחוּ תַמָן יַת דָוִד לְמֶהֱוֵי מַלְכָּא עַל דְבֵית יְהוּדָה וְחַוִיאוּ לְדָוִד לְמֵימָר גַבְרֵי יָבֵשׁ גִלְעָד דִקְבַרוּ יַת שָׁאוּל: [Targum Jonathan on II Samuel / 2 / 5] וּשְׁלַח דָוִד אִזְגַדִין לְוַת אֱנָשֵׁי יָבֵשׁ גִלְעָד וַאֲמַר לְהוֹן בְּרִיכִין אַתּוּן קֳדָם יְיָ דַעְבַדְתּוּן חִסְדָא הָדֵין עִם רִבּוֹנְכוֹן עִם שָׁאוּל וּקְבַרְתּוּן יָתֵיהּ: [Targum Jonathan on II Samuel / 2 / 6] וּכְעַן יַעְבֵּד יְיָ עִמְכוֹן טִיבוּ וּקְשׁוֹט וְאַף אֲנָא אַעְבֵיד עִמְכוֹן טַבְתָא הָדָא דַעֲבַדְתּוּן פִּתְגָמָא הָדֵין: [Targum Jonathan on II Samuel / 2 / 7] וּכְעַן יִתְקְפִן יְדֵיכוֹן וַהֲווֹ לְגַבְרִין גִבָּרִין אֲרֵי מִית רִבּוֹנְכוֹן שָׁאוּל וְאַף יָתִי מְשָׁחוּ דְבֵית יְהוּדָה לְמֶהֱוֵי מַלְכָּא עֲלֵיהוֹן: [Targum Jonathan on II Samuel / 2 / 8] וְאַבְנֵר בַּר נֵר רַב חֵילָא דִי לְשָׁאוּל דְבַר יַת אִישׁ בּוֹשֶׁת בַּר שָׁאוּל וְאַעֲבִירֵיהּ לְמַחֲנָיִם: [Targum Jonathan on II Samuel / 2 / 9] וְאַמְלְכֵיהּ עַל דְבֵית גִלְעָד וְעַל דְבֵית אָשֵׁר וְעַל דְבֵית יִזְרְעֶאל וְעַל דְבֵית אֶפְרַיִם וְעַל דְבֵית בִּנְיָמִן וְעַל דְבֵית יִשְׂרָאֵל כּוּלְהוֹן: [Targum Jonathan on II Samuel / 2 / 10] בַּר אַרְבְּעִין שְׁנִין אִישׁ בֹּשֶׁת בַּר שָׁאוּל כַּד מְלַךְ עַל יִשְׂרָאֵל וְתַרְתֵּין שְׁנִין מְלַךְ בְּרַם דְבֵית יְהוּדָה הֲווֹ בָּתַר דָוִד: [Targum Jonathan on II Samuel / 2 / 11] וַהֲוָה מִנְיַין יוֹמַיָא דַהֲוָה דָוִד מַלְכָּא בְּחֶבְרוֹן עַל דְבֵית יְהוּדָה שְׁבַע שְׁנִין וְשִׁיתָּא יַרְחִין: [Targum Jonathan on II Samuel / 2 / 12] וּנְפַק אַבְנֵר בַּר נֵר וְעַבְדֵי אִישׁ בּוֹשֶׁת בַּר שָׁאוּל מִמַחֲנַיִם לְגִבְעוֹן: [Targum Jonathan on II Samuel / 2 / 13] וְיוֹאָב בַּר צְרוּיָה וְעַבְדֵי דָוִד נְפַקוּ וְעַרְעוּנוּן עַל בְּרֵיכָתָא דִבְגִבְעוֹן כַּחֲדָא וּשְׁרוֹ אִילֵין עַל בְּרֵיכָתָא מִיכָּא וְאִילֵין עַל בֵּרֵיכָתָא מִיכָּא: [Targum Jonathan on II Samuel / 2 / 14] וַאֲמַר אַבְנֵר לְיוֹאָב יְקוּמוּן כְּעַן עוּלֵימַיָא וִיחַיְיכוּן קֳדָמָנָא וַאֲמַר יוֹאָב יְקוּמוּן: [Targum Jonathan on II Samuel / 2 / 15] וְקָמוּ וַעֲבַרוּ בְּמִנְיָן תְּרֵי עֲסַר מִדְבֵית בִּנְיָמִן וּמִדְאִישׁ בֹּשֶׁת בַּר שָׁאוּל וּתְרֵי עֲסַר מֵעַבְדֵי דָוִד: [Targum Jonathan on II Samuel / 2 / 16] וְאַתְקִיפוּ גְבַר בְּרֵישׁ חַבְרֵיהּ וְחַרְבֵּיהּ בִּסְטַר חַבְרֵיהּ וּנְפָלוּ כַּחֲדָא וּקְרָא לְאַתְרָא הַהוּא אַחֲסָנַת קְטִלַיָא דִי בְּגִבְעוֹן: [Targum Jonathan on II Samuel / 2 / 17] וַהֲוָה קְרָבָא תַּקִיף עַד לַחֲדָא בְּיוֹמָא הַהוּא וְאִתַּבַּר אַבְנֵר וֶאֱנָשֵׁי יִשְׂרָאֵל קֳדָם עַבְדֵי דָוִד: [Targum Jonathan on II Samuel / 2 / 18] וַהֲווֹ תַמָן תְּלָתָא בְּנֵי צְרוּיָה יוֹאָב וַאֲבִישַׁי וַעֲשָׂהאֵל וַעֲשָׂהאֵל קַלִיל בְּרִיגְלוֹהִי כַּחֲדָא מִן טָבַיָא דִי בְּחַקְלָא: [Targum Jonathan on II Samuel / 2 / 19] וּרְדַף עֲשָׂהאֵל בָּתַר אַבְנֵר וְלָא אִיתְפְּנֵי לְמֵיזַל עַל יַמִינָא אוֹ עַל סְמָלָא מִבָּתַר אַבְנֵר: [Targum Jonathan on II Samuel / 2 / 20] וְאִיתְפְּנִי אַבְנֵר בַּתְרוֹהִי וַאֲמַר הַאַתְּ דֵין עֲשָׂהאֵל וַאֲמַר אֲנָא: [Targum Jonathan on II Samuel / 2 / 21] וַאֲמַר לֵיהּ אַבְנֵר אִיתְפְנֵי לָךְ עַל יְמִינָךְ אוֹ עַל סְמָלָךְ וְאֵיחוּד לָךְ חַד מֵעוּלֵימַיָא וְסַב לָךְ יַת זְרָזֵיהּ וְלָא אָבָה עֲשָׂהאֵל לְמֵיזַר מִבַּתְרוֹהִי: [Targum Jonathan on II Samuel / 2 / 22] וְאוֹסִיף עוֹד אַבְנֵר לְמֵימָר לַעֲשָׂהאֵל זוּר לָךְ מִבַּתְרַי לָמָה אֶקְטְלִינָךְ וְאֶרְמִינָךְ לְאַרְעָא וְאֵיכְדִין אֶזְקוֹף אַפֵּי וְאֵיחָמֵי לְיוֹאָב אָחוּךְ: [Targum Jonathan on II Samuel / 2 / 23] וְלָא אָבָא לְמֵיזַר וּמְחָהִי אַבְנֵר בַּאֲחוֹרֵי מוּרְנִיתָא בִּסְטַר יַרְכֵיהּ וּנְפָקַת מוּרְנִיתָא מֵאֲחוֹרוֹהִי וּנְפַל תַּמָן וּמִית בְּאַתְרֵיהּ וַהֲוָה כָּל דְאָתֵי לְאַתְרָא דִנְפַל תַּמָן עֲשָׂהאֵל וּמִית וְקַיְמִין: [Targum Jonathan on II Samuel / 2 / 24] וּרְדָפוּ יוֹאָב וַאֲבִישַׁי בָּתַר אַבְנֵר וְשִׁמְשָׁא עָלַת וְאִינוּן מְטוֹ עַד גִבְעַת אַמְתָא דִי עַל אַפֵּי גִיחַ אוֹרַח מַדְבְּרָא דְגִבְעוֹן: [Targum Jonathan on II Samuel / 2 / 25] וְאִתְכְּנִישׁוּ בְּנֵי בִנְיָמִן בָּתַר אַבְנֵר וַהֲווֹ לְסִיעָא חָד וְקָמוּ עַל רֵישׁ רָמָתָא חֲדָא: [Targum Jonathan on II Samuel / 2 / 26] וּקְרָא אַבְנֵר לְיוֹאָב וַאֲמַר הַלְאַפְרֵשׁ תִּקְטוֹל חַרְבָּא הֲלָא יְדַעְתָּא אֲרֵי מְרִירָא תְהֵי בְסוֹפָא וְעַד אֵימָתַי לָא תֵימַר לְעַמָא לְמִתַּב מִבָּתַר אֲחֵיהוֹן: [Targum Jonathan on II Samuel / 2 / 27] וַאֲמַר יוֹאָב קַיָם הוּא יְיָ אֲרֵי אִלוּלָפוֹן מַלֵילְתָּא אֲרֵי בְּכֵין פּוֹן מֵעִידַן צַפְרָא אִסְתַּלֵק עַמָא גְבַר מִבָתַר אֲחוּהִי: [Targum Jonathan on II Samuel / 2 / 28] וּתְקַע יוֹאָב בְּשׁוֹפָרָא וְקָמוּ כָּל עַמָא וְלָא רְדָפוּ עוֹד בָּתַר יִשְׂרָאֵל וְלָא אוֹסִיפוּ עוֹד לְאַגָחָא קְרָבָא: [Targum Jonathan on II Samuel / 2 / 29] וְאַבְנֵר וְגַבְרוֹהִי הֲלִיכוּ בְּמֵישְׁרָא כָּל לֵילְיָא הַהוּא וַעֲבָרוּ יַת יַרְדְנָא וַאֲזַלוּ כָּל בִּתְרוֹן וַאֲתוֹ לְמַחֲנָיִם: [Targum Jonathan on II Samuel / 2 / 30] וְיוֹאָב תַּב מִבָּתַר אַבְנֵר וּכְנַשׁ יַת כָּל עַמָא וּשְׁגוֹ מֵעַבְדֵי דָוִד תִּשְׁעַת עֲסַר גַבְרָא וַעֲשָׂהאֵל: [Targum Jonathan on II Samuel / 2 / 31] וְעַבְדֵי דָוִד קְטַלוּ מִדְבֵית בִּנְיָמִין וּבְגַבְרֵי אַבְנֵר תְּלַת מְאָה וְשִׁתִּין גַבְרָא מִיתוּ: [Targum Jonathan on II Samuel / 2 / 32] וּנְטַלוּ יַת עֲשָׂהאֵל וּקְבָרוּהִי בְּקִבְרָא דַאֲבוּהִי דִי בְּבֵית לֶחֶם וַאֲזַלוּ כָּל לֵילְיָא יוֹאָב וְגַבְרוֹהִי וּנְהַר לְהוֹן בְּחֶבְרוֹן:

Study this passage

Prepare a passage questionPassage ID & source details Where did this come from?

Targum Jonathan on II Samuel — 3

[Targum Jonathan on II Samuel / 3 / 1] וַהֲוָת קְרָבָא תְּקוֹף בֵּין בֵּית שָׁאוּל וּבֵין בֵּית דָוִד וּבֵית דָוִד אָזְלִין וְתַקִיפִין וּבֵית שָׁאוּל אָזְלִין וּמַאֲכִין: [Targum Jonathan on II Samuel / 3 / 2] וְאִתְיְלִידוּ לְדָוִד בְּנִין בְּחֶבְרוֹן וַהֲוָה בוּכְרֵיהּ אַמְנוֹן לַאֲחִינוֹעַם דְמִיִזְרְעֶאל: [Targum Jonathan on II Samuel / 3 / 3] וְתִנְיָנֵיהּ כִלְאָב לַאֲבִיגַיִל אִתַּת נָבָל דְמִכַּרְמְלָא וּתְלִיתָאָה אַבְשָׁלוֹם בַּר מַעֲכָה בַּת תַּלְמַי מַלְכָּא דִגְשׁוּר: [Targum Jonathan on II Samuel / 3 / 4] וּרְבִיעָאָה אֲדוֹנִיָה בַּר חַגִית וַחֲמִישָׁאָה שְׁפַטְיָה בַּר אֲבִיטָל: [Targum Jonathan on II Samuel / 3 / 5] וּשְׁתִיתָאָה יִתְרְעָם לְעֶגְלָה אִתַּת דָוִד אִלֵין אִתְיְלִידוּ לְדָוִד בְּחֶבְרוֹן: [Targum Jonathan on II Samuel / 3 / 6] וַהֲוָה כַּד הֲוָת קְרָבָא בֵּין בֵּית שָׁאוּל וּבֵין בֵּית דָוִד וְאַבְנֵר הֲוָה מַתְקֵף בְּבֵית שָׁאוּל: [Targum Jonathan on II Samuel / 3 / 7] וּלְשָׁאוּל לְחֵינָתָא וּשְׁמָה רִצְפָּה בַּת אַיָה וַאֲמַר לְאַבְנֵר מָה דֵין עַלְתָּא לְוַת לְחֵינָתָא דְאַבָּא: [Targum Jonathan on II Samuel / 3 / 8] וּתְקֵיף לְאַבְנֵר לַחֲדָא עַל פִּתְגָמֵי אִישׁ בֹּשֶׁת וַאֲמַר הֲלָא רֵישָׁא דְכַלְבָּא אֲנָא מִכְּעַן הֲוֵיתִי גְבַר הֶדְיוֹט לִשְׁאָרָא דְבֵית יְהוּדָה יוֹמָא דֵין אַעְבֵּיד טִיבוּ עִם בֵּית שָׁאוּל אֲבוּךְ עִם אֲחוֹהִי וְעִם רַחֲמוֹהִי וְלָא מְסַרְתִּיךְ בִּידָא דְדָוִד וּמִכְּעַן אַתְּ מַסְעַר עָלַי חוֹב אִתְּתָא יוֹמָא דֵין: [Targum Jonathan on II Samuel / 3 / 9] כְּדֵין יַעְבֵּד יְיָ לְאַבְנֵר וּכְדֵין יוֹסֵיף לֵיהּ אֲרֵי כְּמָא דְקַיֵם יְיָ לְדָוִד אֲרֵי כְדֵין אַעְבֵּיד לֵיהּ: [Targum Jonathan on II Samuel / 3 / 10] לְאַעְבָּרָא מַלְכוּ מִבֵּית שָׁאוּל וְלַאֲקָמָא יַת כּוּרְסֵי דָוִד עַל יִשְׂרָאֵל וְעַל דְבֵית יְהוּדָה מִדָן וְעַד בְּאֵר שָׁבַע: [Targum Jonathan on II Samuel / 3 / 11] וְלָא יָכִיל עוֹד לַאֲתָבָא יַת אַבְנֵר פִּתְגָמָא מִדְדָחֵל יָתֵיהּ: [Targum Jonathan on II Samuel / 3 / 12] וּשְׁלַח אַבְנֵר אִזְגַדִין לְוַת דָוִד מֵאַתְרֵיהּ לְמֵימָר מְקַיְמָנָא בְּמַן דַעֲבַד אַרְעָא לְמֵימַר גְזַר קַיָמָךְ עִמִי וְהָא יְדִי עִמָךְ לְאַסְחָרָא לְוָתָךְ יַת כָּל יִשְׂרָאֵל: [Targum Jonathan on II Samuel / 3 / 13] וַאֲמַר טַב אֲנָא אֶגְזַר עִמָךְ קְיָם בְּרַם פִּתְגָמָא חָד אֲנָא שָׁאֵיל מֵעִמָךְ לְמֵימָר לָא תֶחֱזֵי יַת אַפֵּי אֱלָהֵין קֳדָם מֵתָיוּתָךְ יַת מִיכַל בַּת שָׁאוּל בְּמֵיתָךְ לְאִתְחֲזָאָה קֳדָמַי: [Targum Jonathan on II Samuel / 3 / 14] וּשְׁלַח דָוִד אִזְגַדִין לְוַת אִישׁ בֹּשֶׁת בַּר שָׁאוּל לְמֵימָר הַב יַת אִתְּתִי יַת מִיכַל דְאָרָסִית לִי בִּמְאָה עָרְלוֹת פְּלִשְׁתָּאֵי: [Targum Jonathan on II Samuel / 3 / 15] וּשְׁלַח אִישׁ בֹּשֶׁת וְדַבְּרָהּ מִלְוַת בַעֲלָהּ מִלְוַת פַּלְטִיאֵל בַּר לָיִשׁ: [Targum Jonathan on II Samuel / 3 / 16] וַאֲזַל עִמָה בַּעֲלָהּ אָזֵיל וּבְכִי בַּתְרָאָה עַד עַלְמֻת וַאֲמַר לֵיהּ אַבְנֵר אֱזֵיל תּוּב וְתָב: [Targum Jonathan on II Samuel / 3 / 17] וּפִתְגָם אַבְנֵר הֲוָה עִם סָבֵי יִשְׂרָאֵל לְמֵימָר אַף תְּמָלֵי אַף מִדְקָמוֹהִי הֲוֵיתוּן בָּעָן יַת דָוִד לְמֶהֱוֵי מַלְכָּא עֲלֵיכוֹן: [Targum Jonathan on II Samuel / 3 / 18] וּכְעַן עֲבִידוּ אֲרֵי יְיָ אֲמַר לְדָוִד לְמֵימַר בְּיַד דָוִד עַבְדִי אֶפְרוֹק יַת עַמִי יִשְׂרָאֵל מִידָא דִפְלִשְׁתָּאֵי וּמִיַד כָּל בַּעֲלֵי דְבָבֵיהוֹן: [Targum Jonathan on II Samuel / 3 / 19] וּמַלֵיל אַף אַבְנֵר קֳדָם דְבֵית בִּנְיָמִן וַאֲזַל אַף אַבְנֵר לְמַלָלָא קֳדָם דָוִד בְּחֶבְרוֹן יַת כָּל דְתַקֵן בְּעֵינֵי יִשְׂרָאֵל וּבְעֵינֵי כָּל דְבֵית בִּנְיָמִן: [Targum Jonathan on II Samuel / 3 / 20] וַאֲתָא אַבְנֵר לְוַת דָוִד לְחֶבְרוֹן וְעִמֵיהּ עַסְרִין גַבְרַיָא וַעֲבַד דָוִד לְאַבְנֵר וּלְגַבְרַיָא דְעִמֵיהּ מִשְׁתַּיָא: [Targum Jonathan on II Samuel / 3 / 21] וַאֲמַר אַבְנֵר לְדָוִד אֵיקוּם וְאֵיזַל וְאֶכְנוֹשׁ לְוַת רִבּוֹנִי מַלְכָּא יַת כָּל יִשְׂרָאֵל וְיִגְזְרוּן עִמָךְ קְיָם וְתִמְלוֹךְ בְּכָל דְרַעֲוָא נַפְשָׁךְ וּשְׁלַח דָוִד יַת אַבְנֵר וַאֲזַל בִּשְׁלָם: [Targum Jonathan on II Samuel / 3 / 22] וְהָא עַבְדֵי דָוִד וְיוֹאָב אֲתָא מִן מַשְׁרִיתָא וַעֲדָאָה סַגִיאָה עִמְהוֹן אַיְתִיאוּ וְאַבְנֵר לֵיתוֹהִי עִם דָוִד בְּחֶבְרוֹן אֲרֵי שַׁלְחֵיהּ וַאֲזַל בִּשְׁלָם: [Targum Jonathan on II Samuel / 3 / 23] וְיוֹאָב וְכָל חֵילָא דְעִמֵיהּ אֲתוֹ וְחַוִיאוּ לְיוֹאָב לְמֵימַר אָתָא אַבְנֵר בַּר נֵר לְוַת מַלְכָּא וְשַׁלְחֵיהּ וַאֲזַל בִּשְׁלָם: [Targum Jonathan on II Samuel / 3 / 24] וַאֲתָא יוֹאָב לְוַת מַלְכָּא וַאֲמַר מָה עֲבַדְתָּא הָא אָתָא אַבְנֵר לְוָתָךְ לְמָא דְנַן שְׁלַחְתֵּיהּ וַאֲזַל מֵיזַל: [Targum Jonathan on II Samuel / 3 / 25] יְדַעְתָּא יַת אַבְנֵר בַּר נֵר אֲרֵי לְאַטְעֲיוּתָךְ אֲתָא וּלְמִידַע יַת מִיפְקָךְ וְיַת מֵיעָלָךְ וּלְמֵידַע יַת כָּל דְאַתְּ עֲבֵיד: [Targum Jonathan on II Samuel / 3 / 26] וּנְפַק יוֹאָב מִן קֳדָם דָוִד וּשְׁלַח אִזְגַדִין בָּתַר אַבְנֵר וַאֲתִיבוּ יָתֵיהּ מִגוּבָא דְסִירָתָא וְדָוִד לָא יְדָע: [Targum Jonathan on II Samuel / 3 / 27] וְתַב אַבְנֵר לְחֶבְרוֹן וְאַפְנֵיהּ יוֹאָב לְגוֹ תַרְעָא לְמַלָלָא עִמֵיהּ בְּשֵׁלַיָא וּמְחָהִי תַמָן בִּסְטַר יַרְכֵיהּ וּמִית בִּדְמָא דַעֲשָׂהאֵל אֲחוּהִי: [Targum Jonathan on II Samuel / 3 / 28] וּשְׁמַע דָוִד מִבָּתַר כֵּן וַאֲמַר זַכַּאי אֲנָא וּמַלְכוּתִי מִן קֳדָם יְיָ עַד עַלְמָא מִדְמָא דְאַבְנֵר בַּר נֵר: [Targum Jonathan on II Samuel / 3 / 29] יְחוּלוּן עַל רֵישׁ דְיוֹאָב וְאֶל כָּל בֵּית אֲבוּהִי וְלָא יִפְסוֹק מִבֵּית יוֹאָב דְאֵיב וּסְגִיר וּמַתְקִיף בַּאֲגַד וּמִתְקְטֵיל בְּחַרְבָּא וַחֲסִיר מָזוֹן: [Targum Jonathan on II Samuel / 3 / 30] וְיוֹאָב וַאֲבִישַׁי אֲחוּהִי קְטָלוּ לְאַבְנֵר עַל דְקָטַל יַת עֲשָׂהאֵל אֲחוּהוֹן בְּגִבְעוֹן בִּקְרָבָא: [Targum Jonathan on II Samuel / 3 / 31] וַאֲמַר דָוִד לְיוֹאָב וּלְכָל עַמָא דְעִמֵיהּ בְּזָעוּ לְבוּשֵׁיכוֹן וַאֲסָרוּ סַקִין וְסַפְדוּ קֳדָם אַבְנֵר וּמַלְכָּא דָוִד אָזֵיל בָּתַר עַרְסָא: [Targum Jonathan on II Samuel / 3 / 32] וּקְבַרוּ יַת אַבְנֵר בְּחֶבְרוֹן וַאֲרֵים מַלְכָּא יַת קָלֵיהּ וּבְכָא עַל קִבְרָא דְאַבְנֵר וּבְכוֹ כָּל עַמָא: [Targum Jonathan on II Samuel / 3 / 33] וַאֲלָא מַלְכָּא עַל אַבְנֵר וַאֲמַר הַכְּמֵימַת רְשִׁיעִין יְמוּת אַבְנֵר: [Targum Jonathan on II Samuel / 3 / 34] יְדָךְ לָא אֲסִירָן וְרַגְלָךְ לָא לְזִיקִין דִנְחַשׁ אִתְקְרָבוּ כְּמֵפַל קֳדָם גַבְרִין רַשִׁיעִין נְפַלְתָּא וְאוֹסִיפוּ כָל עַמָא לְמִבְכֵּי עֲלוֹהִי: [Targum Jonathan on II Samuel / 3 / 35] וַאֲתָא כָל עַמָא לְאוֹכָלָא יַת דָוִד לַחֲמָא עַד דְיוֹמָא קַיָם וְקַיֵם דָוִד לְמֵימַר כְּדֵין יַעְבֵּיד לִי יְיָ וּכְדֵין יוֹסִיף אֱלָהֵין קֳדָם מֵיעַל שִׁמְשָׁא אֶטְעוֹם לַחְמָא אוֹ כָּל מִדָעַם: [Targum Jonathan on II Samuel / 3 / 36] וְכָל עַמָא אִשְׁתְּמוֹדָעוּ וּשְׁפַר בְּעֵינֵיהוֹן כְּכָל דַעֲבַד מַלְכָּא בְּעֵינֵי כָּל עַמָא טָב: [Targum Jonathan on II Samuel / 3 / 37] וִידָעוּ כָּל עַמָא וְכָל יִשְׂרָאֵל בְּיוֹמָא הַהוּא אֲרֵי לָא הֲוַת בַּעֲצַת מַלְכָּא לְמִקְטַל יַת אַבְנֵר בַּר נֵר: [Targum Jonathan on II Samuel / 3 / 38] וַאֲמַר מַלְכָּא לְעַבְדוֹהִי הֲלָא תֵדְעוּן אֲרֵי רַב וְשַׁלִיט נְפַל יוֹמָא הָדֵין בְּיִשְׂרָאֵל: [Targum Jonathan on II Samuel / 3 / 39] וַאֲנָא יוֹמָא דֵין הֶדְיוֹט וּמְרַבֵּי לְמַלְכָּא וְגַבְרַיָא הָאִלֵין בְּנֵי צְרוּיָה קָשָׁן מִנִי יְשַׁלֵם יְיָ לְעַבְדֵי בִּישְׁתָא כְּבִישְׁתֵיהּ:

Study this passage

Prepare a passage questionPassage ID & source details Where did this come from?

Targum Jonathan on II Samuel — 4

[Targum Jonathan on II Samuel / 4 / 1] וּשְׁמַע בַּר שָׁאוּל אֲרֵי מִית אַבְנֵר בְּחֶבְרוֹן וְאִתְרַשְׁלוּ יְדוֹהִי וְכָל יִשְׂרָאֵל אִתְבְּהִילוּ: [Targum Jonathan on II Samuel / 4 / 2] וּתְרֵין גַבְרִין רַבָּנֵי רֵישֵׁי מַשִׁרְיָן הֲווֹ עִם בַּר שָׁאוּל שׁוּם חַד בַּעֲנָא וְשׁוּם תִּנְיָנָא רֶכֶב בְּנֵי רִמוֹן דְמִבְּאֵרוֹת בְּנֵי בִנְיָמִין אֲרֵי אַף בְּאֵרוֹת מִתְחַשְׁבָא עַל דְבֵית בִּנְיָמִין: [Targum Jonathan on II Samuel / 4 / 3] וַעֲרַקוּ אֱנַשׁ בְּאֵרוֹת לְגִתָּיִם וַהֲווֹ תַמָן דַיָרִין עַד יוֹמָא הָדֵין: [Targum Jonathan on II Samuel / 4 / 4] וְלִיהוֹנָתָן בַּר שָׁאוּל בְּרָא לָקֵי בִּתְרֵין רִגְלוֹהִי בַּר חָמֵשׁ שְׁנִין הֲוָה כַּד אָתַת בְּשׂוּרַת שָׁאוּל וִיהוֹנָתָן מִיִזְרְעֶאל וּנְטַלְתֵּיהּ תּוּרְבַנְתֵּיהּ וְאַפֵּיכַת וַהֲוָה בְּאִתְבָּעֲיוּתָה לְמֶעֶרַק וּנְפַל וַחֲגָר וּשְׁמֵיהּ מְפִיבֹשֶׁת: [Targum Jonathan on II Samuel / 4 / 5] וַאֲזַלוּ בְּנֵי רִמוֹן דְמִבְּאֵרוֹת רֵכָב וּבַעֲנָה וַאֲתוֹ כְּמֵיחַם יוֹמָא לְבֵית אִישׁ בֹּשֶׁת וְהוּא שָׁכִיב יַת שִׁנַת מַלְכַיָא: [Targum Jonathan on II Samuel / 4 / 6] וְאִינוּן אֲתוֹ עַד גוֹ בֵיתָא כְּזַבְּנֵי חִטִין וּמְחוֹהִי בִּסְטַר יַרְכֵיהּ וְרֵכַב וּבַעֲנָה אֲחוֹהִי אִשְׁתֵּיזָבוּ: [Targum Jonathan on II Samuel / 4 / 7] וַאֲתוֹ לְבֵיתָא וְהוּא שָׁכִיב עַל עַרְסֵיהּ בְּאִדְרוֹן בֵּית מִשְׁכְּבֵיהּ וּמְחוֹהִי וְקַטְלוֹהִי וְאַעְדִיאוּ יַת רֵישֵׁיהּ וּנְסִיבוּ יַת רֵישֵׁיהּ וַאֲזַלוּ בְּאוֹרַח מֵישְׁרָא כָּל לַיְלְיָא: [Targum Jonathan on II Samuel / 4 / 8] וְאַיְתִיאוּ יַת רֵישׁ אִישׁ בּוֹשֶׁת לְוַת דָוִד לְחֶבְרוֹן וַאֲמַרוּ לְמַלְכָּא הָא רֵישׁ אִישׁ בֹּשֶׁת בַּר שָׁאוּל בְּעֵיל דְבָבָךְ דִבְעָא לְמִקְטְלָךְ וַעֲבַד יְיָ לְרִבּוֹנִי מַלְכָּא פּוּרְעֲנוּתָא יוֹמָא הָדֵין מִשָׁאוּל וּמִזַרְעֵיהּ: [Targum Jonathan on II Samuel / 4 / 9] וַאֲתֵיב דָוִד יַת רֵכָב וְיַת בַּעֲנָה אֲחוּהִי בְּנֵי רִמוֹן דְמִבְּאֵרוֹת וַאֲמַר לְהוֹן קַיָם הוּא יְיָ דִי פְרַק יַת נַפְשִׁי מִכָּל עָקָא: [Targum Jonathan on II Samuel / 4 / 10] אֲרֵי דְחַוֵי לִי לְמֵימַר הָא מִית שָׁאוּל וְהוּא הֲוָה כִּמְבַשֵׂר בְּעֵינֵי נַפְשֵׁיהּ וַאֲחָדִית בֵּיהּ וּקְטַלְתֵּיהּ בְּצִקְלָג דַהֲוָה מְדַמִי לְמִתַּן לֵיהּ מַתְּנַת בְּסוֹרָתֵיהּ: [Targum Jonathan on II Samuel / 4 / 11] אַף אֲרֵי גַבְרִין רַשִׁיעַיָא קְטַלוּ יַת גְבַר זַכַּאי בְּבֵיתֵיהּ עַל שִׁווּיֵה וּכְעַן הֲלָא אִתְבַּע יַת דְמֵיהּ מִיֶדְכוֹן וַאֲפַלֵי יַתְכוֹן מִן אַרְעָא: [Targum Jonathan on II Samuel / 4 / 12] וּפַקֵיד דָוִד יַת עוּלֵמַיָא וְקַטְלִינוּן וּקְצִיצוּ יַת יְדֵיהוֹן וְיַת רַגְלֵיהוֹן וּצְלָבוּ עַל בְּרֵכָתָא בְּחֶבְרוֹן וְיַת רֵישׁ אִישׁ בּוֹשֶׁת נְסִיבוּ וּקְבָרוּ בְּקִבְרָא דְאַבְנֵר בְּחֶבְרוֹן:

Study this passage

Prepare a passage questionPassage ID & source details Where did this come from?

Targum Jonathan on II Samuel — 5

[Targum Jonathan on II Samuel / 5 / 1] וַאֲתוֹ כָּל שִׁבְטַיָא דְיִשְׂרָאֵל לְוַת דָוִד לְחֶבְרוֹן וַאֲמַרוּ לְמֵימָר הָא אֲנָא קְרִיבָךְ וּבִסְרָךְ אֲנַחְנָא: [Targum Jonathan on II Samuel / 5 / 2] אַף מֵאִתְמָלֵי אַף מִדְקָמוֹהִי כַּד הֲוָה שָׁאוּל מַלְכָּא עֲלָנָא אַתְּ הֲוֵיתָא נָפֵיק וְעָלֵיל בְּרֵישׁ יִשְׂרָאֵל וַאֲמַר יְיָ לָךְ אַתְּ תְּפַרְנֵס יַת עַמִי יַת ישְׂרָאֵל וְאַתְּ תֶּהֱוֵי לְמַלְכָּא עַל יִשְׂרָאֵל: [Targum Jonathan on II Samuel / 5 / 3] וַאֲתוֹ כָּל סָבֵי יִשְׂרָאֵל לְוַת מַלְכָּא בְּחֶבְרוֹן וּגְזַר לְהוֹן מַלְכָּא דָוִד קְיָם בְּחֶבְרוֹן קֳדָם יְיָ וּמְשָׁחוּ יַת דָוִד לְמֶהֱוֵי מַלְכָּא עַל יִשְׂרָאֵל: [Targum Jonathan on II Samuel / 5 / 4] בַּר תְּלָתִין שְׁנִין דָוִד כַּד מְלַךְ וְאַרְבְּעִין שְׁנִין מְלָךְ: [Targum Jonathan on II Samuel / 5 / 5] בְּחֶבְרוֹן מְלַךְ עַל דְּבֵית יְהוּדָה שְׁבַע שְׁנִין וְשִׁתָּא יַרְחִין וּבִירוּשָׁלַם מְלַךְ תְּלָתִין וּתְלַת שְׁנִין עַל כָּל יִשְׂרָאֵל וִיהוּדָה: [Targum Jonathan on II Samuel / 5 / 6] וַאֲזַל מַלְכָּא וְגַבְרוֹהִי לִירוּשָׁלַם לְוַת יְבוּסָאָה יַתְבֵי אַרְעָא וַאֲמַרוּ לְדָוִד לְמֵימַר לָא תֵיעוּל הַלְכָא אֱלָהֵין בְּאַעְדָיוּתָךְ חַטָאַיָא וְחַיָבַיָא דְאַמְרִין לָא יֵעוּל דָוִד הַלְכָא: [Targum Jonathan on II Samuel / 5 / 7] וַאֲחַד דָוִד יַת חַקְרָא דְצִיוֹן הִיא קַרְתָּא דְדָוִד: [Targum Jonathan on II Samuel / 5 / 8] וַאֲמַר דָוִד בְּיוֹמָא הַהוּא כָּל דְיִקְטַל יְבוּסָאָה וְיִשְׁרֵי לְמִכְבַּשׁ כְּרַכָּא וְיַת חַטָאַיָא וְיַת חַיָבַיָא רְחִיקָא נַפְשָׁא דְדָוִד עַל כֵּן יֵימְרוּן חַטָאַיָא וְחַיָבַיָא לָא יַעֲלוּן לְבֵיתָא: [Targum Jonathan on II Samuel / 5 / 9] וְיָתִיב דָוִד בִּחַקְרָא וּקְרָא לָהּ קַרְתָּא דְדָוִד וּבְנָא דָוִד סְחוֹר סְחוֹר מִן מַלְיָתָא וּלְגָיו: [Targum Jonathan on II Samuel / 5 / 10] וַאֲזַל דָוִד אָזֵיל וּסְגִי וּמֵימְרָא דַייָ אֱלָהָא צְבָאוֹת בְּסַעֲדֵיהּ: [Targum Jonathan on II Samuel / 5 / 11] וּשְׁלַח חִירָם מַלְכָּא דְצוֹר אִזְגַדִין לְוַת דָוִד וַאֲעֵי אַרְזִין וְנַגָרִין דְאוּמָנִין לְמִיקָץ אָעִין וְאַבְנִין וְאַרְדִיכְלִין דְאוּמָנִין בְּבִנְיַן כּוֹתָלִין וּבְנוֹ בֵיתָא לְדָוִד: [Targum Jonathan on II Samuel / 5 / 12] וִידַע דָוִד אֲרֵי אַתְקְנֵיהּ יְיָ לְמֶהֱוֵי מַלְכָּא עַל יִשְׂרָאֵל וַאֲרֵי מְנַטְלָא מַלְכוּתֵיהּ בְּדִיל עַמֵיהּ יִשְׂרָאֵל: [Targum Jonathan on II Samuel / 5 / 13] וּנְסִיב דָוִד עוֹד לְחֵינָן וּנְשִׁין מִירוּשְׁלֵם בָּתַר דַאֲתָא מֵחֶבְרוֹן וְאִתְיְלִידוּ עוֹד לְדָוִד בְּנִין וּבְנָן: [Targum Jonathan on II Samuel / 5 / 14] וְאִלֵין שְׁמָהַת דְאִתְיְלִידוּ לֵיהּ בִּירוּשְׁלֵם שַׁמוּעַ וְשׁוֹבָב וְנָתָן וּשְׁלֹמֹה: [Targum Jonathan on II Samuel / 5 / 15] וְיִבְחָר וֶאֱלִישׁוּעַ וְנֶפֶג וְיָפִיעַ: [Targum Jonathan on II Samuel / 5 / 16] וֶאֱלִישָׁמָע וְאֶלְיָדָע וֶאֱלִיפָלֶט: [Targum Jonathan on II Samuel / 5 / 17] וּשְׁמָעוּ פְלִשְׁתָּאֵי אֲרֵי מְשָׁחוּ יַת דָוִד לְמֶהֱוֵי מַלְכָּא עַל יִשְׂרָאֵל וּסְלִיקוּ כָּל פְּלִשְׁתָּאֵי לְמִבְעֵי יַת דָוִד וּשְׁמַע דָוִד וּנְחַת לְחַקְרָא: [Targum Jonathan on II Samuel / 5 / 18] וּפְלִשְׁתָּאֵי אֲתוֹ וְאִתְרַטִישׁוּ בְּמֵישַׁר גִבָּרַיָא: [Targum Jonathan on II Samuel / 5 / 19] וּשְׁאֵיל דָוִד בְּמֵימְרָא דַייָ לְמֵימַר הַאֶסַק עַל פְּלִשְׁתָּאֵי הֲתִמְסְרִינוּן בִּידִי וַאֲמַר יְיָ לְדָוִד סַק אֲרֵי מִמְסַר אֶמְסָר יַת פְּלִשְׁתָּאֵי בִּידָךְ: [Targum Jonathan on II Samuel / 5 / 20] וַאֲתָא דָוִד בְּמֵישַׁר פְּרָצִים וּמְחָנוּן תַּמָן דָוִד וַאֲמַר תְּבַר יְיָ יַת בַּעֲלֵי דְבָבֵי קֳדָמַי כְּתִבּוּר מָאן דַחֲסַף דְמָלֵי מַיָין עַל כֵּן קְרָא שְׁמֵיהּ דְאַתְרָא הַהוּא מֵישַׁר פְרָצִים: [Targum Jonathan on II Samuel / 5 / 21] וּשְׁבַקוּ תַּמָן יַת טַעֲוַתְהוֹן וְאוֹקֵידִינוּן דָוִד וְגַבְרוֹהִי: [Targum Jonathan on II Samuel / 5 / 22] וְאוֹסִיפוּ עוֹד פְּלִשְׁתָּאֵי לְמֵיסַק וְאִיתְרַטִישׁוּ בְּמֵישַׁר גִיבָּרַיָא: [Targum Jonathan on II Samuel / 5 / 23] וּשְׁאֵיל דָוִד בְּמֵימְרָא דַייָ וַאֲמַר לָא תֵיסַק אִסְתַּחֵר לַאֲחוֹרֵיהוֹן וּתְהַךְ לְהוֹן מִקָבֵיל אִילָנַיָא: [Targum Jonathan on II Samuel / 5 / 24] וִיהֵי כְמִישְׁמְעָךְ יַת קַל צְוַחְתָּא בְּרֵישֵׁי אִילָנַיָא בְּכֵן תִּתְקַף אֲרֵי בְּכֵן נְפִיק מַלְאָכָא דַייָ לְאַצְלָחָא קֳדָמָךְ לְמִקְטַל בְּמַשִׁרְיַת פְּלִשְׁתָּאֵי: [Targum Jonathan on II Samuel / 5 / 25] וַעֲבַד דָוִד כֵּן כְּמָא דִי פַקְדֵיהּ יְיָ וּקְטַל יַת פְּלִשְׁתָּאֵי מִגֶבַע עַד מַעֲלָנָא דְגָזַר:

Study this passage

Prepare a passage questionPassage ID & source details Where did this come from?

Targum Jonathan on II Samuel — 6

[Targum Jonathan on II Samuel / 6 / 1] וְאוֹסִיף עוֹד דָוִד יַת כָּל בְּחוּרֵי יִשְׂרָאֵל תְּלָתִין אַלְפִין: [Targum Jonathan on II Samuel / 6 / 2] וְקָם וַאֲזַל דָוִד וְכָל עַמָא דִי עִמֵיהּ מִקִרְוַיָא מִדְבֵית יְהוּדָה לְאַסָקָא מִתַּמָן יַת אֲרוֹנָא דַייָ דְאִיתְקְרֵי שְׁמָא שְׁמָא דַייָ צְבָאוֹת דִשְׁכִינְתֵּה שַׁרְיָא עֵיל מִן כְּרוּבַיָא עֲלוֹהִי: [Targum Jonathan on II Samuel / 6 / 3] וַאֲחִיתוּ יַת אֲרוֹנָא דַייָ בְּעֶגְלָתָא חַדְתָּא וּנְטָלוֹהִי מִבֵּית אֲבִינָדָב דִי בְּגִבְעֲתָא וְעֻזָא וְאַחְיוֹ בְנֵי אֲבִינָדָב מַדְבְּרִין יַת עֶגְלָתָא חַדְתָּא: [Targum Jonathan on II Samuel / 6 / 4] וּנְטָלוֹהִי מִבֵּית אֲבִינָדָב דִי בְּגִבְעֲתָא עִם אֲרוֹנָא דַייָ וְאַחְיוֹ אָזֵיל קֳדָם אֲרוֹנָא: [Targum Jonathan on II Samuel / 6 / 5] וְדָוִד וְכָל בֵּית יִשְׂרָאֵל מְשַׁבְּחִין קֳדָם יְיָ בְּכָל אָעֵי בִּרְוַון וּבְכִינָרִין וּבִנְבָלִין וּבְתֻפִּין וּבִרְבִיעִין וּבְצֶלְצְלִין: [Targum Jonathan on II Samuel / 6 / 6] וַאֲתוֹ עַד אֲתַר מְתַקֵן וְאוֹשִׁיט עֻזָה יְדֵיהּ בַּאֲרוֹנָא דַייָ וַאֲחַד בֵּיהּ אֲרֵי מְרַגוֹהִי תּוֹרַיָא: [Targum Jonathan on II Samuel / 6 / 7] וּתְקֵיף רוּגְזָא דַייָ בְּעֻזָה וּמְחָהִי תַמָן מֵימְרָא דַייָ עַל דְאִישְׁתְּלֵי וּמִית תַּמָן עִם אֲרוֹנָא דַיָי: [Targum Jonathan on II Samuel / 6 / 8] וּתְקֵיף לְדָוִד עַל דִתְרַע יְיָ תִּרְעֲתָא בְּעֻזָה וּקְרָא לְאַתְרָא הַהוּא אַתְרָא דְמִית בֵּיהּ עֻזָה עַד יוֹמָא הָדֵין: [Targum Jonathan on II Samuel / 6 / 9] וּדְחִיל דָוִד מִן קֳדָם יְיָ בְּיוֹמָא הַהוּא וַאֲמַר אֵיכְדֵין יֵעוּל לְוָתִי אֲרוֹנָא דַיָי: [Targum Jonathan on II Samuel / 6 / 10] וְלָא אָבָא דָוִד לְאַפְנָאָה לְוָתֵיהּ יַת אֲרוֹנָא דַייָ לְקַרְתָּא דְדָוִד וְאַפְנֵיהּ דָוִד לְבֵית עוֹבֵד אֱדוֹם גִיתָּאָה: [Targum Jonathan on II Samuel / 6 / 11] וּשְׁרָא אֲרוֹנָא דַייָ בְּבֵית עוֹבֵד אֱדוֹם גִיתָּאָה תְּלָתָא יַרְחִין וּבָרִיךְ יְיָ יַת עוֹבֵד אֱדוֹם וְיַת כָּל בֵּיתֵיהּ: [Targum Jonathan on II Samuel / 6 / 12] וְאִתְחַוָא לְמַלְכָּא דָוִד לְמֵימַר בָּרִיךְ יְיָ יַת בֵּית עוֹבֵד אֱדוֹם וְיַת כָּל דִילֵיהּ בְּדִיל אֲרוֹנָא דַייָ וַאֲזַל דָוִד וְאַסֵּיק יַת אֲרוֹנָא דַייָ מִבֵּית עוֹבֵד אֱדוֹם לְקַרְתָּא דְדָוִד בְּחֶדְוָא: [Targum Jonathan on II Samuel / 6 / 13] וַהֲוָה כַּד נְטָלוּ נַטְלֵי אֲרוֹנָא דַייָ שִׁיתָּא זוּגִין וּנְכֵיס תּוֹר וּפַּטִים: [Targum Jonathan on II Samuel / 6 / 14] וְדָוִד מְשַׁבַּח בְּכָל תְּקוֹף קֳדָם יְיָ וְדָוִד אֲסִיר כַּרְדוּט דְבוּץ: [Targum Jonathan on II Samuel / 6 / 15] וְדָוִד וְכָל בֵּית יִשְׂרָאֵל מַסְקִין יַת אֲרוֹנָא דַייָ בְּיַבָּבָא וּבְקַל שׁוֹפָרָא: [Targum Jonathan on II Samuel / 6 / 16] וַהֲוָה אֲרוֹנָא דַייָ אֲתָא לְקַרְתָּא דְדָוִד וּמִיכַל בַּת שָׁאוּל אִסְתְּכִיאַת מִן חֲרַכָּא וַחֲזַת יַת מַלְכָּא דָוִד מְרַקֵד וּמְשַׁבַּח קֳדָם יְיָ וּבְסָרַת עֲלוֹהִי בְּלִבָּהּ: [Targum Jonathan on II Samuel / 6 / 17] וְאַיְתִיאוּ יַת אֲרוֹנָא דַייָ וַאֲקִימוּ יָתֵיהּ בְּאַתְרֵיהּ בְּגוֹ מַשְׁכְּנָא דִי פְרַס לֵיהּ דָוִד וְאַסִיק דָוִד עֲלַוָן קֳדָם יְיָ וְנִכְסַת קוּדְשִׁין: [Targum Jonathan on II Samuel / 6 / 18] וְשֵׁיצֵי דָוִד מִלְאַסָקָא עֲלָתָא וְנִכְסַת קוּדְשַׁיָא וּבָרִיךְ יַת עַמָא בִּשְׁמָא דַייָ צְבָאוֹת: [Targum Jonathan on II Samuel / 6 / 19] וּפַלֵיג לְכָל עַמָא לְכָל הֲמוֹנָא דְיִשְׂרָאֵל מִגְבַר וְעַד אִתְּתָא לִגְבַר גְרִצְתָּא דִלְחֵם חֲדָא וּפְלוּג חָד וּמָנָתָא חֲדָא וַאֲזַל כָּל עַמָא גְבַר לְבֵיתֵיהּ: [Targum Jonathan on II Samuel / 6 / 20] וְתָב דָוִד לְבָרָכָא יַת אֱנָשׁ בֵּיתֵיהּ וּנְפָקַת מִיכַל בַּת שָׁאוּל לָקֳדָמוּת דָוִד וַאֲמַרַת מַה אִתְיַקַר יוֹמָא דֵין מַלְכָּא דְיִשְׂרָאֵל דְאִתְגְלֵי יוֹמָא דֵין לְעֵינֵי אַמְהַת עַבְדוֹהִי כְּמָא דְחָלִיץ וּמִתְגְלֵי חַד מִן סְרִיקַיָא: [Targum Jonathan on II Samuel / 6 / 21] וַאֲמַר דָוִד לְמִיכַל קֳדָם יְיָ דִי אִיתְרְעֵי בִי מֵאֲבוּךְ וּמִכָּל בֵּיתֵיהּ לְפַקָדָא יָתִי לְמֶהֱוֵי מַלְכָּא עַל עַמָא דַייָ עַל יִשְׂרָאֵל וְשַׁבְּחִית קֳדָם יְיָ: [Targum Jonathan on II Samuel / 6 / 22] וְזָעֵירְנָא עוֹד מִדָא וָאֶהִי מַכִּיךְ בְּעֵינֵי נַפְשִׁי מִבְּכֵן וְעִם אַמְהָתָא דִי אַתְּ אֲמַרְתְּ בְּעֵינֵיהוֹן אֱהֵי יַקִיר: [Targum Jonathan on II Samuel / 6 / 23] וּלְמִיכַל בַּת שָׁאוּל לָא הֲוָה לָה וְלָד עַד יוֹם מוֹתָהּ:

Study this passage

Prepare a passage questionPassage ID & source details Where did this come from?

Targum Jonathan on II Samuel — 7

[Targum Jonathan on II Samuel / 7 / 1] וַהֲוָה כַּד יָתֵיב מַלְכָּא בְּבֵיתֵיהּ וַיָי אַנִיחַ לֵיהּ מִסְחוֹר סְחוֹר מִכָּל בַּעֲלֵי דְבָבוֹהִי: [Targum Jonathan on II Samuel / 7 / 2] וַאֲמַר מַלְכָּא לְנָתָן נְבִיָא חֲזֵי כְעַן דִי אֲנָא יָתֵיב בְּבֵיתָא דִי מְטַלֵל בְּכִיוֹרֵי אַרְזַיָא וַאֲרוֹנָא דַייָ שָׁרֵי בְּמַשְׁכְּנָא בְגוֹ יְרִיעֲתָא: [Targum Jonathan on II Samuel / 7 / 3] וַאֲמַר נָתָן לְמַלְכָּא כָּל דִי בְלִבָּךְ אֱזֵיל עֲבֵיד אֲרֵי מֵימְרָא דַייָ בְּסַעֲדָךְ: [Targum Jonathan on II Samuel / 7 / 4] וַהֲוָה בְּלֵיְלְיָא הַהוּא וַהֲוָה פִתְגָם נְבוּאָה מִן קֳדָם יְיָ לְוַת נָתַן לְמֵימָר: [Targum Jonathan on II Samuel / 7 / 5] אֱזֵיל וְתֵימַר לְעַבְדִי לְדָוִד כִּדְנַן אֲמַר יְיָ הַאַתְּ תִּבְנֵי קֳדָמַי בֵּיתָא לְאַשְׁרָאָה שְׁכִנְתִּי בָּהּ: [Targum Jonathan on II Samuel / 7 / 6] אֲרֵי לָא אִשְׁרִיתִי שְׁכִנְתִּי בְּבֵיתָא מִיוֹמָא דִי אַסְקֵית יַת בְּנֵי יִשְׂרָאֵל מִמִצְרַיִם וְעַד יוֹמָא הָדֵין וַהֲוֵיתִי מַשְׁרִי שְׁכִנְתִּי בְּמַשְׁכְּנִין וּבִירִיעָן: [Targum Jonathan on II Samuel / 7 / 7] בְּכָל אֲתַר דִי הַלְכִית בְּכָל בְּנֵי יִשְׂרָאֵל הֲפִתְגַם מַלְלִית עִם חַד שִׁבְטַיָא דְיִשְׂרָאֵל דִי פַקֵדִית לְפַרְנָסָא יַת עַמִי יַת יִשְׂרָאֵל לְמֵימָר לְמָא לָא בְנִיתוּן קֳדָמַי בֵּיתָא דִי מְטַלֵל בְּכִיוֹרָא אַרְזַיָא: [Targum Jonathan on II Samuel / 7 / 8] וּכְעַן כִּדְנַן תֵּימַר לְעַבְדִי לְדָוִד כִּדְנַן אֲמַר יְיָ צְבָאוֹת אֲנָא דְבַרְתָּךְ מִן דִירָא מִבָּתַר עָנָא לְמֶהֱוֵי מַלְכָּא עַל עַמִי עַל יִשְׂרָאֵל: [Targum Jonathan on II Samuel / 7 / 9] וַהֲוָה מֵימְרִי בְסַעֲדָךְ בְּכָל אֲתַר דִי הֲלֵכְתָּא וְשֵׁיצֵיתִי יַת כָּל בַּעֲלֵי דְבָבָךְ מִן קֳדָמָךְ וְעַבְדִית לָךְ שׁוּם רַב כְּשׁוּם רַבְרְבַיָא דִי בְאַרְעָא: [Targum Jonathan on II Samuel / 7 / 10] וְאַשְׁוֵי אֲתַר מְתַקֵן לְעַמִי יִשְׂרָאֵל וַאֲקַיְמִנוּן וְיִשְׁרוּן בְּאַתְרְהוֹן וְלָא יְזוּעוּן עוֹד וְלָא יוֹסְפוּן בְּנֵי רִשְׁעָא לְעַנָיוּתְהוֹן כִּדְבְּקַדְמֵיתָא: [Targum Jonathan on II Samuel / 7 / 11] וּלְמִן יוֹמָא דִי פַקְדֵית נְגִידִין עַל עַמִי יִשְׂרָאֵל וַאֲנָחֵית לָךְ מִכָּל בַּעֲלֵי דְבָבָךְ וְחַוֵי לָךְ יְיָ אֲרֵי בֵּית מַלְכוּ יְקַיֵים לָךְ יְיָ: [Targum Jonathan on II Samuel / 7 / 12] אֲרֵי יַשְׁלִימוּן יוֹמָךְ וְתִשְׁכּוּב עִם אַבְהָתָךְ וְאָקִים יַת בְּרָךְ בַּתְרָךְ דִי תוֹלִיד וֶאֱתַקֵן יַת מַלְכוּתֵיהּ: [Targum Jonathan on II Samuel / 7 / 13] הוּא יִבְנֵי בֵיתָא לִשְׁמִי וְאַתְקִין יַת כּוּרְסֵי מַלְכוּתֵיהּ עַד עָלְמָא: [Targum Jonathan on II Samuel / 7 / 14] אֲנָא אֱהֵי לֵיהּ כְּאָב וְהוּא יְהֵי לִי דָמֵי כְּבַר דְאִם יִסְרַח וְאַלְקִינֵיהּ בְּמַלְקוּת גַבְרִין וּבְמַרְדוּת בְנֵי אֱנָשָׁא: [Targum Jonathan on II Samuel / 7 / 15] וְטוּבִי לָא יַעְדִי מִנֵיהּ כְּמָא דְאַעְדֵיתִי מִן שָׁאוּל דִי אַעְדֵיתִי מִן קֳדָמָךְ: [Targum Jonathan on II Samuel / 7 / 16] וְקַיֵים בֵּיתָךְ וּמַלְכוּתָךְ עַד עָלְמָא קֳדָמָךְ כּוּרְסֵי מַלְכוּתָךְ יְהֵי מְתַקַן עַד עָלְמָא: [Targum Jonathan on II Samuel / 7 / 17] כְּכֹל פִּתְגָמַיָא הָאִלֵין וּכְכֹל נְבוּאֲתָא הָדָא כְּדֵין מַלֵיל נָתָן עִם דָוִד: [Targum Jonathan on II Samuel / 7 / 18] וַאֲתָא מַלְכָּא דָוִד וִיתֵיב קֳדָם יְיָ וַאֲמַר לֵיהּ אֲנָא כְמִסַת יְיָ אֱלֹהִים וּמַן בֵּיתִי אֲרֵי אַמְטַתְנִי עַד הַלְכָא: [Targum Jonathan on II Samuel / 7 / 19] וּזְעֵירַת עוֹד דָא קֳדָמָךְ יְיָ אֱלֹהִים וּמַלֵלְתָּא אַף עַל בֵּית עַבְדָךְ לְעַלְמָא דְאָתֵי וְדָא חַזְיָא לִבְנֵי אֱנָשָׁא יְיָ אֱלֹהִים: [Targum Jonathan on II Samuel / 7 / 20] וּמַה יוֹסִיף דָוִד עוֹד לְמַלָלָא קֳדָמָךְ וְאַתְּ עֲבַדְתָּ בָּעוּת עַבְדָךְ יְיָ אֱלֹהִים: [Targum Jonathan on II Samuel / 7 / 21] בְּדִיל מֵימְרָךְ וּכְלִבָּךְ עֲבַדְתָּ יַת כָּל רַבְרְבָתָא הָדָא לְהוֹדָעָא יַת עַבְדָךְ: [Targum Jonathan on II Samuel / 7 / 22] עַל כֵּן רַב אַתְּ יְיָ אֱלֹהִים אֲרֵי לֵית דִכְוָתָךְ וְלֵית אֱלָהָא בַר מִנָךְ כְּכֹל דִי שְׁמַעְנָא אָמְרִין קֳדָמָנָא: [Targum Jonathan on II Samuel / 7 / 23] וּמַן כְּעַמָךְ כְּיִשְׂרָאֵל עַמָא חַד בְּחִיר בְּאַרְעָא דַאֲזַלוּ שְׁלוּחִין מִן קֳדָם יְיָ לְמִפְרַק לֵיהּ לְעָם וּלְשַׁוָאָה לֵיהּ שׁוּם וּלְמֶעְבַּד לְכוֹן רַבְרְבָן וַחֲסִינָן עַד דִי עָלוּ לַאֲרַע בֵּית שְׁכִנְתָּךְ דִיהַבְתְּ לְהוֹן מִן קֳדָם עַמָךְ דִי פְרַקְתָּא לָךְ מִמִצְרַיִם גוֹיִם וֵאלֹהָיו: [Targum Jonathan on II Samuel / 7 / 24] וְאַתְקֵינְתָּא לָךְ יַת עַמָךְ יִשְׂרָאֵל קֳדָמָךְ לְעַם עַד עָלְמָא וְאַתְּ יְיָ הֱוֵיתָא לְהוֹן לֵאלָהָא: [Targum Jonathan on II Samuel / 7 / 25] וּכְעַן יְיָ אֱלֹהִים פִּתְגָמָא דִי מַלֵלְתָּא עַל עַבְדָךְ וְעַל אֱנַשׁ בֵּיתֵיהּ אָקִים עַד עָלְמָא וֶעֱבֵיד כְּמָא דִי מַלֵלְתָּא: [Targum Jonathan on II Samuel / 7 / 26] וְיִסְגֵי שְׁמָךְ עַד עָלְמָא לְמֵימַר יְיָ צְבָאוֹת אֱלֹהִים עַל יִשְׂרָאֵל וּבֵית עַבְדָךְ דָוִד יְהֵי מְתַקֵן קֳדָמָךְ: [Targum Jonathan on II Samuel / 7 / 27] אֲרֵי אַתְּ יְיָ צְבָאוֹת אֱלָהָא דְיִשְׂרָאֵל חֲוֵיתָא לְעַבְדָךְ לְמֵימָר מַלְכוּ אֲקַיֵם לָךְ עַל כֵּן הֲוָת בְּלִבָּא דְעַבְדָךְ לְצַלָאָה קֳדָמָךְ יַת צְלוֹתָא הָדֵין: [Targum Jonathan on II Samuel / 7 / 28] וּכְעַן יְיָ אֱלֹהִים אַתְּ הוּא יְיָ וּפִתְגָמָךְ אִינוּן קְשׁוֹט וּמַלֵלְתָּא עַל עַבְדָךְ יַת טַבְתָא הָדָא: [Targum Jonathan on II Samuel / 7 / 29] וּכְעַן שְׁרֵי וּבְרִיךְ יַת בֵּית עַבְדָךְ לְמֶהֱוֵי לְעַלְמָא קֳדָמָךְ אֲרֵי אַתְּ יְיָ אֱלֹהִים מַלֵלְתָּא וּמִבִּרְכָתָךְ יִתְבָּרְכוּן בָּתֵּי עַבְדָךְ צַדִיקַיָא לַעֲלָם:

Study this passage

Prepare a passage questionPassage ID & source details Where did this come from?

Targum Jonathan on II Samuel — 8

[Targum Jonathan on II Samuel / 8 / 1] וַהֲוָה בָּתַר כֵּן וּמְחָא דָוִד יַת פְּלִשְׁתָּאֵי וְתַבְּרִינוּן וּנְסִיב דָוִד יַת תִּקוּן אַמְתָא מִידָא דִפְלִשְׁתָּאֵי: [Targum Jonathan on II Samuel / 8 / 2] וּמְחָא יַת מוֹאֲבָאֵי וּמְשַׁח לְהוֹן בְּעַדְבָא רָמֵי יַתְהוֹן לְאַרְעָא וּמְשַׁח תְּרֵין חַבְלִין לְמִקְטַל וּמְלֵי חַבְלָא לַאֲחָאָה וַהֲווֹ מוֹאָבָא לְדָוִד לְעַבְדִין נַטְלֵי פְרָס: [Targum Jonathan on II Samuel / 8 / 3] וּמְחָא דָוִד יַת הַדַדְעֶזֶר בַּר רְחוֹב מַלְכָּא דְצוֹבָא כַּד אֲזַל לְאַשְׁנָאָה תְּחוּמֵיהּ בִּנְהַר פְּרָת: [Targum Jonathan on II Samuel / 8 / 4] וַאֲסַר דָוִד מִנֵיהּ אֲלַף וּשְׁבַע מְאָה פְּרָשִׁין וְעַשְׂרִין אַלְפִין גְבַר רַגְלִי וַעֲקַד דָוִד יַת כָּל רְתִיכַיָא וְאַשְׁאַר מִנְהוֹן מְאָה רְתִיכִין: [Targum Jonathan on II Samuel / 8 / 5] וַאֲתוֹ אֱנַשׁ אֲרַם דַמֶשֶׂק לְמִסְעֹד לַהֲדַדְעֶזֶר מַלְכָּא דְצוֹבָה וּמְחָא דָוִד בַּאֲרָם עַשְׂרִין וּתְרֵין אַלְפִין גַבְרָא: [Targum Jonathan on II Samuel / 8 / 6] וּמַנֵי דָוִד אִסְטַרְטִיגִין בַּאֲרַם דַמֶשֶׂק וַהֲווֹ אֱנַשׁ אֲרָם לְדָוִד לְעַבְדִין נַטְלֵי פְרָס וּפְרַק יְיָ יַת דָוִד בְּכָל אֲתַר דִי הֲלִיךְ: [Targum Jonathan on II Samuel / 8 / 7] וּנְסִיב דָוִד יַת שִׁלְטֵי דְדַהֲבָא דַהֲווֹ עַל עַבְדֵי הֲדַדְעֶזֶר וְאַיְתִינוּן לִירוּשְׁלֵם: [Targum Jonathan on II Samuel / 8 / 8] וּמִבֶּטַח וּמִבֵּרוֹתַי קִרְוֵי הֲדַדְעֶזֶר נְסִיב מַלְכָּא דָוִד נְחָשָׁא סַגִי לַחֲדָא: [Targum Jonathan on II Samuel / 8 / 9] וּשְׁמַע תּוֹעִי מַלְכָּא דַחֲמָת אֲרֵי מְחָא דָוִד יַת כָּל מַשִׁרְיַת הֲדַדְעֶזֶר: [Targum Jonathan on II Samuel / 8 / 10] וּשְׁלַח תּוֹעִי יַת יוֹרָם בְּרֵיהּ לְוַת מַלְכָּא דָוִד לְמִשְׁאַל לֵיהּ לִשְׁלָם וּלְבָרְכוּתֵיהּ עַל דְאַגִיחַ קְרָבָא בַּהֲדַדְעֶזֶר וְקַטְלֵיהּ אֲרֵי גְבַר עָבֵיד קְרָבִין עִם תּוֹעִי הֲוָה הֲדַדְעֶזֶר וְעִמֵיהּ הֲווֹ מָנֵי כַסְפָּא וּמָנֵי דַהֲבָא וּמָנֵי נְחָשָׁא: [Targum Jonathan on II Samuel / 8 / 11] אַף יַתְהוֹן אַקְדִישׁ מַלְכָּא דָוִד קֳדָם יְיָ עִם כַּסְפָּא וְדַהֲבָא דִי אַקְדִישׁ מִכָּל עַמְמַיָא דִי כַבֵּשׁ: [Targum Jonathan on II Samuel / 8 / 12] מֵאֲרָם וּמִמוֹאָב וּמִבְּנֵי עַמוֹן וּמִפְּלִשְׁתָּאֵי וּמֵעֲמַלְקָאֵי וּמִבִּיזַת הֲדַדְעֶזֶר בַּר רְחוֹב מַלְכָּא דְצוֹבָה: [Targum Jonathan on II Samuel / 8 / 13] וּכְנַשׁ דָוִד מַשִׁרְיַן כַּד תַּב מִלְמִמְחֵי יַת אֲרָם בְּגֵיא מֶלַח תַּמְנַת עֲסַר אַלְפִין: [Targum Jonathan on II Samuel / 8 / 14] וּמַנֵי בֶאֱדוֹם אִסְטַרְטִיגִין בְּכָל אֱדוֹם מַנֵי אִסְטַרְטִיגִין וַהֲווֹ כָל אֱדוֹם עַבְדִין לְדָוִד וּפְרַק יְיָ יַת דָוִד בְכָל אֲתַר דִי הֲלִיךְ: [Targum Jonathan on II Samuel / 8 / 15] וּמְלַךְ דָוִד עַל כָּל יִשְׂרָאֵל וַהֲוָה דָוִד עָבֵיד דִין דִקְשׁוֹט וְזָכוּ לְכָל עַמֵיהּ: [Targum Jonathan on II Samuel / 8 / 16] וְיוֹאָב בַּר צְרוּיָה מְמַנָא עַל חֵילָא וִיהוֹשָׁפָט בַּר אֲחִילוּד מְמַנָא עַל דָכְרָנַיָא: [Targum Jonathan on II Samuel / 8 / 17] וְצָדוֹק בַּר אֲחִיטוּב וַאֲחִימֶלֶךְ בַּר אֶבְיָתָר כַּהֲנַיָא וּשְׂרָיָה סַפְרָא: [Targum Jonathan on II Samuel / 8 / 18] וּבְנָיָהוּ בַּר יְהוֹיָדָע מְמַנָא עַל קַשְׁתַּיָא וְעַל קַלְעֲיָא וּבְנֵי דָוִד רַבְרְבִין הֲווֹ:

Study this passage

Prepare a passage questionPassage ID & source details Where did this come from?

Targum Jonathan on II Samuel — 9

[Targum Jonathan on II Samuel / 9 / 1] וַאֲמַר דָוִד הֲאִית בָּא עוֹד דִי אִשְׁתָּאֵר לְבֵית שָׁאוּל וְאַעְבֵיד עִמֵיהּ טִיבוּ בְּדִיל יְהוֹנָתָן: [Targum Jonathan on II Samuel / 9 / 2] וּלְבֵית שָׁאוּל עַבְדָא וּשְׁמֵיהּ צִיבָא וּקְרוֹ לֵיהּ לְוַת דָוִד וַאֲמַר מַלְכָּא לֵיהּ הַאַתְּ צִיבָא וַאֲמַר עַבְדָךְ: [Targum Jonathan on II Samuel / 9 / 3] וַאֲמַר מַלְכָּא הֲאִית עוֹד גַבְרָא לְבֵית שָׁאוּל וְאַעְבֵּיד עִמֵיהּ טִיבוּ מִן קֳדָם יְיָ וַאֲמַר צִיבָא לְמַלְכָּא עוֹד בְּרָא לִיהוֹנָתָן לָקֵי בְּתַרְתֵּין רַגְלוֹהִי: [Targum Jonathan on II Samuel / 9 / 4] וַאֲמַר לֵיהּ מַלְכָּא הֵיכָא הוּא וַאֲמַר צִיבָא לְמַלְכָּא הָא הוּא בֵּית מָכִיר בַּר עַמִיאֵל בְּלוֹ דְבָר: [Targum Jonathan on II Samuel / 9 / 5] וּשְׁלַח מַלְכָּא דָוִד וְדַבְרֵיהּ מִבֵּית מְכִיר בַּר עַמִיאֵל מִלוֹ דְבָר: [Targum Jonathan on II Samuel / 9 / 6] וַאֲתָא מְפִיבֹשֶׁת בַּר יְהוֹנָתָן בַּר שָׁאוּל לְוַת דָוִד וּנְפַל עַל אַפּוֹהִי וּסְגִיד וַאֲמַר דָוִד מְפִיבֹשֶׁת וַאֲמַר הָא עַבְדָךְ: [Targum Jonathan on II Samuel / 9 / 7] וַאֲמַר לֵיהּ דָוִד לָא תִדְחַל אֲרֵי מֶעְבַד אַעְבִּיד עִמָךְ טִיבוּ בְּדִיל יְהוֹנָתָן אֲבוּךְ וְאָתֵיב לָךְ יַת כָּל אַחֲסָנַת שָׁאוּל אֲבוּךְ וְאַתְּ תֵּיכוּל לַחְמָא עַל פְּתוֹרִי תְּדִירָא: [Targum Jonathan on II Samuel / 9 / 8] וּסְגִיד וַאֲמַר מָה עַבְדָךְ אֲרֵי אִתְפְּנִיתָא עַל גְבַר הֶדְיוֹט דִכְוָתִי: [Targum Jonathan on II Samuel / 9 / 9] וּקְרָא מַלְכָּא לְצִיבָא עוּלֵימָא דְשָׁאוּל וַאֲמַר לֵיהּ כָּל דַהֲוָה לְשָׁאוּל וּלְכָל בֵּיתֵיהּ יְהָבִית לְבַר רִבּוֹנָךְ: [Targum Jonathan on II Samuel / 9 / 10] וְתִפְלַח לֵיהּ יַת אַרְעָא אַתְּ וּבְנָךְ וְעַבְדָיִךְ וְתֵיעוּל וִיהֵי לְבַר רִבּוֹנָךְ מָזוֹן וְיִתְפַּרְנֵס וּמְפִיבֹשֶׁת בַר רִבּוֹנָךְ אָכֵיל תְּדִירָא לַחְמָא עַל פְּתוֹרִי וּלְצִיבָא חַמְשַׁת עֲסַר בְּנִין וְעַסְרִין עַבְדִין: [Targum Jonathan on II Samuel / 9 / 11] וַאֲמַר צִיבָא לְמַלְכָּא כְּכֹל דִי פַקֵיד רִבּוֹנִי מַלְכָּא יַת עַבְדֵיהּ כֵּן יַעְבֵּד עַבְדָךְ וּמְפִיבֹשֶׁת אָכַל עַל פְּתוֹרִי כְּחַד מִבְּנֵי מַלְכָּא: [Targum Jonathan on II Samuel / 9 / 12] וְלִמְפִיבֹשֶׁת בָּרָא זְעֵירָא וּשְׁמֵיהּ מִיכָה וְכֹל מוֹתַב בֵּית צִיבָא עַבְדִין לִמְפִיבֹשֶׁת: [Targum Jonathan on II Samuel / 9 / 13] וּמְפִיבֹשֶׁת יְתִיב בִּירוּשְׁלֵם אֲרֵי עַל פְּתוֹרָא דְמַלְכָּא תְּדִירָא הוּא אָכֵל וְהוּא לָקֵי בְּתַרְתֵּין רִגְלוֹהִי:

Study this passage

Prepare a passage questionPassage ID & source details Where did this come from?

Targum Jonathan on II Samuel — 10

[Targum Jonathan on II Samuel / 10 / 1] וַהֲוָה בָּתַר כֵּן וּמִית מַלְכָּא דִבְנֵי עַמוֹן וּמְלַךְ חָנוּן בְּרֵיהּ תְּחוֹתוֹהִי: [Targum Jonathan on II Samuel / 10 / 2] וַאֲמַר דָוִד אַעְבֵיד טֵיבוּ עִם חָנוּן בַּר נָחָשׁ כְּמָא דַעֲבֵד אֲבוּהִי עִמִי טִיבוּ וּשְׁלַח דָוִד לְנַחֲמוּתֵיהּ בִּידָא דְעַבְדוֹהִי לְוַת אֲבוּהִי וַאֲתוֹ עַבְדֵי דָוִד לְאַרְעָא בְּנֵי עַמוֹן: [Targum Jonathan on II Samuel / 10 / 3] וַאֲמַרוּ רַבְרְבֵי בְּנֵי עַמוֹן לְחָנוּן רִבּוֹנֵיהוֹן הַמְיַקֵר דָוִד יַת אֲבוּךְ בְּעֵינָךְ אֲרֵי שְׁלַח לָךְ מְנַחֲמִין הֲלָא בְּדִיל לְמֶחְקַר יַת קַרְתָּא וּלְאַלָלוּתָהּ וּלְבַדְקָהּ שְׁלַח דָוִד יַת עַבְדוֹהִי לְוָתָךְ: [Targum Jonathan on II Samuel / 10 / 4] וּנְסִיב חָנוּן יַת עַבְדֵי דָוִד וּגְדַע יַת פַלְגוּת דִקְנֵיהוֹן וּפְסִיק יַת לְבוּשֵׁיהוֹן עַד פַּלְגֵיהוֹן עַד אֲתַר בֵּית בְּהָתַתְהוֹן וְשַׁלְחִינוּן: [Targum Jonathan on II Samuel / 10 / 5] וְחַוִיאוּ לְדָוִד וּשְׁלַח לָקֳדָמוּתְהוֹן אֲרֵי הֲווֹ גַבְרַיָא מִתְכַּלְמִין לַחֲדָא וַאֲמַר מַלְכָּא תְּבוּ בִירֵיחוֹ עַד דְיִצְמַח דִקְנֵיכוֹן וּתְתוּבוּן: [Targum Jonathan on II Samuel / 10 / 6] וַחֲזוֹ בְנֵי עַמוֹן אֲרֵי אִתְגָרִיאוּ בְדָוִד וּשְׁלַחוּ בְנֵי עַמוֹן וַאֲגָרוּ יַת אֲרַם בֵּית רְחוֹב וְיַת אֲרַם צוֹבָא עַסְרִין אַלְפִין גְבַר רִגְלֵי וְיַת מֶלֶךְ מַעֲכָה אֲלַף גְבַר וְאִישׁ טוֹב תְּרֵי עֲסַר אַלְפִין גַבְרָא: [Targum Jonathan on II Samuel / 10 / 7] וּשְׁמַע דָוִד וּשְׁלַח יַת יוֹאָב וְיַת כָּל חֵילָא דְגִבָרַיָא: [Targum Jonathan on II Samuel / 10 / 8] וּנְפַקוּ בְּנֵי עַמוֹן וּסְדָרוּ קְרָבָא בְּמַעֲלָנָא דְתַרְעָא וַאֲרַם צוֹבָא וּרְחוֹב וְאִישׁ טוֹב וּמַעֲכָה בִּלְחוֹדֵיהוֹן בְּחַקְלָא: [Targum Jonathan on II Samuel / 10 / 9] וַחֲזָא יוֹאָב אֲרֵי תַקִיפוּ עֲלוֹהִי עַבְדֵי קְרָבָא מֵאֲפּוֹהִי וּמֵאֲחוֹרוֹהִי וּבְחַר מִכֹּל בְּחוּרֵי יִשְׂרָאֵל וְסַדַר לָקֳדָמוּת אֱנַשׁ אֲרָם: [Targum Jonathan on II Samuel / 10 / 10] וְיַת שְׁאָר עַמָא יְהַב בְּיַד אַבְשַׁי אֲחוֹהִי וְסַדַר לָקֳדָמוּת בְּנֵי עַמוֹן: [Targum Jonathan on II Samuel / 10 / 11] וַאֲמַר אִם תִּתְקַף אֱנַשׁ אֲרַם מִנִי וּתְהֵי לִי לְפָרִיק וְאִם בְּנֵי עַמוֹן יִתְקְפוּן מִנָךְ וְאֵיהַךְ לְמִפְרַק לָךְ: [Targum Jonathan on II Samuel / 10 / 12] תְּקֵף וְנִתְקַף עַל עַמָנָא וְעַל קִירְוֵי אֱלָהָנָא וַיָי יַעְבֵּד דְתַקֵן קֳדָמוֹהִי: [Targum Jonathan on II Samuel / 10 / 13] וּקְרֵיב יוֹאָב וְעַמָא דִי עִמֵיהּ לְאַגָחָא קְרָבָא בֶּאֱנַשׁ אֲרָם וְאַפִּיכוּ מִן קֳדָמוֹהִי: [Targum Jonathan on II Samuel / 10 / 14] וּבְנֵי עַמוֹן חֲזוֹ אֲרֵי אַפָכוּ אֱנַשׁ אֲרָם וַעֲרָקוּ מִן קֳדָם אֲבִישַׁי וַאֲתוֹ לְקַרְתָּא וְתַב יוֹאָב מִלְוַת בְנֵי עַמוֹן וַאֲתָא לִירוּשְׁלֵם: [Targum Jonathan on II Samuel / 10 / 15] וַחֲזוֹ אֱנַשׁ אֲרָם אֲרֵי אִתְבָּרוּ קֳדָם יִשְׂרָאֵל וְאִתְכְּנִישׁוּ כַּחֲדָא: [Targum Jonathan on II Samuel / 10 / 16] וּשְׁלַח הֲדַדְעֶזֶר וְאַפֵּיק יַת אֱנַשׁ אֲרָם דְמֵעִבַּר פְּרָת וַאֲתוֹ לְחֵילָם וְשׁוֹבַךְ רַב חֵילָא דְהֲדַדְעֶזֶר קֳדָמֵיהוֹן: [Targum Jonathan on II Samuel / 10 / 17] וְאִיתְחַוָא לְדָוִד וּכְנַשׁ יַת כָּל יִשְׂרָאֵל וַעֲבַר יַת יַרְדְנָא וַאֲתוֹ לְחֵלָם וְסַדָרוּ אֱנַשׁ אֲרָם לְקֳדָמוּת דָוִד וְאַגִיחוּ קְרָבָא עִמֵיהּ: [Targum Jonathan on II Samuel / 10 / 18] וְאַפָּכוּ אֱנַשׁ אֲרָם מִן קֳדָם יִשְׂרָאֵל וּקְטַל דָוִד מֵאֲרָם שְׁבַע מְאָה רְתִיכִין וְאַרְבְּעִין אַלְפִין פָּרָשִׁין וְיַת שׁוֹבָךְ רַב חֵילֵיהּ מְחוֹ וּמִית תַּמָן: [Targum Jonathan on II Samuel / 10 / 19] וַחֲזוֹ כָל מַלְכַיָא עַבְדֵי הֲדַדְעֶזֶר אֲרֵי אִתְבָּרוּ קֳדָם יִשְׂרָאֵל וְאַשְׁלִימוּ עִם יִשְׂרָאֵל וּפַלְחוּנוּן וּדְחִילוּ אֱנַשׁ אֲרָם לְמִפְרַק עוֹד יַת בְּנֵי עַמוֹן:

Study this passage

Prepare a passage questionPassage ID & source details Where did this come from?

Targum Jonathan on II Samuel — 11

[Targum Jonathan on II Samuel / 11 / 1] וַהֲוָה לִזְמַן סוֹפָא דְשַׁתָּא לְעִדַן מִפַּק מַלְכַיָא וּשְׁלַח דָוִד יַת יוֹאָב וְיַת עַבְדוֹהִי עִמֵיהּ וְיַת כָּל יִשְׂרָאֵל וְחַבִּילוּ יַת בְּנֵי עַמוֹן וְצָרוּ עַל רַבָּה וְדָוִד יָתֵיב בִּירוּשְׁלֵם: [Targum Jonathan on II Samuel / 11 / 2] וַהֲוָה לְעִדַן רַמְשָׁא וְקָם דָוִד מֵעַל שִׁיווּיֵהּ וַהֲלִיךְ עַל אִגַר בֵּית מַלְכָּא וַחֲזָא אִתְּתָא מִשְׁתַּטְפָא עַל אִגְרָא וְאִתְּתָא שְׁפִירַת חֵזוּ לַחֲדָא: [Targum Jonathan on II Samuel / 11 / 3] וּשְׁלַח דָוִד וּשְׁאַל לְאִתְּתָא וַאֲמַר הֲלָא דָא בַּת שֶׁבַע בַּת אֱלִיעָם אִתַּת אוּרִיָה חִתָּאָה: [Targum Jonathan on II Samuel / 11 / 4] וּשְׁלַח דָוִד אִזְגַדִין וְדַבְּרָהּ וַאֲתַת לְוָתֵיהּ וּשְׁכִיב עִמָהּ וְהִיא מִתְדַכְיָא מִסוֹבְתָהּ וְתָבַת לְבֵיתָהּ: [Targum Jonathan on II Samuel / 11 / 5] וְעַדִיאַת אִתְּתָא וּשְׁלָחַת וְחַוִיאַת לְדָוִד וַאֲמַרַת מְעַדְיָא אֲנָא: [Targum Jonathan on II Samuel / 11 / 6] וּשְׁלַח דָוִד לְוַת יוֹאָב שְׁדַר לִי יַת אוּרִיָה חִתָּאָה וְשַׁדֵר יוֹאָב יַת אוּרִיָה חִתָּאָה לְוַת דָוִד: [Targum Jonathan on II Samuel / 11 / 7] וַאֲתָא אוּרִיָה לְוָתֵיהּ וּשְׁאַל לֵיהּ דָוִד לִשְׁלַם יוֹאָב וְלִשְׁלַם עַמָא וְלִשְׁלַם עַבְדֵי קְרָבָא: [Targum Jonathan on II Samuel / 11 / 8] וַאֲמַר דָוִד לְאוּרִיָא חוּת לְבֵיתָךְ וּשְׁטוֹף רִגְלָךְ וּנְפַק אוּרִיָה מִבֵּית מַלְכָּא וּנְפַקַת בַּתְרוֹהִי סְעוּדָתָא דְמַלְכָּא: [Targum Jonathan on II Samuel / 11 / 9] וּשְׁכַב אוּרִיָה בִּתְרַע בֵּית מַלְכָּא עִם כָּל עַבְדֵי רִבּוֹנֵיהּ וְלָא נְחַת לְבֵיתֵיהּ: [Targum Jonathan on II Samuel / 11 / 10] וְחַוִיאוּ לְדָוִד לְמֵימַר לָא נְחַת אוּרִיָה לְבֵיתֵיהּ וַאֲמַר דָוִד לְאוּרִיָה הֲלָא מֵאוֹרְחָא אַתְּ אָתֵי מָא דֵין לָא נְחַתְתָּא לְבֵיתָךְ: [Targum Jonathan on II Samuel / 11 / 11] וַאֲמַר אוּרִיָה לְדָוִד אֲרוֹנָא וְיִשְׂרָאֵל וִיהוּדָה יַתְבִין בִּמְטָלַיָא וְרִבּוֹנִי יוֹאָב וְעַבְדֵי רִבּוֹנִי עַל אַפֵּי בְרָא שָׁרָן וַאֲנָא אֵיעוּל לְבֵיתִי לְמֵיכַל וּלְמִשְׁתֵּי וּלְמִשְׁכַּב עִם אִתְּתִי חַיָךְ וְחַיֵי נַפְשָׁךְ אִם אַעְבֵּיד יַת פִּתְגָמָא הָדֵין: [Targum Jonathan on II Samuel / 11 / 12] וַאֲמַר דָוִד לְאוּרִיָה תִּיב הָכָא אַף יוֹמָא דֵין וּמְחַר אַשְׁלְחִינָךְ וִיתֵיב אוּרִיָה בִּירוּשְׁלֵם בְּיוֹמָא הַהוּא וּבֵיוֹמָא דְבַתְרוֹהִי: [Targum Jonathan on II Samuel / 11 / 13] וּקְרָא לֵיהּ דָוִד וַאֲכַל קֳדָמוֹהִי וּשְׁתֵי וְרַוְיֵהּ וּנְפַק בְרַמְשָׁא לְמִשְׁכַּב בְּשִׁווּיֵהּ עִם עַבְדֵי רִבּוֹנֵיהּ וּלְבֵיתֵיהּ לָא נְחָת: [Targum Jonathan on II Samuel / 11 / 14] וַהֲוָה בְּצַפְרָא וּכְתַב דָוִד אִגַרְתָּא לְוַת יוֹאָב וְשַׁדָר בְּיַד אוּרִיָה: [Targum Jonathan on II Samuel / 11 / 15] וּכְתַב בְּאִגַרְתָּא לְמֵימָר הָבוּ יַת אוּרִיָה לָקֳבֵיל אַפֵּי קְרָבָא תַּקִיפָא וּתְתוּבוּן מִבַּתְרוֹהִי וְיִתְמְחֵי וִימוּת: [Targum Jonathan on II Samuel / 11 / 16] וַהֲוָה כַּד צַר יוֹאָב עַל קַרְתָּא וִיהַב יַת אוּרִיָה לְאַתְרָא דִידַע אֲרֵי גַבְרִין גִבָּרִין תַּמָן: [Targum Jonathan on II Samuel / 11 / 17] וּנְפַקוּ אֱנָשֵׁי קַרְתָּא וְאַגִיחוּ קְרָבָא עִם יוֹאָב וְאִתְקְטֵיל מֵעַמָא מֵעַבְדֵי דָוִד וּמִית אַף אוּרִיָה חִתָּאָה: [Targum Jonathan on II Samuel / 11 / 18] וּשְׁלַח יוֹאָב וְחַוֵי לְדָוִד יַת כָּל עִסְקֵי קְרָא: [Targum Jonathan on II Samuel / 11 / 19] וּפַקֵיד יַת אִזְגַדָא לְמֵימָר כְּשֵׁצָיוּתָךְ יַת כָּל עִסְקֵי קְרָבָא לְמַלָלָא עִם מַלְכָּא: [Targum Jonathan on II Samuel / 11 / 20] וִיהֵי אִם יִדְלַק רוּגְזָא דְמַלְכָּא וְיֵימַר לָךְ מָא דֵין אִתְקַרֵבְתּוּן לְקַרְתָּא לְאַגָחָא הֲלָא יְדַעְתּוּן יַת דְיִרְמוֹן עֲלֵיכוֹן מִן שׁוּרָא: [Targum Jonathan on II Samuel / 11 / 21] מַן קְטַל יַת אֲבִימֶלֶךְ בַּר יְרֻבֶּשֶׁת הֲלָא אִתְּתָא רְמָת עֲלוֹהִי פַלְגוּת רֶכֶב רֵחַיָא מִן שׁוּרָא וּמִית בְּתֵבֵץ לְמָא אִתְקָרִבְתּוּן לְשׁוּרָא וְתֵימַר אַף עַבְדָךְ אוּרִיָה חִתָּאָה מִית: [Targum Jonathan on II Samuel / 11 / 22] וַאֲזַל אִזְגַדָא וַאֲתָא וְחַוֵי לְדָוִד יַת כָּל דְשַׁלְחֵיהּ יוֹאָב: [Targum Jonathan on II Samuel / 11 / 23] וַאֲמַר אִזְגַדָא לְדָוִד אֲרֵי תַקִיפוּ עֲלָנָא גַבְרַיָא וּנְפַקוּ לְוָתָנָא לְחַקְלָא וַהֲוֵינָא טַרְדִין לְהוֹן עַד מַעֲלָנָא דְתַרְעָא: [Targum Jonathan on II Samuel / 11 / 24] וּשְׁדוֹ קַשָׁתַיָא בְּעַבְדָיִךְ מִן שׁוּרָא וְאִתְקְטִילוּ מֵעַבְדֵי מַלְכָּא וְאַף עַבְדָךְ אוּרִיָה חִתָּאָה מִית: [Targum Jonathan on II Samuel / 11 / 25] וַאֲמַר דָוִד לְאִזְגַדָא כְּדֵין תֵּימַר לְיוֹאָב לָא יַבְאֵשׁ בְּעֵינָךְ יַת פִּתְגָמָא הָדֵין אֲרֵי כְדֵין וּכְדֵין תִּקְטוֹל חַרְבָּא אַתְקֵיף קְרָבָא עַל קַרְתָּא וּפַגְרָהּ וְתַקְפֵהוּ: [Targum Jonathan on II Samuel / 11 / 26] וּשְׁמָעַת אִתַּת אוּרִיָה אֲרֵי מִית אוּרִיָהּ בַּעֲלָה וּסְפָדַת עַל בַעֲלָהּ: [Targum Jonathan on II Samuel / 11 / 27] וַעֲבַר אֶבְלָא וּשְׁלַח דָוִד וְכַנְשָׁה לְבֵיתֵיהּ וַהֲוַת לֵיהּ לְאִתּוּ וִילִידַת לֵיהּ בַּר וּבָאֵישׁ פִּתְגָמָא דַעֲבַד דָוִד קֳדָם יְיָ:

Study this passage

Prepare a passage questionPassage ID & source details Where did this come from?

Targum Jonathan on II Samuel — 12

[Targum Jonathan on II Samuel / 12 / 1] וּשְׁלַח יְיָ יַת נָתָן לְוַת דָוִד וַאֲתָא לְוָתֵיהּ וַאֲמַר לֵיהּ תְּרֵין גַבְרִין הֲווֹ בְקַרְתָּא חָדָא חַד עֲתִּירָא וְחַד מִסְכֵּינָא: [Targum Jonathan on II Samuel / 12 / 2] לְעַתִּירָא הֲווֹ עָאן וְתוֹרִין סַגִי לַחֲדָא: [Targum Jonathan on II Samuel / 12 / 3] וּלְמִסְכֵּינָא לֵית כָּל מִדָעַם אֱלָהֵין אִמַרְתָּא חֲדָא זְעֵירָא דְזַבְּנָא וְקַיְימָהּ וּרְבַת עִמֵיהּ וְעִם בְּנוֹהִי כַּחֲדָא מִפִּתֵּיהּ אֲכָלַת וּמִכּוֹסֵיהּ שַׁתְיָא וּבְחֵיקֵיהּ שָׁכְבָא וַהֲוַת לֵיהּ כִּבְרַתָּא: [Targum Jonathan on II Samuel / 12 / 4] וַאֲתָא אוֹרְחָא לְגַבְרָא עַתִּירָא וְחַס לְמֵיסַב מֵעָנֵיהּ וּמִתּוֹרֵיהּ לְמֶעְבַּד לְאוֹרְחָא דַאֲתָא לֵיהּ וּנְסֵיב יַת אִמַרְתָּא דְגַבְרָא מִסְכֵּינָא וְעַבְדָהּ לְגַבְרָא דַאֲתָא לְוָתֵיהּ: [Targum Jonathan on II Samuel / 12 / 5] וּתְקֵיף רוּגְזָא דְדָוִד בְּגַבְרָא לַחֲדָא וַאֲמַר לְנָתָן קַיָים הוּא יְיָ אֲרֵי גְבַר חַיַב קְטוֹל גַבְרָא דַעֲבַד דָא: [Targum Jonathan on II Samuel / 12 / 6] וְיַת אִמַרְתָּא יְשַׁלֵם עַל חַד אַרְבְּעָא חֲלַף דַעֲבַד יַת פִּתְגָמָא הָדֵין וְעַל דְלָא חָס: [Targum Jonathan on II Samuel / 12 / 7] וַאֲמַר נָתָן לְדָוִד אַתְּ גַבְרָא כִּדְנַן אֲמַר יְיָ אֱלָהָא דְיִשְׂרָאֵל אֲנָא מְשַׁחְתָּךְ לְמֶהֱוֵי מַלְכָּא עַל יִשְׂרָאֵל וַאֲנָא שֵׁיזַבְתָּךְ מִידָא דְשָׁאוּל: [Targum Jonathan on II Samuel / 12 / 8] וִיהָבֵית לָךְ יַת בֵּית רִבּוֹנָךְ וְיַת נְשֵׁי רִבּוֹנָךְ בְּחֵיקָךְ וִיהָבֵית לָךְ יַת בֵּית יִשְׂרָאֵל וִיהוּדָה וְאִם זְעֵיר וְאוֹסִיף לָךְ כְּאִלֵין וּכְאִלֵין: [Targum Jonathan on II Samuel / 12 / 9] מָא דֵין בָּסַרְתָּא עַל פִּתְגָמָא דַייָ לְמֶעְבַּד דְבִישׁ קֳדָמוֹהִי יַת אוּרִיָה חִתָּאָה קְטַלְתָּא בְּחַרְבָּא וְיַת אִתְּתֵיהּ נְסִיבְתָּא לָךְ לְאִתּוּ וְיָתֵיהּ קְטַלְתָּא בְחַרְבָּא דִבְנֵי עַמוֹן: [Targum Jonathan on II Samuel / 12 / 10] וּכְעַן לָא תִפְסוֹק חַרְבָּא מִן אֱנַשׁ בֵּיתָךְ עַד עַלְמָא חֲלָף דַאֲשַׁטְתַּנִי וּנְסֵבְתָּא יַת אִתַּת אוּרִיָה חִתָּאָה לְמֶהֱוֵי לָךְ לְאִתּוּ: [Targum Jonathan on II Samuel / 12 / 11] כִּדְנַן אֲמַר יְיָ הָא אֲנָא מְקַיֵים עֲלָךְ בִּישָׁא מִבֵּיתָךְ וְאֶדְבַר יַת נְשָׁךְ לְעֵינָךְ וְאֶתֵּן לְחַבְרָךְ וְיִשְׁכּוֹב עִם נְשָׁךְ לְעֵינֵי שִׁמְשָׁא הָדָא: [Targum Jonathan on II Samuel / 12 / 12] אֲרֵי אַתְּ עֲבַדְתָּא בְסִתְרָא וַאֲנָא אַעְבֵּיד יַת פִּתְגָמָא הָדֵין קֳדָם כָּל יִשְׂרָאֵל וְקָבֵיל שִׁמְשָׁא: [Targum Jonathan on II Samuel / 12 / 13] וַאֲמַר דָוִד לְנָתָן חָבִית קֳדָם יְיָ וַאֲמַר נָתָן לְדָוִד אַף יְיָ אַעְבֵּר חוֹבָךְ לָא תְמוּת: [Targum Jonathan on II Samuel / 12 / 14] בְּרַם אֲרֵי מִפְתַּח פְּתַחְתָּא פּוּמָא דְסַנְאֵי עַמָא דַייָ בְּפִתְגָמָא הָדֵין אַף בְּרָא דְאִתְיְלִיד לָךְ מֵמַת יְמוּת: [Targum Jonathan on II Samuel / 12 / 15] וַאֲזַל נָתָן לְבֵיתֵיהּ וּתְבַר יְיָ יַת רַבְיָא דִילִידַת אִתַּת אוּרִיָה לְדָוִד וְאִטְעַן: [Targum Jonathan on II Samuel / 12 / 16] וּבְעָא דָוִד רַחֲמִין מִן קֳדָם יְיָ עַל רַבְיָא וְצָם דָוִד צוֹמָא וְעַל וּבָת וּשְׁכִיב עַל אַרְעָא: [Targum Jonathan on II Samuel / 12 / 17] וְקָמוּ סָבֵי בֵיתֵיהּ עֲלוֹהִי לַאֲקָמוּתֵיהּ מִן אַרְעָא וְלָא אֲבָא וְלָא אֲכָל עִמְהוֹן לַחְמָא: [Targum Jonathan on II Samuel / 12 / 18] וַהֲוָה בְּיוֹמָא שְׁבִיעָאָה וּמִית רַבְיָא וּדְחִילוּ עַבְדֵי דָוִד לְחַוָאָה לֵיהּ אֲרֵי מִית רַבְיָא אֲרֵי אֲמַרוּ כַּד הֲוָה רַבְיָא קַיָם מַלֵילְנָא עִמֵיהּ וְלָא קַבֵּיל מִנָנָא וְאֵיכְדֵין נֵימַר לֵיהּ מִית רַבְיָא וְיַעְבֵּד בִּישָׁא: [Targum Jonathan on II Samuel / 12 / 19] וַחֲזָא דָוִד אֲרֵי עַבְדוֹהִי מְלַחֲשִׁין וּסְבַר דָוִד אֲרֵי מִית רַבְיָא וַאֲמַר דָוִד לְעַבְדוֹהִי הֲמִית רַבְיָא וַאֲמַרוּ מִית: [Targum Jonathan on II Samuel / 12 / 20] וְקָם דָוִד מִן אַרְעָא וּמְשַׁח וְשַׁף וְשַׁנֵי כְּסוּתֵיהּ וְעַל לְבֵית מַקְדְשָׁא דַייָ וּסְגִיד וַאֲתָא לְבֵיתֵיהּ וּשְׁאֵיל וְשַׁוִיאוּ לֵיהּ לַחְמָא וַאֲכַל: [Targum Jonathan on II Samuel / 12 / 21] וַאֲמַרוּ עַבְדוֹהִי לֵיהּ מַה פִתְגָמָא הָדֵין דַעֲבַדְתָּא עַד דְרַבְיָא קַיָם צַמְתָּא וּבְכֵית וְכַד מִית רַבְיָא קַמְתָּא וַאֲכַלְתְּ לַחְמָא: [Targum Jonathan on II Samuel / 12 / 22] וַאֲמַר עַד דְרַבְיָא קַיָם צָמֵית וּבְכֵיתִי אֲרֵי אֲמַרִית מַן יְדַע דִלְמָא יִתְרְחֵים עֲלַי מִן קֳדָם יְיָ וְיֵחִי רַבְיָא: [Targum Jonathan on II Samuel / 12 / 23] וּכְעַן מִית לְמָא דְנַן אֲנָא צָאֵים הַאֵיכוּל לַאֲתָבוּתֵיהּ עוֹד אֲנָא אֵיזֵיל לְוָתֵיהּ וְהוּא לָא תָאֵב לְוָתִי: [Targum Jonathan on II Samuel / 12 / 24] וְנָחֵים דָוִד יַת בַּת שֶׁבַע אִתְּתֵיהּ וְעַל לְוָתָהּ וּשְׁכִיב עִמָהּ וִילֵידַת בַּר וּקְרַת יַת שְׁמֵיהּ שְׁלֹמֹה וַיָי רַחְמֵיהּ: [Targum Jonathan on II Samuel / 12 / 25] וּשְׁלַח בְּיַד נָתָן נְבִיָא וּקְרָא יַת שְׁמֵיהּ יְדִידְיָה בְּדִיל יְיָ: [Targum Jonathan on II Samuel / 12 / 26] וְאַגִיחַ קְרָבָא יוֹאָב בְּרַבַּת בְּנֵי עַמוֹן וּכְבַשׁ יַת קִרְיַת מַלְכוּתָא: [Targum Jonathan on II Samuel / 12 / 27] וּשְׁלַח יוֹאָב אִזְגַדִין לְוַת דָוִד וַאֲמַר אַגָחִית קְרָבָא בְרַבָּה וְאַף כְּבָשִׁית יַת קִרְיַת מַלְכוּתָא: [Targum Jonathan on II Samuel / 12 / 28] וּכְעַן כְּנוֹשׁ יַת שְׁאַר עַמָא וּשְׁרֵי עַל קַרְתָּא וְכַבְּשָׁהּ דִלְמָא אֶכְבּוֹשׁ אֲנָא יַת קַרְתָּא וְיִתְקְרִי שְׁמִי עֲלָהּ: [Targum Jonathan on II Samuel / 12 / 29] וּכְנַשׁ דָוִד יַת כָּל עַמָא וַאֲזַל לְרַבַּת וְאַגִיחַ קְרָבָא בָהּ וְכַבְּשָׁהָא: [Targum Jonathan on II Samuel / 12 / 30] וּנְסִיב יַת כְּלִילָא דְמַלְכְּהוֹן מֵעַל רֵישֵׁיהּ וּמַתְקְלָהּ כִּכְּרָא דְדַהֲבָא וּבָהּ אֲבַן טָבָא וַהֲוָה עַל רֵישָׁא דְדָוִד וַעֲדַת קַרְתָּא אַפֵיק סַגִי לַחֲדָא: [Targum Jonathan on II Samuel / 12 / 31] וְיַת עַמָא דְבָהּ אַפֵּיק וּמְסַר יַתְהוֹן בִּמְסָרִין וּבְמוֹרִיגֵי פַרְזְלָא וּבְמִגְזְרֵי פַרְזְלָא וּגְרַר יַתְהוֹן בְּשׁוּקַיָא וְכֵן עֲבַד לְכָל קִירְוֵי בְנֵי עַמוֹן וְתַב דָוִד וְכָל עַמָא לִירוּשְׁלֵם:

Study this passage

Prepare a passage questionPassage ID & source details Where did this come from?

Targum Jonathan on II Samuel — 13

[Targum Jonathan on II Samuel / 13 / 1] וַהֲוָה בָּתַר כֵּן וּלְאַבְשָׁלוֹם בַּר דָוִד אֲחָתָא שַׁפִּרְתָּא וּשְׁמָהּ תָּמָר וְרַחֲמָה אַמְנוֹן בַּר דָוִד: [Targum Jonathan on II Samuel / 13 / 2] וַעֲקַת לְאַמְנוֹן לְאִתְמְרָעָא בְּדִיל תָּמָר אֲחָתֵיהּ אֲרֵי בְתוּלְתָּא הִיא וַהֲוָה מְכַסָא בְּעֵינֵי אַמְנוֹן לְמֶעְבַּד לָהּ מִדָעַם: [Targum Jonathan on II Samuel / 13 / 3] וּלְאַמְנוֹן שׁוֹשְׁבִינָא וּשְׁמֵיהּ יוֹנָדָב בַּר שִׁמְעָה אֲחוֹהִי דְדָוִד וְיוֹנָדָב גְבַר חַכִּים לַחֲדָא: [Targum Jonathan on II Samuel / 13 / 4] וַאֲמַר לֵיהּ מָה דֵין אַתְּ כְּדֵין חֲשׁוֹךְ בַּר מַלְכָּא בִּצְפַר בִּצְפַר הֲלָא תְּחַוֵי לִי וַאֲמַר לֵיהּ אַמְנוֹן יַת תָּמָר אַחְתֵיהּ דְאַבְשָׁלוֹם אֲחִי אֲנָא רָחֵם: [Targum Jonathan on II Samuel / 13 / 5] וַאֲמַר לֵיהּ יְהוֹנָדָב שְׁכַב עַל שִׁווּיָךְ וְאִתְמְרָע וְיֵיתִי אֲבוּךְ לְמֶחֱזָךְ וְתֵימַר לֵיהּ תֵּיתֵי כְעַן תָּמָר אֲחָתִי וְתֵיכְלִינַנִי לַחְמָא וְתַעְבֵּיד לְעֵינַי יַת סְעוּדְתָא בְּדִיל דְאֶחְזֵי וְאֵכוּל מִן יְדָהּ: [Targum Jonathan on II Samuel / 13 / 6] וּשְׁכִיב אַמְנוֹן וְאִתְמְרָע וַאֲתָא מַלְכָּא לְמֶחְזְיֵה וַאֲמַר אַמְנוֹן לְמַלְכָּא תֵּיתֵי כְעַן תָּמָר אֲחָתִי וְתַחֲלוֹט לְעֵינַי תַּרְתֵּין חֲלִיטָתָא וְאֵכּוּל מִן יְדָהּ: [Targum Jonathan on II Samuel / 13 / 7] וּשְׁלַח דָוִד לְוַת תָּמָר לְבֵיתָא לְמֵימָר אֱזִילִי כְעַן לְבֵית אַמְנוֹן אֲחוּךְ וֶעֱבִידִי לֵיהּ סְעוּדְתָא: [Targum Jonathan on II Samuel / 13 / 8] וַאֲזַלַת תָּמָר בֵּית אַמְנוֹן אֲחוּהָא וְהוּא שְׁכִיב וּנְסִיבַת יַת לִישָׁא וְלָשַׁת וַחֲלָטַת לְעֵינוֹהִי וּבַשִׁילַת יַת חֲלִיטָתָא: [Targum Jonathan on II Samuel / 13 / 9] וּנְסֵיבַת יַת מַסְרֵיתָא וַאֲרִיקַת קֳדָמוֹהִי וְלָא אֲבָא לְמֵיכַל וַאֲמַר אַמְנוֹן אַפִּיקוּ כָל אֱנַשׁ מֵעִילַוָי וְאַפִּיקוּ כָל אֱנַשׁ מֵעִילַוֹהִי: [Targum Jonathan on II Samuel / 13 / 10] וַאֲמַר אַמְנוֹן לְתָמָר אָעִילִי סְעוּדְתָא לְאִידְרוֹן בֵּית מִשְׁכְּבָא וְאֵכוּל מִן יְדִיךְ וּנְסִיבַת תָּמָר יַת חֲלִיטָתָא דַעֲבָדַת וְאָעֵילַת לְאַמְנוֹן אֲחוּהָא לְאִידְרוֹן בֵּית מִשְׁכְּבָא: [Targum Jonathan on II Samuel / 13 / 11] וְקָרֵיבַת לֵיהּ לְמֵיכַל וְאַתְקֵיף בָּהּ וַאֲמַר לָהּ עוּלִי שְׁכִיבִי עִמִי אֲחָתִי: [Targum Jonathan on II Samuel / 13 / 12] וַאֲמַרַת לֵיהּ אֲחִי בְּבָעוּ לָא תְעַנַנֵי אֲרֵי לָא מִתְעֲבֵד כֵּן בְּיִשְׂרָאֵל לָא תַעְבֵּד יַת קְלָנָא הָדֵין: [Targum Jonathan on II Samuel / 13 / 13] וַאֲנָא לְאָן אוֹבִיל יַת חִסוּדִי וְאַתְּ תְּהֵי כְּחַד מִן שָׁטַיָא בְיִשְׂרָאֵל וּכְעַן מַלֵל כְּעַן עִם מַלְכָּא אֲרֵי לָא יִמְנְעִינַנִי מִנָךְ: [Targum Jonathan on II Samuel / 13 / 14] וְלָא אֲבָא לְקַבָּלָא מִנָהּ וּתְקֵיף מִנָהּ וְעַנְיָהּ וּשְׁכִיב עִמָהּ: [Targum Jonathan on II Samuel / 13 / 15] וּסְנָאָהּ אַמְנוֹן סִנְאָתָא רַבְּתָא לַחֲדָא אֲרֵי סַגִיאָה סִנְאָתָא דִי סְנָאָהּ מֵרִחֲמָתָא דִרְחִימָהּ וַאֲמַר לָהּ אַמְנוֹן קוּמִי אֱזִילִי: [Targum Jonathan on II Samuel / 13 / 16] וַאֲמַרַת לֵיהּ עַל עֵיסַק בִּישְׁתָא רַבְּתָא הָדָא מֵאוֹחֲרַנְתָּא דַעֲבַדְתָּא עִמִי אַתְּ אֲמַר לְשַׁלָחוּתִי וְלָא אֲבָא לְקַבְּלָא מִנָהּ: [Targum Jonathan on II Samuel / 13 / 17] וּקְרָא יַת עוּלֵימֵיהּ מְשׁוּמְשָׁנֵיהּ וַאֲמַר שַׁלְחוּ כְעַן יַת דָא מִלְוָתִי לְבָרָא וְאַגֵיף דָשָׁא בַּתְרָהָא: [Targum Jonathan on II Samuel / 13 / 18] וַעֲלָהּ כִּתּוּנָא דְפַסֵי אֲרֵי כֵן לָבְשָׁן בְּנַת מַלְכָּא בְּתוּלָתָא כַּרְדוּטִין וְאַפֵּיק יָתָה מְשׁוּמְשָׁנֵיהּ לְבָרָא וְאַגִיף דָשָׁא בַּתְרָהָא: [Targum Jonathan on II Samuel / 13 / 19] וּנְסִיבַת תָּמָר קִטְמָא עַל רֵישָׁהּ וְכִתּוּנָא דְפַסֵי דַעֲלָה בְּזַעַת וְשַׁוִיאַת יְדָהּ עַל רֵישָׁהּ וַאֲזָלַת מֵיזַל וּצְוָחַת: [Targum Jonathan on II Samuel / 13 / 20] וַאֲמַר לָהּ אַבְשָׁלוֹם אֲחוּהָא הַאֲמִינוֹן אֲחוּךְ הֲוָה עִמֵךְ וּכְעַן אֲחָתִי שְׁתוּקִי אֲחוּךְ הוּא לָא תְשַׁוִין יַת לִבֵּךְ לְפִתְגָמָא הָדֵין וִיתִיבַת תָּמָר וְצַדְיָא בֵּית אַבְשָׁלוֹם אֲחוּהָא: [Targum Jonathan on II Samuel / 13 / 21] וּמַלְכָּא דָוִד שְׁמַע יַת כָּל פִּתְגָמַיָא הָאִילֵן וּתְקֵיף לֵיהּ לַחֲדָא: [Targum Jonathan on II Samuel / 13 / 22] וְלָא מַלֵיל אַבְשָׁלוֹם עִם אַמְנוֹן לְמִבִּישׁ וְעַד טַב אֲרֵי סָנֵי אַבְשָׁלוֹם יַת אַמְנוֹן עַל עֵיסַק דְעַנֵי יַת תָּמָר אֲחָתֵיהּ: [Targum Jonathan on II Samuel / 13 / 23] וַהֲוָה לִזְמַן תַּרְתֵּין שְׁנִין וַהֲווֹ גָזְזִין לְאַבְשָׁלוֹם בְּמֵישַׁר חָצוֹר עִם בֵּית אֶפְרָיִם וְזַמִין אַבְשָׁלוֹם לְכָל בְּנֵי מַלְכָּא: [Targum Jonathan on II Samuel / 13 / 24] וַאֲתָא אַבְשָׁלוֹם לְוַת מַלְכָּא וַאֲמַר הָא כְעַן גָזְזִין לְעַבְדָךְ יֵיזֵיל כְּעַן מַלְכָּא וְעַבְדוֹהִי עִם עַבְדָךְ: [Targum Jonathan on II Samuel / 13 / 25] וַאֲמַר מַלְכָּא לְאַבְשָׁלוֹם לָא בְרִי לָא כְעַן נֵיזִיל כֻּלָנָא וְלָא נִתְקֵיף עֲלָךְ וְאַתְקֵיף בֵּיהּ וְלָא אָבָה לְמֵיזַל וּבָרְכֵיהּ: [Targum Jonathan on II Samuel / 13 / 26] וַאֲמַר אַבְשָׁלוֹם וְלָא יֵיזִיל כְּעַן עִמָנָא אַמְנוֹן אֲחִי וַאֲמַר לֵיהּ מַלְכָּא לְמָא יֵיזִיל עִמָךְ: [Targum Jonathan on II Samuel / 13 / 27] וְאַתְקֵיף בֵּיהּ אַבְשָׁלוֹם וּשְׁלַח עִמֵיהּ יַת אַמְנוֹן וְיַת כָּל בְּנֵי מַלְכָּא: [Targum Jonathan on II Samuel / 13 / 28] וּפַקֵיד אַבְשָׁלוֹם יַת עוּלֵימוֹהִי לְמֵימָר חֲזוֹ כְעַן כַּד יִשְׁפַּר לִבָּא דְאַמְנוֹן בְּחַמְרָא וְאֵימַר לְכוֹן קְטוּלוּ יַת אַמְנוֹן וְתִקְטְלוּן יָתֵיהּ לָא תִדְחֲלוּן הֲלָא אֲרֵי אֲנָא פַקְדִית יַתְכוֹן אִתְקִיפוּ וַהֲווֹ לְגַבְרִין גִבָּרִין: [Targum Jonathan on II Samuel / 13 / 29] וַעֲבַדוּ עוּלֵימֵי אַבְשָׁלוֹם לְאַמְנוֹן כְּמָא דְפַקֵד אַבְשָׁלוֹם וְקָמוּ כָּל בְּנֵי מַלְכָּא וּרְכִיבוּ אֱנַשׁ עַל כּוּדַנְתֵּיהּ וַאֲפָּכוּ: [Targum Jonathan on II Samuel / 13 / 30] וַהֲוָה עַד דְאִינוּן בְּאוֹרְחָא וּשְׁמוּעֲתָא אָתַת לְוַת דָוִד לְמֵימַר קְטַל אַבְשָׁלוֹם יַת כָּל בְּנֵי מַלְכָּא וְלָא אִשְׁתָּאַר מִנְהוֹן חָד: [Targum Jonathan on II Samuel / 13 / 31] וְקָם מַלְכָּא וּבְזַע יַת לְבוּשׁוֹהִי וּשְׁכִיב עַל אַרְעָא וְכָל עַבְדוֹהִי מְעַתְּדִין כַּד מְבַזְעִין לְבוּשֵׁיהוֹן: [Targum Jonathan on II Samuel / 13 / 32] וַאֲתֵיב יוֹנָדָב בַּר שִׁמְעָה אֲחוֹהִי דְדָוִד וַאֲמַר לָא יֵימַר רִבּוֹנִי יַת כָּל עוּלֵימַיָא בְּנֵי מַלְכָּא קְטַלוּ אֲרֵי אַמְנוֹן בִּלְחוֹדוֹהִי מִית אֲרֵי בְלִבָּא דְאַבְשָׁלוֹם הֲוַת כְּמָנָא מִיוֹמָא דְעַנֵי יַת תָּמָר אֲחָתֵיהּ: [Targum Jonathan on II Samuel / 13 / 33] וּכְעַן לָא יְשַׁוֵי רִבּוֹנִי מַלְכָּא עַל לִבֵּיהּ פִּתְגָמָא לְמֵימַר כָּל בְּנֵי מַלְכָּא מִיתוּ אֱלָהֵין אַמְנוֹן בִּלְחוֹדוֹהִי מִית: [Targum Jonathan on II Samuel / 13 / 34] וַעֲרַק אַבְשָׁלוֹם וּזְקֵף עוּלֵימָא סַכְוָאָה יַת עֵינוֹהִי וַחֲזָא וְהָא עַם סַגִי אָתָן מֵאוֹרַח מֵאֲחוֹרוֹהִי מִסְטַר טוּרָא: [Targum Jonathan on II Samuel / 13 / 35] וַאֲמַר יוֹנָדָב לְמַלְכָּא הָא בְנֵי מַלְכָּא אֲתוֹ כְּפִתְגָמָא דְעַבְדָךְ כֵּן הֲוָה: [Targum Jonathan on II Samuel / 13 / 36] וַהֲוָה כְּשֵׁיצָיוּתֵיהּ לְמַלָלָא וְהָא בְנֵי מַלְכָּא אֲתוֹ וַאֲרִימוּ קַלְהוֹן וּבְכוֹ וְאַף מַלְכָּא וְכָל עַבְדוֹהִי בְּכוֹ בְּכִי סַגִיאָה לַחֲדָא: [Targum Jonathan on II Samuel / 13 / 37] וְאַבְשָׁלוֹם עֲרַק וַאֲזַל לְוַת תַּלְמַי בַּר עֲמִיהוּד מַלְכָּא דִגְשׁוּר וְאִתְאַבַּל עַל בְּרֵיהּ כָּל יוֹמַיָא: [Targum Jonathan on II Samuel / 13 / 38] וְאַבְשָׁלוֹם עֲרַק וַאֲזַל לִגְשׁוּר וַהֲוָה תַמָן תְּלַת שְׁנִין: [Targum Jonathan on II Samuel / 13 / 39] וְחַמֵידַת נַפְשָׁא דְדָוִד מַלְכָּא לְמִפַּק עַל אַבְשָׁלוֹם אֲרֵי אִתְנַחַם עַל אַמְנוֹן אֲרֵי מִית:

Study this passage

Prepare a passage questionPassage ID & source details Where did this come from?

Targum Jonathan on II Samuel — 14

[Targum Jonathan on II Samuel / 14 / 1] וִידַע יוֹאָב בַּר צְרוּיָה אֲרֵי לִבָּא דְמַלְכָּא לְמִפַּק עַל אַבְשָׁלוֹם: [Targum Jonathan on II Samuel / 14 / 2] וּשְׁלַח יוֹאָב לִתְקוֹעַ וּנְסֵיב מִתַּמָן אִתְּתָא חֲכִּמְתָּא וַאֲמַר לָהּ אִתְאַבְּלֵי כְעַן וּלְבוּשִׁי כְעַן לְבוּשֵׁי אֶבְלָא וְלָא תְשׁוּפִין מִשְׁחָא וּתְהֵא כְּאִתְּתָא דְנַן יוֹמִין סַגִיאִין מִתְאַבְּלָא עַל מֵיתָא: [Targum Jonathan on II Samuel / 14 / 3] וְתַהֲכִין לְוַת מַלְכָּא וּתְמַלְלִין עִמֵיהּ כְּפִתְגָמָא הָדֵין וְשַׁוַי יוֹאָב יַת פִּתְגָמַיָא בְּפוּמָהּ: [Targum Jonathan on II Samuel / 14 / 4] וַאֲמָרַת אִתְּתָא דְמִתְּקוֹעַ לְמַלְכָּא וּנְפָלַת עַל אַפָּהּ עַל אַרְעָא וּסְגִידַת וַאֲמָרַת פְּרוֹק מַלְכָּא: [Targum Jonathan on II Samuel / 14 / 5] וַאֲמַר לָהּ מַלְכָּא מַה לִיךְ וַאֲמָרַת בְּקוּשְׁטָא אִתְּתָא אַרְמַלְתָּא אֲנָא וּמִית בַּעֲלִי: [Targum Jonathan on II Samuel / 14 / 6] וּלְאַמְתָךְ תְּרֵין בְּנִין וְאִתְנְצִיאוּ תַרְוֵיהוֹן בְּחַקְלָא וְלֵית דִמְשֵׁיזֵיב בֵּינֵיהוֹן וּמְחוֹ חַד יַת חַד וּקְטַל יָתֵיהּ: [Targum Jonathan on II Samuel / 14 / 7] וְהָא קָמַת כָּל זַרְעִיתָא עַל אַמְתָךְ וַאֲמַרוּ הָבִי וְנִקְטוֹל יַת דִקְטַל אֲחוֹהִי וְנִקְטְלִינֵיהּ בְּחוֹבַת נַפְשָׁא דַאֲחוֹהִי דִקְטַל וּנְשֵׁיצֵי אַף יַת יָרוֹתָא וּבְעוֹ לְמִקְטַל יַת חַד יְחִידִי דְאִשְׁתְּאַר בְּדִיל דְלָא לְשַׁוָאָה לְבַעֲלֵי שׁוּם וּשְׁאָר עַל אַפֵּי אַרְעָא: [Targum Jonathan on II Samuel / 14 / 8] וַאֲמַר מַלְכָּא לְאִתְּתָא אֱזִילִי לְבֵיתָךְ וַאֲנָא אֲפַקֵיד עֲלָךְ: [Targum Jonathan on II Samuel / 14 / 9] וַאֲמַרַת אִתְּתָא דְמִתְּקוֹעַ לְמַלְכָּא עֲלַי דִי לִי רִבּוֹנִי מַלְכָּא חוֹבָא וְעַל בֵּית אַבָּא וּמַלְכָּא וְכוּרְסֵי מַלְכוּתֵיהּ זַכַּאי: [Targum Jonathan on II Samuel / 14 / 10] וַאֲמַר מַלְכָּא מַן דְיֵימַר לִיךְ מִלָא וְתַיְתִינֵיהּ לְוָתִי וְלָא יוֹסִיף עוֹד לְאַנְזָקָה בִיךְ: [Targum Jonathan on II Samuel / 14 / 11] וַאֲמַרַת יִדְכַּר כְּעַן מַלְכָּא מַה דִכְתִיב בִּסְפַר אוֹרַיְתָא דַייָ אֱלָהָךְ בְּדִיל לְאַסְגָאָה אוֹרְחָא קֳדָם גָאֵל דְמָא לְחַבָּלָא וְלָא יְשֵׁיצוֹן יַת בְּרִי וַאֲמַר קַיָם הוּא יְיָ אִם יִפּוֹל מִסְעַר רֵישׁ בְּרִיךְ לְאַרְעָא: [Targum Jonathan on II Samuel / 14 / 12] וַאֲמַרַת אִתְּתָא תְּמַלֵל כְּעַן אַמְתָךְ קֳדָם רִבּוֹנִי מַלְכָּא פִתְגָמָא וַאֲמַר מַלֵילִי: [Targum Jonathan on II Samuel / 14 / 13] וַאֲמַרַת אִתְּתָא וּלְמָה חֲשַׁבְתָּא כַּהֲדָא עַל עַמָא דַייָ וּמְמַלֵיל מַלְכָּא פִתְגָמָא הָדֵין כִּגְבַר חַיָב בְּדִיל דְלָא לְאַתָבָא מַלְכָּא יַת בִּדוּרֵיהּ: [Targum Jonathan on II Samuel / 14 / 14] אֲרֵי מִיתָא דְמָאִית וּכְמַיָא דְמִתְאַשְׁדִין לְאַרְעָא דְלָא אֶפְשַׁר לְהוֹן דְיִתּוֹסְפוּן כֵּן לֵית אֶפְשַׁר לְדַיָנָא דְקוּשְׁטָא לְקַבָּלָא מָמוֹן דִשְׁקַר וְדִמְחַשֵׁב מֵחְשְׁבָן בְּדִיל דְלָא לְבָדָרָא מִנֵיהּ בִּדוּרָא: [Targum Jonathan on II Samuel / 14 / 15] וּכְעַן דַאֲתֵיתִי לְמַלָלָא קֳדָם מַלְכָּא רִבּוֹנִי יַת פִּתְגָמָא הָדֵין אֲרֵי דַחֲלוּנַנִי עַמָא וַאֲמַרַת אַמְתָךְ אֲמַלֵיל כְּעַן קֳדָם מַלְכָא מְאִים יַעְבֵּד מַלְכָּא יַת פִּתְגָמָא דְאַמְתֵיהּ: [Targum Jonathan on II Samuel / 14 / 16] אֲרֵי יִשְׁמַע מַלְכָּא לְשֵׁיזָבָא יַת אַמְתֵיהּ מִיַד גַבְרָא לְשֵׁיצָאָה יָתִי וְיַת בְּרִי כַּחֲדָא מֵאַחֲסָנַת עַמָא דַיָי: [Targum Jonathan on II Samuel / 14 / 17] וַאֲמַרַת אַמְתָךְ יְהֵי כְעַן פִּתְגָמָא דְרִבּוֹנִי מַלְכָּא לְנִיחָא אֲרֵי כְּמַלְאָכָא דַייָ כֵּן רִבּוֹנִי מַלְכָּא לְמִשְׁמַע טַב וּבִישׁ וּמֵימְרָא דַייָ אֱלָהָךְ יְהֵי בְסַעֲדָךְ: [Targum Jonathan on II Samuel / 14 / 18] וַאֲתֵיב מַלְכָּא וַאֲמַר לְאִתְּתָא לָא כְעַן תְּכַסֵי מִנִי פִתְגָמָא דַאֲנָא שְׁאֵל יָתִיךְ וַאֲמַרַת אִתְּתָא יְמַלֵיל כְּעַן רִבּוֹנִי מַלְכָּא: [Targum Jonathan on II Samuel / 14 / 19] וַאֲמַר מַלְכָּא הֲיַד יוֹאָב עִמָךְ בְּכָל דָא וַאֲתִיבַת אִתְּתָא וַאֲמַרַת חַיֵי נַפְשָׁךְ רִבּוֹנִי מַלְכָּא אִם אִית לְמִסְטֵי לְיַמִינָא וְלִסְמָלָא מִכֹּל דִי מַלֵיל רִבּוֹנִי מַלְכָּא אֲרֵי עַבְדָךְ יוֹאָב הוּא פַקְדַנִי וְהוּא שַׁוִי בְּפוּמָא דְאַמְתָךְ יַת כָּל פִּתְגָמַיָא הָאִלֵין: [Targum Jonathan on II Samuel / 14 / 20] בְּדִיל לְאַקָפָא יַת אַפֵּי פִתְגָמָא עֲבַד עַבְדָךְ יוֹאָב יַת פִּתְגָמָא הָדֵין וְרִבּוֹנִי חַכִּים כְּחָכְמַת מַלְאָכָא דַייָ לְמִידַע יַת כָּל דִי בְאַרְעָא: [Targum Jonathan on II Samuel / 14 / 21] וַאֲמַר מַלְכָּא לְיוֹאָב הָא כְעַן עֲבָדִית יַת פִּתְגָמָא הָדֵין וֶאֱזֵיל אֲתֵיב יַת עוּלֵימָא יַת אַבְשָׁלוֹם: [Targum Jonathan on II Samuel / 14 / 22] וּנְפַל יוֹאָב עַל אַפּוֹהִי לְאַרְעָא וּסְגִיד וּבָרִיךְ יַת מַלְכָּא וַאֲמַר יוֹאָב יוֹמָא דֵין יְדַע עַבְדָךְ אֲרֵי אַשְׁכָּחִית רַחֲמִין בְּעֵינָךְ רִבּוֹנִי מַלְכָּא דַעֲבַד מַלְכָּא יַת פִּתְגָמָא דְעַבְדֵיהּ: [Targum Jonathan on II Samuel / 14 / 23] וְקָם יוֹאָב וַאֲזַל לִגְשׁוּר וְאַיְתֵי יַת אַבְשָׁלוֹם לִירוּשְׁלֵם: [Targum Jonathan on II Samuel / 14 / 24] וַאֲמַר מַלְכָּא יִסְתְּחַר לְבֵיתֵיהּ וְאַפֵּי לָא יֶחְזֵי וְאִסְתְּחַר אַבְשָׁלוֹם לְבֵיתֵיהּ וְאַפֵּי מַלְכָּא לָא חֲזָא: [Targum Jonathan on II Samuel / 14 / 25] וּכְאַבְשָׁלוֹם לָא הֲוָה גְבַר שַׁפִּיר בְּכָל יִשְׂרָאֵל לְשָׁבָּחָא לַחֲדָא מִפַּרְסַת רִגְלוֹהִי וְעַד מוֹחֵיהּ לָא הֲוָה בֵיהּ מוּמָא: [Targum Jonathan on II Samuel / 14 / 26] וּבְסַפָּרוּתֵיהּ יַת רֵישֵׁיהּ וַהֲוָה מִזְמַן עִדַן לְעִדַן דִמְסַפֵר אֲרֵי יַקִיר עֲלוֹהִי וּמְסַפֵּר לֵיהּ וּתְקַל יַת סְעַר רֵישֵׁיהּ מָאתָן סִלְעִין בְּמַתְקְלָא דְמַלְכָּא: [Targum Jonathan on II Samuel / 14 / 27] וְאִתְיְלִידוּ לְאַבְשָׁלוֹם תְּלָתָא בְנִין וּבְרַתָּא חֲדָא וּשְׁמָהּ תָּמָר הִיא הֲוַת אִתְּתָא שַׁפִּירַת חֵיזוּ: [Targum Jonathan on II Samuel / 14 / 28] וִיתֵב אַבְשָׁלוֹם בִּירוּשְׁלֵם תַּרְתֵּין שְׁנִין וְאַפֵּי מַלְכָּא לָא חֲזָא: [Targum Jonathan on II Samuel / 14 / 29] וּשְׁלַח אַבְשָׁלוֹם לְוַת יוֹאָב לְשַׁלְחָא יָתֵיהּ לְוַת מַלְכָּא וְלָא אֲבָה לְמֵיתֵי לְוָתֵיהּ וּשְׁלַח עוֹד תִּנְיָנוּת וְלָא אֲבָה לְמֵיתֵי: [Targum Jonathan on II Samuel / 14 / 30] וַאֲמַר לְעַבְדוֹהִי חֲזוֹ אַחְסַנְתֵּיהּ דְיוֹאָב דִסְמִיכָא לְדִילִי וְלֵיהּ תַּמָן סְעוֹרִין אֱזִילוּ וְאַדְלְקוּהָ בְּנוּרָא וְאַדְלִיקוּ עַבְדֵי אַבְשָׁלוֹם יַת אַחְסַנְתֵּיהּ בְּנוּרָא: [Targum Jonathan on II Samuel / 14 / 31] וְקָם יוֹאָב וַאֲתָא לְוַת אַבְשָׁלוֹם לְבֵיתָא וַאֲמַר לֵיהּ לְמָה אַדְלִיקוּ עַבְדָיִךְ יַת אַחְסַנְתָּא דִילִי בְּנוּרָא: [Targum Jonathan on II Samuel / 14 / 32] וַאֲמַר אַבְשָׁלוֹם לְיוֹאָב הָא שְׁלָחִית לְוָתָךְ לְמֵימָר אִיתָא הַלְכָא וְאִשְׁלְחִינָךְ לְוַת מַלְכָּא לְמֵימַר לְמָה אָתֵיתִי מִגְשׁוּר טַב לִי עוֹד דַאֲנָא תַמָן וּכְעַן אֶחֱזֵי אַפֵּי מַלְכָּא וְאִם אִית בִּי חוֹבָא וְיִקְטְלִינַנִי: [Targum Jonathan on II Samuel / 14 / 33] וַאֲתָא יוֹאָב לְוַת מַלְכָּא וְחַוִי לֵיהּ וּקְרָא לְאַבְשָׁלוֹם וַאֲתָא לְוַת מַלְכָּא וּסְגִיד לֵיהּ עַל אַפּוֹהִי עַל אַרְעָא קֳדָם מַלְכָּא וּנְשַׁק מַלְכָּא לְאַבְשָׁלוֹם:

Study this passage

Prepare a passage questionPassage ID & source details Where did this come from?

Targum Jonathan on II Samuel — 15

[Targum Jonathan on II Samuel / 15 / 1] וַהֲוָה מִבָּתַר כֵּן וַעֲבֵד לֵיהּ אַבְשָׁלוֹם רְתִיכִין וְסוּסְוַן וְחַמְשִׁין גַבְרָא רָדְפִין קֳדָמוֹהִי: [Targum Jonathan on II Samuel / 15 / 2] וּמַקְדִים אַבְשָׁלוֹם וְקָאֵים עַל כֵּיבַשׁ אוֹרַח תַּרְעָא וַהֲוֵי כָּל גַבְרָא דִיהֵי לֵיהּ דִין לְמֵיעַל לָקֳדָם מַלְכָּא לְמֵידַן וּקְרֵי אַבְשָׁלוֹם לֵיהּ וַאֲמַר אֵי מִדָא קַרְתָּא אַתְּ וַאֲמַר מֵחַד שִׁבְטַיָא דְיִשְׂרָאֵל עַבְדָךְ: [Targum Jonathan on II Samuel / 15 / 3] וַאֲמַר לֵיהּ אַבְשָׁלוֹם חֲזֵי פִתְגָמָךְ תַּקְנִין וְיָאָן וְשָׁמַע לֵית לָךְ מִן קֳדָם מַלְכָּא: [Targum Jonathan on II Samuel / 15 / 4] וַאֲמַר אַבְשָׁלוֹם מַן יְמַנַנִי דַיָנָא בְּאַרְעָא וְקָדָמַי יֵיתִי כָּל גְבַר דִיהֵי לֵיהּ דִין וּמַצוּ וְאַדִינַנֵיהּ בִקְשׁוֹט: [Targum Jonathan on II Samuel / 15 / 5] וַהֲוָה כַּד קְרַב גַבְרָא לְמִסְגַד לֵיהּ וּמוֹשִׁיט יַת יְדֵיהּ וּמַתְקֵיף בֵּיהּ וּנְשִׁיק לֵיהּ: [Targum Jonathan on II Samuel / 15 / 6] וַעֲבַד אַבְשָׁלוֹם כְּפִתְגָמָא הָדֵין לְכָל יִשְׂרָאֵל דְאָתָן לְמִידַן לְוַת מַלְכָּא וְגָנֵב אַבְשָׁלוֹם יַת לִבָּא דֶאֱנָשֵׁי יִשְׂרָאֵל: [Targum Jonathan on II Samuel / 15 / 7] וַהֲוָה מִסוֹף אַרְבְּעִין שְׁנִין וַאֲמַר אַבְשָׁלוֹם לְמַלְכָּא אַזִיל כְּעַן וַאֲשַׁלֵם יַת נִדְרִי דִנְדָרִית קֳדָם יְיָ בְּחֶבְרוֹן: [Targum Jonathan on II Samuel / 15 / 8] אֲרֵי נִדְרָא נְדַר עַבְדָךְ בְּמֵיתְבֵי בִּגְשׁוּר בַּאֲרָם לְמֵימָר אִם אֲתָבָא יְתִיבִינַנִי יְיָ לִירוּשְׁלֵם וְאֶפְלָח קֳדָם יְיָ: [Targum Jonathan on II Samuel / 15 / 9] וַאֲמַר לֵיהּ מַלְכָּא אֱזֵיל בִּשְׁלָם וְקָם וַאֲזַל לְחֶבְרוֹן: [Targum Jonathan on II Samuel / 15 / 10] וּשְׁלַח אַבְשָׁלוֹם מְאַלְלִין בְּכָל שִׁבְטַיָא דְיִשְׂרָאֵל לְמֵימָר כְּמִשְׁמָעֲכוֹן יַת קַל שׁוֹפָרָא וְתֵימְרוּן מְלַךְ אַבְשָׁלוֹם בְּחֶבְרוֹן: [Targum Jonathan on II Samuel / 15 / 11] וְעִם אַבְשָׁלוֹם אֲזַלוּ מָאתָן גַבְרִין מִירוּשְׁלֵם זְמִינִין וְאָזְלִין לְתוּמֵיהוֹן וְלָא יָדְעִין כָּל מִדָעַם: [Targum Jonathan on II Samuel / 15 / 12] וּשְׁלַח אַבְשָׁלוֹם יַת אֲחִיתוֹפֶל גִילוֹנָאָה מָלִיכָא דְדָוִד מִקַרְתֵּיהּ מִגִלֹה בְּדַבָּחוּתֵיהּ יַת דִבְחַיָא וַהֲוָה מַרְדָא תַּקִיף וְעַמָא אָזֵיל וְסַגִי עִם אַבְשָׁלוֹם: [Targum Jonathan on II Samuel / 15 / 13] וַאֲתָא דִמְחַוֵי לְוַת דָוִד לְמֵימָר אִתְפְנֵי לִבָּא דֶאֱנָשׁ יִשְׂרָאֵל בָּתַר אַבְשָׁלוֹם: [Targum Jonathan on II Samuel / 15 / 14] וַאֲמַר דָוִד לְכָל עַבְדוֹהִי דִי עִמֵיהּ בִּירוּשְׁלֵם קוּמוּ וְנַעֲרוֹק אֲרֵי לָא תְהֵי לָנָא שֵׁיזְבָא מִן קֳדָם אַבְשָׁלוֹם אוֹחוּ לְמֵיזַל דִילְמָא יוֹחִי וְיִדְבְּקִינָנָא וְיִכְמוֹן יַת בִּישְׁתָא עֲלָנָא וְיִמְחֵי יַת קַרְתָּא לְפִתְגַם דְחָרֶב: [Targum Jonathan on II Samuel / 15 / 15] וַאֲמַרוּ עַבְדֵי מַלְכָּא לְמַלְכָּא כְּכָל דְיֵימַר רִבּוֹנִי מַלְכָּא הָא עַבְדָיִךְ: [Targum Jonathan on II Samuel / 15 / 16] וּנְפַק מַלְכָּא וְכָל אֱנַשׁ בֵּיתֵיהּ דִי עִמֵיהּ וּשְׁבַק מַלְכָּא יַת עֲשַׂר נְשִׁין לְחֵינָן לְמִטַר בֵּיתָא: [Targum Jonathan on II Samuel / 15 / 17] וּנְפַק מַלְכָּא וְכָל אֱנַשׁ בֵּיתֵיהּ עִמֵיהּ וְקָמוּ בַּאֲתַר דְרָחִיק: [Targum Jonathan on II Samuel / 15 / 18] וְכָל עַבְדוֹהִי עָבְרִין עַל יְדוֹהִי וְכָל קַשָׁתַיָא וְכָל קַלְעַיָא וְכָל גִתָּאֵי שִׁית מְאָה גַבְרָא דְאָתָן עִמֵיהּ מִגַת עָבְרִין קֳדָם מַלְכָּא: [Targum Jonathan on II Samuel / 15 / 19] וַאֲמַר מַלְכָּא לְאִתַּי גִיתָּאָה לְמָא תֵיזֵיל אַף אַתְּ עִמָנָא תּוּב וְתֵיב עִם מַלְכָּא אֲרֵי נוּכְרָא אַתְּ וְאַף אִם גָלֵי אַתְּ אֱזֵיל לָךְ לְאַתְרָךְ: [Targum Jonathan on II Samuel / 15 / 20] תְּמָלֵי אֲתֵיתָא וְיוֹמָא דֵין אֲטַלְטְלִינָךְ עִמָנָא לְמֵיזַל וַאֲנָא אָזֵיל לַאֲתַר דְלֵית אֲנָא יְדַע לְאָן אֲנָא אָזֵיל תּוּב וַאֲתֵיב יַת אֲחָךְ עִמָךְ וַעֲבֵיד עִמְהוֹן טִיבוּ וּקְשׁוֹט: [Targum Jonathan on II Samuel / 15 / 21] וַאֲתֵיב אִתַּי יַת מַלְכָּא וַאֲמַר קַיָים הוּא יְיָ וְקַיָים רִיבּוֹנִי מַלְכָּא אֱלָהֵין בְּאַתְרָא דִיהֵי תַמָן רִבּוֹנִי מַלְכָּא אִם לְמוֹתָא וְאִם לְחַיֵי אֲרֵי תַמָן יְהֵי עַבְדָךְ: [Targum Jonathan on II Samuel / 15 / 22] וַאֲמַר דָוִד לְאִתַּי אֱזֵיל וֶעֱבַר וַעֲבַר אִתַּי גִתָאָה וְכָל גַבְרוֹהִי וְכָל טַפְלָא דְעִימֵיהּ: [Targum Jonathan on II Samuel / 15 / 23] וְכָל דַיָירֵי אַרְעָא בָּכַן קַל רַב וְכָל עַמָא עָבְרִין וּמַלְכָּא עֲבַר בְּנַחֲלָא דְקִדְרוּן וְכָל עַמָא עָבְרִין עַל אַפֵּי אוֹרַח מַדְבְּרָא: [Targum Jonathan on II Samuel / 15 / 24] וְהָא אַף צָדוֹק וְכָל לְוָאֵי עִמֵיהּ נַטְלִין יַת אֲרוֹן קְיָמָא דַייָ וַאֲקִימוּ יַת אֲרוֹנָא דַייָ וּסְלִיק אֶבְיָתָר עַד דִשְׁלִים כָּל עַמָא לְמֶעְבַּר מִן קַרְתָּא: [Targum Jonathan on II Samuel / 15 / 25] וַאֲמַר מַלְכָּא לְצָדוֹק אֲתֵיב יַת אֲרוֹנָא דַייָ לְקַרְתָּא אִם אַשְׁכַּח רַחֲמִין קֳדָם יְיָ וִיתִיבִינַנִי וְיַחְזִינַנִי קֳדָמוֹהִי וְאֶפְלַח קֳדָמוֹהִי בְּבֵית מַקְדְשֵׁיהּ: [Targum Jonathan on II Samuel / 15 / 26] וְאִם כְּדֵין יֵימַר לָא רַעֲוָא קֳדָמַי בָּךְ הָא אֲנָא יַעְבֵּיד לִי כְּמָא דְרַעֲוָא קֳדָמוֹהִי: [Targum Jonathan on II Samuel / 15 / 27] וַאֲמַר מַלְכָּא לְצָדוֹק כַּהֲנָא חֶזְוַיָא אַתְּ תּוּב לְקַרְתָּא בִּשְׁלָם וַאֲחִימַעַץ בְּרָךְ וִיהוֹנָתָן בַּר אֶבְיָתָר תְּרֵין בְּנֵיכוֹן עִמְכוֹן: [Targum Jonathan on II Samuel / 15 / 28] חֲזוֹ דַאֲנָא מִתְעַכֵּב בְּמֵישְׁרֵי מַדְבְּרָא עַד דְיִמְטֵי פִּתְגָמָא מִנְכוֹן לְחַוָאָה לִי: [Targum Jonathan on II Samuel / 15 / 29] וַאֲתֵיב צָדוֹק וְאֶבְיָתָר יַת אֲרוֹנָא דַייָ לִירוּשְׁלֵם וִיתִיבוּ תַמָן: [Targum Jonathan on II Samuel / 15 / 30] וְדָוִד סָלִיק בְּמַסְקָנָא דְטוּר זֵיתַיָא סָלִיק וּבָכֵי וְרֵישֵׁיהּ לֵיהּ מְכָרֵךְ וְהוּא אָזֵיל יָחֵיף וְכָל עַמָא דְעִמֵיהּ כָּרִיכוּ גְבַר רֵישֵׁיהּ וְסַלְקִין מְסַק וּבָכָן: [Targum Jonathan on II Samuel / 15 / 31] וְדָוִד אִתְחַוָא לְמֵימָר אֲחִיתוֹפֶל בִּמְרוֹדַיָא עִם אַבְשָׁלוֹם וַאֲמַר דָוִד קַלְקֵל כְּעַן יַת מִלְכָּא דַאֲחִיתוֹפֶל יְיָ: [Targum Jonathan on II Samuel / 15 / 32] וַהֲוָה דָוִד אֲתָא עַד רֵישׁ טוּרַיָא דִי סְגִיד תַּמָן קֳדָם יְיָ וְהָא לָקָדָמוּתֵיהּ חוּשַׁי אַרְכָּאָה מְבַזְעִין לְבוּשׁוֹהִי וְעַפְרָא רְמֵי בְּרֵישֵׁיהּ: [Targum Jonathan on II Samuel / 15 / 33] וַאֲמַר לֵיהּ דָוִד אִם עֲבַרְתָּא עִמִי וּתְהֵי עָלַי לְמָטוּל: [Targum Jonathan on II Samuel / 15 / 34] וְאִם לְקַרְתָּא תְתוּב וְתֵימַר לְאַבְשָׁלוֹם עַבְדָךְ אֲנָא מַלְכָּא אֱהֵי עַבְדָא דַאֲבוּךְ וַאֲנָא מִבְּכַן וּכְעַן וַאֲנָא עַבְדָךְ וּתְקַלְקֵל לִי יַת מַלְכָּא דַאֲחִיתוֹפֶל: [Targum Jonathan on II Samuel / 15 / 35] וַהֲלָא עִמָךְ תַּמָן צָדוֹק וְאֶבְיָתָר כַּהֲנַיָא וִיהֵי כָּל פִּתְגָמָא דְתִשְׁמַע מִבֵּית מַלְכָּא תְּחַוֵי לְצָדוֹק וּלְאֶבְיָתָר כַּהֲנַיָא: [Targum Jonathan on II Samuel / 15 / 36] הָא תַּמָן עִמְהוֹן תְּרֵין בְּנֵיהוֹן אֲחִימַעַץ לְצָדוֹק וִיהוֹנָתָן לְאֶבְיָתָר וְתִשְׁלְחוּן בִּידֵיהוֹן לְוָתִי כָּל מִדָעַם דְתִשְׁמְעוּן: [Targum Jonathan on II Samuel / 15 / 37] וַאֲתָא חוּשַׁי שׁוֹשְׁבִינָא דְדָוִד לְקַרְתָּא וְאַבְשָׁלוֹם אֲתָא לִירוּשְׁלֵם:

Study this passage

Prepare a passage questionPassage ID & source details Where did this come from?

Targum Jonathan on II Samuel — 16

[Targum Jonathan on II Samuel / 16 / 1] וְדָוִד עֲבַר זְעֵיר מֵרֵישׁ טוּרָא וְהָא צִיבָא עוּלֵימָא דִמְפִיבֹשֶׁת לָקֳדָמוּתֵיהּ וְזוֹג חֲמָרִין חֲשִׁיקִין וַעֲלֵיהוֹן מָאתָן גְרִיצָן דִלְחֵם וּמְאָה אִתְכְּלִין דְעִנְבִין יְבֵשִׁין וּמְאָה מָנָן דְבֵילָתָא וּגְרַב דַחֲמָר: [Targum Jonathan on II Samuel / 16 / 2] וַאֲמַר מַלְכָּא לְצִיבָא מָה אִילֵין לָךְ וַאֲמַר צִיבָא חֲמָרַיָא לְבֵית מַלְכָּא לְמִרְכַּב וְלַחְמָא וּדְבֵילָתָא לְמֵיכַל עוּלֵימַיָא וְחַמְרָא לְמִשְׁתֵּי דִמְשִׁלְהֵי בְּמַדְבְּרָא: [Targum Jonathan on II Samuel / 16 / 3] וַאֲמַר מַלְכָּא וְאָן בַּר רִבּוֹנָךְ וַאֲמַר צִיבָא לְמַלְכָּא הָא יָתֵיב בִּירוּשְׁלֵם אֲרֵי אֲמַר יוֹמָא דֵין יְתִיבוּן לִי בֵּית יִשְׂרָאֵל יַת מַלְכוּתָא דְאַבָּא: [Targum Jonathan on II Samuel / 16 / 4] וַאֲמַר מַלְכָּא לְצִיבָא הָא לָךְ כָּל דִי לִמְפִיבֹשֶׁת וַאֲמַר צִיבָא מוֹדֵינָא אַשְׁכַּח רַחֲמִין בְּעֵינָךְ רִבּוֹנִי מַלְכָּא: [Targum Jonathan on II Samuel / 16 / 5] וַאֲתָא דָוִד מַלְכָּא עַד עַלְמַת וְהָא מִתַּמָן גַבְרָא נָפֵיק מִזַרְעִית בֵּית שָׁאוּל וּשְׁמֵיהּ שִׁמְעִי בַּר גֵרָא נָפֵיק מִיפַק וּמְלַטֵט: [Targum Jonathan on II Samuel / 16 / 6] וּמְרַגֵם בְּאַבְנַיָא יַת דָוִד וְיַת כָּל עַבְדֵי מַלְכָּא דָוִד וְכָל עַמָא וְכָל גִבָּרַיָא מִימִינֵיהּ וּמִשְׂמָאלֵיהּ: [Targum Jonathan on II Samuel / 16 / 7] וּכְדֵין אֲמַר שִׁמְעִי בְּלַטְטוּתֵיהּ פּוּק פּוּק גְבַר חַיָיב קְטוֹל וּגְבַר רַשִׁיעָא: [Targum Jonathan on II Samuel / 16 / 8] אָתִיב עֲלָךְ יְיָ כָּל חוֹבֵי בֵּית שָׁאוּל דִמְלַכְתָּא תְּחוֹתוֹהִי וְאַצְלַח יְיָ יַת מַלְכוּתָא בִּידָא דְאַבְשָׁלוֹם בְּרָךְ וְהָא אַתְּ בְּבִישְׁתָּךְ אֲרֵי גְבַר חַיָיב קְטוֹל אַתְּ: [Targum Jonathan on II Samuel / 16 / 9] וַאֲמַר אֲבִישַׁי בַּר צְרוּיָה לְמַלְכָּא לְמָא יְלַטֵט כַּלְבָּא מֵיתָא הָדֵין יַת רִבּוֹנִי מַלְכָּא אֶעְבַּר כְּעַן וְעַדִי יַת רֵישֵׁיהּ: [Targum Jonathan on II Samuel / 16 / 10] וַאֲמַר מַלְכָּא מַה לִי וּלְכוֹן בְנֵי צְרוּיָה כְּדֵין יְלַטִיט אֲרֵי יְיָ אֲמַר לֵיהּ לַטֵיט יַת דָוִד וּמַן יֵימַר מַה דֵין עֲבַדְתָּא כֵּן: [Targum Jonathan on II Samuel / 16 / 11] וַאֲמַר דָוִד לַאֲבִישַׁי וּלְכָל עַבְדוֹהִי הָא בְּרִי דְאוֹלֵידִית בָּעֵי לְמִקְטְלִי וְאַף אֲרֵי כְעַן בַּר שֵׁבֶט בִּנְיָמִן שְׁבוּקוּ מִינֵיהּ וִילַטֵט אֲרֵי אָמַר לֵיהּ יְיָ: [Targum Jonathan on II Samuel / 16 / 12] מָאִים גְלֵי קֳדָם יְיָ דִמְעַת עֵינִי וִיתֵיב יְיָ לִי טַבְתָא חֲלַף לְוַטָתֵיהּ יוֹמָא הָדֵין: [Targum Jonathan on II Samuel / 16 / 13] וַאֲזַל דָוִד וְגַבְרוֹהִי בְּאוֹרְחָא וְשִׁמְעִי אָזֵיל בִּסְטַר טוּרָא לְקִבְלֵיהּ אָזֵיל וּמְלַטֵט וּמְרַגֵם בְּאַבְנַיָא לְקִיבְלֵיהּ וּמַשְׁדֵי עַפְרָא: [Targum Jonathan on II Samuel / 16 / 14] וַאֲתָא מַלְכָּא וְכָל עַמָא דִי עִמֵיהּ כַּד מִשַׁלְהָן וְנַח תַּמָן: [Targum Jonathan on II Samuel / 16 / 15] וְאַבְשָׁלוֹם וְכָל עַמָא אֱנַשׁ יִשְׂרָאֵל אֲתוֹ לִירוּשְׁלֵם וַאֲחִיתוֹפֶל עִמֵיהּ: [Targum Jonathan on II Samuel / 16 / 16] וַהֲוָה כַּד אֲתָא חוּשַׁי אַרְכָּאָה שׁוֹשְׁבִינָא דְדָוִד לְוַת אַבְשָׁלוֹם וַאֲמַר חוּשַׁי לְאַבְשָׁלוֹם יַצְלַח מַלְכָּא יַצְלַח מַלְכָּא: [Targum Jonathan on II Samuel / 16 / 17] וַאֲמַר אַבְשָׁלוֹם לְחוּשַׁי דָא טֵיבוּתָךְ דְעִם חַבְרָךְ לְמָה לָא אֳזַלְתָּ עִם חַבְרָךְ: [Targum Jonathan on II Samuel / 16 / 18] וַאֲמַר חוּשַׁי לְאַבְשָׁלוֹם לָא אֱלָהֵין דְאִתְרְעֵי יְיָ וְעַמָא הָדֵין וְכָל אֱנַשׁ יִשְׂרָאֵל דִי לֵיהּ אֱהֵי וְעִמֵיהּ אָתִיב: [Targum Jonathan on II Samuel / 16 / 19] וְתִנְיָנוּת קֳדָם מַן אֲנָא אֶפְלַח הֲלָא קֳדָם בְּרֵיהּ כְּמָא דְפַלְחִית קֳדָם אֲבוּךְ כֵּן אֲהֵי פְלַח קֳדָמָךְ: [Targum Jonathan on II Samuel / 16 / 20] וַאֲמַר אַבְשָׁלוֹם לַאֲחִיתוֹפֶל הֲבוּ לְכוֹן מִלְכָּא מַה נַעְבֵּיד: [Targum Jonathan on II Samuel / 16 / 21] וַאֲמַר אֲחִיתוֹפֶל לְאַבְשָׁלוֹם עוּל לְוַת לְחֵינָתָא דַאֲבוּךְ דִי שְׁבַק לְמִיטַר בֵּיתָא וּשְׁמַע כָּל יִשְׂרָאֵל אֲרֵי אִתְגָרֵיתָא בַּאֲבוּךְ וְיִתְקוֹף יְדֵי כָּל דִי עִמָךְ: [Targum Jonathan on II Samuel / 16 / 22] וּנְגִדוּ לְאַבְשָׁלוֹם קִינוּפִין עַל אִיגָרָא וְעַל אַבְשָׁלוֹם לְוַת לְחֵינָתָא דַאֲבוּהִי לְעֵינֵי כָּל יִשְׂרָאֵל: [Targum Jonathan on II Samuel / 16 / 23] וּמַלְכָּא דַאֲחִיתוֹפֶל דִמְלֵךְ בְּיוֹמַיָא הָאִינוּן כְּמָא דְשָׁאִיל גַבְרָא בְּפִתְגָמָא דַייָ כֵּן כָּל מִלְכָּא דַאֲחִיתוֹפֶל אַף לְדָוִד אַף לְאַבְשָׁלוֹם:

Study this passage

Prepare a passage questionPassage ID & source details Where did this come from?

Targum Jonathan on II Samuel — 17

[Targum Jonathan on II Samuel / 17 / 1] וַאֲמַר אֲחִיתוֹפֶל לְאַבְשָׁלוֹם אֶבְחַר כְּעַן תְּרֵי עֲסַר אַלְפִין גַבְרָא וְאָקוּם וְאֶרְדוֹף בָּתַר דָוִד בְּלֵילְיָא: [Targum Jonathan on II Samuel / 17 / 2] וְאֵיהַךְ עֲלוֹהִי כַּד הוּא מְשַׁלְהֵי וִידוֹהִי מְרַשְׁלָן וְאָזִיעַ יָתֵיהּ וְיַעֲרוֹק כָּל עַמָא דִי עִמֵיהּ וְאֶקְטוֹל יַת מַלְכָּא בִּלְחוֹדוֹהִי: [Targum Jonathan on II Samuel / 17 / 3] וְאָתִיב כָּל עַמָא לְוָתָךְ כַּד יְתוּבוּן כּוּלְהוֹן בָּתַר דְיִתְקְטֵל גַבְרָא דְאַתְּ בָּעֵי כָּל עַמָא יְהֵי שְׁלָם: [Targum Jonathan on II Samuel / 17 / 4] וּכְשַׁר פִּתְגָמָא בְּעֵינֵי אַבְשָׁלוֹם וּבְעֵינֵי כָּל סָבֵי יִשְׂרָאֵל: [Targum Jonathan on II Samuel / 17 / 5] וַאֲמַר אַבְשָׁלוֹם קְרִי כְעַן אַף לְחוּשַׁי אַרְכָּאָה וְנִשְׁמַע מַה דְיֵימַר אַף הוּא: [Targum Jonathan on II Samuel / 17 / 6] וַאֲתָא חוּשַׁי לְוַת אַבְשָׁלוֹם וַאֲמַר אַבְשָׁלוֹם לֵיהּ לְמֵימַר כְּפִתְגָמָא הָדֵין מַלֵיל אֲחִיתוֹפֶל הֲנַעְבֵּיד יַת פִּתְגָמֵיהּ אִם לָא דְכָשַׁר בְּעֵינָךְ אַתְּ מַלֵיל: [Targum Jonathan on II Samuel / 17 / 7] וַאֲמַר חוּשַׁי לְאַבְשָׁלוֹם לָא תַקִין מִלְכָּא דִמְלַךְ אֲחִיתוֹפֶל בְּזִמְנָא הָדָא: [Targum Jonathan on II Samuel / 17 / 8] וַאֲמַר חוּשַׁי אַתְּ יְדַעְתָּא יַת אֲבוּךְ וְיַת גַבְרוֹהִי אֲרֵי גִבָּרִין אִינוּן וּמְרִירַן נַפְשָׁן אִינוּן כְּדוֹב תַּכֵּל בְּחַקְלָא וַאֲבוּךְ גְבַר עָבֵיד קְרָבִין וְלָא יְבִית יַת עַמָא: [Targum Jonathan on II Samuel / 17 / 9] הָא כְעַן הוּא טָמִיר בְּחַד מִן קוּמְצַיָא אוֹ בְּחַד מִן אַתְרַיָא וִיהֵי כְּמִיפֵל בְּהוֹן בְּקַדְמֵיתָא וְיִשְׁמַע דִי שְׁמַע וְיֵימַר הֲוַת מְחָתָא בְּעַמָא דְבָתַר אַבְשָׁלוֹם: [Targum Jonathan on II Samuel / 17 / 10] וְהוּא אַף גְבַר גִבַּר דְלִיבֵּיהּ כְּלִבָּא דְאַרְיָא מִמַס יִמְסֵי אֲרֵי יְדַע כָּל יִשְׂרָאֵל אֲרֵי גִיבַּר אֲבוּךְ וְגַבְרִין גִבָּרִין דִי עִמֵיהּ: [Targum Jonathan on II Samuel / 17 / 11] אֲרֵי מְלָכִית אִתְכַּנָשָׁא יִתְכַּנְשׁוּן עֲלָךְ כָּל יִשְׂרָאֵל מִדָן וְעַד בְּאֵר שֶׁבַע כְּחָלָא דִי עַל יַמָא לִסְגֵי וְאַתְּ תְּהֵי אֱזֵיל בְּרֵישׁ כּוּלָנָא: [Targum Jonathan on II Samuel / 17 / 12] וּנְהַךְ עֲלוֹהִי בְּחַד מִן אַתְרַיָא דִנְהַךְ לְתַמָן וְנִשְׁרֵי עֲלוֹהִי כְּמָא דְשָׁרֵי טַלָא עַל אַרְעָא וְלָא נַשְׁאַר בֵּיהּ וּבְכָל גַבְרַיָא דִי עִימֵיהּ אַף חָד: [Targum Jonathan on II Samuel / 17 / 13] וְאִם לְקַרְתָּא יִתְכְּנַשׁ וְיִתְכַּנְשׁוּן כָּל יִשְׂרָאֵל עַל קַרְתָּא הַהִיא וְיַקְפוּנָהּ מַשִׁרְיַן וּנְעַקַר יָתָה וְיַת אַבְנָהָא וְנִרְמִינָהּ לְנַחֲלָא עַד דְלָא נַשְׁאַר תַּמָן אַבְנָהָא: [Targum Jonathan on II Samuel / 17 / 14] וַאֲמַר אַבְשָׁלוֹם וְכָל אֱנַשׁ יִשְׂרָאֵל תַּקִין מִלְכָּא דְחוּשַׁי אַרְכָּאָה מִמִלְכָּא דַאֲחִיתוֹפֶל וַיָי פָקַד לְקַלְקָלָא יַת מִלְכָּא דַאֲחִיתוֹפֶל תַּקְנָא בְּדִיל דְיַיתֵי יְיָ עַל אַבְשָׁלוֹם יַת בִּישְׁתָּא: [Targum Jonathan on II Samuel / 17 / 15] וַאֲמַר חוּשַׁי לְצָדוֹק וּלְאֶבְיָתָר כַּהֲנַיָא כְּדֵין וּכְדֵין מְלִיךְ אֲחִיתוֹפֶל יַת אַבְשָׁלוֹם וְיַת סָבֵי יִשְׂרָאֵל וּכְדֵין מְלָכִית אַף אֲנָא: [Targum Jonathan on II Samuel / 17 / 16] וּכְעַן שְׁלָחוּ בִּפְרִיעַ וְחַווּ לְדָוִד לְמֵימַר לָא תָבִית בְּלֵילְיָא בְּמַשְׁרֵי מַדְבְּרָא וְאַף מֶעְבַּר תֶּעְבַּר דִילְמָא יִתַּהֲנֵי לְמַלְכָּא וּלְכָל עַמָא דִי עִמֵיהּ: [Targum Jonathan on II Samuel / 17 / 17] וִיהוֹנָתָן וַאֲחִימַעַץ קַיְימִין בְּעֵין קַצְרָא וַאֲזַלַת אַמְתָא וְחַוִיאַת לְהוֹן וְאִינוּן יֵיזְלוּן וְחַוִיאוּ לְמַלְכָּא דָוִד אֲרֵי לָא יָכְלִין לְאִיתְחַזָאָה לְמֵיעַל לְקַרְתָּא: [Targum Jonathan on II Samuel / 17 / 18] וַחֲזָא יַתְהוֹן עוּלֵימָא וְחַוִי לְאַבְשָׁלוֹם וַאֲזַלוּ תַרְוֵיהוֹן בִּפְרִיעַ וְעָלוּ לְבֵית גַבְרָא בְּעָלֵימַת וְלֵיהּ גוֹבָא בְּדַרְתֵּיהּ וּנְחָתוּ תַמָן: [Targum Jonathan on II Samuel / 17 / 19] וּנְסִיבַת אִתְּתָא וּפַרְסַת יַת פְרָסָא עַל פּוּמָא דְבֵירָא וּשְׁטָחַת עֲלוֹהִי דְקִילָן וְלָא אִתְיְדַע פִּתְגָמָא: [Targum Jonathan on II Samuel / 17 / 20] וַאֲתוֹ עַבְדֵי אַבְשָׁלוֹם לְוַת אִתְּתָא לְבֵיתָא וַאֲמַרוּ אָן אֲחִימַעַץ וִיהוֹנָתָן וַאֲמַרַת לְהוֹן אִתְּתָא כְּבַר עֲבָרוּ יַרְדְנָא וּבְעוֹ וְלָא אַשְׁכָּחוּ וְתָבוּ לִירוּשְׁלֵם: [Targum Jonathan on II Samuel / 17 / 21] וַהֲוָה בָּתַר מֵיזַלְהוֹן וּסְלִיקוּ מִגוֹבָא וַאֲזַלוּ וְחַוִיאוּ לְמַלְכָּא דָוִד וַאֲמַרוּ לְדָוִד קוּמוּ וֶעֱבַרוּ בִּפְרִיעַ יַת יַרְדְנָא אֲרֵי כְדֵין מְלִיךְ עֲלֵיכוֹן אֲחִיתוֹפֶל: [Targum Jonathan on II Samuel / 17 / 22] וְקָם דָוִד וְכָל עַמָא דִי עִמֵיהּ וַעֲבַרוּ יַת יַרְדְנָא עַד מַנְהַר צַפְרָא עַד חַד לָא שְׁגָא דְלָא עֲבַר יַת יַרְדְנָא: [Targum Jonathan on II Samuel / 17 / 23] וַאֲחִיתוֹפֶל חֲזָא אֲרֵי לָא אִתְקַיָם מִלְכֵּיהּ וְזָרֵיז יַת חֲמָרָא וְקָם וַאֲזַל לְבֵיתֵיהּ וּלְקַרְתֵּיהּ וּפַקֵיד עַל אֱנַשׁ בֵּיתֵיהּ וְאִתְחַנַק וּמִית וְאִתְקְבַר בִּקְבְרָא דַאֲבוּהִי: [Targum Jonathan on II Samuel / 17 / 24] וְדָוִד אֲתָא לְמַחֲנָיִם וְאַבְשָׁלוֹם עֲבַר יַת יַרְדְנָא הוּא וְכָל אֱנַשׁ יִשְׂרָאֵל עִמֵיהּ: [Targum Jonathan on II Samuel / 17 / 25] וְיַת עַמָשָׂא מַנִי אַבְשָׁלוֹם חֲלַף יוֹאָב עַל חֵילָא וְעַמָשָׂא בַּר גַבְרָא וּשְׁמֵיהּ יִתְרָא יִשְׂרָאֵלָא דְעַל לְוַת אֲבִיגַל בַּת נָחָשׁ אֲחָתֵיהּ דִצְרוּיָה אִמֵיהּ דְיוֹאָב: [Targum Jonathan on II Samuel / 17 / 26] וּשְׁרָא יִשְׂרָאֵל וְאַבְשָׁלוֹם בַּאֲרַע גִלְעָד: [Targum Jonathan on II Samuel / 17 / 27] וַהֲוָה כַּד אֲתָא דָוִד לְמַחֲנָיִם וְשׁוֹבִי בַר נָחָשׁ מֵרַבַּת בְּנֵי עַמוֹן וּמָכִיר בַּר עַמִיאֵל מִלֹא דְבָר וּבַרְזִלַי גִלְעָדָאָה מֵרֹגְלִים: [Targum Jonathan on II Samuel / 17 / 28] מַכְבִּין וְקוֹלִין וּמָאן דַחֲסַף וְחִטִין וּסְעוֹרִין וְקִמְחָא וְקַלְיָא וּפוּלָא וּטְלוֹפְחִין וְקַלְיָא: [Targum Jonathan on II Samuel / 17 / 29] וּדְבַשׁ וּשְׁמָן וְעָאן וְגוּבְנִין דַחֲלַב תּוֹרִין קָרִיבוּ לְדָוִד וּלְעַמָא דִי עִמֵיהּ לְמֵיכַל אֲרֵי אֲמָרוּ עַמָא כָּפִין וּמְשַׁלְהִין וְצָחֵי בְּמַדְבְּרָא:

Study this passage

Prepare a passage questionPassage ID & source details Where did this come from?

Targum Jonathan on II Samuel — 18

[Targum Jonathan on II Samuel / 18 / 1] וּמְנָא דָוִד יַת עַמָא דִי עִמֵיהּ וּמַנִי עֲלֵיהוֹן רַבָּנֵי אַלְפִּין וְרַבָּנֵי מַאֲוָתָא: [Targum Jonathan on II Samuel / 18 / 2] וּשְׁלַח דָוִד יַת עַמָא תִּלְתָּא בְיַד יוֹאָב וְתִלְתָּא בְּיַד אֲבִישַׁי בַּר צְרוּיָה אֲחוּהִי דְיוֹאָב וְתִלְתָּא בְּיַד אִתַּי גִתָּאָה וַאֲמַר מַלְכָּא לְעַמָא מִפַּק אֱפֹּק אַף אֲנָא עִמְכוֹן: [Targum Jonathan on II Samuel / 18 / 3] וַאֲמַר עַמָא לָא תִפּוֹק אֲרֵי אִם מֶעֱרֹק נַעֲרוֹק לָא יְשַׁווּן עֲלָנָא לִבָּא וְאִם יִתְקַטְלוּן פַּלְגָנָא לָא יְשַׁווּן עֲלָנָא לִבָּא אֲרֵי כְעַן אַתְּ יָכִיל לְמִסְעַד כְּוָתָנָא עַסְרָא אַלְפִין וּכְעַן טַב אֲרֵי תְצַלֵי עֲלָנָא מִקַרְתָּא לְמִסְעַד: [Targum Jonathan on II Samuel / 18 / 4] וַאֲמַר לְהוֹן מַלְכָּא דְתַקִין בְּעֵינֵיכוֹן אַעְבֵּיד וְקָם מַלְכָּא עַל כֵּיבַשׁ אוֹרַח תַּרְעָא וְכָל עַמָא נְפָקוּ לְמָאתָן וּלְאַלְפִין: [Targum Jonathan on II Samuel / 18 / 5] וּפַקֵיד מַלְכָּא יַת יוֹאָב וְיַת אֲבִישַׁי וְיַת אִתַּי לְמֵימַר אִסְתַּמָרוּ לִי בְּעוּלֵימָא בְאַבְשָׁלוֹם וְכָל עַמָא שְׁמָעוּ כַּד פַּקֵיד מַלְכָּא יַת כָּל רַבְרְבַיָא עַל עֵיסַק אַבְשָׁלוֹם: [Targum Jonathan on II Samuel / 18 / 6] וּנְפַק עַמָא לְחַקְלָא לִקֳדָמוּת יִשְׂרָאֵל וַהֲוַת קְרָבָא בְּחוּרְשָׁא דְבֵית אֶפְרָיִם: [Targum Jonathan on II Samuel / 18 / 7] וְאִתַּבָּרוּ תַמָן עַם יִשְׂרָאֵל קֳדָם עַבְדֵי דָוִד וַהֲוַת תַּמָן מְחָתָא רַבְּתָא בְּיוֹמָא הַהוּא עַסְרִין אַלְפִין: [Targum Jonathan on II Samuel / 18 / 8] וַהֲווֹ תַמָן עַבְדֵי קְרָבָא מִתְבַּדְרִין עַל אַפֵי כָל אַרְעָא וְאַסְגִיאַת חַיַת חוּרְשָׁא לְקַטָלָא בְעַמָא מִדְקָטִילַת חַרְבָּא בְּיוֹמָא הַהוּא: [Targum Jonathan on II Samuel / 18 / 9] וְאִתְעֲרַע אַבְשָׁלוֹם קֳדָם עַבְדֵי דָוִד וְאַבְשָׁלוֹם רָכִיב עַל כּוּדַנְתָּא וְעָלַת כּוּדַנְתָּא תְּחוֹת סוֹכָא דְבוּטְמָא רַבָּא וְאִתְאֲחַד רֵישֵׁיהּ בְּבוּטְמָא וְאִתְּלֵי בֵּין שְׁמַיָא וּבֵין אַרְעָא וְכוּדַנְתָּא דִי תְּחוֹתוֹהִי עֲבָרַת: [Targum Jonathan on II Samuel / 18 / 10] וַחֲזָא גַבְרָא חָד וְחַוֵי לְיוֹאָב וַאֲמַר הָא חֲזֵיתִי יַת אַבְשָׁלוֹם תְּלִי בְּבוּטְמָא: [Targum Jonathan on II Samuel / 18 / 11] וַאֲמַר יוֹאָב לְגַבְרָא דִמְחַוֵי לֵיהּ וְהָא חֲזֵיתָא וּמָא דֵין לָא מְחִיתָהוּ תַמָן וּרְמִיתָהִי לְאַרְעָא וַעֲלֵי פּוֹן לְמִתַּן לָךְ עֲסַר סִלְעִין דִכְסַף וְאִסְפַּנְקִי חֲדָא: [Targum Jonathan on II Samuel / 18 / 12] וַאֲמַר גַבְרָא לְיוֹאָב וְלוּ אַנָא תָּקֵל עַל כַּפֵּי אֲלַף סִלְעִין דִכְסַף לָא אוֹשִׁיט יְדֵי בְּבַר מַלְכָּא אֲרֵי קֳדָמָנָא פַּקֵיד מַלְכָּא יָתָךְ וְיַת אֲבִישַׁי וְיַת אִתַּי לְמֵימַר אִסְתַּמָרוּ לִי בְעוּלֵימָא בְּאַבְשָׁלוֹם: [Targum Jonathan on II Samuel / 18 / 13] אוֹ פּוֹן עֲבָדִית בְּנַפְשִׁי שְׁקַר וְכָל מִדַעַם לָא יִתְכַּסָא מִן מַלְכָּא וְאַתְּ תִּתְעַתַּד מִקָבֵיל: [Targum Jonathan on II Samuel / 18 / 14] וַאֲמַר יוֹאָב הֲלָא מִבְּכֵין אֵישָׁרַי קֳדָמָךְ וּנְסִיב תְּלָתָא גַסְסִין בִּידֵיהּ וּקְבָעִינוּן בְּלִבָּא דְאַבְשָׁלוֹם וְעַד כְּעַן קַיָם בְּגוֹ בוּטְמָא: [Targum Jonathan on II Samuel / 18 / 15] וְאִסְתַּחָרוּ עַסְרָא עוּלֵמַיָא נַטְלֵי זְיָנֵיהּ דְיוֹאָב וּמְחוֹ יַת אַבְשָׁלוֹם וְקַטְלוֹהִי: [Targum Jonathan on II Samuel / 18 / 16] וּתְקַע יוֹאָב בְּשׁוֹפָרָא וְתַב עַמָא מִלְמִרְדַף בָּתַר יִשְׂרָאֵל אֲרֵי מְנַע יוֹאָב יַת עַמָא: [Targum Jonathan on II Samuel / 18 / 17] וּנְסִיבוּ יַת אַבְשָׁלוֹם וּרְמוֹ יָתֵיהּ בְּחוּרְשָׁא לְגוֹ קוּמְצָא רַבָּה וַאֲקִימוּ עֲלוֹהִי דְגוֹר אַבְנִין רַב לַחֲדָא וְכָל יִשְׂרָאֵל אַפָּכוּ גְבַר לִקְרְווֹהִי: [Targum Jonathan on II Samuel / 18 / 18] וְאַבְשָׁלוֹם נְסִיב וַאֲקֵים לֵיהּ בְּחַיוֹהִי יַת קָמָתָא דִי בְּמֵישַׁר מַלְכָּא אֲרֵי אֲמַר לֵית לִי בַר קַיָם בְּדִיל לְאַדְכָּרָא שְׁמִי וּקְרָא לְקָמָתָא עַל שְׁמֵיהּ וּקְרָא לָהּ אַתְרָא דְאַבְשָׁלוֹם עַד יוֹמָא הָדֵין: [Targum Jonathan on II Samuel / 18 / 19] וַאֲחִימַעַץ בַּר צָדוֹק אֲמַר אֶרְהוּט כְּעַן וַאֲבַסַר יַת מַלְכָּא אֲרֵי אִתְפְּרַע לֵיהּ יְיָ מִיַד בַּעֲלֵי דְבָבוֹהִי: [Targum Jonathan on II Samuel / 18 / 20] וַאֲמַר לֵיהּ יוֹאָב לָא גְבַר כְּשַׁר לְבַסָרָא אַתְּ יוֹמָא דֵין וּתְבַסֵר בְּיוֹם אוֹחֲרָן וְיוֹמָא הָדֵין לָא תְבַסֵר אֱלָהֵין דְבַּר מַלְכָּא מִית: [Targum Jonathan on II Samuel / 18 / 21] וַאֲמַר יוֹאָב לְכוּשִׁי אֱזֵיל חַוֵי לְמַלְכָּא דַחֲזֵיתָא וּסְגִיד כּוּשִׁי לְיוֹאָב וּרְהַט: [Targum Jonathan on II Samuel / 18 / 22] וְאוֹסִיף עוֹד אֲחִימַעַץ בַּר צָדוֹק וַאֲמַר לְיוֹאָב וִיהֵי מָה אֶרְהוֹט כְּעַן אַף אֲנָא בָּתַר כּוּשִׁי וַאֲמַר יוֹאָב לְמָא דְנַן אַתְּ רָהִיט בְּרִי וְלָךְ לֵית בְּסוֹרָא מִתְיְהַב: [Targum Jonathan on II Samuel / 18 / 23] וִיהֵי מָא בִכְדֵין אֶרְהוּט וַאֲמַר לֵיהּ רְהוּט וּרְהַט אֲחִימַעַץ בְּאוֹרַח מֵישְׁרָא וּקְדִים יַת כּוּשִׁי: [Targum Jonathan on II Samuel / 18 / 24] וְדָוִד יָתֵיב בֵּין תְּרֵין תַּרְעַיָא וְהַלִיךְ סַכְוָאָה עַל אִגַר תַּרְעָא עַל שׁוּרָא וּזְקֵף יַת עֵינוֹהִי וַחֲזָא וְהָא גַבְרָא רָהִיט בִּלְחוֹדוֹהִי: [Targum Jonathan on II Samuel / 18 / 25] וּקְרָא סַכְוָאָה וְחַוֵי לְמַלְכָּא וַאֲמַר מַלְכָּא אִם בִּלְחוֹדוֹהִי הוּא בְּסוֹרְתָא בְּפוּמֵיהּ וַאֲזַל מֵיזַל וְקָרֵיב: [Targum Jonathan on II Samuel / 18 / 26] וַחֲזָא סַכְוָאָה גַבְרָא אַחֲרָנָא רָהִיט וּקְרָא סַכְוָאָה לְנָטַר תַּרְעָא וַאֲמַר הָא גַבְרָא רָהִיט בִּלְחוֹדוֹהִי וַאֲמַר מַלְכָּא אַף דֵין מְבַסֵר: [Targum Jonathan on II Samuel / 18 / 27] וַאֲמַר סַכְוָאָה אֲנָא חֲזֵי יַת רִיהֲטָא דְקַדְמָאָה כְּרִיהֲטָא דַאֲחִימַעַץ בַּר צָדוֹק וַאֲמַר מַלְכָּא גְבַר טַב דֵין וְאַף בְּסוֹרָא טָבָא יַיְתֵי: [Targum Jonathan on II Samuel / 18 / 28] וּקְרָא אֲחִימַעַץ וַאֲמַר לְמַלְכָּא שְׁלָם וּסְגִיד לְמַלְכָּא עַל אַפּוֹהִי עַל אַרְעָא וַאֲמַר בְּרִיךְ יְיָ אֱלָהָךְ דִמְסַר יַת גַבְרַיָא דַאֲרִימוּ יַת יְדֵיהוֹן בְּרִבּוֹנִי מַלְכָּא: [Targum Jonathan on II Samuel / 18 / 29] וַאֲמַר מַלְכָּא שְׁלַם לְעוּלֵימָא לְאַבְשָׁלוֹם וַאֲמַר אֲחִימַעַץ חֲזֵיתִי הֲמוֹנָא סַגִיאָה בָּתַר דִשְׁלַח יַת עַבְדָא דְמַלְכָּא יוֹאָב וְיַת עַבְדָךְ וְלָא יְדָעִית מָה: [Targum Jonathan on II Samuel / 18 / 30] וַאֲמַר מַלְכָּא אִסְתַּחַר אִתְעַתַּד הָכָא וְאִסְתְּחַר וְקָם: [Targum Jonathan on II Samuel / 18 / 31] וְהָא כוּשִׁי אֲתָא וַאֲמַר כוּשִׁי יִתְבַּסַר רִבּוֹנִי מַלְכָּא אֲרֵי אִתְפְּרַע לָךְ יְיָ יוֹמָא דֵין מִיַד כָּל דְקָמוּ עֲלָךְ: [Targum Jonathan on II Samuel / 18 / 32] וַאֲמַר מַלְכָּא לְכוּשִׁי הַשָׁלֵם לְעוּלֵימָא לְאַבְשָׁלוֹם וַאֲמַר כּוּשִׁי יְהוֹן כְּעוּלֵימָא סַנְאֵי רִבּוֹנִי מַלְכָּא וְכָל דְקָמוּ עֲלָךְ לְבִישָׁא:

Study this passage

Prepare a passage questionPassage ID & source details Where did this come from?

Targum Jonathan on II Samuel — 19

[Targum Jonathan on II Samuel / 19 / 1] וּרְגַז מַלְכָּא וּסְלִיק עַל עֲלִיַת תַּרְעָא וּבְכָא וּכְדֵין אֲמַר בְּמֵיזְלֵיהּ בְּרִי אַבְשָׁלוֹם בְּרִי בְרִי אַבְשָׁלוֹם לְוַי דְמֵתִית אֲנָא חִלוּפָךְ וְאַתְּ קַיָם יוֹמָא דֵין אַבְשָׁלוֹם בְּרִי בְרִי: [Targum Jonathan on II Samuel / 19 / 2] וְאִתְחָוָאָה לְיוֹאָב הָא מַלְכָּא בָכֵי וּמִתְאַבֵּל עַל אַבְשָׁלוֹם: [Targum Jonathan on II Samuel / 19 / 3] וַהֲוַת תְּשׁוּעֲתָא בְּיוֹמָא הַהוּא לְאֶבְלָא לְכָל עַמָא אֲרֵי שְׁמַע עַמָא בְּיוֹמָא הַהוּא לְמֵימַר אִתְנְסֵיס מַלְכָּא עַל בְּרֵיהּ: [Targum Jonathan on II Samuel / 19 / 4] וּמִתְגַנְבִין עַמָא בְּיוֹמָא הַהוּא לְמֵיעַל לְקַרְתָּא כְּמָא דְמִתְגַנְבִין עַמָא דְמִתְכַּלְמִין בְּמִפַּכְהוֹן בִּקְרָבָא: [Targum Jonathan on II Samuel / 19 / 5] וּמַלְכָּא כְּרִיךְ יַת אַפּוֹהִי וּצְוַח מַלְכָּא בְּקַל רַב בְּרִי אַבְשָׁלוֹם אַבְשָׁלוֹם בְּרִי בְּרִי: [Targum Jonathan on II Samuel / 19 / 6] וַאֲתָא יוֹאָב לְוַת מַלְכָּא לְבֵיתָא וַאֲמַר אַבְהֵיתְתָא יוֹמָא דֵין יַת אַפֵּי כָּל עַבְדָיִךְ דְשֵׁיזִיבוּ יַת נַפְשָׁךְ יוֹמָא דֵין וְיַת נְפַשׁ בְּנָךְ וּבְנָתָךְ וּנְפַשׁ נְשָׁךְ וּנְפַשׁ לְחֵינָתָךְ: [Targum Jonathan on II Samuel / 19 / 7] לְמִרְחַם יַת סַנְאָיִךְ וּלְמִסְנֵי יַת רַחֲמָיִךְ אֲרֵי חַוֵיתָא יוֹמָא דֵין אֲרֵי לֵית לָךְ רַבְרְבִין וְעַבְדִין אֲרֵי אֲנָא יְדַעְנָא יוֹמָא דֵין אֲרֵי אִלוּ אַבְשָׁלוֹם קַיָם וְכוּלָנָא יוֹמָא דֵין מִתְקַטְלִין אֲרֵי בְכֵן כָּשַׁר בְּעֵינָךְ: [Targum Jonathan on II Samuel / 19 / 8] וּכְעַן קוּם פּוּק וּמַלֵיל עַל לִבָּא דְעַבְדָךְ אֲרֵי בְּמֵימְרָא דַייָ קַיֵמִית אֲרֵי לֵיתָךְ נָפִיק אִם יְבִית גְבַר עִמָךְ בְּלֵילְיָא וּתְהֵי בִישָׁא לָךְ דָא מִכָּל בִּישְׁתָא דְאָתַת עֲלָךְ מִזְעוּרָךְ עַד כְּעַן: [Targum Jonathan on II Samuel / 19 / 9] וְקָם מַלְכָּא וִיתֵיב בְּתַרְעָא וּלְכָל עַמָא חַוִיאוּ לְמֵימַר הָא מַלְכָּא יָתֵיב בְּתַרְעָא וַאֲתָא כָל עַמָא לָקֳדָם מַלְכָּא וְיִשְׂרָאֵל אַפִּיךְ גְבַר לְקִרְווֹהִי: [Targum Jonathan on II Samuel / 19 / 10] וַהֲווֹ כָל עַמָא מִתְוַכְּחִין בְּכָל שִׁבְטַיָא דְיִשְׂרָאֵל לְמֵימַר מַלְכָּא שֵׁיזְבָנָא מִיַד בְּעֵיל דְבָבָנָא וְהוּא פָרְקָנָא מִידָא דִפְלִשְׁתָּאֵי וּכְעַן עֲרַק מִן אַרְעָא מִלְוַת אַבְשָׁלוֹם: [Targum Jonathan on II Samuel / 19 / 11] וְאַבְשָׁלוֹם דִמְשַׁחְנָא עֲלָנָא מִית בִּקְרָבָא וּכְעַן לְמָה אַתּוּן שַׁתְקִין לַאֲתָבָא יַת מַלְכָּא: [Targum Jonathan on II Samuel / 19 / 12] וּמַלְכָּא דָוִד שְׁלַח לְצָדוֹק וּלְאֶבְיָתָר כַּהֲנַיָא לְמֵימַר מַלִילוּ לְסָבֵי יְהוּדָה לְמֵימַר לְמָא תְהוֹן בַּתְרָאִין לַאֲתָבָא יַת מַלְכָּא לְבֵיתֵיהּ וּפִתְגַם כָּל יִשְׂרָאֵל אֲתָא לְוַת מַלְכָּא לְבֵיתֵיהּ: [Targum Jonathan on II Samuel / 19 / 13] אֲחַי אַתּוּן קְרִיבַי וּבִסְרַי אַתּוּן וּלְמָא תְהוֹן בַּתְרָאִין לַאֲתָבָא יַת מַלְכָּא: [Targum Jonathan on II Samuel / 19 / 14] וְלַעֲמָשָׂא תֵימְרוּן הֲלָא קְרִיבִי וּבִסְרִי אַתְּ כְּדֵין יַעְבֵּיד לִי יְיָ וּכְדֵין יוֹסִיף אִם לָא רַב חֵילָא תְּהֵי קֳדָמֵי כָּל יוֹמַיָא חֲלַף יוֹאָב: [Targum Jonathan on II Samuel / 19 / 15] וְאִתְפְּנֵי לִבָּא דְכָל אֱנַשׁ יְהוּדָה כְּגַבְרָא חָד וּשְׁלָחוּ לְמַלְכָּא תּוּב אַתְּ וְכָל עַבְדָיִךְ: [Targum Jonathan on II Samuel / 19 / 16] וְתָב מַלְכָּא וַאֲתָא עַד יַרְדְנָא וּדְבֵית יְהוּדָה אֲתוֹ לְגִלְגְלָא לְמֵיזַל לָקֳדָמוּת מַלְכָּא לְאַעְבָּרָא יַת מַלְכָּא יַת יַרְדְנָא: [Targum Jonathan on II Samuel / 19 / 17] וְאוֹחִי שִׁמְעִי בַר גֵרָא בַּר שֵׁבֶט בִּנְיָמִן דִי מֵעַלְמַת וּנְחַת עִם אֱנַשׁ יְהוּדָה לִקֳדָמוּת מַלְכָּא דָוִד: [Targum Jonathan on II Samuel / 19 / 18] וַאֲלַף גַבְרָא עִמֵיהּ מִשִׁבְטָא דְבִנְיָמִין וְצִיבָא עוּלֵימָא דְבֵית שָׁאוּל וְחַמְשַׁת עֲסַר בְּנוֹהִי וְעַשְׂרִין עַבְדוֹהִי עִמֵיהּ וְגָזוּ יַרְדְנָא קֳדָם מַלְכָּא: [Targum Jonathan on II Samuel / 19 / 19] וַעֲבָרוּ מְגִזָתָא לְאַעְבָּרָא יַת בֵּית מַלְכָּא וּלְמֶעְבַּד דְתַקִין בְּעֵינוֹהִי וְשִׁמְעִי בַר גֵרָא נְפַל קֳדָם מַלְכָּא בְּמֶעְבְּרֵיהּ בְּיַרְדְנָא: [Targum Jonathan on II Samuel / 19 / 20] וַאֲמַר לְמַלְכָּא לָא יַחְשׁוֹב עֲלַי דִלִי רִבּוֹנִי חוֹבָא וְלָא תִדְכַּר יַת דִי סְרַח עַבְדָךְ בְּיוֹמָא דִי גְלָא רִבּוֹנִי מַלְכָּא מִירוּשְׁלֵם לְשַׁוָאָה מַלְכָּא עַל לִבֵּיהּ: [Targum Jonathan on II Samuel / 19 / 21] אֲרֵי יְדַע עַבְדָךְ אֲרֵי אֲנָא חָבִית וְהָא אָתִית יוֹמָא דֵין קַדְמָאִי לְכָל בֵּית יוֹסֵף לְמֵחַת לִקָדָמוּת רִבּוֹנִי מַלְכָּא: [Targum Jonathan on II Samuel / 19 / 22] וַאֲתֵיב אֲבִישַׁי בַּר צְרוּיָה וַאֲמַר הַחֲלַף דָא לָא יִתְקְטֵל שִׁמְעִי אֲרֵי לַט יַת מְשִׁיחָא דַיָי: [Targum Jonathan on II Samuel / 19 / 23] וַאֲמַר דָוִד מַה לִי וּלְכוֹן בְּנֵי צְרוּיָה אֲרֵי תֶהֱווֹן לִי יוֹמָא דֵין לִסְטַן יוֹמָא דֵין יִתְקְטֵיל גַבְרָא בְּיִשְׂרָאֵל אֲרֵי הֲלָא יְדַעְנָא אֲרֵי יוֹמָא דֵין אֲנָא מַלְכָּא עַל יִשְׂרָאֵל: [Targum Jonathan on II Samuel / 19 / 24] וַאֲמַר מַלְכָּא לְשִׁמְעִי לָא תְמוּת וְקַיָם לֵיהּ מַלְכָּא: [Targum Jonathan on II Samuel / 19 / 25] וּמְפִיבֹשֶׁת בַּר שָׁאוּל נְחַת לִקֳדָמוּת מַלְכָּא וְלָא שְׁטַף רַגְלוֹהִי וְלָא סַפֵּר סִפְמֵיהּ וְיַת לְבוּשׁוֹהִי לָא חַוַר לְמִן יוֹמָא דִי גְלָא מַלְכָּא עַד יוֹמָא דַאֲתָא בִשְׁלָם: [Targum Jonathan on II Samuel / 19 / 26] וַהֲוָה כַּד אָתָא לִירוּשְׁלֵם לָקֳדָמוּת מַלְכָּא וַאֲמַר לֵיהּ מַלְכָּא לְמָא לָא אָזַלְתָּא עִמִי מְפִיבֹשֶׁת: [Targum Jonathan on II Samuel / 19 / 27] וַאֲמַר רִבּוֹנִי מַלְכָּא עַבְדִי שְׁקַר כִּי אֲרֵי אֲמַר עַבְדָךְ אֶחֱשׁוֹק לִי חֲמָרָא וְאֶרְכּוּב עֲלָהּ וְאֵיהַךְ עִם מַלְכָּא אֲרֵי חַגִיר עַבְדָךְ: [Targum Jonathan on II Samuel / 19 / 28] וַאֲמַר עַל עַבְדָךְ מִילִין דְלָא כַשְׁרָן קֳדָם רִבּוֹנִי מַלְכָּא וְרִבּוֹנִי מַלְכָּא חַכִּים כְּמַלְאָכָא דַייָ וַעֲבֵיד דְתַקֵין בְּעֵינָךְ: [Targum Jonathan on II Samuel / 19 / 29] אֲרֵי לָא הֲוָה כָּל בֵּית אַבָּא אֱלָהֵין גַבְרֵי חַיָבֵי קְטוֹל לְרִבּוֹנִי מַלְכָּא וְשַׁוֵיתָא יַת עַבְדָךְ בְּאָכְלֵי פְתוֹרָךְ וּמָה אִית לִי עוֹד זְכוּ וּלְמִקְבַּל עוֹד קֳדָם מַלְכָּא: [Targum Jonathan on II Samuel / 19 / 30] וַאֲמַר לֵיהּ מַלְכָּא לְמָא תְמַלֵיל עוֹד פִּתְגָמָךְ אֲמָרִית אַתְּ וְצִיבָא תִּפְלְגוּן יַת אַחְסַנְתָּא: [Targum Jonathan on II Samuel / 19 / 31] וַאֲמַר מְפִיבֹשֶׁת לְמַלְכָּא אַף יַת כּוּלָא יִסַב בָּתַר דְאָתָא רִבּוֹנִי מַלְכָּא בִּשְׁלָמָא לְבֵיתֵיהּ: [Targum Jonathan on II Samuel / 19 / 32] וּבַרְזִלֵי גִלְעֲדָאָה נְחַת מֵרוֹגְלִים וַעֲבַר יַת מַלְכָּא יַת יַרְדְנָא לְאַלְוָיוּתֵיהּ יַת יַרְדְנָא: [Targum Jonathan on II Samuel / 19 / 33] וּבַרְזִלַי סִיב לַחֲדָא בַּר תַּמְנָן שְׁנִין וְהוּא סוֹבַר יַת מַלְכָּא בְּמִיתְבֵיהּ בְמַחֲנַיִם אֲרֵי גְבַר רַב הוּא לַחֲדָא: [Targum Jonathan on II Samuel / 19 / 34] וַאֲמַר מַלְכָּא לְבַרְזִלַי אַתְּ עֲבַר עִמִי וַאֲסוֹבַר יָתָךְ עִמִי בִּירוּשְׁלֵם: [Targum Jonathan on II Samuel / 19 / 35] וַאֲמַר בַּרְזִלַי לְמַלְכָּא כַּמָה יוֹמֵי שְׁנֵי חַיַי אָרֵי אָסַק עִם מַלְכָּא לִירוּשְׁלֵם: [Targum Jonathan on II Samuel / 19 / 36] בַּר תַּמְנָן שְׁנִין אֲנָא יוֹמָא דֵין הַאִידַע בֵּין טַב לְבִישׁ אִם יִטְעַם עַבְדָךְ יַת מָה דְאֵיכוּל וְיַת מָה דְאֶשְׁתֵּי אִם אֶשְׁמַע עוֹד בְּקַל כִּנְרִין וְתוּשְׁבָּחָן וּלְמָה יְהֵי עַבְדָךְ עוֹד לְמַטוּל עַל רִבּוֹנִי מַלְכָּא: [Targum Jonathan on II Samuel / 19 / 37] כִּזְעֵיר יֶעְבַּר עַבְדָךְ יַת יַרְדְנָא עִם מַלְכָּא וּלְמָה יְשַׁלְמִנַנִי מַלְכָּא תַּשְׁלוּמָא הָדָא: [Targum Jonathan on II Samuel / 19 / 38] יְתִיב כְּעַן עַבְדָךְ וְאֵמוּת בְּקַרְתִּי וְאִתְקְבַר בְּקִבְרָא דְאַבָּא וּדְאִמָא וְהָא עַבְדָךְ כִּמְהָם יֶעְבַּר עִם רִבּוֹנִי מַלְכָּא וֶעֱבֵיד לֵיהּ יַת דְתַקִין בְּעֵינָךְ: [Targum Jonathan on II Samuel / 19 / 39] וַאֲמַר מַלְכָּא עִמִי יֶעְבַּר כִּמְהָם וַאֲנָא אַעְבֵּיד לֵיהּ יַת דְתַקִין בְּעֵינָךְ וְכָל דְתִרְמֵי עָלַי אַעְבֵּיד לָךְ: [Targum Jonathan on II Samuel / 19 / 40] וַעֲבַר כָּל עַמָא יַת יַרְדְנָא וּמַלְכָּא עֲבַר וּנְשַׁק מַלְכָּא לְבַרְזִלַי וּבָרְכֵיהּ וְתַב לְאַתְרֵיהּ: [Targum Jonathan on II Samuel / 19 / 41] וַעֲבַר מַלְכָּא לְגִלְגְלָא וְכִמְהָן עֲבַר עִימֵיהּ וְכָל עַמָא דְבֵית יְהוּדָה אַעְבָּרוּ יַת מַלְכָּא וְאַף פַּלְגוּת עַמָא דְיִשְׂרָאֵל: [Targum Jonathan on II Samuel / 19 / 42] וְהָא כָּל אֱנַשׁ יִשְׂרָאֵל אֲתָן לְוַת מַלְכָּא וַאֲמַרוּ לְמַלְכָּא מָא דֵין כַּסְיוּךְ מִנָנָא אֲחָנָא אֱנַשׁ יְהוּדָה וְאַעְבָּרוּ יַת מַלְכָּא וְיַת אֱנַשׁ בֵּיתֵיהּ יַת יַרְדְנָא וְכָל גַבְרֵי דָוִד עִמֵיהּ: [Targum Jonathan on II Samuel / 19 / 43] וַאֲתֵיב כָּל אֱנַשׁ יְהוּדָה עַל אֱנַשׁ יִשְׂרָאֵל אֲרֵי קָרִיב לִי מַלְכָּא מִדִילָךְ וּלְמָה דְנַן תְּקוֹף לָךְ עַל פִתְגָמָא הָדֵין הֲמֵיכַל אֲכִילְנָא מִנִכְסֵי מַלְכָּא אִם מַתְּנָא מַנֵי לָנָא: [Targum Jonathan on II Samuel / 19 / 44] וַאֲתֵיב אֱנַשׁ יִשְׂרָאֵל יַת אֱנַשׁ יְהוּדָה וַאֲמַר עַסְרָא חוּלָקִין אִית לִי בְּמַלְכָּא וְאַף בְּדָוִד אֲנָא רָעֵינָא מִנָךְ וּמָא דֵין אַשְׁטְתַנִי וְלָא הֲוָה פִתְגָמִי קַדְמוּתָא לִי לַאֲתָבָא יַת מַלְכִּי וּתְקֵיף פִּתְגַם אֱנַשׁ יְהוּדָה מִפִּתְגַם אֱנַשׁ יִשְׂרָאֵל:

Study this passage

Prepare a passage questionPassage ID & source details Where did this come from?

Targum Jonathan on II Samuel — 20

[Targum Jonathan on II Samuel / 20 / 1] וְתַמָן אִתְעַרַע גְבַר רַשִׁיעָא וּשְׁמֵיהּ שֶׁבַע בַּר בִּכְרִי גַבְרָא מִשִׁבְטָא דְבֵית בִּנְיָמִן וּתְקַע בְּשׁוֹפָרָא וַאֲמַר לֵית לָן חוּלַק בְּדָוִד וְלָא אַחְסָנָא לָנָא בְּבַר יִשַׁי גְבַר לְקִרְווֹהִי יִשְׂרָאֵל: [Targum Jonathan on II Samuel / 20 / 2] וּסְלִיק כָּל אֱנַשׁ יִשְׂרָאֵל מִבָּתַר דָוִד לְמֵיזַל בָּתַר שֶׁבַע בַּר בִּכְרִי וֶאֱנַשׁ יְהוּדָה לָווּ עִם מַלְכְּהוֹן מִן יַרְדְנָא וְעַד יְרוּשְׁלֵם: [Targum Jonathan on II Samuel / 20 / 3] וַאֲתָא דָוִד לְבֵיתֵיהּ לִירוּשְׁלֵם וּדְבַר מַלְכָּא יַת עֲסַר נְשִׁין לְחֵינָן דִי שְׁבַק לְמִטַר בֵּיתָא וּמַנִינָן בְּבֵית מַטָרָא וּמְסוֹבַר לְהֵן וּלְוַתְהֶן לָא עַל וַהֲוָאָה נְטִירָן וּמִתְקַרְיָן עַד יוֹם מוּתְהֵן אַרְמְלָן דְבַעְלֵיהֶן קַיָם: [Targum Jonathan on II Samuel / 20 / 4] וַאֲמַר מַלְכָּא לַעֲמָשָׂא כְּנוֹשׁ קֳדָמַי יַת אֱנַשׁ יְהוּדָה תְּלָתָא יוֹמִין וְאַתְּ הָכָא קוּם: [Targum Jonathan on II Samuel / 20 / 5] וַאֲזַל עֲמָשָׂא לְמִכְנַשׁ יַת דְבֵית יְהוּדָה וְאוֹחַר מִן זִמְנָא דַאֲמַר לֵיהּ: [Targum Jonathan on II Samuel / 20 / 6] וַאֲמַר דָוִד לַאֲבִישַׁי כְּעַן יַבְאֵישׁ לָנָא שֶׁבַע בַּר בִּכְרִי מִן אַבְשָׁלוֹם אַתְּ דְבַר יַת עַבְדֵי רִבּוֹנָךְ וּרְדַף בַּתְרוֹהִי דִלְמָא יַשְׁכַּח לֵיהּ קִרְוִין כְּרִיכָן וְיָעִיק לָנָא: [Targum Jonathan on II Samuel / 20 / 7] וּנְפַקוּ בַּתְרוֹהִי גַבְרֵי יוֹאָב וְקַשָׁתַיָא וְקַלְעֲיָא וְכָל גִבָּרַיָא וּנְפַקוּ מִירוּשְׁלֵם לְמִרְדַף בָּתַר שֶׁבַע בַּר בִּכְרִי: [Targum Jonathan on II Samuel / 20 / 8] אִינוּן עִם אַבְנָא רַבְּתָא דִי בְגִבְעוֹן וַעֲמָשָׂא אֲתָא לְאַפֵּיהוֹן וְיוֹאָב אֲסִיר מְזָרֵיז לְבוּשׁוֹהִי וַעֲלוֹהִי אִסְפַּנְקֵי חֶרֶב מְזָרְזָא עַל חַרְצֵיהּ בִּנְדָנָהּ וְהוּא אָזִיל וּפְסָע: [Targum Jonathan on II Samuel / 20 / 9] וַאֲמַר יוֹאָב לַעֲמָשָׂא הַשְׁלָם אַתְּ אָחִי וַאֲחַדַת יַת יְמִין יוֹאָב בְּדִקְנָא דַעֲמָשָׂא לְמִנְשַׁק לֵיהּ: [Targum Jonathan on II Samuel / 20 / 10] וַעֲמָשָׂא לָא אִסְתְּמַר בְּחַרְבָּא דִי בְיַד יוֹאָב וּמְחָהִי בָהּ בִּסְטַר יַרְכֵיהּ וּשְׁפַךְ מֵיעוֹהִי לְאַרְעָא וְלָא תְנָא לֵיהּ וּמִית וְיוֹאָב וַאֲבִישַׁי אֲחוֹהִי רְדַף בָּתַר שֶׁבַע בַר בִּכְרִי: [Targum Jonathan on II Samuel / 20 / 11] וְגַבְרָא קָאִים עִילַווֹהִי מֵעוּלֵימֵי יוֹאָב וַאֲמַר מַן דְרָעִי בְיוֹאָב וּמַן דִי לְדָוִד יֵיזֵל בָּתַר יוֹאָב: [Targum Jonathan on II Samuel / 20 / 12] וַעֲמָשָׂא מִטְרַף בִּדְמָא בְּגוֹ כַבְשָׁא וַחֲזָא גַבְרָא אֲרֵי קָם כָּל עַמָא וְאַסְחַר יַת עֲמָשָׂא מִן כַּבְשָׁא לְחַקְלָא וּרְמָא עֲלוֹהִי לְבוּשָׁא כַּד חֲזָא כָּל דַאֲתֵי עֲלוֹהִי וְקָאִים: [Targum Jonathan on II Samuel / 20 / 13] כַּד אַפְנֵיהּ מִן כַּבְשָׁא עֲבַר כָּל גַבְרָא בָּתַר יוֹאָב לְמִרְדַף בָּתַר שֶׁבַע בַּר בִּכְרִי: [Targum Jonathan on II Samuel / 20 / 14] וַעֲבַר בְּכָל שִׁבְטַיָא דְיִשְׂרָאֵל לְאָבֵלָה וּבֵית מַעֲכָה וְכָל בֵּירִין וְאִתְכְּנִישׁוּ וַאֲתוֹ אַף אִינוּן בַּתְרוֹהִי: [Targum Jonathan on II Samuel / 20 / 15] וַאֲתוֹ וְצָרוּ עֲלוֹהִי בְּאָבֵל בֵית מַעֲכָה וּצְבָרוּ מַלְיָתָא עַל קַרְתָּא וְאַקְפָהּ מַשִׁרְיָן וְכָל עַמָא דְעִם יוֹאָב מִתְעַשְׁתִּין לְחַבָּלָא שׁוּרָא: [Targum Jonathan on II Samuel / 20 / 16] וּקְרַת אִתְּתָא חַכִּימָתָא מִן קַרְתָּא שְׁמָעוּ שְׁמָעוּ אִמְרוּ כְעַן לְיוֹאָב קְרַב עַד הָכָא וַאֲמַלֵיל עִמָךְ: [Targum Jonathan on II Samuel / 20 / 17] וּקְרִיב לְוָתָהּ וַאֲמַרַת אִתְּתָא הַאַתְּ יוֹאָב וַאֲמַר אֲנָא וַאֲמַרַת לֵיהּ שְׁמַע פִּתְגָמֵי אַמְתָךְ וַאֲמַר שָׁמַע אֲנָא: [Targum Jonathan on II Samuel / 20 / 18] וַאֲמַרַת לְמֵימַר אֶדְכַּר כְּעַן מַה דִכְתִיב בִסְפַר אוֹרַיְתָא לְמִשְׁאַל בְּקַרְתָּא בְקַדְמִין לְמֵימַר הַכְדֵין הֲוָת לָךְ לְמִשְׁאַל בְּאָבֵל אִם מַשְׁלְמִין: [Targum Jonathan on II Samuel / 20 / 19] אֲנַחְנָא שַׁלְמִין בְּהֵימָנוּתָא עִם יִשְׂרָאֵל דְאַתְּ בָּעֵי לְחַבָּלָא קִירְוָא דְהִיא כְּרַךְ רַב וְאִמָא בְּיִשְׂרָאֵל לְמָה תְקַלְקֵל אַחֲסָנַת עַמָא דַיָי: [Targum Jonathan on II Samuel / 20 / 20] וְאָתֵיב יוֹאָב וַאֲמַר חַס חַס לִי אִם אֲקַלְקֵל וְאִם אֲחַבֵּל: [Targum Jonathan on II Samuel / 20 / 21] לָא כֵן פִתְגָמָא אֲרֵי גַבְרָא מִטוּרָא דְבֵית אֶפְרַיִם שֶׁבַע בַּר בִּכְרִי שְׁמֵיהּ אֲרִים יְדֵיהּ בְּמַלְכָּא בְּדָוִד הָבוּ יָתֵיהּ בִּלְחוֹדֵיהּ וְאֵיהַךְ מֵעַל קַרְתָּא וַאֲמַרַת אִתְּתָא לְיוֹאָב הָא רֵישֵׁיהּ מִיתְרְמֵי לָךְ מִן שׁוּרָא: [Targum Jonathan on II Samuel / 20 / 22] וַאֲתַת אִתְּתָא לְוַת כָּל עַמָא בְּחוּכְמְתָהּ וּפְסַקוּ יַת רֵישׁ שֶׁבַע בַּר בִּכְרִי וּרְמוֹ לְיוֹאָב וּתְקַע בְּשׁוֹפָרָא וְאִתְבַּדָרוּ מֵעַל קַרְתָּא גְבַר לְקִרְווֹהִי וְיוֹאָב תָּב לִירוּשְׁלֵם לְוַת מַלְכָּא: [Targum Jonathan on II Samuel / 20 / 23] וְיוֹאָב מְמַנָא עַל כָּל חֵילָא דְיִשְׂרָאֵל וּבְנָיָה בַּר יְהוֹיָדָע עַל קַשָׁתַיָא וְעַל קַלָעַיָא: [Targum Jonathan on II Samuel / 20 / 24] וַאֲדוּרָם מְמַנָא עַל מַסְקֵי מִסִין וִיהוֹשָׁפָט בַּר אֲחִילוּד מְמַנָא עַל דוּכְרָנַיָא: [Targum Jonathan on II Samuel / 20 / 25] וּשְׁוָא סַפְרָא וְצָדוֹק וְאֶבְיָתָר כַּהֲנַיָא: [Targum Jonathan on II Samuel / 20 / 26] וְאַף עִירָא יָאִירָאָה דְמִתְּקוֹעַ הֲוָה רַב לְדָוִד:

Study this passage

Prepare a passage questionPassage ID & source details Where did this come from?

Targum Jonathan on II Samuel — 21

[Targum Jonathan on II Samuel / 21 / 1] וַהֲוָה כַפְנָא בְיוֹמֵי דָוִד תְּלַת שְׁנִין שַׁתָּא בָּתַר שַׁתָּא וּבְעָא דָוִד רַחֲמִין קֳדָם יְיָ וַאֲמַר יְיָ עַל שָׁאוּל וְעַל בֵּית חַיָבֵי קְטוֹל עַל דִקְטַל יַת גִבְעוֹנָאֵי: [Targum Jonathan on II Samuel / 21 / 2] וּקְרָא מַלְכָּא לְגִבְעוֹנָאֵי וַאֲמַר לְהוֹן וְגִבְעוֹנָאֵי לָא מִבְּנֵי יִשְׂרָאֵל אִינוּן אֱלָהֵין מִשְׁאַר אֱמוֹרָאֵי וּבְנֵי יִשְׂרָאֵל קַיָמוּ לְהוֹן וּבְעָא שָׁאוּל לְקַטָלוּתְהוֹן בִּדְקָנִי לִבְנֵי יִשְׂרָאֵל וִיהוּדָה: [Targum Jonathan on II Samuel / 21 / 3] וַאֲמַר דָוִד לְגִבְעוֹנָאֵי מָה אַעְבֵּיד לְכוֹן וּבְמָה אֶתְכַּפַּר וּבָרִיכוּ יַת אַחְסָנַת עַמָא דַיָי: [Targum Jonathan on II Samuel / 21 / 4] וַאֲמַרוּ לֵיהּ גִבְעוֹנָאֵי לֵית אֲנַחְנָא צְרִיכִין לְמִיסַב כְּסַף וּדְהַב מִן שָׁאוּל וּמִן בֵּיתֵיהּ וְאַף לָא אֱנַשׁ לְמִקְטַל בְּיִשְׂרָאֵל וַאֲמַר מָה אַתּוּן אָמְרִין אַעְבֵּיד לְכוֹן: [Targum Jonathan on II Samuel / 21 / 5] וַאֲמַרוּ לְמַלְכָּא גַבְרָא דְשֵׁצְיָנָא וּדְחַשֵׁב לָנָא אִשְׁתֵּיצֵינָא מִלְמֵידַר בְּכָל תְּחוּם אַרְעָא דְיִשְׂרָאֵל: [Targum Jonathan on II Samuel / 21 / 6] יִתְיַהֲבוּן לָנָא שַׁבְעָא גַבְרִין מִבְּנוֹהִי וְנַצְלְבִינוּן קֳדָם יְיָ בְּגִבְעֲתָא דְשָׁאוּל בְּחִירָא דַייָ וַאֲמַר מַלְכָּא אֲנָא אֶתֵּן: [Targum Jonathan on II Samuel / 21 / 7] וְחָס מַלְכָּא עַל מְפִיבֹשֶׁת בַּר יְהוֹנָתָן בַּר שָׁאוּל עַל שְׁבוּעֲתָא דַייָ דְבֵינֵיהוֹן בֵּין דָוִד וּבֵין יְהוֹנָתָן בַּר שָׁאוּל: [Targum Jonathan on II Samuel / 21 / 8] וּנְסֵיב מַלְכָּא יַת תְּרֵין בְּנֵי רִצְפָה בַת אַיָה דִילֵידַת לְשָׁאוּל יַת אַרְמוֹנִי וְיַת מְפִיבֹשֶׁת וְיַת חַמְשַׁת בְּנֵי מֵרַב דְרָבִיאַת מִיכַל בַּת שָׁאוּל דִילֵידַת לְעַדְרִיאֵל בַּר בַּרְזִילַי דְמִמְחוֹלוֹת: [Targum Jonathan on II Samuel / 21 / 9] וּמַתְרִינוּן בִּידָא דְגִבְעוֹנָאֵי וּצְלוֹבִינוּן בְּטוּרָא קֳדָם יְיָ וּנְפָלוּ שַׁבְעָתְהוֹן כַּחֲדָא וְאִינוּן אִתְקְטָלוּ בְּיוֹמֵי חַצְדָא בְּקַדְמָאִין בִּשְׁרָיוּת חֲצַד סְעוֹרִין: [Targum Jonathan on II Samuel / 21 / 10] וּנְסִיבַת רִצְפָּה בַּת אַיָה יַת סַקָא וּפִרְסָתֵיהּ לָהּ עַל טִנָרָא מִשְׁרָיוּת חַצְדָא עַל דִנְחָתַת מִטְרָא עֲלֵיהוֹן מִן שְׁמַיָא וְלָא שַׁבְקַת עוֹפָא דִשְׁמַיָא לִמְנַח עֲלֵיהוֹן בִּימָמָא וְיַת חֵיוַת בָּרָא בְּלֵילְיָא: [Targum Jonathan on II Samuel / 21 / 11] וְאִתְחַוָא לְדָוִד יַת דַעֲבָדִית רִצְפָּה בַּת אַיָה לְחֵינָתָא דְשָׁאוּל: [Targum Jonathan on II Samuel / 21 / 12] וַאֲזַל דָוִד וּנְסִיב יַת גַרְמֵי שָׁאוּל וְיַת גַרְמֵי יְהוֹנָתָן בְּרֵיהּ מִלְוַת יַתְבֵי יָבֵשׁ גִלְעָד דִגְנַבוּ יַתְהוֹן מִשׁוּרָא דְבֵית שַׁן דְצַלְבוּנוּן תַּמָן פְלִשְׁתָּאֵי בְּיוֹמָא דִקְטָלוּ פְּלִשְׁתָּאֵי יַת שָׁאוּל בְּגִלְבּוֹעַ: [Targum Jonathan on II Samuel / 21 / 13] וְאַסִיק מִתַּמָן יַת גַרְמֵי שָׁאוּל וְיַת גַרְמֵי יְהוֹנָתָן בְּרֵיהּ וּכְנָשׁוּ יַת גַרְמֵי צְלִיבַיָא: [Targum Jonathan on II Samuel / 21 / 14] וּקְבַרוּ יַת גַרְמֵי שָׁאוּל וִיהוֹנָתָן בְּרֵיהּ בְּאַרַע שֵׁבֶט בִּנְיָמִין בְּצֵלַע בְּקִבְרָא דְקִישׁ אֲבוּהִי וַעֲבַדוּ כָּל דְפַקֵיד מַלְכָּא וְקַבֵּיל יְיָ צְלוֹתָא דְדַיָרֵי אַרְעָא בָּתַר כֵּן: [Targum Jonathan on II Samuel / 21 / 15] וַהֲוַת עוֹד קְרָבָא לִפְלִשְׁתָּאֵי עִם יִשְׂרָאֵל וּנְחַת דָוִד וְעַבְדוֹהִי עִמֵיהּ וְאַגִיחוּ קְרָבָא עִם פְּלִשְׁתָּאֵי וְאִשְׁתַּלְהֵי דָוִד: [Targum Jonathan on II Samuel / 21 / 16] וְיִשְׁבִּי בְּנוֹב דִי בִּבְנֵי גִבָּרָא וּמַתְקַל סוֹפִינֵיהּ מַתְקַל תְּלַת מְאָה סַלְעִין דִנְחָשָׁא הוּא אֲסִיר אִסְפַּנְקֵי חַדְתָּא וַאֲמַר לְמִקְטַל יַת דָוִד: [Targum Jonathan on II Samuel / 21 / 17] וּסְעֵיד לֵיהּ אֲבִישַׁי בַּר צְרוּיָה וּמְחָא יַת פְּלִשְׁתָּאָה וְקַטְלֵיהּ בְּכֵן קַיָימוּ גַבְרֵי דָוִד לֵיהּ לְמֵימַר לָא תִּפּוֹק עוֹד עִמָנָא לִקְרָבָא וְלָא תִיטְפֵי יַת מַלְכוּתָא דְיִשְׂרָאֵל: [Targum Jonathan on II Samuel / 21 / 18] וַהֲוָה בָּתַר כֵּן וַהֲוַת עוֹד קְרָבָא בְּגוֹב עִם פְּלִשְׁתָּאֵי בְּכֵן קְטַל סִבְכֵי דְמִן חוּשַׁת יַת סַף דְבִבְנֵי גִבָּרָא: [Targum Jonathan on II Samuel / 21 / 19] וַהֲוַת עוֹד קְרָבָא בְּגוֹב עִם פְּלִשְׁתָּאֵי וּקְטַל דָוִד בַּר יִשַׁי מְחֵי פָּרוֹכֶת בֵּית מַקְדְשָׁא דְמִבֵּית לֶחֶם יַת גָלְיַת גִתָּאָה וְאָעָא דְמוּרְנִיתֵיהּ כְאַכְסַן דְגַרְדָאִין: [Targum Jonathan on II Samuel / 21 / 20] וַהֲוַת עוֹד קְרָבָא בְּגַת וַהֲוָה גְבַר דְמִשְׁחָן וְאֶצְבְּעַת יְדוֹהִי וְאֶצְבְּעַת רִגְלוֹהִי שִׁית וָשִׁית עַשְׂרִין וְאַרְבַּע בְּמִנְיַן וְאַף הוּא אִתְיְלִיד בְּגִבָּרָא: [Targum Jonathan on II Samuel / 21 / 21] וְחַסֵיד יַת יִשְׂרָאֵל וְקַטְלֵיהּ יְהוֹנָתָן בַּר שִׁמְעָה אֲחוּהִי דְדָוִד: [Targum Jonathan on II Samuel / 21 / 22] יַת אַרְבַּעַת אִילֵין אִתְיְלִידוּ לְגִבָּרָא בְּגַת וְאִתְמַסְרוּ בִידָא דְדָוִד וּבִידָא דְעַבְדוֹהִי:

Study this passage

Prepare a passage questionPassage ID & source details Where did this come from?

Targum Jonathan on II Samuel — 22

[Targum Jonathan on II Samuel / 22 / 1] וְשַׁבַּח דָוִד בִּנְבוּאָה קֳדָם יְיָ יַת פִּתְגָמֵי תּוּשְׁבַּחְתָּא הָדָא עַל כָּל יוֹמַיָא דְשֵׁיזִיב יְיָ יַת יִשְׂרָאֵל מִיַד כָּל בַּעֲלֵי דְבָבֵיהוֹן וְאַף לְדָוִד שֵׁיזְבֵיהּ מֵחַרְבָּא דְשָׁאוּל: [Targum Jonathan on II Samuel / 22 / 2] וַאֲמַר יְיָ תּוּקְפִי וְרוּחְצָנִי וּמְשֵׁיזִיב יָתִי: [Targum Jonathan on II Samuel / 22 / 3] אֱלָהִי דְאִתְרְעֵי בִי קָרֵבְנִי לִדְחַלְתֵּיהּ תּוּקְפֵי דְמִן קֳדָמוֹהִי מִתְיְהַב לִי תְּקוֹף וּפוּרְקָן לְאִתְגַבָּרָא עַל בַּעֲלֵי דְבָבִי רוֹחֲצַנִי דְעַל מֵימְרֵיהּ אֲנָא רָחִיץ בְּעִדַן עָקָא מֵגִין עָלַי מִבַּעֲלֵי דְבָבִי וַאֲמַר לַאֲרָמָא קַרְנִי בְּפוּרְקָנֵיהּ סוּמְכָנִי דַהֲוָה מֵימְרֵיהּ סְמַךְ לִי כַּד הֲוֵיתִי עָרִיק מִן קֳדָם רָדְפַי פּוּרְקָנִי מִבַּעֲלֵי דְבָבִי וְאַף מִיַד כָּל חֲטוֹפִין שֵׁיזִיב יָתִי: [Targum Jonathan on II Samuel / 22 / 4] אֲמַר דָוִד בְּתוּשְׁבְּחָא אֲנָא מְצַלֵי קֳדָם יְיָ דִבְכָל עִדַן מִבַעֲלֵי דְבָבִי פָּרִיק יָתִי: [Targum Jonathan on II Samuel / 22 / 5] אֲרֵי אַקֵיפַתְנִי עָקָא כְּאִתָּא דְיַתְבָא עַל מַתְבְּרָא וְחֵילָא לֵית לָהּ לְמֵילַד וְהִיא מְסַכְּנָא לִמְמָת סִיעַת חַיָבִין בַּעֲתַת יָתִי: [Targum Jonathan on II Samuel / 22 / 6] מַשִׁרְיַת רַשִׁיעִין אַקְפוּנִי קַדְמוּנִי דִמְזַיְנִין בְּמָנֵי קְטוֹל: [Targum Jonathan on II Samuel / 22 / 7] אֲמַר דָוִד כַּד עָקָא לִי אֲנָא מְצַלֵי קֳדָם יְיָ וּקְדָם אֱלָהַי אֲנָא מִתְחַנֵן וּמְקַבֵּל מֵהֵיכָלֵיהּ צְלוֹתִי וּבָעוּתִי קֳדָמוֹהִי מִתְעַבְּדָא: [Targum Jonathan on II Samuel / 22 / 8] וְאִתְרְגִיפַת וְאִתְרְגִישַׁת אַרְעָא שַׁכְלוּלֵי שְׁמַיָא זָעוּ וְאִתְרְכִינוּ אֲרֵי תְקֵף רוּגְזֵיהּ: [Targum Jonathan on II Samuel / 22 / 9] סְלִיק זְדוֹנֵי דְפַרְעֹה רַשִׁיעָא כִּתְנָנָא קֳדָמוֹהִי בְּכֵן שְׁלַח רוּגְזֵיהּ כְּאָשָׁא בָעֲרָא דְמִן קֳדָמוֹהִי מְשֵׁיצָאָה מְזוֹפִיתֵיהּ כְּגוּמְרִין דְנוּר דָלְקָא מֵימְרֵיהּ: [Targum Jonathan on II Samuel / 22 / 10] וְאַרְכִּין שְׁמַיָא וְאִתְגֵלִי יְקָרֵיהּ וַעֲנַן אֲמִיטְתָא כְּבַשׁ קֳדָמוֹהִי: [Targum Jonathan on II Samuel / 22 / 11] וְאִתְגְלֵי בִּגְבוּרְתֵיהּ עַל כְּרוּבִין קַלִילִין וְדַבַּר בִּתְקֵיף עַל כַּנְפֵי רוּחָא: [Targum Jonathan on II Samuel / 22 / 12] וְאַשְׁרֵי שְׁכִינְתֵּיהּ בַּעֲרָפֵילָא וַעֲנַן יְקַר סְחוֹר סְחוֹר לֵיהּ מָחִית מִיִן תַּקִיפִין מֵרִכְפַּת עֲנָנִין קַלִילִין בְּרוּם עַלְמָא: [Targum Jonathan on II Samuel / 22 / 13] מִזִיו יְקָרֵיהּ מַבְהִיקִין שְׁמֵי שְׁמַיָא מְזוֹפִיתֵיהּ כְּגוּמְרִין דְנוּר דַלְקָא מֵימְרֵיהּ: [Targum Jonathan on II Samuel / 22 / 14] אַכְלֵי מִן שְׁמַיָא יְיָ וְעִלָאָה אֲרִים מֵימְרֵיהּ: [Targum Jonathan on II Samuel / 22 / 15] וּשְׁלַח מָחָתֵיהּ כְּגִירִין וּבַדְרִינוּן בַּרְקִין וְשַׁגְשִׁינוּן: [Targum Jonathan on II Samuel / 22 / 16] וְאִתְחַזִיאוּ עוּמְקֵי יַמָא אִתְגְלִיאוּ שַׁכְלוּלֵי תֵבֵל בִּמְזוֹפִיתָא מִן קֳדָם יְיָ מִמֵימַר תְּקוֹף רוּגְזֵיהּ: [Targum Jonathan on II Samuel / 22 / 17] שְׁלַח נְבִיוֹהִי מֶלֶךְ תַּקִיף דְיָתֵיב בִּתְקוֹף רוּמָא דַבַּרְנִי שֵׁיזְבַנִי מֵעַמְמִין סַגִיאִין: [Targum Jonathan on II Samuel / 22 / 18] שֵׁיזְבַנִי מִסַנְאַי אֲרֵי תַקְפַנִי מִבַּעֲלֵי דְבָבֵי אֲרֵי אִתְגַבָּרוּ עֲלָי: [Targum Jonathan on II Samuel / 22 / 19] יְקַדְמוּנִי בְּיוֹם טִלְטוּלִי וַהֲוַת מֵימְרָא דַייָ סְמַךְ לִי: [Targum Jonathan on II Samuel / 22 / 20] וְאַפֵּיק לִרְוָחָא יָתִי שֵׁיזְבַנִי אֲרֵי אִתְרְעִי בִי: [Targum Jonathan on II Samuel / 22 / 21] אֲמַר דָוִד יְשַׁלְמִינַנִי יְיָ כִּזְכוּתִי כִּבְרִירוּת יְדַי יְתִיב לִי יְיָ: [Targum Jonathan on II Samuel / 22 / 22] אֲרֵי נְטָרִית אוֹרְחָן דְתַקְנָן קֳדָם יְיָ וְלָא הַלִיכִית בִּרְשַׁע קֳדָם אֱלָהָי: [Targum Jonathan on II Samuel / 22 / 23] אֲרֵי כָל דִינוֹהִי גְלָן לְקִבְּלִי לְמֶעְבַּדְהוֹן וּקְיָמוֹהִי לָא עֲדִית מִנְהוֹן: [Targum Jonathan on II Samuel / 22 / 24] וַהֲוֵית שְׁלִים בִּדְחַלְתֵּיהּ וַהֲוֵית נָטַר נַפְשִׁי מֵחוֹבִין: [Targum Jonathan on II Samuel / 22 / 25] וַאֲתֵיב יְיָ לִי כִּזְכוּתִי כִּבְרִירוּתִי קֳדָם מֵימְרֵיהּ: [Targum Jonathan on II Samuel / 22 / 26] עִם אַבְרָהָם דְאִשְׁתְּכַח חֲסִיד קֳדָמָךְ בְּכֵן אֲסְגֵיתָא לְמֶעֱבַּד חִסְדָא עִם זַרְעֵיהּ יִצְחָק דַהֲוָה שְׁלִים בִּדְחַלְתָּךְ בְּכֵן אַשְׁלֵמְתָּא מֵימַר רְעוּתָךְ לְמֶעְבַּד עִמֵיהּ: [Targum Jonathan on II Samuel / 22 / 27] עִם יַעֲקֹב דְהַלִיךְ בִּבְרִירוּתָּא קֳדָמָךְ בְּחַרְתָּא בְנוֹהִי מִכָּל עַמְמַיָא וְאַפְרַשְׁתָּא זַרְעֵיהּ מִכָּל פְּסוֹלָא פַּרְעֹה וּמִצְרָאֵי דַחֲשִׁיבוּ מַחְשְׁבָן עַל עַמָךְ בַּלְבַּלְתִּינוּן בְּמַחְשְׁבַתְהוֹן: [Targum Jonathan on II Samuel / 22 / 28] וְיַת עַמָא בֵּית יִשְׂרָאֵל דְמִתְקְרָן בְּעַלְמָא הָדֵין עַם חֲשִׁיךְ אַתְּ עֲתִיד לְמִפְרַק וּבְמֵימְרָךְ תַּקִיפָא דְמִתְגַבְּרִין עֲלֵיהוֹן תַּמְאִיךְ: [Targum Jonathan on II Samuel / 22 / 29] אֲרֵי אַתְּ הוּא מָרֵי נְהוֹרֵי דְיִשְׂרָאֵל יְיָ וַיָי יַפְקִינַנִי מֵחֲשׁוֹכָא לִנְהוֹרָא וְיֶחֱזִינַנִי בְּעַלְמָא דַעֲתִיד לְמֵיתֵי לְצַדִיקַיָא: [Targum Jonathan on II Samuel / 22 / 30] אֲרֵי בְמֵימְרָךְ אַסְגֵי מַשִׁרְיָן וּבְמֵימַר אֱלָהָי אֲכַבֵּשׁ כָּל כְּרַכִּין תַּקִיפִין: [Targum Jonathan on II Samuel / 22 / 31] אֱלָהָא דְכֵיוָנָא אוֹרְחֵיהּ אוֹרַיְתָא דַייָ בְּחִירָא הִיא תַּקִיף הוּא לְכָל דִי מִתְרַחֲצִין עֲלוֹהִי: [Targum Jonathan on II Samuel / 22 / 32] בְּכֵן עַל נִסָא וּפוּרְקָנָא דִי תַעְבֵּיד לִמְשִׁיחָךְ וְלִשְׁאָרָא דְעַמָךְ דְאִשְׁתַּאֲרוּן יוֹדוּן כָּל עַמְמַיָא אוּמַיָא וְלִישָׁנַיָא וְיֵימְרוּן לֵית אֱלָהָא אֶלָא יְיָ אֲרֵי לֵית בַּר מִנָךְ וְעַמָךְ יֵימְרוּן לֵית דְתַקֵיף אֶלָא אֱלָהָנָא: [Targum Jonathan on II Samuel / 22 / 33] אֱלָהָא דְסָעִיד לִי בְּחֵילָא וּמְתַקַן שְׁלִים אוֹרְחִי: [Targum Jonathan on II Samuel / 22 / 34] מְשַׁוֵי רִגְלַי קַלִילִין כְּאַיָלָתָא וְעַל בֵּית תּוּקְפֵי יְקִימִנָנִי: [Targum Jonathan on II Samuel / 22 / 35] מַלֵיף יְדֵי לְמֶעְבַּד קְרָבָא וּמַתְקֵיף בְקֶשֶׁת נְחָשָׁא דַרְעִי: [Targum Jonathan on II Samuel / 22 / 36] וִיהַבְתְּ לִי תְּקוֹף וּבְפוּרְקָנָךְ וּבְמֵימְרָךְ אַסְגִיתַנִי: [Targum Jonathan on II Samuel / 22 / 37] אַסְגִיתָא פְּסִיעָתִי תְּחוֹתָי וְלָא אִזְדַעְזְעָא רְכוּבָתִי: [Targum Jonathan on II Samuel / 22 / 38] וּרְדָפִית סַנְאַי וְשֵׁיצֵיתִינוּן וְלָא תָבֵית עַד דִי גְמַרְתִּינוּן: [Targum Jonathan on II Samuel / 22 / 39] וְשֵׁיצֵיתִינוּן וּגְמַרְתִּינוּן וְלָא יְכִילוּ לְמֵיקָם וּנְפָלוּ קְטִילִין תְּחוֹת פַּרְסַת רִגְלָי: [Targum Jonathan on II Samuel / 22 / 40] וּסְעַדְתַּנִי בְחֵילָא לְמֶעְבַּד קְרָבָא תְּבַרְתָּא עַמְמַיָא דְקַיְמִין לְאַבְאָשָׁא לִי תְּחוֹתָי: [Targum Jonathan on II Samuel / 22 / 41] וְסַנְאַי תְּבַרְתָּא קֳדָמַי מְחַזְרֵי קְדַל בַּעֲלֵי דְבָבַי וְשֵׁיצֵיתִינוּן: [Targum Jonathan on II Samuel / 22 / 42] בָּעָן סָעִיד וְלֵית לְהוֹן פָּרִיק מְצַלָן קֳדָם יְיָ וְלָא מְקַבֵּיל צְלוֹתְהוֹן: [Targum Jonathan on II Samuel / 22 / 43] וְדוֹשַׁשְׁתִּינוּן כְּעַפְרָא דְאַרְעָא כְּסִין שׁוֹקִין בְּעַטֵית בְּהוֹן רְפַסְתִּינוּן: [Targum Jonathan on II Samuel / 22 / 44] וּתְשֵׁיזְבִנַנִי מִפַּלְגוּת עַמָא תְּמַנַינִי רֵישָׁא לְעַמְמַיָא עַמָא דְלָא יְדָעִית יִפְלְחוּנָנִי: [Targum Jonathan on II Samuel / 22 / 45] בְּנֵי עַמְמַיָא יִתְכַּדְבוּן לִי לִשְׁמוֹעַ אוֹדֶן יִשְׁתַּמְעוּן בִּי: [Targum Jonathan on II Samuel / 22 / 46] בְּנֵי עַמְמַיָא יְסוּפוּן וִיזוּעוּן מִבִּירְנְיָתֵהוֹן: [Targum Jonathan on II Samuel / 22 / 47] בְּכֵן עַל נִיסָא וּפוּרְקָנָא דַעֲבַדְתָּא לְעַמָךְ בֵּית יִשְׂרָאֵל אוֹדִיאוּ וַאֲמַרוּ קַיָים הוּא יְיָ וּבְרִיךְ תַּקִיפָא דְמִן קֳדָמוֹהִי מִתְיְהִיב לָנָא תְּקוֹף וּפּוּרְקַן וּמְרוֹמֵם אֱלָהָא תְּקוֹף פּוּרְקָנָנָא: [Targum Jonathan on II Samuel / 22 / 48] אֱלָהָא דַעֲבַד פּוּרְעֲנוּתָא לִי וְתַבַּר עַמְמַיָא דְקַיְימִין לְאַבְאָשָׁא לִי תְּחוֹתָי: [Targum Jonathan on II Samuel / 22 / 49] וּפַרְקִי מִסַנְאַי וְעַל דְקַיְימִין לְאַבְאָשָׁא לִי תַּגְבְּרִינַנִי מִגוֹג וּמִמַשִׁירְיַת עַמְמִין חֲטוּפִין דְעִימֵיהּ תְּשֵׁיזְבִינַנִי: [Targum Jonathan on II Samuel / 22 / 50] עַל כֵּן אוֹדֵי קֳדָמָךְ יְיָ בְּעַמְמַיָא וְלִשְׁמָךְ אֵימַר תּוּשְׁבְּחָן: [Targum Jonathan on II Samuel / 22 / 51] מַסְגֵי לְמֶעְבַּד פּוּרְקַן עִם מַלְכֵּיהּ וְעָבֵד טֵיבוּ לִמְשִׁיחֵיהּ לְדָוִד וּלְזַרְעֵיהּ עַד עַלְמָא:

Study this passage

Prepare a passage questionPassage ID & source details Where did this come from?

Targum Jonathan on II Samuel — 23

[Targum Jonathan on II Samuel / 23 / 1] וְאִילֵין פִּתְגָמֵי נְבוּאַת דָוִד דְאִתְנַבִּי לְסוֹף עַלְמָא לְיוֹסֵי נֶחֱמְתָא דַעֲתִידִין לְמֵיתֵי אֲמַר דָוִד בַּר יִשַׁי וַאֲמַר גַבְרָא דִמְרַבָּא לְמַלְכּוּ מְשִׁיחָא בְּמֵימָר אֱלָהֵיהּ דְיַעֲקֹב וְתַקִין לְמִימְנֵי בְּחֵיךְ מְבוֹסַם תּוּשְׁבַּחְתֵּיהּ דְיִשְׂרָאֵל: [Targum Jonathan on II Samuel / 23 / 2] אֲמַר דָוִד בְּרוּחַ נְבוּאָה דַייָ אֲנָא מְמַלֵיל אִלֵין וּפִתְגָמֵי קוּדְשֵׁיהּ בְּפוּמֵי אֲנָא סָדַר: [Targum Jonathan on II Samuel / 23 / 3] אֲמַר דָוִד אֱלָהָא דְיִשְׂרָאֵל עֲלַי מַלֵיל תַּקִיפָא דְיִשְׂרָאֵל דְשַׁלִיט בִּבְנֵי אֱנָשָׁא קוּשְׁטָא דָאִין אֲמַר לְמַנָאָה לִי מַלְכָּא דְהוּא מְשִׁיחָא דַעֲתִיד דִיקוּם וְיִשְׁלוֹט בִּדְחַלְתָּא דַיָי: [Targum Jonathan on II Samuel / 23 / 4] טוּבֵיכוֹן צַדִיקַיָא עֲבַדְתּוּן לְכוֹן עוֹבָדִין טָבִין דְאַתּוּן עֲתִידִין לְאַנְהָרָא בְּזֵיהוֹר יְקָרֵיהּ כִּנְהוֹר צַפְרָא דְאָזֵיל וְתַקִין וּכְשִׁימְשָׁא דַעֲתִיד לְאַנְהָרָא כְּזֵיהוֹר יְקָרֵיהּ עַל חַד תְּלַת מְאָה אַרְבְּעִין וּתְלָתָא כִּנְהוֹר שִׁבְעַת כּוֹכְבַיָא שִׁבְעַת יוֹמַיָא יַתִּיר מִכְּדֵין תִּתְרַבּוּן וְיֵיטַב לְכוֹן דַהֲוֵיתוֹן מֵחַמְדִין לִשְׁנֵי נֶחָמָתָא דְאַתְיָן הָא כְּאִכָּרָא דִמְסוֹבַר בִּשְׁנֵי בַּצוֹרְתָּא דְיֵחוֹת מִיטְרָא עַל אַרְעָא: [Targum Jonathan on II Samuel / 23 / 5] אֲמַר דָוִד יַתִּירָא מִבְכֵין בֵּיתִי קֳדָם אֵל אֲרֵי קַיָים עֲלָם קַיֵים לִי לְמֶהֱוֵי מַלְכוּתִי קַיָימָא כְּמָא דְקַיָימִין סִידְרֵי בְּרֵאשִׁית וּנְטִירָא לְעַלְמָא דְאָתֵי אֲרֵי כָּל צָרְכִי וְכָל בָּעוּתִי קֳדָמוֹהִי מִתְעַבְּדִין בְּכֵן כָּל מַלְכוּ לְקִבְלֵיהּ עוֹד לָא תִתְקַיֵים: [Targum Jonathan on II Samuel / 23 / 6] וְרַשִׁיעַיָא עָבְדֵי חֶטְאָה דָמָן לְכֻבִּין דִבְמִפַּקְהוֹן רַכִּיכִין לְמִקְטַף וְכַד אֱנַשׁ חַיֵס עֲלֵיהוֹן וְשָׁבֵיק לְהוֹן אָזְלִין וְתַקְפִין עַד דְלֵית אֶפְשַׁר לְמִקְרָב לְהוֹן בְּיָד: [Targum Jonathan on II Samuel / 23 / 7] וְאַף כָּל אֱנַשׁ דִמְשָׁרֵי לְמִיקְרַב בְּחוֹבִין אָזְלִין וְתַקְפִין עֲלוֹהִי עַד דְחָפִין לֵיהּ כַּלְבוּשׁ דְפַרְזְלָא דְלָא יָכְלִין לֵיהּ בַּאָעֵי מוּרְנִין וְרוֹמָחִין בְּכֵין לֵית פּוּרְעֲנוּתְהוֹן בְּיַד אֱנַשׁ אֱלָהֵין בְּאֶשְׁתָּא עֲתִידִין לְאִתּוֹקָדָא יְתּוֹקְדוּן בְּאִתְגְלָאָה בֵּית דִינָא רַבָּא לְמִתַּב עַל כּוּרְסֵי דִינָא לְמֵידַן יַת עַלְמָא: [Targum Jonathan on II Samuel / 23 / 8] אִלֵין שְׁמָהַת גִבָּרַיָא דַהֲווֹ עִם דָוִד גִבָּרָא רֵישׁ מַשְׁרִיתָא יָתֵיב עַל כּוּרְסֵי דִינָא וְכָל נְבִיאַיָא וְסָכַיָא מַקְפִין לֵיהּ מְשִׁיחַ בִּמְשַׁח קוּדְשָׁא בְּחִיר וּמְפַנַק שַׁפִּיר בְּרֵיוֵיהּ וְיָאֵי בְּחֶזְוֵיהּ חַכִּים בְּחוּכְמְתָא וְסוּכְלָתָן בְּעֵצָה גִבַּר בְּגִבָּרוּתָא רֵישׁ גִבָּרַיָא הוּא מְתַקֵן בְּמָנֵי זְיָנָא נְפַק בְפוּם קָלָא וּנְצַח בִּקְרָבָא וּמְתַבֵיב עַל יְדֵי מוּרְנִיתֵיהּ תַּמְנֵי מְאָה קְטִילִין בְּזִמְנָא חֲדָא: [Targum Jonathan on II Samuel / 23 / 9] וּבַתְרוֹהִי אֶלְעָזָר בַּר דוֹדוֹ בַּר אֲחוּהִי בִּתְלָתָא גִבָּרַיָא עִם דָוִד כַּד חֲסִידוּ פְּלִשְׁתָּאֵי וְאִתְכְּנִישׁוּ תַמָן לַאֲגָחָא קְרָבָא וּסְלִיקוּ אֱנַשׁ יִשְׂרָאֵל: [Targum Jonathan on II Samuel / 23 / 10] הוּא קָם וּקְטַל בִּפְלִשְׁתָּאֵי עַד דְלָאִית יְדֵיהּ וְאַדְבִּיקַת יְדֵיהּ עִם חַרְבָּא וַעֲבַד יְיָ פּוּרְקָנָא רַבָּא בְּיוֹמָא הַהוּא וְעַמָא תַּב בַּתְרוֹהִי בְּרַם לַחֲלָצָא קְטִילַיָא: [Targum Jonathan on II Samuel / 23 / 11] וּבַתְרוֹהִי שַׁמָה בַר אָגֵא דְמִן הָרָר טוּרָאָה וְאִתְכְּנִישׁוּ פְלִשְׁתָּאֵי לְחַיָתָא וַהֲוַת תַּמָן אַחֲסָנַת חַקְלָא מַלְיָא טְלוֹפְחִין וְעַמָא אַפֵּךְ מִן קֳדָם פְּלִשְׁתָּאֵי: [Targum Jonathan on II Samuel / 23 / 12] וְאִתְעַתֵּד בְּגוֹ אַחְסַנְתָּא וְשֵׁיזְבֵיהּ וּקְטַל יַת פְּלִשְׁתָּאֵי וַעֲבַד יְיָ פּוּרְקָנָא רַבָּא: [Targum Jonathan on II Samuel / 23 / 13] וּנְחָתוּ תְלָתָא גִבָּרַיָא מִגִבָּרֵי רֵישֵׁי מַשִׁרְיָתָא וַאֲתוֹ לַחֲצָדָא לְוַת דָוִד לִמְעָרַת עֲדֻלָם וּמַשִׁרְיַת פְּלִשְׁתָּאֵי שַׁרְיָא בְּמֵישַׁר גִבָּרַיָא: [Targum Jonathan on II Samuel / 23 / 14] וְדָוִד בְּכֵן בְּחַקְרָא וְאִסְטַרְטִיג פְּלִשְׁתָּאֵי בְּכֵן בְּבֵית לָחֶם: [Targum Jonathan on II Samuel / 23 / 15] וַחֲמֵידַת נַפְשָׁא דְדָוִד וַאֲמַר מַן יַשְׁקִינַנִי מַיָא מִגוֹבָא דְבֵית לֶחֶם דִי בְּתַרְעָא: [Targum Jonathan on II Samuel / 23 / 16] וּבְזָעוּ תְלָתָא גִבָּרַיָא בְּמַשִׁרְיַת פְּלִשְׁתָּאֵי וּמְלוֹ מַיָא מִגוֹבָא דְבֵית לֶחֶם דִבְתַרְעָא וּנְסִיבוּ וְאַיְתִיאוּ לְוַת דָוִד וְלָא אֲבָא לְמִשְׁתֵּיהוֹן וַאֲמַר לְנַסָכָא יַתְהוֹן קֳדָם יְיָ: [Targum Jonathan on II Samuel / 23 / 17] וַאֲמַר חַס לִי מִן קֳדָם יְיָ מִלְמֶעְבַּד דָא הֲדַס גִבָּרַיָא דַאֲזַלוּ בְנַפְשַׁתְהוֹן וְלָא אֲבָא לְמִשְׁתֵּיהוֹן אִלֵין עֲבָדוּ תְּלָתָא גִבָּרַיָא: [Targum Jonathan on II Samuel / 23 / 18] וַאֲבִישַׁי אֲחוּהִי דְיוֹאָב בַּר צְרוּיָה הוּא רֵישׁ גִבָּרַיָא וְהוּא תַבֵּיב יַת מוּרְנִיתֵיהּ עַל תְּלַת מְאָה קְטִילִין וְלֵיהּ שׁוּם בִּתְלָתָא גִבָּרַיָא: [Targum Jonathan on II Samuel / 23 / 19] מִן גִבָּרַיָא הֲוָה יַקִיר וַהֲוָה לְהוֹן לְרַבָּא וְלִתְלַת גִבָּרִין לָא מְטָא: [Targum Jonathan on II Samuel / 23 / 20] וּבְנָיָהוּ בַר יְהוֹיָדָע בַּר גְבַר דָחֵיל חֶטְאִין דִילֵיהּ עוֹבָדִין מִקַבְּצְאֵל הוּא קְטַל יַת תְּרֵין רַבְרְבֵי מוֹאָב וְהוּא נְחַת וּקְטַל יַת אַרְיָא בְּגוֹ גוֹבָא בְּיוֹמָא דְתַלְגָא: [Targum Jonathan on II Samuel / 23 / 21] וְהוּא קְטַל יַת גַבְרָא מִצְרָאָה גְבַר דְחֶזְוָא וּבִידָא דְמִצְרָאָה מוּרְנִיתָא וּנְחַת עֲלוֹהִי בְּחוּטְרָא וַאֲנֵיס יַת מוּרְנִיתָא מִידָא דְמִצְרָאָה וְקַטְלֵיהּ בְּמוּרְנִיתֵיהּ: [Targum Jonathan on II Samuel / 23 / 22] אִלֵין עֲבַד בְּנָיָהוּ בַּר יְהוֹיָדָע וְלֵיהּ שׁוּם בִּתְלָתָא גִבָּרַיָא: [Targum Jonathan on II Samuel / 23 / 23] מִן גִבָּרַיָא יַקִיר וְלִתְלַת גְבוּרָן לָא מְטָא וּמַנְיֵיהּ דָוִד עַל מִשְׁמַעְתֵּיהּ: [Targum Jonathan on II Samuel / 23 / 24] עֲשָׂהאֵל אֲחוֹהִי דְיוֹאָב בְּגִבָּרַיָא אֶלְחָנָן בַּר דוֹדוֹ דְמִבֵּית לָחֶם: [Targum Jonathan on II Samuel / 23 / 25] שַׁמָה דְמִן חֲרוֹד אֱלִיקָא דְמִן חֲרוֹד: [Targum Jonathan on II Samuel / 23 / 26] חֶלֶץ דְמִן פֶּלֶט עִירָא בַּר עִקֵשׁ דְמִתְּקוֹעַ: [Targum Jonathan on II Samuel / 23 / 27] אֲבִיעֶזֶר דְמִן עֲנָתוֹת מְבֻנַי דְמִן חֻשָׁת: [Targum Jonathan on II Samuel / 23 / 28] צַלְמוֹן דְמִן אֲחֹחַ מַהֲרֵי דְמִן נְטוֹפֶת: [Targum Jonathan on II Samuel / 23 / 29] חֵלֶב בַּר בַּעֲנָה דְמִנְטֹפֶת אִתַי בַּר רִיבַי מִגִבְעֲתָא דִבְנֵי בִנְיָמִין: [Targum Jonathan on II Samuel / 23 / 30] בְנָיָהוּ דְמִפִּרָעָתוֹן הִדֵי דְמִנַחֲלֵי גָעַשׁ: [Targum Jonathan on II Samuel / 23 / 31] אֲבִי עַלְבוֹן דְמִן עַרְבָת עַזְמָוֶת דְמִבַּרְחֻם: [Targum Jonathan on II Samuel / 23 / 32] אֶלְיַחְבָּא דְמִשַׁעַלְבוֹן בְּנֵי יָשֵׁן יְהוֹנָתָן: [Targum Jonathan on II Samuel / 23 / 33] שַׁמָה דְמִן הֲרַר טוּרָאָה אֲחִיאָם בַּר שָׁרָר דְמִטוּר גָבוֹהַּ: [Targum Jonathan on II Samuel / 23 / 34] אֶלִיפֶלֶט בַּר אֲחַסְבִּי בַּר מַעֲכָת אֱלִיעָם בַּר אֲחִיתוֹפֶל גִלוֹנָאָה: [Targum Jonathan on II Samuel / 23 / 35] חֶצְרַי דְמִן כַּרְמְלָא פַעֲרַי דְמִן אֲרָב: [Targum Jonathan on II Samuel / 23 / 36] יִגְאָל בַּר נָתָן דְמִצוֹבָה בָּנִי מִשֵׁבֶט גָד: [Targum Jonathan on II Samuel / 23 / 37] צֶלֶק דְמִבְּנֵי עַמוֹן נַחֲרֵי דְמִן בְּאֵרוֹת נָטַל זְיָנֵיהּ דְיוֹאָב בַּר צְרוּיָה: [Targum Jonathan on II Samuel / 23 / 38] עִירָא דְמִן יֶתֶר גָרַב דְמִן יֶתֶר: [Targum Jonathan on II Samuel / 23 / 39] אוּרִיָה חִתָּאָה כָּל גִבָּרַיָא תְלָתִין וּשְׁבָע:

Study this passage

Prepare a passage questionPassage ID & source details Where did this come from?

Targum Jonathan on II Samuel — 24

[Targum Jonathan on II Samuel / 24 / 1] וְאוֹסִיף רוּגְזָא דַייָ לְמִתְקַף בְּיִשְׂרָאֵל וְגָרֵי יַת דָוִד בְּהוֹן לְמֵימַר אֱזִיל מְנֵי יַת יִשְׂרָאֵל וְיַת דְבֵית יְהוּדָה: [Targum Jonathan on II Samuel / 24 / 2] וַאֲמַר מַלְכָּא לְיוֹאָב רַב חֵילָא דְעִמֵיהּ הֲלֵיךְ כְּעַן בְּכָל שִׁבְטָא דְיִשְׂרָאֵל מִדָן וְעַד בְּאֵר שֶׁבַע וּמְנֵי יַת עַמָא וְאִידַע יַת חֻשְׁבַּן עַמָא: [Targum Jonathan on II Samuel / 24 / 3] וַאֲמַר יוֹאָב לְמַלְכָּא וְיוֹסֵף יְיָ אֱלָהָךְ עַל עַמָא כְּאִלֵין וּכְאִלֵין מְאָה זִמְנִין וְעֵינֵי רִבּוֹנִי מַלְכָּא חָזָן וְרִבּוֹנִי מַלְכָּא לְמָא אִתְרְעֵי בְּפִתְגָמָא הָדֵין: [Targum Jonathan on II Samuel / 24 / 4] וּתְקֵיף פִּתְגָמָא דְמַלְכָּא עַל יוֹאָב וְעַל רַבָּנֵי חֵילָא וּנְפַק יוֹאָב וְרַבָּנֵי חֵילָא קֳדָם מַלְכָּא לְמִמְנֵי יַת עַמָא יַת יִשְׂרָאֵל: [Targum Jonathan on II Samuel / 24 / 5] וַעֲבַרוּ יַת יַרְדְנָא וּשְׁרוֹ בַעֲרוֹעֵר דָרוֹם קַרְתָּא דִבְגוֹ נַחְלָא דְשִׁבְטָא גָד וְאֶל יַעְזֵר: [Targum Jonathan on II Samuel / 24 / 6] וַאֲתוֹ לְגִלְעָד וּלְאַרְעָא דָרוֹמָא לְחָדְשִׁי וַאֲתוֹ לְדָן יַעַן וּמִתַּמָן אִסְתְּחַר לְצִידוֹן: [Targum Jonathan on II Samuel / 24 / 7] וַאֲתוֹ לְקִירְוִין כְּרִיכָן וְכָל קִרְוֵי חִוָאֵי וּכְנַעֲנָאֵי וּנְפַקוּ לְדָרוֹם יְהוּדָה לִבְאֵר שָׁבַע: [Targum Jonathan on II Samuel / 24 / 8] וְהֲלִיכוּ בְּכָל אַרְעָא וַאֲתוֹ מִסְיָפֵי תִשְׁעַת יַרְחִין וְעַסְרִין יוֹמִין לִירוּשְׁלֵם: [Targum Jonathan on II Samuel / 24 / 9] וִיהַב יוֹאָב יַת חֻשְׁבַּן מִנְיַן עַמָא לְמַלְכָּא וַהֲווֹ יִשְׂרָאֵל תַּמְנֵי מְאָה אַלְפִין גְבַר גִבַּר שַׁלְפֵי סַיָפָא וֶאֱנַשׁ יְהוּדָה חֲמֵשׁ מְאָה אַלְפִין גַבְרָא: [Targum Jonathan on II Samuel / 24 / 10] וְחַשׁ דָוִד בְּלִבֵּיהּ בָּתַר כֵּן דִמְנָא יַת עַמָא וַאֲמַר דָוִד קֳדָם יְיָ חָבִית לַחֲדָא דַעֲבָדִית הָדָא וּכְעַן יְיָ אַעֲבַּר כְּעַן יַת חוֹבָא דְעַבְדָךְ אֲרֵי אִתְתַּכָּלִית לַחֲדָא: [Targum Jonathan on II Samuel / 24 / 11] וְקָם דָוִד בְּצַפְרָא וּפִתְגַם נְבוּאָה מִן קֳדָם יְיָ הֲוָה עִם גָד נְבִיָא חֶזְוַיָא דְדָוִד לְמֵימָר: [Targum Jonathan on II Samuel / 24 / 12] אֱזִיל וּתְמַלֵיל עִם דָוִד כִּדְנַן אֲמַר יְיָ חֲדָא מִתְּלַת אֲנָא רָמֵי עֲלָךְ בְּחַר לָךְ חַד מִנְהוֹן וְאַעְבֵּד לָךְ: [Targum Jonathan on II Samuel / 24 / 13] וַאֲתָא גָד לְוַת דָוִד וְחַוֵי לֵיהּ וַאֲמַר לֵיהּ הֲתָעוֹל לָךְ שְׁבַע שְׁנִין כַּפְנָא בְּאַרְעָךְ אִם תְּלָתָא יַרְחִין תְּהֵי עָרִיק קֳדָם סַנְאָךְ וְהוּא רָדִיף לָךְ וְאִם מֶהֱוֵה תְּלָתָא יוֹמִין מוֹתָא בְּאַרְעָךְ כְּעַן דַע וַחֲזֵי מָה אֲתִיב שֹׁלְחִי פִּתְגָמָא: [Targum Jonathan on II Samuel / 24 / 14] וַאֲמַר דָוִד לְגָד עָקַת לִי לַחֲדָא נִתְמְסַר כְּעַן בְּיַד מֵימְרָא דַייָ אֲרֵי סַגִיאִין רַחֲמוֹהִי וּבִידָא דֶאֱנָשָׁא לָא אִתְמְסָר: [Targum Jonathan on II Samuel / 24 / 15] וִיהַב יְיָ מוֹתָא בְּיִשְׂרָאֵל מֵעִידַן דְמִתְנְכִיס תְּמִידָא וְעַד דְמִתַּסֵק וּמִית מִן עַמָא מִדָן וְעַד בְּאֵר שֶׁבַע שַׁבְעִין אַלְפִין גַבְרָא: [Targum Jonathan on II Samuel / 24 / 16] וְאוֹשִׁיט יְדֵיהּ מַלְאָכָא לִירוּשְׁלֵם לְחַבָּלוּתָהּ וְתַב יְיָ מִן בִּישְׁתָא וַאֲמַר לְמַלְאָכָא דִמְחַבֵּל בְּעַמָא מִסַת כְּעַן אַגַח יְדָךְ וּמַלְאָכָא דַייָ הֲוָה שָׁרֵי בְּבֵית אִידְרֵי דְאַרְנוֹן יְבוּסָאָה: [Targum Jonathan on II Samuel / 24 / 17] וַאֲמַר דָוִד קֳדָם יְיָ כַּד חֲזָא יַת מַלְאָכָא דְמִקַטֵל בְּעַמָא וַאֲמַר הָא אֲנָא חָבִית וַאֲנָא סְרָחִית וְאִלֵין עַמָא דְאִינוּן כְּעָנָא בְּיַד רַעְיָא מָה עֲבָדוּ תְּהֵי כְּעַן מָחֲתָךְ בִּי וּבְבֵית אַבָּא: [Targum Jonathan on II Samuel / 24 / 18] וַאֲתָא גָד לְוַת דָוִד בְּיוֹמָא הַהוּא וַאֲמַר לֵיהּ סַק אֲקֵים קֳדָם יְיָ מַדְבְּחָא בְּבֵית אִידְרֵי דַאֲרַוָן יְבֻסָאָה: [Targum Jonathan on II Samuel / 24 / 19] וּסְלִיק דָוִד כְּפִתְגָמָא דְגָד כְּמָא דְפַקֵיד יְיָ: [Targum Jonathan on II Samuel / 24 / 20] וְאִסְתְּכִי אֲרַוָן וַחֲזָא יַת מַלְכָּא וְיַת עַבְדוֹהִי עָבְרִין עֲלוֹהִי וּנְפַק אֲרְוָן וּסְגִיד לְמַלְכָּא אַפּוֹהִי עַל אַרְעָא: [Targum Jonathan on II Samuel / 24 / 21] וַאֲמַר אֲרַוָן מָא דֵין אֲתָא רִבּוֹנִי מַלְכָּא לְוַת עַבְדֵיהּ וַאֲמַר דָוִד לְמִזְבַן מִנָךְ יַת בֵּית אִידְרֵי לְמִבְנָא מַדְבְּחָא קֲדָם יְיָ וְיִתְכְּלִי מוֹתָנָא מֵעַל עַמָא: [Targum Jonathan on II Samuel / 24 / 22] וַאֲמַר אֲרַוָן לְדָוִד יִסַב וְיִסַק רִבּוֹנִי מַלְכָּא דְתַקִין בְּעֵינוֹהִי חֲזֵי תּוֹרַיָא דִכְשֵׁרִין לַעֲלָתָא וּמוֹרִיגַיָא וּמָנֵי תוֹרַיָא לְאָעַיָא: [Targum Jonathan on II Samuel / 24 / 23] כֹּלָא יְהַב אֲרַוָן מַלְכָּא לְמַלְכָּא דִי בְעָא מִנֵיהּ מַלְכָּא וַאֲמַר אֲרַוָן לְמַלְכָּא יְיָ אֱלָהָךְ יְקַבֵּיל קוּרְבָּנָךְ בְּרַעֲוָא: [Targum Jonathan on II Samuel / 24 / 24] וַאֲמַר מַלְכָּא לַאֲרַוָן לָא אֲרֵי מִזְבַּן אֶזְבּוּן מִנָךְ בְּדָמִין וְלָא אַסִיק קֳדָם יְיָ אֱלָהָי עֲלַוָן מַגָן וּזְבַן דָוִד יַת בֵּית אִידְרֵי וְיַת תּוֹרַיָא בִּכְסַף סַלְעִין חַמְשִׁין: [Targum Jonathan on II Samuel / 24 / 25] וּבְנָא תַמָן דָוִד מַדְבְּחָא קֳדָם יְיָ וְאַסֵיק עֲלַוָן וְנִכְסַת קוּדְשִׁין וְקַבֵּיל יְיָ צְלוֹת דַיָרֵי אַרְעָא וְאִתְכְּלִי מוֹתָנָא מֵעַל יִשְׂרָאֵל:

Study this passage

Prepare a passage questionPassage ID & source details Where did this come from?

II-Samuel · All reading sections

Choose an edition

Targum Jonathan on the Prophets — PD Aramaic
Available body coverage · arc
21 chapter/reading unit(s) · 380 nonempty passage record(s).
Supported chapters & passages
- Amos · 9 passage record(s)
- Ezekiel · 48 passage record(s)
- Habakkuk · 3 passage record(s)
- Haggai · 2 passage record(s)
- Hosea · 14 passage record(s)
- I-Kings · 22 passage record(s)
- I-Samuel · 31 passage record(s)
- II-Kings · 25 passage record(s)
- II-Samuel · 24 passage record(s)
- Isaiah · 66 passage record(s)
- Jeremiah · 52 passage record(s)
- Joel · 4 passage record(s)
- Jonah · 4 passage record(s)
- Joshua · 24 passage record(s)
- Judges · 21 passage record(s)
- Malachi · 3 passage record(s)
- Micah · 7 passage record(s)
- Nahum · 3 passage record(s)
- Obadiah · 1 passage record(s)
- Zechariah · 14 passage record(s)
- Zephaniah · 3 passage record(s)
Body coverage is separate from textual verification. Counts do not establish complete chapters or textual completeness.

Ask about this passage

About this edition

Targum Jonathan on the Prophets — PD Aramaic

Unverified edition

This reading is in arc. An English translation is not in this library yet.

Reading language: arc · Original language (catalog): Aramaic

Recorded completeness: All 21 acquired exact Prophets book exports, including the Twelve Minor Prophets. This is the Prophets Targum Jonathan, distinct from Pentateuch Pseudo-Jonathan. Actual language Aramaic in Hebrew script, despite upstream he bucket. Actual coverage: 21 exact source components, 380 chapter/section passages, 9296 nonempty original paragraph/verse rows. Reference labels are deterministic paths in the original JSON, not invented missing historical chapter numbers. Reader navigation uses actual source book, tractate or named section labels; source component order is retained in evidence.. Available reading sections are listed below.

Available body coverage · arc

21 chapter/reading unit(s) · 380 nonempty passage record(s).

Supported chapters & passages

Amos · 9 passage record(s)
Ezekiel · 48 passage record(s)
Habakkuk · 3 passage record(s)
Haggai · 2 passage record(s)
Hosea · 14 passage record(s)
I-Kings · 22 passage record(s)
I-Samuel · 31 passage record(s)
II-Kings · 25 passage record(s)
II-Samuel · 24 passage record(s)
Isaiah · 66 passage record(s)
Jeremiah · 52 passage record(s)
Joel · 4 passage record(s)
Jonah · 4 passage record(s)
Joshua · 24 passage record(s)
Judges · 21 passage record(s)
Malachi · 3 passage record(s)
Micah · 7 passage record(s)
Nahum · 3 passage record(s)
Obadiah · 1 passage record(s)
Zechariah · 14 passage record(s)
Zephaniah · 3 passage record(s)

Body coverage is separate from textual verification. Counts do not establish complete chapters or textual completeness.

Classification: Ancient biblical textual witness / translation
Edition type: Text derived from a recorded Edition source
Original language (catalog): Aramaic
Reading language: arc
Recorded publication basis: Public domain (recorded basis)
Governed review state: Unreviewed

Helpful Saints Literal Translation (HSLT) is a word-for-word translation prepared by Helpful Saints. Recorded status: Translation in progress.

Helpful Saints Readable Translation (HSRT) is a clearer reading prepared from the literal translation. It waits until a Helpful Saints literal translation exists.

Edition source: Targum Jonathan on the Prophets — PD Aramaic

Provenance: Unchanged original JSON embedded in explicit multi-source container. Reading body uses deterministic native wp_strip_all_tags, grouped by original parent array/section, with source-path labels and two-LF passage separators. Source component identities and native exact rights are retained. All 21 acquired exact Prophets book exports, including the Twelve Minor Prophets. This is the Prophets Targum Jonathan, distinct from Pentateuch Pseudo-Jonathan. Actual language Aramaic in Hebrew script, despite upstream he bucket. Actual coverage: 21 exact source components, 380 chapter/section passages, 9296 nonempty original paragraph/verse rows. Reference labels are deterministic paths in the original JSON, not invented missing historical chapter numbers. Reader navigation uses actual source book, tractate or named section labels; source component order is retained in evidence.

Recorded rights statement: No further rights statement is recorded in this view.

Attribution: Targum Jonathan on the Prophets — PD Aramaic

License: PUBLIC_DOMAIN

Source attribution and conditions: Exact identified historical public-domain version(s) supplied by Sefaria; full translator/publisher version titles retained in component evidence.

Rights territory and conditions depend on the recorded Edition source; worldwide clearance is not established by this label.

View Edition source

Scripture FirstSources ClassifiedEvidence VisibleCounterpoints PreservedMember Research PrivateAI Never Claims Divine Authority

Evidence Intelligence

Know what kind of evidence you are looking at.

Helpful Saints keeps direct biblical text, language evidence, ancient witnesses, historical context, research models, and open questions visibly distinct.

Primary

Direct Biblical Text

The explicit wording and literary context of canonical Scripture.

Primary Support

Original-Language Evidence

Hebrew, Aramaic, Greek, morphology, lemmas, semantic range, and textual comparison.

Comparative

Ancient Witness

Septuagint, Dead Sea Scrolls, ancient Jewish literature, and early Christian writings—clearly classified.

Contextual

Historical Context

Geography, material culture, chronology ranges, institutions, customs, and reception history.

Interpretive

Research Model

A configured chronology, theological synthesis, typological pattern, or proposed relationship.

Unresolved

Open Question

Evidence is incomplete, debated, or insufficient for a settled conclusion.

Targum Jonathan

Targum Jonathan on II Samuel — 1

Targum Jonathan on II Samuel — 2

Targum Jonathan on II Samuel — 3

Targum Jonathan on II Samuel — 4

Targum Jonathan on II Samuel — 5

Targum Jonathan on II Samuel — 6

Targum Jonathan on II Samuel — 7

Targum Jonathan on II Samuel — 8

Targum Jonathan on II Samuel — 9

Targum Jonathan on II Samuel — 10

Targum Jonathan on II Samuel — 11

Targum Jonathan on II Samuel — 12

Targum Jonathan on II Samuel — 13

Targum Jonathan on II Samuel — 14

Targum Jonathan on II Samuel — 15

Targum Jonathan on II Samuel — 16

Targum Jonathan on II Samuel — 17

Targum Jonathan on II Samuel — 18

Targum Jonathan on II Samuel — 19

Targum Jonathan on II Samuel — 20

Targum Jonathan on II Samuel — 21

Targum Jonathan on II Samuel — 22

Targum Jonathan on II Samuel — 23

Targum Jonathan on II Samuel — 24

Know what kind of evidence you are looking at.

Direct Biblical Text

Original-Language Evidence

Ancient Witness

Historical Context

Research Model

Open Question

Search & explore

Carry your study with you